Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Feijóo cre que “moitos pontevedreses hoxe miran ao Concello e ven un proxecto esgotado cun alcalde canso”

30 Jun 2018

O presidente do Partido Popular de Galicia, Alberto Núñez Feijóo, clausurou este sábado o congreso local da formación en Pontevedra, no que resultou elixido Rafael Domínguez como novo presidente. Feijóo gabou o “compromiso con Pontevedra”, o “espírito emprendedor” e a “fortaleza de carácter” de Domínguez, do que subliñou que “sabe escoitar” e “ten a forza e as enerxías necesarias para afrontar este importante reto”. “Estamos a vivir un día grande para o Partido Popular, pero tamén para Pontevedra”, apuntou, para expresar que este conclave é unha oportunidade para “afrontar con certezas o futuro” e volver a ilusionar á cidade.

Pola contra, o líder dos populares galegos lamentou que “despois de 20 anos, moitos pontevedreses miran hoxe cara á Casa do Concello e ven un proxecto esgotado encabezado por un alcalde canso de escoitar as reclamacións dos veciños e de ter a iniciativa”. “O Goberno local desta cidade preocúpase moito polo chasis, polos acabados e porque Pontevedra teña bos extras, pero ten totalmente desatendido o motor da cidade”, salientou o presidente aludindo á economía da cidade. Neste sentido, amosouse preocupado de que aos autónomos, aos emprendedores e ás empresas pequenas, medianas e grandes “se lles transmiten centos de sinais de que en Pontevedra non son ben recibidos”.

 

Por iso, o presidente explicou que estamos ante unha “oportunidade histórica” para que isto cambie e que “o motor de Pontevedra volva funcionar coa po-tencia de sempre”, polo que pediu unha cidade axeitada para emprender; con capacidade para captar investimentos; onde aos emprendedores non se lles poñan trabas, senón facilidades; e onde as empresas non sexan, por definición, non gratas”.  

 

Neste sentido, Feijóo tamén reivindicou o papel da Xunta nos últimos anos para dinamizar Pontevedra de cara ao futuro, con proxectos xa en marcha como a mellora da intermodalidade entre as estacións da cidade; un investimento de 3 millóns de euros en novas sendas para a comarca; a variante de Alba; o novo edificio xudicial da Parda; a mellora no saneamento da ría de Pontevedra, con varias actuacións previstas; a remodelación da antiga sede da Xunta en Benito Corbal; a futura residencia de maiores, con 120 novas prazas públicas de atención á dependencia; ou o Gran Montecelo, “que deixará a Sanidade pública pontevedresa preparada para atender as necesidades asistenciais das cinco vindeiras décadas”.

 

LEMBRANZA A RAJOY E CRÍTICAS A PEDRO SÁNCHEZ

O líder dos populares galegos tamén quixo acordarse do presidente Mariano Rajoy na súa cidade, do que dixo que “demostrou na súa saída a mesma grandeza que o caracterizou nestes anos no Goberno de España”. Así mesmo, destacou do pontevedrés que cumpriu todos os compromisos que asumiu á fronte do Executivo central.

 

“Éncheme de orgullo pertencer a un partido que sempre antepón os intereses do país aos intereses partidistas”, recalcou, para lamentar que o novo Goberno de Pedro Sánchez “só ten un obxectivo: ser útil aos intereses electorais do Partido Socialista”.

 

Deste xeito, quixo criticar algunha das primeiras decisións que tomou este Executivo, como abrir a porta a novas cesións aos nacionalismos vascos e cataláns, ou pactar con Podemos un cambio en Radiotelevisión Española que lles garanta o seu control.

 

Neste senso apuntou que tanto para Pedro Sánchez como para aqueles que apoiaron a súa moción de censura “unha RTVE plural é aquela que elixe o líder de Podemos”. Ao fío desto lembrou que Pablo Iglesias tíñase marcado como obxectivo “fundamental” facerse co control do ente público e, segundo apuntou Feijoó, “están a piques de acadalo” algo que, dixo, “lamentaría polos miles de profesionais do ente, que non o merecen e teñen dado mostras de facer unha televisión plural do que nos orgullecemos todos os españois”.

Por último, afirmou que fronte a un Rajoy que preferiu “ser ex presidente que pactar en contra dos intereses xerais do país” está Pedro Sánchez, un presidente “sometido ás facturas que nestes intres está empezando a pagar”.

Síguenos nas redes sociais