Utilizamos cookies para asegurar que damos la mejor experiencia al usuario en nuestro sitio web. Si continúa utilizando este sitio asumiremos que está de acuerdo. Más información Política de Cookies

Alberto Núñez Feijóo destacou que a Xunta destinará preto de 20 millóns de euros derivados dos recursos adicionais do cumprimento do déficit para, no rural, mellorar a base territorial das explotacións, contribuír a diversificar as oportunidades e responder a diversas necesidades conxunturais, así como, no eido da pesca, mellorar as infraestruturas portuarias.
 
Máis polo miúdo, Feijóo destacou que nos próximos meses se inxectará unha achega de 4,2 millóns de euros para pechar as concentracións xa moi avanzadas e para decretar novas zonas de reestruturación.
 
Nesta liña, levaranse a cabo varias obras que permitan poñer á disposición dos propietarios as fincas afectadas por distintos procesos de concentración parcelaria, e que facilitarán o acceso a fincas ou a mellora das comunicacións en máis de 36.000 hectáreas, beneficiando en total máis de 25.000 familias. “E, tamén decidimos iniciar os traballos en novas zonas de reestruturación parcelaria, actuando en máis de 8.700 hectáreas, que beneficiarán máis de 3.300 propietarios”, engadiu.
No eido das infraestruturas, o titular da Xunta precisou que a Administración autonómica destinará 4,5 millóns de euros para poñer a punto numerosas infraestruturas nun total de 25 concellos. E, co obxectivo de diversificar as posibilidades no agro, destinarase unha liña de 2,6 millóns de euros para plantar no rural galego preto dun millón de castiñeiros, en case 1.000 hectáreas e beneficiando case 700 familias.
 
En relación ao sector lácteo, o titular da Xunta avanzou a aprobación dunha liña de axudas directas aos titulares das explotacións que teñan dificultades financeiras derivadas da súa actividade. “Estamos a falar dunha achega de 3 millóns de euros para axudar a aquelas granxas que teñan dificultades derivadas dun préstamo vinculado á explotación: que tivera que ser refinanciado, que tivera ampliado o prazo de pago ou o período de carencia, que tivera unha resolución xudicial de execución de hipoteca e que tivera débedas con provedores”, explicou.
 
Co fin de minorar os danos de determinadas especies animais –especialmente o xabaril e o lobo- sobre os cultivos agrícolas, destinaranse ademais 2 millóns de euros a distintos labores de prevención e de axudas aos afectados.
 
E, no tocante ao sector pesqueiro, Feijóo adiantou que a Xunta destinará unha achega de 3 millóns de euros co obxectivo de acometer de xeito inmediato obras de mellora en pantaláns e de mellora da seguridade dos portos.
 
“En definitiva, con esta partida de preto de 20 millóns de euros adquirimos un compromiso adicional co sector primario, destinando recursos para que case 30.000 propietarios poidan ter ordenadas máis de 44.000 hectáreas en concentracións parcelarias; para mellorar infraestruturas rurais en 25 concellos; para axudar a que preto de 700 familias fagan plantacións de case 1 millón de castiñeiros; para dar apoio aos afectados polos danos que ocasionan o xabaril e o lobo; para que as explotacións lácteas con créditos pendentes poidan dispoñer de axudas directas; e para levar a cabo infraestruturas portuarias”, aseverou.
 
Feijóo concluíu afirmando que “este último paquete pecha o reparto inicial dos fondos adicionais que comprometemos pero que non esgotamos na súa totalidade, co afán de poder dispoñer dun colchón de recursos que permita reforzar, se fose necesario, tanto as medidas postas en marcha, como outras que xa estaban incluídas nos orzamentos e posibles continxencias de futuro”.
O presidente do Goberno galego, Alberto Núñez Feijóo, salientou hoxe o aumento nun 25% o número de obradoiros de emprego autonómicos, que pasan de 80 a 100. Esta iniciativa, xunto coas 28 lanzadeiras de emprego que se porán en marcha, axudarán a que 3.600 persoas desempregadas obteñan oportunidades laborais.
 
