Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Feijóo: "Os galegos non lle imos dar un minuto máis na Moncloa a un presidente que non lle preocupou Galicia nin un só minuto"

14 Mar 2019

14, marzo, 2019. “Os galegos non lle imos dar un minuto máis na Moncloa a un presidente do Goberno que non lle preocupou Galicia nin un só minuto do seu tempo”, indicou o presidente dos populares galegos, Alberto Núñez Feijóo, quen dixo que a única preocupación de Pedro Sánchez é el mesmo.

Durante un mitin en Sarria, onde estivo acompañado polo candidato á Alcaldía, José Antonio García, e pola presidenta provincial, Elena Candia, o líder do PPdeG fixo fincapé en que a proposta de Pedro Sánchez é prolongar un goberno que non funcionou para España e que está en permanente débeda co populismo, co nacionalismo e co independentismo. Neste senso, recalcou que os socialistas, en vez de gobernar para todos os españois, só o fan para os seus socios. E é que, tal e como recordou, presentou uns orzamentos xerais que recortaban un 30% os investimentos para Galicia, mentres noutros lugares subían un 60%.

 

O presidente dos populares galegos subliñou que o que propón o líder dos socialistas é darlle continuidade a un goberno moi áxil para a publicidade, pero moi preguiceiro para aportar solucións. Neste punto, Feijóo referiuse á situación de Alcoa e a do sector enerxético e, tamén, á reclamación do Goberno galego para poder empregar o superávit de 2018, que no caso de Galicia son 125 millóns de euros, e poder destinalo así a políticas sociais.

 

Así, incidiu en que o vindeiro de 28 de abril os galegos teñen a oportunidade de poñer fin a un goberno cun presidente que empregou o Falcon para ir de concerto e para visitar 20 países e 16 comunidades autónomas, pero que, pola contra, “non tivo nin un día para visitar Galicia como presidente do Goberno”, pero si para vir pedir o voto nun mitin o pasado fin de semana.

 

O PARTIDO DAS PERSOAS

O líder do PPdeG salientou que o Partido Popular é a única formación que ten un proxecto propio, un equipo e un candidato. Asegurou que “o PP non é un partido grande que pon franquicias despersonalizadas alí onde pode”, senón que nace das persoas que hai en cada pobo, comarca e parroquia de Galicia e España, o que “fai que sexamos un gran partido”.

 

Así, Feijóo remarcou que se os galegos queren que goberne o candidato do Partido Popular, e non outros de forma directa ou indirecta, non se pode dividir o voto. “Só hai unha formula segura: o voto directo ao PP”, porque tal e como apuntou o presidente dos populares galegos, o resto tan só son presuposicións e carambolas. Segundo afirmou, nin a Sarria nin a Galicia nin a España lle vén ben que goberne unha combinación de socialistas, populistas e nacionalistas como o goberno de Pedro Sánchez, ao que se favorece, precisamente, cando se dividen as forzas. Por iso, Feijóo avogou por un goberno estable e un goberno que goberne, como o que se acadou en Galicia tras unir o voto.

Síguenos nas redes sociais