Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Lugo, 10 de xuño de 2016.- O presidente do PPdeG, Alberto Núñez Feijóo, afirmou hoxe que os populares “seguiremos contribuíndo a que o rural galego transmita estabilidade e confianza, xa que ese é o segredo para captar investimentos”.

Así se expresaba o líder do PPdeG na súa visita a Cooperativa Penaval, en Santa Cristina de Román (Lugo), onde estivo acompañado polo presidente do PP local, Jaime Castiñeira, polo cabeza de lista ao Senado José Manuel Barreiro, polo cabeza de lista ao Congreso, Joaquín García Díez, e pola presidenta provincial, Elena Candia. 

Segundo asegurou, non se pode entender a economía galega sen explotacións gandeiras e, precisamente, Cooperativa Penaval, cunha produción anual de 2,3 millóns de litros de leite e unha facturación de 900.000 euros, é un símbolo da forza que ten e seguirá tendo o sector en Galicia.

O SECTOR LÁCTEO, UNHA APOSTA DE FUTURO
O presidente dos populares galegos convidou a entender a nosa gandería en positivo para vela como unha aposta de futuro e para intentar resolver os problemas, empregando a política para achegar solucións, e non para sementar dúbidas nin intentar sacar rédito político da crise do sector.

Neste senso, Feijóo lembrou que, dentro deste contexto internacional, no que o lácteo experimenta unha caída dos prezos como froito da sobreprodución e do descenso da demanda de leite, Galicia mantén datos razoables. Deste xeito, o prezo medio por litro de leite situouse no mes pasado en 27,9 céntimos, unha cifra que supera a media europea, que son 26,6 céntimos por litro. 

Segundo o líder do PPdeG, “o lácteo galego ten futuro sempre que entendemos en positivo e mirando sempre cada adiante”. Ademais, asegurou que “contamos co compromiso de todo o sector: dos gandeiros, da industria e, por suposto, do Goberno galego”.

Con respecto aos gandeiros, Feijóo lembrou que 2.240 deles solicitaron unha axuda no marco do Plan de Mellora, que implica tamén un desembolso pola súa banda: están dispostos a investir porque saben que no día de mañá recollerán os froitos.

Pola súa banda, a industria láctea tamén está comprometida co sector, por iso ten previsto para os vindeiros anos un investimento de 155 millóns de euros para proxectos de transformación e posta en valor do produto.

En canto ao Goberno galego, Feijóo puxo en valor as medidas que está tomando a favor do lácteo, como a liña de axudas directas por valor de 3 millóns de euros para os titulares de explotacións lácteas que teñan dificultades económicas derivadas da súa actividade ou a orde de axudas para apoiar os investimentos que queiran facer as industrias lácteas.

RELEVO XERACIONAL E EMPREGO NO SECTOR
Por outra banda, Feijóo tamén fixo fincapé en que outra das probas máis claras de que o sector lácteo ten futuro é que as granxas están a vivir un relevo xeracional. De feito, 757 mozos e mozas pediron unha axuda para incorporarse a unha actividade agraria neste 2016, máis do triplo das solicitudes que se rexistraron o ano anterior (219).

Así mesmo, lembrou que os datos do desemprego no sector agrícola son esperanzadores: no pasado mes de maio reduciuse nun 1,21% o número de desempregados no sector.

O PPdeG CUMPRE E SEGUIRÁ CUMPRINDO
O presidente do PPdeG incidiu na importancia de seguir traballando a prol do sector lácteo e de explorar novas vías de comercialización para o leite e de reforzo na aposta polos produtos lácteos.

Con respecto a isto, asegurou que o lácteo sempre contará co apoio da Xunta e do PPdeG, que cumpren e seguirán cumprindo con medidas como o plan de Impostos Cero no rural, que xa beneficiou a 1.200 agricultores e gandeiros; coa achega de liquidez ás explotacións, obxectivo ao que xa se destinaron 10 millóns de euros; e coa posta en valor do leite, con actuacións como a promoción da marca Galega 100%. 

