Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Tellado ve ao PPdeG como o único partido “con ilusión, motivación e ganas de servir a Galicia” no vindeiro curso político

25 Ago 2017

O secretario xeral dos populares galegos, Miguel Tellado, lembrou que o partido estará acompañando este domingo ao presidente nacional, Mariano Rajoy, no tradicional acto de apertura curso político. Como xa acontecera o ano pasado, este evento celebrarase na Carballeira de San Xusto, no concello pontevedrés de Cerdedo-Cotobade. Sobre isto, Tellado subliñou que é unha honra acoller un ano máis ao líder popular na súa propia casa.

O número dous do PPdeG quixo lembrar que a situación política mudou desde hai un ano. “En 2016 afrontabamos aquel acto coa incertidume sobre a formación do goberno central, e a poucos días de comezar unha campaña autonómica que máis tarde se revelaría crucial”, apuntou, para valorar que “o 25 de setembro, Galicia falou. E falou para dicir alto e claro que apostaba pola estabilidade e polo rigor. Aquel resultado tamén contribuíu a aclarar o panorama nacional”.

Tellado subliñou que “neste último tramo de 2017, co horizonte político moito máis despexado, desde o Partido Popular afrontamos o vindeiro curso político con máis ganas de traballar polos galegos ca nunca”. Así, quixo valorar que “temos máis motivos ca nunca para facelo”, dada a renovada confianza dos cidadáns, os bos indicadores económicos e a batería de iniciativas que prepara o Goberno para consolidar o crecemento dos nosos sectores fundamentais.

Neste contexto, insistiu en que “o PPdeG tampouco se detén, e seguirá traballando arreo para construír proxectos que ilusionen aos veciños de cada recuncho de Galicia”. Deste xeito, opinou que para conseguir este obxectivo “é fundamental estar a pé de rúa, como estivo o presidente Feijóo durante o verán percorrendo Galicia”; así como continuar co proceso de renovación e a celebración dos congresos, comezando polo de Novas Xeracións, previsto para o 22 e 23 de setembro.

UNHA OPOSICIÓN CENTRADA EN SI MESMA

O secretario xeral comparou a situación do PPdeG, que “afronta os próximos meses con ilusión, con motivación, e cunha vontade de servir a Galicia que hoxe por hoxe non se pode ver en ningunha outra formación da nosa terra”, coa dos principais partidos da oposición, aos que ve “co reloxo parado desde o 25 de setembro” e “centrados nas súas batallas internas”.

En canto ao PSdeG, Tellado explicou que “hai tres candidatos sanchistas cuxo único programa electoral é ver quen representa mellor a política do ‘No es no’”. “Mentres tanto, non teñen ningunha dúbida en acusarse de xogo sucio e de denunciarse publicamente”, incidiu.

Por outra parte, lembrou que as Mareas de Podemos seguirán lideradas por Luís Villares, do que dixo que “todos menos el saben que é un zombi político”, e criticou que os tres alcaldes urbanos do seu partido seguirán máis centrados en derrocalo, despois de ser eles os que o nomearon, ca de gobernar os seus concellos.

Así, o secretario xeral concluíu que “hai un ano, os nosos rivais eran os partidos da oposición, que ameazaban con intentar unirse para desbancar a quen gañase as eleccións. Hoxe, para o PPdeG, os únicos inimigos son o paro, a inestabilidade e os problemas aos que se enfrontan no seu día a día todos os galegos”.

Síguenos nas redes sociais