“Aumentamos a dotación orzamentaria destes dous programas, de 17 millóns de euros a 21 millóns”, dixo o presidente. Deste modo, poderán beneficiarse dos obradoiros de emprego 1.920 persoas, en lugar das 1.300 que se prevían inicialmente. O 20% das súas prazas están reservadas para os beneficiarios da Risga.
 
Estes obradoiros durarán seis meses, durante os cales a Xunta financiará o soldo dos participantes e a súa contribución á Seguridade Social, así como o dos docentes e o dos administrativos que xestionen o proxecto. Pola súa banda, os concellos encargaranse da organización directa dos cursos, a selección dos profesionais que os levarán a cabo e a relación cos participantes. Isto pon de relevancia, tal e como subliñou o presidente, “a importancia da colaboración entre institucións”.
 
No tocante as lanzadeiras de emprego —os antigos programas integrados—, Feijóo afirmou que contarán un orzamento de preto de 3 millóns de euros e beneficiarán a 1.680 persoas. Son programas moi prácticos que tamén contarán cun programa específico para beneficiarios da Risga. Neles subvencionarase 3.000 euros por participante, en lugar dos 2.400 euros dos programas ordinarios.
 
Estas medidas, xunto co programa de formación profesional orientado á Industria 4.0 e as preto de 700 accións formativas que se lanzaron nas últimas semanas —que beneficiarán, en conxunto, a uns 11.000 galegos desocupados—, reforzan a aposta da Xunta por obter “bos datos no eido do emprego”, coma os deste mes de maio.
O presidente do Goberno galego, Alberto Núñez Feijóo, avanzou, tras a reunión do Consello da Xunta, o deseño, xunto co Colexio Oficial de Arquitectos de Galicia (COAG), dunha guía sobre o emprego da cor e dos materiais para acadar unha verdadeira integración paisaxística das edificacións das doce grandes áreas paisaxísticas de Galicia.
 
Máis polo miúdo, Feijóo precisou que a guía será elaborada polo COAG a través dun convenio dotado con algo máis de 163.000 euros, e coa finalidade de establecer unhas directrices técnicas, científicas e obxectivas para a regulación do emprego da cor e os materiais dos revestimentos arquitectónicos nas paisaxes urbanas, periurbanas e rurais. “É dicir, marcar unhas pautas para acadar unha axeitada integración paisaxística e contribuír a unha mellora da calidade dos espazos públicos”, dixo, ao que engadiu que, deste xeito, definiranse os tipos de materiais máis recomendables para os diferentes elementos da construción en base ao territorio onde se van asentar, así como as gamas ou paletas de cores máis congruentes coa contorna na que se vaian empregar.
 
Para conseguilo, inicialmente elaborarase unha análise e diagnose previa en cada unha das doce grandes áreas que establece o xa aprobado Catálogo das paisaxes de Galicia. E, ademais, este proxecto procurará analoxías coa arquitectura popular galega de cada zona, aínda que poderá propoñer novas cores e materiais que harmonicen coa paisaxe.
 
Cómpre salientar tamén que todas as propostas que se recollerán neste documento terán un carácter orientativo e servirán de axuda para que os plans urbanísticos e instrumentos de ordenación poidan concretalas de forma máis detallada para ámbitos territoriais menores.
 
Para levar a cabo esta iniciativa, convocarase un concurso co COAG, que seleccionará seis equipos, traballando cada un deles en dúas das doce grandes áreas paisaxísticas, co obxectivo de contar cun documento a finais deste mesmo ano.
 
Feijóo lembrou que esta non é a primeira guía que se promove desde a Xunta para protexer a paisaxe galega. E, nesta liña lembrou que a Xunta xa impulsou: unha guía de boas prácticas para a intervención nos núcleos rurais; outra destinada aos sistemas praia-duna; e outro documento para a elaboración de estudos de impacto e integración paisaxística; aos que se engade esta cuarta que se suma tamén á Estratexia da Paisaxe.
 
“En definitiva, avanzamos no obxectivo de lograr una verdadeira integración, unha demanda social cada vez máis consolidada” dixo o presidente da Xunta, ao que engadiu que cómpre traballar moito en documentos e estratexias e regulando todo isto cunha lei para que a estratexia e os documentos teñan respaldo legal.
 