Do mesmo xeito, salientou outras medidas importantes que está a implementar o Goberno galego, como a achega de parte dos fondos adicionais que se lograron por cumprir o déficit a axudas para as explotacións con máis dificultades; as axudas para os agricultores e gandeiros afectados polas desfeitas ocasionadas por xabaríns; e as concentracións parcelarias, para rematar as que están en marcha e impulsar outras novas.

Como sinalou Feijóo, algúns recén chegados desde a Complutense de Madrid desexan que o rural galego vaia o peor posible para apañar aquí un puñado de votos, mentres que os populares levan toda a vida a carón dos gandeiros e queren seguir apoiándoos para o que precisen.

A COMISIÓN 1ª APROBA O DITAME DA MODIFICACIÓN DA LEI DE COORDINACIÓN DE POLICÍAS LOCAIS, PASO PREVIO Á SÚA APROBACIÓN DEFINITIVA EN SESIÓN PLENARIA



·    O texto definitivo do ditame incorpora o 45% das emendas presentadas polos grupos da oposición



Santiago, 10 de xuño de 2016.- A Comisión 1ª do Parlamento galego aprobou hoxe o ditame do proxecto de Lei que modifica a Lei 4/2007 de coordinación de policías locais, que permitirá “dotar de seguridade xurídica aos procesos selectivos para a incorporación de novos axentes e evitará a parálise existente na actualidade na convocatoria de prazas nos concellos galegos”, manifestou o deputado do Grupo Popular, Jacobo Moreira.



Na súa intervención, Moreira salientou que coa aprobación do ditame “damos un paso importante a un proxecto que xa viña consensuado desde a Xunta de Galicia tanto coa Comisión de Coordinación de Policías Locais como pola Federación galega de municipios e provincias (Fegamp)”.



“Á maiores, no debate de ponencia, o Grupo Popular incorporou ao texto o 45 por cento das emendas presentadas polos grupos da oposición”, sinalou Moreira. Porén, amosouse sorprendido pola abstención de todos os grupos da oposición.



ASPECTOS SIGNIFICATIVOS



Entre os aspectos significativos deste novo texto lexislativo, o deputado popular sinalou que “vén marcado polo Estatuto Básico do Emprego Público e pola sentenza do Tribunal de Xustiza da Unión Europea que considerou discriminatorio o establecemento dun límite de idade de acceso aos procesos de selección para o persoal dos corpos de Policía Local”.



Ademais, establécese a posibilidade de cooperación entre os concellos que non teñen recursos propios para a implantación da Policía Local. En concreto, indicou que “a partir de agora os concellos vanse poder coordinar para poñer en marcha este servizo sempre que non superen en conxunto a cifra de 40.000 habitantes”.


O PPDEG EXPRESA “O MÁIS PROFUNDO AGARIMO” ÁS FAMILIAS E AMIGOS DAS VÍTIMAS DO ACCIDENTE DE ANGROIS E AVOGA POR “COÑECER CANTO ANTES TODA A VERDADE”



Santiago, 8 de xuño de 2016.- O portavoz de Infraestruturas do Grupo Popular, Jesús Goldar, reiterou hoxe no Parlamento “o máis profundo agarimo aos representantes da Plataforma das vítimas do tren Alvia e a todas as familias e amigos de todas e cada unha das vítimas” e sinalou que “todos os galegos temos o máis grande interese en coñecer canto antes toda a verdade do acontecido naquel triste día para que nunca máis teñamos que sufrir nada semellante”.



Goldar lamentou que o BNG impedira hoxe que o Parlamento galego aprobara solicitar á Comisión Europea que faga público o informe redactado pola Axencia Ferroviaria Europea sobre o accidente de Angrois. Neste sentido, lembrou que a divulgación do informe da Axencia Ferroviaria Europea “debe ser autorizada pola Comisión Europea, que xa comunicou o peche do expediente aberto contra España e a súa intención de non publicar dito informe ata final do presente mes de xuño, para non interferir coa investigación xudicial en curso”.



