Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Tellado anuncia que Mariano Rajoy estará o martes na provincia de Pontevedra para participar na campaña do PPdeG

01 Nov 2019

1, novembro, 2019. O secretario xeral do PPdeG, Miguel Tellado, anunciou a participación de Mariano Rajoy na campaña para as Eleccións Xerais o vindeiro martes en diferentes actos na provincia de Pontevedra, lembrando que mañá será Pablo Casado quen visite a nosa Comunidade. “Un, na súa etapa de Goberno, fíxoo moito mellor como presidente que Pedro Sánchez; e o outro farao a partir do 10 de novembro se os galegos e os españois lle dan a súa confianza”, salientou.

 

Máis polo miúdo, precisou que o candidato popular á Presidencia estará este sábado en Lalín nun acto con preto de 2.000 persoas “que queren acompañalo na súa carreira electoral”. Pola súa banda, Mariano Rajoy visitará Pontevedra e Vigo, “e en ambos sitios recibirá o agarimo dunha cidadanía que sabe que ten moito peor presidente do Goberno agora que hai dous anos e que Galicia perdeu a un gran aliado na Moncloa o mesmo día no que o gañaron os independentistas, os nacionalistas e os populistas”.

 

Logo de lembrar que os populares galegos levarán a cabo 12 campañas -a que ten que ver coa axenda global de toda a Comunidade, a das catro provincias e a das sete cidades e as súas áreas urbanas- para poder difundir a mensaxe do PP por todos os recunchos de Galicia, incidiu en que “é unha honra contar co presidente Rajoy porque moitos españois hoxe botan de menos o seu sentido común fronte á politica frívola de Pedro Sánchez”.

 

GALICIA, UNHA PRIORIDADE

Ademais, o secretario xeral subliñou que Galicia foi a prioridade absoluta de Mariano Rajoy, recordando que o seu Goberno investía na nosa Comunidade máis do dobre do que lle correspondía por poboación, algo que cambiou coa chegada do socialista á Moncloa, que recortou ese investimento nun 30% “para agradar aos pais intelectuais dos CDR e da Cataluña dos lazos amarelos”.

 

Segundo manifestou, “Cataluña paga a Sánchez con barricadas o diñeiro que lle entregou o seu Executivo a costa dos galegos”, remarcando que isto “xamais pasaría co anterior presidente do Goberno”. “Por iso é un orgullo que Rajoy apoie a este partido no seu reto de sacar aos socialistas e a todos os que os apoiaron naquela vergoñosa moción de censura”, engadiu.

 

A ALTERNATIVA É O PP

Por último, Tellado fixo fincapé en que a situación de extrema complexidade política que vive España non é irremediable, poñendo como exemplo de cumprimento do deber, da responsabilidade e da estabilidade a Galicia. “A nosa Comunidade é a mostra de que a alternativa sólida e clara no Partido Popular é real”, dixo. 

 

Así mesmo, avogou por unir o voto dos que queren que o país volva funcionar e que prefiren o rigor, a eficacia e un Goberno que non teña que deberlle nada ao nacionalismo nin ao independentismo, mantendo que o PP sae a gañar pola economía, o emprego, os traballadores da nosa industria, os servizos públicos e as familias.

Síguenos nas redes sociais