Feijóo di que "votar BNG será votar ao independentismo catalán e ao peor dos independentismos vascos"

17 Dic 2018

16, decembro, 2018. O presidente dos populares galegos, Alberto Núñez Feijóo, advertiu, esta mañá, que o próximo 26 de maio, votar BNG será votar tamén ao independentismo catalán e ao peor dos independentismos vascos, xa que os candidatos do BNG, sexan de Carballo ou de calquera outro concello, irán en coalición con ERC e Bildu.

Dixo tamén que, do mesmo xeito que non se vai atopar noutro partido o que se busca no Partido Popular –xestión, a defensa da Constitución e unha idea de España e de Galicia-, tampouco se vai encontrar en ningunha outra formación un goberno que goberne. Neste senso, Feijóo contrapuxo a estabilidade de Galicia fronte a incapacidade para gobernar do executivo de Pedro Sánchez, por estar sometido ao ditado de Podemos, ao mandato de quen o apoiou na moción de censura, e en débeda permanente con nacionalistas e independentistas.

 

Para o presidente dos populares galegos, ao igual que acontece en España, tampouco hai goberno naquelas comunidades nas que o socialismo se apoia neses mesmos socios nin tampouco naqueles concellos onde o nacionalismo e o populismo son os que poñen ou quitan alcaldes.

 

Pero si “hai goberno que goberna en Galicia”, indicou o líder do PPdeG, xa que pode desenvolver un proxecto e onde o seu único pacto é cos galegos. Mostra diso son as iniciativas que cada semana se aproban nos Consellos da Xunta; os proxectos que se desenvolven na provincia e no concello e, tamén, a posta en marcha de máis infraestruturas, oportunidades e servizos. Por iso, fixo fincapé en que tanto a Galicia, aos concellos e aos galegos venlle mellor un goberno como o do PPdeG que un desgoberno como o de España. “A maioría dos galegos coincidimos en que canto mellor irían as cousas en España se funcionaran como en Galicia”, sinalou.

 

O VALOR DO PARTIDO POPULAR

Feijóo reivindicou o valor do Partido Popular e amosouse orgulloso de pertencer a el, por ser unha formación que gobernou e superou as dúas crises máis grandes que viviu este país; por contribuír ao progreso e á democracia e por ser clave na transformación de Galicia. “Un partido que sabe conectar coa maioría dos galegos, aberto e que sabe sumar a diferentes persoas e pensamentos entorno a obxectivos que son comúns”, dixo Feijóo, quen destacou tamén a capacidade de “repoñerse a momentos difíciles”, así como saber afrontar unha renovación case sen precedentes.

 

Así, o líder do PPdeG avogou por seguir traballando co listón máis alto, con ilusión e exercendo a vocación de servizo con humildade e buscando o mellor para os galegos. “Sigamos facendo deste Partido Popular o partido que a xente busca e que espera que sexamos”, engadiu.

 

“O PASO ADIANTE” DE AURELIO NÚÑEZ

O líder dos populares galegos agarda que o paso adiante dado por Aurelio Núñez para ser o candidato á Alcaldía de Carballo sexa tamén o paso adiante de todo o concello. Neste senso, destacou que o traballo, as ganas e a ilusión do partido fan que se poida “ir a por todas” neste municipio. “Aurelio está aquí porque non entende a política como acomodo. Está para escoitar, para falar, pero, sobre todo, para facer”, salientou.

 

Feijóo indicou que, xa que os veciños de Carballo son puxanza e o motor de Galicia, o concello non pode seguir estando gobernado pola inercia, senón que ten que avanzar con pasos firmes. Para iso, o PPdeG conta cun proxecto que propón un cambio que substitúa a inercia por pasos adiante, o acomodo por inconformismo, a rutina polas ideas e a pasividade pola acción.

 

Para rematar, sinalou que non hai que elixir entre Carballo, Galicia e España: “Pódese elixir Carballo, Galicia e España”, algo que, tal e como dixo Feijóo, non está nin no nacionalismo, nin en partidos que demostran só quererse a si mesmos e gobernan sometidos ao nacionalismo, nin en partidos que non saben o que é Carballo. “Está –finalizou- no proxecto de Aurelio Núñez e no Partido Popular”.

Síguenos nas redes sociais