SEN COMPETENCIAS PARA INVESTIGAR



“En todo caso, a Axencia Ferroviaria Europea xa reiterou en diferentes ocasións que dito informe non aborda a responsabilidade do sinistro, senón a organización das investigacións sobre accidentes ferroviarios”, clarexou Goldar.



Respecto da solicitude de creación dunha comisión de investigación sobre o accidente de Angrois no Parlamento galego, Jesús Goldar reiterou que “as competencias enmateria de ferrocarrís e transportes terrestres que transcorren polo territorio de máis de unha comunidade autónoma recaen de maneira exclusiva e excluínte no Estado”. “Esa ausencia de competencias inhabilita formal e legalmente calquera comisión de investigación que puidera crear un Parlamento autonómico, que deviría baleira de contido porque nada podería investigar ao impedirllo a Lei”, anotou.

 


UNANIMIDADE NO PARLAMENTO DE GALICIA PARA RECLAMAR O REMATE ESTE ANO DA OBRA DO NOVO ACCESO AO PORTO DE BURELA



·    Ademais das melloras evidentes en comunicación, gañarase en seguridade, pois evitará o paso de 146.000 vehículos pesados ao ano polo centro da localidade



·    A concorrencia de dous gobernos populares, en Galicia e en España, permitiu que nos últimos meses a obra acadara o impulso definitivo tras anos de múltiples contratempos



Santiago, 8 de xuño de 2016.- O Pleno do Parlamento de Galicia aprobou esta mañá por unanimidade a iniciativa impulsada polo Grupo Popular na que se insta á Xunta ao remate, neste ano 2016, da obra do novo acceso ao porto de Burela.



Trátase dunha estrada na que o Goberno galego vén de investir preto de 8 millóns de euros, a través da Consellería de Infraestruturas e Vivenda, e que ao longo dos seus 1,26 quilómetros enlazará a Avenida da Mariña coa zona portuaria, á altura da nova lonxa.



INFRAESTRUTURA ESTRATÉXICA



O deputado popular Jose Manuel Balseiro agradeceu o apoio acadado e salientou que “todos os grupos parlamentarios coincidiron en considerar esta infraestrutura como estratéxica polo pulo que suporá para as empresas e particulares que operan nunha das dársenas pesqueiras e comerciais máis importantes do Cantábrico”.



“A gran maioría dos transportes que teñen a súa orixe no porto de Burela son de produtos do mar, peixes e mariscos perecedoiros, polo que mellorar os tempos supón gañar en competitividade e capacidade económica”, dixo Balseiro. Neste sentido, apuntou que, “ademais dunha mellor comunicación, toda a localidade gañará en seguridade pois evitará o paso, inevitable e hoxe obrigado, de 146.000 vehículos pesados ao ano polo centro da localidade”.



MÚLTIPLES CONTRATEMPOS



Balseiro tamén quixo poñer en valor o feito de que a concorrencia de dous gobernos populares, en Galicia e en España, permitiu que nos últimos meses a obra acadara o seu impulso definitivo tras anos de múltiples contratempos.



“Xunta e Goberno central foron quen de desbloquear o trazado, concordar o desvío das liñas de FEVE e elaborar un novo proxecto que superase as dificultades técnicas derivadas da complicada orografía e da necesidade de non provocar un enorme impacto visual e paisaxístico”, explicou Balseiro.



O deputado popular fixo tamén un repaso polos incontables contratempos que afectaron a esta obra e que implicaron unha demora enorme desde que fora proxectada. En concreto, lembrou a paralización xudicial dos traballos pola presentación de distintos recursos que tiveron que resolverse ou a aparición de pegadas arqueolóxicas que precisaron dun plan especial de catalogación e intervención.



