Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Tellado: "O voto dos galegos foi quen de producir unha reacción en cadea de sensatez"

26 Oct 2016

Santiago de Compostela, 26 de outubro de 2016.- O secretario xeral dos populares galegos, Miguel Tellado, ofreceu hoxe unha rolda de prensa trala decisión de onte do presidente do Partido Popular, Mariano Rajoy, de aceptar o encargo do Rei de someterse a unha nova sesión de investidura unha vez que o PSOE accedeu a absterse nela.


Tellado destacou o papel de Galicia como “verdadeira panca de cambio en España” ao lembrar que, fai un mes, os galegos apostaron pola estabilidade e a gobernabilidade e esa decisión provocou “unha reacción en cadea de sensatez” no conxunto do Estado.


Salientou que “o voto dos galegos valeu dobre” xa que a súa mensaxe “a favor dun goberno estable” e contra “aquelas forzas que apostaban polo bloqueo” non só foi útil para “garantir a estabilidade en Galicia” senón tamén para “permitir o desbloqueo en España”.


O número dous do PPdeG felicitouse porque os dous grandes partidos teñan asumido o mandato electoral que esixía “un plus de responsabilidade” no PSOE e un “plus de xenerosidade” no PP. Pola contra, lamentou a “soberbia” dos deputados da Marea, incapaces de asumir os resultados electorais, que asistirán a unha manifestación rodeando o Congreso “pouco respectuosa co resultado electoral”. “É a reacción esperable nun grupo do que forma parte un deputado que chamou ‘ignorante e alienado’ ao pobo galego por non votar á súa forza política”, apuntou.

 

INVESTIDURA EN GALICIA
Tellado afirmou tamén que en poucos días se producirá un debate de investidura en Galicia na que o presidente Feijóo, aínda con maioría absoluta, acudirá “coa mesma vontade de diálogo e a mesma humildade” que o presidente Rajoy esta tarde.


Preguntouse, asemade, se neste caso os deputados da Marea se quedarán a escoitalo ou “preferirán saír á rúa a berrar”. O secretario xeral do PPdeG dixo esperar que “non decidan tapar o falar calmado de Galicia con berros” e salientou que a verdadeira forma de facer política “para a xente” é dende dentro das institucións e que dende fora, como pretenden Marea e Podemos en Madrid, faise política “para os fotógrafos”.


“Nun mes, España e Galicia deixarán de estar en funcións e haberá dous novos gobernos co mandato lexítimo das urnas para facer progresar o país”, destacou Tellado ao tempo que lembraba as previsións de crecemento económico dadas a coñecer onte. “E detrás desta nova situación estará a forza do pobo galego”, salientou.


O secretario xeral do PPdeG rematou lembrando que “o que demanda a cidadanía é diálogo” e agardando que “os novos tempos da política galega tradúzanse tamén en novas formas que abandonen a crispación”.


COMEZAN AS LIORTAS NO GRUPO DE EN MAREA
O secretario xeral do PPdeG quixo facer referencia tamén aos datos coñecidos sobre a solicitude de medios que o voceiro do grupo parlamentario de En Marea, Luis Villares fixo á coordinadora provisional da súa formación política.


Tellado salientou que a divulgación destes datos supón “o inicio das liortas” no grupo parlamentario e un preludio dun proceso de división semellante ao que viviu o grupo Alternativa Galega de Esquerdas. “Alguén filtrou este escrito coa intención de danar a imaxe de Luis Villares”, constatou Tellado, que recomendou ao voceiro que, ante a traizón dos seus compañeiros, en lugar de solicitar un chofer solicite “un ‘guardaespaldas’”.

Síguenos nas redes sociais