Trátase dunha decisión que cualificou de complexa pero considera que calquera Goberno da Xunta a seguirá nos vindeiros anos “porque non poderíamos, en ningún caso, perder o tempo investido con maior intensidade que nunca para poñer a Galicia como se merece".

Vigo, 2 de xuño de 2016.- O secretario xeral do PPdeG, Miguel Tellado, afirmou que tras 31 baixadas consecutivas do paro en Galicia “é evidente que a recuperación económica por fin chegou á rúa”.

O dirixente popular celebrou os datos do paro do pasado mes de maio, onde houbo un descenso no desemprego de 16.517 persoas con respecto a hai un ano, é dicir unha baixada significativa do 7% que se traduce na creación de postos de traballo. 

Así mesmo, salientou que creceu un 1,26% a afiliación á Seguridade Social en relación ao ano pasado, con 11.841 afiliados máis que hai doce meses. En total, levamos 26 meses consecutivos de subidas á afiliación en Galicia dende abril de 2014, uns datos que Tellado cualifica como positivos e que avalan que a recuperación económica “é real”.
 
Para o mandatario cómpre estar satisfeitos posto que o paro baixa en todos os sectores, nas catro provincias e nas sete cidades galegas.
 

Ademais, malia que asegurou que aínda queda moito por facer, puxo en valor todo o traballo realizado nestes últimos meses e que permite que hoxe podamos celebrar estas cifras.

XESTIÓN INEXISTENTE DE CABALLERO EN VIGO

Por outra banda e durante unha rolda de prensa ofrecida en Vigo xunto á portavoz local do PP, Elena Muñoz, Miguel Tellado afirmou que o alcalde de Vigo, Abel Caballero, é un experto en converter “as derrotas en vitorias e as vitorias en derrotas”. Deste xeito asegurou que é difícil facer balance dunha “xestión inexistente cun alcalde que estivo ausente” desde as pasadas eleccións municipais.
 
Tellado salientou que Caballero tivo moitas derrotas ao longo da súa traxectoria, e recordou cando sacou os peores resultados do PSdeG en nas eleccións autonómicas do 97; cando quixo aspirar no 98 a ser secretario xeral do PSOE en Galicia e tivo que retirar a súa candidatura ao non contar cos apoios suficientes; e cando nas súas dúas primeiras eleccións municipais, sendo candidato á Alcaldía, perdeu contra o PP con peores resultados que os seus antecesores. 
 
Así mesmo, o mandatario popular indicou que trala súa primeira vitoria en maio do pasado ano, Caballero non entendeu os resultados como o respaldo da cidadanía e comezou un exercicio de “soberbia política sen precedentes”. Nesta liña, apuntou que o alcalde “corre o perigo de morrer politicamente de éxito”.
 
E é que, segundo indicou Tellado, quixo elixirse en conciencia moral como o líder de facto do PSdeG facendo nunha xira por Galicia; pretendeu apadriñar a un candidato ás primarias socialistas, converténdose  nun auténtico lastre para Méndez Romeu; ou quere encarnar unha estratexia de hexemonía socialista, desprezando aos seus socios da esquerda e esquecéndose que cando el mesmo se presentou ás autonómicas ía en coalición con EU. 
 
“Exerce a política dende a soberbia sen facer autocrítica”, dixo ao tempo que salientaba que, pese a que Caballero cuestiona todos os días a actuación das Mareas en Ferrol, Santiago e A Coruña, non repara en que estas formacións gobernan grazas ao apoio do seu propio partido.
 
Tellado tamén apuntou que a política debe exercerse dende a humildade e que o alcalde de Vigo está na posición contraria. “Vigo é moito máis que Caballero, hai moitos vigueses que non se senten representados polo seu goberno e merecen un respecto”, engadiu.
 
Nese senso, aseverou que o alcalde converteu a súa vitoria electoral nunha derrota para a cidade, xa que a súa xestión non é beneficio dos cidadáns. “Leva dende maio do ano pasado subido nunha nube pero non se da conta de que esa nube xa se evaporou e que agora mesmo xa está en caída libre. Caballero tocou teito e agora só lle queda seguir baixando”, sentenciou.
 

Santiago de Compostela, 1 de xuño de 2016.- O secretario xeral dos populares galegos, Miguel Tellado, anunciou que o PPdeG puxo en marcha a súa maquinaria de cara ás vindeiras eleccións autonómicas e asegurou que xa están traballando nun programa electoral que será “aberto para a nova etapa de consolidación da recuperación económica e da creación do emprego”.