Balseiro lembrou que cando o Goberno Feijóo recibiu o proxecto a Xustiza tiña determinado que o trazado decidido polo anterior Goberno bipartito non se correspondía co planeamento municipal vixente, “o que obrigou a empezar practicamente de cero, entre outras cousas, para deseñar un trazado soterrado baixo as vías do tren e, nese senso, salientou o esforzo realizado pola Xunta para mellorar todo o proxecto herdado”.



ASPECTOS TÉCNICOS



Finalmente, desde o portavoz popular repasaron algúns dos principais aspectos técnicos desta obra, que implicou a escavación de preto de 179.000 metros cúbicos de terra e o inminente estendido de mestura bituminosa en quente. A actuación tamén incluíu traballos de restauración e acondicionamento paisaxístico, restauración de patrimonio histórico, drenaxe lonxitudinal e transversal e sinalización horizontal e vertical.



O novo viario beneficiará directamente máis de 9.500 veciños do concello de Burela, e a unha poboación aínda maior debido ao emprego que xera o porto e a afluencia turística que esta localidade ten sobre todo no verán.


O PARLAMENTO APROBA, A INICIATIVA DO GRUPO POPULAR, INSTAR Á XUNTA A IMPULSAR A COMPRA PÚBLICA INNOVADORA



·    O obxectivo é promover a mellora dos servizos públicos e exercer un efecto tractor na innovación do tecido empresarial e nos centros de coñecemento galegos



·    Moisés Blanco salientou que “Galicia foi unha das comunidades autónomas pioneiras en incorporar na súa lexislación e normativa medidas de impulso á compra pública Innovadora”



Santiago, 8 de xuño de 2016.- O Parlamento de Galicia aprobou esta mañá a proposición non de lei do Grupo Popular a través da que se insta á Xunta a impulsar a compra pública innovadora en todas as administracións galegas, como medida para promover a mellora dos servizos públicos e exercer un efecto tractor na innovación do tecido empresarial e nos centros de coñecemento galegos. “Temos que seguir avanzando nunha materia que evoluciona a gran velocidade e conseguir o maior número de fondos posibles, porque se non o facemos nós irán a parar a proxectos doutras autonomías ou estados da Unión Europea”, manifestou o portavoz de Novas Tecnoloxías, Moisés Blanco.



Na súa intervención, Blanco sinalou que a compra pública innovadora “pódese levar a cabo en calquera ámbito ou nivel da administración que desenvolva procesos de contratación, e abrangue desde a actuación máis sinxela ata a utilización de procedementos contractuais máis complexos”.



O portavoz popular salientou que “España é líder en Europa na creación dun ecosistema necesario que favoreza a investigación e a innovación”, e referiuse “ao importante esforzo lexislativo realizado nos últimos anos para facilitar a utilización das compras públicas con solucións innovadoras”. En concreto, citou a inclusión de procedementos de diálogo competitivo na Lei de contratos do sector público e tamén dunha nova modalidade de contrato de colaboración público privada para a compra pública de tecnoloxía innovadora.



“Pero, ademais, Galicia foi unha das comunidades autónomas pioneiras en incorporar na súa lexislación e normativa medidas de impulso á compra pública Innovadora, recollidas no Plan galego de investigación, innovación e crecemento-Plan I2C; na Lei 5/2013, de fomento da investigación e da innovación de Galicia; na Lei 14/2013, de racionalización do sector público autonómico; ou no Plan de mellora da contratación publica 2014-2016”, apuntou.



GALICIA COMO REFERENTE



Moisés Blanco engadiu que “non nos quedamos só na teoría, porque hoxe Galicia constitúe un referente no desenvolvemento de proxectos de compra pública innovadora que conseguiron captar financiamento de fondos Feder e que mesmo, nalgún caso, chegaron a obter o recoñecemento das boas prácticas empregadas”. Neste sentido, citou o Premio estatal á mellor iniciativa innovadora outorgado ao proxecto para implantar un polo tecnolóxico e industrial en Rozas ou o Premio Nacional de Innovación outorgado ao Sergas en 2013.



O portavoz popular considerou “clave a colaboración e o diálogo coas entidades ou organismos públicos que pretendían realizar licitacións mediante procedementos de compra pública innovadora” na consecución de financiamento con fondos Feder. “Froito desta labor, entre 2007 e 2013 conseguiuse cofinanciación para desenvolver proxectos como o Hospital 2050 e InnovaSaúde, do Sergas; LáserPET, da Universidade de Santiago; A-Tempo, da Universidade da Coruña; Táctica, da Universidade de Vigo; ou SmartCity, do Concello de A Coruña; iniciativas que mobilizaron preto de 120 millóns de euros”, dixo.



“Pero, sen lugar a dúbidas, o proxecto estrela que recibiu todos os parabéns e recoñecementos foi a alianza da Xunta con Inaer e Indra para a creación no aeródromo de Rozas dun polo industrial e tecnolóxico de referencia en avións non tripulados para aplicacións civís, unha iniciativa na que a Xunta ampliou a súa aposta inicial de 25 a 40 millóns e se completa con outro de compra pública innovadora no que se investirán 20 millóns en tecnoloxías novas”, indicou. 

Estrasburgo, 8 de junio de 2016.- El eurodiputado popular, Francisco Millán Mon, subrayó la necesidad de que Filipinas continúe sus esfuerzos contra la pesca ilegal, no declarada y no reglamentada; agregando que la Comisión Europea deberá seguir este asunto atentamente.

El político gallego, que participó anoche en un debate en el pleno del Parlamento Europeo sobre la aprobación de un Acuerdo Marco de Partenariado y Cooperación de la Unión Europea con Filipinas, destacó la importancia de los lazos que unen a Filipinas con varios países europeos y la relevancia de este país dentro del ASEAN. 

En esta línea, mencionó que el Acuerdo Marco facilitará la negociación que ya está en marcha del acuerdo de libre comercio entre la Unión Europea y Filipinas. “Este acuerdo”, dijo, “sustituirá a un instrumento unilateral como el SPG+ concedido a Filipinas en diciembre de 2014.”
 


O PPDEG LAMENTA QUE A OPOSICIÓN REXEITE SOLICITAR AO GOBERNO CENTRAL QUE EXPLORE A POSIBILIDADE DE ACADAR UN PACTO POLA EDUCACIÓN



·    Hipólito Fariñas lembrou o principio de acordo asinado por representantes de PP, PSOE, PODEMOS e Ciudadanos na Universidade de Nebrija para a elaboración dun Pacto de Estado pola Educación



Santiago, 7 de xuño de 2016.- O portavoz de Educación do Grupo Popular, Hipólito Fariñas, lamentou que os grupos da oposición rexeitaran esta tarde no Parlamento a súa emenda para que o Goberno central explore a posibilidade de acadar un Pacto pola Educación que consolide a senda de mellora dos indicadores de resultados consecuencia das innovacións pedagóxicas e metodolóxicas postas en marcha nos últimos anos.



Fariñas subliñou que “a sociedade demanda consenso” e neste eido lembrou o principio de acordo asinado recentemente por representantes de PP, PSOE, PODEMOS e Ciudadanos na Universidade de Nebrija para a elaboración dun Pacto de Estado pola Educación.



MENSAXE PEDAGÓXICA



Deste xeito, lamentou que os grupos da oposición impediran que o Parlamento galego “fora o primeiro no que se acadara un consenso unánime arredor da necesidade deste pacto educativo”. “Tratemos de esquecer o que nos separa, que é bastante menos do que nos une, e sexamos responsables para poñernos de acordo e facer algo conxunto polo sistema educativo”, apuntou.



Hipólito Fariñas criticou que os grupos da oposición inciten ao incumprimento das leis, en concreto da LOMCE. “Estamos nunha Cámara lexislativa e debemos velar pola mensaxe pedagóxica que se lle manda aos educandos”, indicou.