O dirixente reuniuse esta mañá co amplo equipo redactor do programa electoral para as autonómicas e que está formado por representantes do grupo parlamentario, do novo Comité Executivo e por membros do Goberno autonómico.

“Plantexamos elaborar un documento participativo que permita reunirnos con distintos colectivos para recoller propostas de entidades e tamén de persoas a título individual”, apuntou.

Así mesmo, Tellado indicou que pese a que no horizonte máis inmediato está a celebración das eleccións xerais, esa campaña debe circular en paralelo á preparación das autonómicas, non podendo esperar ao 26-X para comezar a configurar a proposta que farán aos galegos e que marcará a folla de ruta de Galicia dende ano 2016 ata o ano 2020.

Nesta liña, engadiu que empregarán a experiencia dun Goberno que ven traballando ao longo dos últimos sete anos para recuperar a situación da nosa comunidade e sacala da crise económica.  “Trátase de establecer as liñas de traballo futuras para consolidar a recuperación que hoxe existe xa en Galicia e seguir avanzado nesa dirección”, indicou.

Ademais, Tellado dixo que o PPdeG ostenta unha dobre responsabilidade, a de representar á xente que os vota defendendo o seu proxecto e a de garantir a estabilidade política e institucional.

“Fronte a estabilidade que ofrece Alberto Núñez Feijóo hai un cúmulo de partidos que non son quen de constituírse de forma individual como unha alternativa de Goberno distinta ao PP”, sentenciou.

Ferrol, 31 de maio de 2016.- O secretario xeral do PPdeG, Miguel Tellado, asegurou que Xoaquín Fernández Leiceaga traballará arreo para conseguir o mesmo obxectivo que tiña hai 20 anos, cando militaba no BNG: facer presidente da Xunta de Galicia a Xosé Manuel Beiras. 
 
O dirixente popular admitía que se o PSOE tivo algunha oportunidade de manterse alleo á influencia das Mareas perdeuna coa vitoria de Leiceaga fronte a José Luis Méndez Romeu nas primarias dos socialistas galegos. Así mesmo, salientou a coherencia política e ética de Romeu, que esta mesma mañá dimitía como portavoz parlamentario do PSdeG. 
 
E é que, segundo o secretario xeral dos PPdeG, os socialistas están agora máis cerca do actual Pablo Iglesias que do Pablo Iglesias que fundou o PSOE. 
 
Neste sentido recordou que en Ferrol gobernan as Mareas pese a que o PP ten o dobre de concelleiros e o dobre de votos. Para Tellado, esta situación será a ruína dos socialistas en Galicia: “Sestayo fixo alcalde a Suárez pero Iglesias non fixo presidente a Sánchez”, apuntaba ao admitir que estes feitos amosan o baixo que está o listón do PSOE na nosa comunidade.
O dirixente po PPdeG tamén asegurou que “estamos na zona cero do populismo e do entreguismo do PSOE ás Mareas”. Así mesmo, apuntou que estes gobernos son os do cambio a peor: “onde antes había gobernos, agora hai desgobernos; onde había xestión, agora hai xestos; e onde antes había estabilidade, agora hai inestabilidade e incertidume”.
 
Tellado indicou que pese a que algúns dicían que as maiorías eran malas, agora demostrouse que os gobernos en minoría son moito peores. Nesta liña fixo fincapé en que os rexedores de Ferrol, Santiago e A Coruña amosaron a súa total falta de diálogo e medo a tomar decisións. “Prefiren non actuar con tal de non decidir”, engadiu o dirixente ao tempo que aseguraba que son gobernos ególatras onde está instalada a frivolidade política.
 
“Teñen abandonado a planificación, carecen de proxecto de cidade e as súas prioridades políticas non coinciden coas preocupacións do cidadáns”, aseverou mentres lembraba que o alcalde de Ferrol, Jorge Suárez, está máis preocupado por retirar busto do rei emérito da fachada do Concello, por realizar unha consulta sobre a forma do Estado ou por quitar as axudas da Semana Santa; que pola creación de emprego.
 