PEDRO PUY ASEGURA QUE O CONCERTO ECONÓMICO “NON É RENDIBLE E SERÍA TREMENDAMENTE PREXUDICIAL” PARA GALICIA



·    Estudos realizados sobre a materia afirman que o cupo suporía perdas do 3,8 por cento do PIB para Galicia



·    Puy acusou ao BNG de traer ao Parlamento “un debate fiscal contrario ao que se está debatendo no mundo



Santiago, 7 de xuño de 2016.- O portavoz do Grupo Popular, Pedro Puy, asegurou hoxe que o concerto económico para Galicia que propón o BNG “non é rendible e ademais sería tremendamente prexudicial”, xa que suporía perdas de ingresos aproximadas do 3,8 por cento do PIB. Neste sentido, dixo que “fan as contas da vella, porque comparan o que recada o Estado en Galicia co que a Administración central transfire para pagar os servizos que exerce na Comunidade galega, esquecéndose de todos os servizos que o Estado presta aos galegos, como defensa, Seguridade Social ou obras públicas”.



Na súa intervención na sesión plenaria, Puy explicou que o concerto económico supón que unha comunidade autónoma se financie cos impostos que recada e paga á Administración central unha contía como contraprestación polo que a Administración central realiza nesa comunidade. Neste sentido, indicou que este cupo “non depende do nivel de renda das persoas que residen nesa comunidade autónoma e canto máis rica sexa a comunidade maior será a diferenza que se queda, que practicamente non contribúe á solidariedade nin interpersoal nin interterritorial do conxunto do Estado”.



“O sistema actual garante a equidade interpersoal”, asegurou Pedro Puy. Así, tomou como referencia os datos do INE do ano 2013 en Galicia para comparar o 85,89 por cento da renda bruta por habitante co 91,65 por cento da renda dispoñible bruta dos galegos, é dicir, despois de que o Estado cobre os impostos e dea todo tipo de transferencias e subvencións. “Un seis por cento máis de capacidade de gasto, o que supón que funciona o Estado de Benestar que se basea nun sistema fiscal progresivo de carácter estatal, que redistribúe a renda sacándolle menos a quen menos ten e dándolle máis a quen menos ten e máis o precisa”, sinalou.



Ademais, o portavoz popular lembrou que a Seguridade Social se paga coas cotizacións, aínda que na actualidade “se comece a debater en España que para garantir o futuro das pensións se tire das fontes tributarias”. Lembrou que en Galicia hai unha relación entre contribuínte e cotizante á Seguridade Social do 1,25, lonxe da estabilidade do sistema que estaría no 2,5 e da media de España, que está no 2,2, polo que alertou sobre “os 800.000 pensionistas galegos poden ter nalgún momento dependencia do conxunto fiscal de España, que non é un asunto menor”.



FUNCIONANDO DE XEITO AXEITADO



“O sistema de financiamento de réxime común está funcionando de xeito axeitado para Galicia, que recibe por enriba da media española porque é unha comunidade que en termos de riqueza relativa está por baixo da media do conxunto do Estado”, manifestou.



Pedro Puy recordou que nos estudos sobre extrapolación do cupo para Galicia realizados polo profesor Zubiri “falaba de perdas de ingresos arredor do 3,8 por cento do PIB”, polo que “se Galicia renuncia con este cupo a este ingreso está facendo un negocio moi malo”.



Así mesmo, criticou que os nacionalistas apoien que Cataluña vaia a un pacto fiscal semellante ao do cupo, cando “os cálculos feitos polos profesores Leiceaga e Lago Peñas din que o pacto fiscal que propón Cataluña quitaría a Galicia de 570 a 780 millóns de euros ao ano”.



O portavoz popular acusou ao BNG de traer ao Parlamento “un debate fiscal contrario ao que se está debatendo no mundo: máis equidade, máis orzamento europeo con tributos que redistribúan; máis colaboración internacional na loita contra a fraude; estabilidade da economía e controlar con impostos os movementos do capital”. 


O PARLAMENTO TOMA EN CONSIDERACIÓN A PROPOSICIÓN DE LEI PARA A ACTUALIZACIÓN DO SISTEMA DE TRANSPORTE PÚBLICO DE GALICIA, IMPULSADA POLO GRUPO POPULAR



·    “O obxectivo é que entre todos sexamos quen de poñer unha solución acaída e urxente a un grave problema que pon en serio risco a milleiros de persoas que traballan nun sector fundamental para a economía de Galicia”, sinalou



·    A nova Lei achegará seguridade xurídica aos usuarios, ás empresas que deben prestar o dito servizo público e, por suposto, aos seus traballadores



Santiago, 7 de xuño de 2016.- O Parlamento de Galicia aprobou hoxe a toma en consideración da proposición de Lei de medidas urxentes para a actualización do sistema de transporte público de Galicia, impulsada polo Grupo Popular para asegurar a prestación deste servizo a todos os usuarios con todas as garantías e coa máxima seguridade xurídica para os operadores. O portavoz de Infraestruturas, Jesús Goldar, animou aos grupos da oposición a realizar “aportacións construtivas” na tramitación parlamentaria deste texto lexislativo, “co obxectivo de que entre todos sexamos quen de poñer unha solución acaída e urxente a un grave problema que pon en serio risco a milleiros de persoas que traballan nun sector fundamental para a economía de Galicia”.



Jesús Goldar explicou que esta proposición de lei vén dar resposta á recente sentenza do Tribunal Supremo que anulaba a renovación das concesións de transporte público regular permanente de uso xeral por estrada e o plan de modernización deste servizo. “A consecuencia directa desta sentenza é que dos 145 contratos de transporte interurbano existentes en 2009, só 14 manterían a súa vixencia”, apuntou.



Neste sentido, sinalou que a Xunta de Galicia ten interposto un incidente de nulidade fronte a esta sentenza do Tribunal  Supremo, ao considerar que procedeu a unha valoración da constitucionalidade dunha disposición autonómica de rango legal, a Lei 5/2009, o que está excluído da competencia do citado tribunal.



“O Grupo Popular cre firmemente que este texto achegará seguridade xurídica aos usuarios dos servizos públicos de transporte da competencia da Comunidade Autónoma; ás empresas que deben prestar o dito servizo público e, por suposto, aos seus traballadores”, manifestou. Ademais, dixo que “non só achega a solución adecuada para garantir esta estabilidade, senón que establece mecanismos para afrontar unha intensa modernización do servizo público e a súa plena adaptación ás demandas da sociedade para as próximas décadas”.



PLAN DE TRANSPORTE



Jesús Goldar explicou que a planificación deste novo sistema de transporte público será afrontada polo Plan de Transporte Público de Galicia, que determinará, ordenará e establecerá a oferta de servizos de transporte público da competencia da Xunta e implementará a coordinación da totalidade de servizos de transporte público que se desenvolvan no territorio galego.



Este Plan de Transporte analizará a ordenación do territorio entermos de mobilidade, fixará os modelos de xestión de servizosbaixo demanda das persoas usuarias; e regulará os requisitos básicos que deba cumprir a oferta de transporte público en ámbitos tales como accesibilidade, conectividade territorial, seguridade, interconexións modais e intermodais nos principais nós de conexión.



Así mesmo, establecerá os sistemas de tarificación que resultarán aplicables ao conxunto do sistema de transportes; complementará as condicións básicas de dereitos e obrigas das
persoas usuarias; e garantirá a accesibilidade para o conxunto da poboación.



CONSELLO GALEGO



Os traballos de elaboración e aprobación deste Plan de Transporte non superarán os 21 meses e na elaboración do mesmo está prevista a participación do Consello Galego de Transportes, no que están presentes a administración local, o sector empresarial, as organizacións sindicais, a representación de consumidores e usuarios, a de persoas con discapacitadas e membros doutras ámbitos sectoriais das administracións públicas de Galicia.



Outra das cuestións que destacou Jesús Goldar da nova Lei é a garantía da continuidade do servizo público afectado polo fallo xudicial. “Esta continuidade sería unha oportunidade para manter as liñas de modernización impulsadas na Lei 5/2009, a través da integración dos plans de transporte metropolitano e no modelo de tarifas zonais; a implantación do sistema de axuda á explotación; e o mantemento do compromiso de integrar progresivamente vehículos accesibles a persoas con mobilidade reducida”. 

 

Santiago de Compostela, 6 de xuño de 2016.- O presidente do PPdeG, Alberto Núñez Feijóo, sinalou que non quere para Galicia a irresponsabilidade que houbo en España estes últimos meses senón que quere que volva ao país a responsabilidade que si hai na nosa comunidade.

Segundo indicou, o fracaso que partidos como o PSOE, Ciudadanos, Podemos e os nacionalistas arrastraron a todo o país, ata ter que celebrar uns novos comicios xerais, tamén ten que ser só deles o día das eleccións. 
Así mesmo, apuntou que se os populares fixeran como o resto, hoxe en Galicia estariamos vendo que partidas recortar. Sen embargo, agora o que se fai é elixir en que investimos para solucionar os problemas sociais derivados da crise e para garantir o futuro, xa que aquí houbo a responsabilidade que faltou este tempo en España.
O presidente tamén asumiu que agora non será sinxelo vencer ao hastío merecido contra a política posto que, se en decembro viñamos de catro anos de responsabilidade que levaron ao conxunto do Estado a volver crecer, en xuño vimos de cinco meses de irresponsabilidade que levaron ao bloqueo. Por este motivo salientou que agora é máis urxente que entón que o país despexe o seu futuro.
Ademais, Feijóo apuntou que co PP non hai que escoller entre Galicia e España porque elíxense as dúas, cun candidato galego, Mariano Rajoy, que vai coidar dos intereses da nosa comunidade porque “é un de nós”.
O líder do PPdeG tamén incidiu en que teñen que ser os populares os que se acheguen á xente sendo, ademais, o único partido que demostrou que cumpriu co seu deber.
 
PROXECTO PARA GALICIA
O dirixente, que presidiu esta tarde a primeira Xunta Directa do partido tralo XVI Congreso autonómico, afirmou que os populares teñen un nivel de esixencia maior porque en eles tamén hai un caudal de confianza e esperanza máis grande, así como teñen o listón máis alto por ter a obriga de construír, servir e concretar, sen ser simples comentaristas de tertulias ou de twitter.
No acto, Feijóo agradeceu aos afiliados darlle plena liberdade para propoñer o seu equipo e despois ratificalo nas urnas, asegurando que hai que merecer formar parte do maior órgano do primeiro partido de Galicia, xa que non só é unha honra senón tamén son deberes. Deste xeito, admitiu que hai que exercer cada día por Galicia e por España, sendo dignos representantes dos afiliados, dando o máximo deles mesmos e cumprindo co seu deber.
Nese senso, lembrou que veñen do proceso de Congresos de maior renovación no partido nos últimos anos e falou da capacidade de estar en disposición de só ter que estar pendentes de servir a Galicia sen depender de ninguén. Así, a diferenza entre os populares e o resto de formacións é que eles teñen algo que os une, que é un proxecto para Galicia, mentres os demais autodestrúense.
Así mesmo, incidiu en que no seu Congreso eles falaban do seu compromiso, que é a nosa comunidade, pero nos procesos dos demais adversarios só saben falar de Feijóo.
O presidente tamén puxo en valor a liberdade que permite ao PP servir a Galicia, algo para o que se precisa ter as dúas mans libres e non como lles ocorre ao resto, que teñen as mans atadas ao favor da UPG, Sánchez, Rivera, Iglesias ou das outras forzas das que dependan para pactar.
Pola contra, admitiu que el si é libre como candidato “sen máis debe que Galicia”, e é libre como presidente “sen máis debe que os galegos”.
 
Página 4 de 22

Síguenos nas redes sociais