No tocante a Coruña, indicou que Xulio Ferreiro tamén está centrado en criticar a Inditex mentres é incapaz de retirar as vallas que permiten a circulación do tráfico no túnel da Marina ou precisa ata de cinco votacións para aprobar unha modificación de crédito.
 
Con respecto a Santiago, Tellado salientou que Martiño Noriega é incapaz de tapar as fochancas da cidade, non é quen de licitar a xestión do servizo de comedores que dependen do Concello, e despreza as crenzas relixiosas da maioría da cidadanía. Nesta liña, condenou como da as costas á Catedral, que fomenta o turismo na urbe, “parapetándose nunha falsa laicidade que é sinal evidente do seu sectarismo sen límites”. 
 
Para o secretario xeral do PPdeG, “gañou o candidato oficialista, que vai permitir a Besteiro seguir sendo a man que mece o berce do socialismo desde a sala de espera dos xulgados”
 
Miguel Tellado afirma que “o PSdeG converteuse nun bipartito en si mesmo en Galicia” logo da celebración das primarias 
 
“O gran derrotado destas primarias é Abel Caballero. O seu liderado quedou totalmente roto e agora non hai dinoseto que repare a súa honra despois desta debacle que sufriu”
 
Santiago, 29 de maio de 2016.- O secretario xeral do Partido Popular de Galicia, Miguel Tellado, afirmou  hoxe en Ferrol que “o Partido Socialista converteuse nun bipartito en si mesmo en Galicia” logo da celebración das primarias. “Onte gañou Leiceaga, o candidato oficialista bendicido por Pedro Sánchez e que vai permitir que Besteiro poida seguir sendo a man que mece o berce do socialismo galego dende a sala de espera dos xulgados de Lugo”, manifestou.
 
Tellado afirmou que o resultado das primarias “constata a división e fractura interna do PSdeG” e apuntou que os socialistas galegos atoparon un camicace para presentar ás eleccións galegas e que supere o peor resultado da historia dos socialistas galegos nunha convocatoria electoral autonómica en Galicia, que ata agora ostentaba Caballero”.
 
“O gran derrotado destas primarias é Abel Caballero. O seu liderado quedou totalmente roto e agora non hai dinoseto que repare a súa honra despois desta debacle que sufriu nas primarias socialistas”, indicou. 
 
RETO: HIPOTÉTICO VICEPRESIDENTE DE BEIRAS
 
O secretario xeral do PPdeG apuntou que “o maior reto político de Leiceaga será agora ser hipotético vicepresidente de un hipotético goberno presidido por Beiras”. Neste sentido, lembrou que nestas primarias dos socialistas galegos “un  candidato quería pactar con Podemos e outro non, e ganou o que estaría disposto a facer presidente a Iglesias en España e a Beiras en Galicia”.
 
“Esta é a deriva na que se atopa sumido o Partido Socialista en Galicia, que tivo que buscar nun ex dirixente do BNG ao seu próximo candidato ás autonómicas”, manifestou Miguel Tellado. Deste xeito, ironizou con que “Leiceaga podería protagonizar un remake da película Regreso ao futuro, pero habería que cambiarlle o título e chamarlle Regreso ao pasado. 
 
Para rematar, Tellado criticou que “aos socialistas galegos non lles importa Galicia e non teñen nada que ofrecer en Galicia, están a outra cousa, e por iso aos galegos non lles importou nada estas primarias”.
 
O secretario xeral do PPdeG participou esta mañá na clausura da convención de concelleiros da provincia de Pontevedra
 
Miguel Tellado asegura que “o ganador das primarias do PSOE en Galicia será a Marea” 
 
“Á única militancia á que teñen ilusionado con este proceso é a do PP, que vai traballar con máis intensidade para que este tipo de espectáculos queden circunscritos á vida interna dalgúns partidos, pero que non cheguen nunca á Xunta”, sinalou
 
Moraña, 28 de maio de 2016.- O secretario xeral do PPdeG, Miguel Tellado, asegurou esta mañá en Moraña que “o ganador das primarias do Partido Socialista en Galicia será a Marea”. “Son primarias a vicepresidente dunha Galicia na que Feijóo perda a maioría absoluta e Beiras sexa presidente”, afirmou.
 
No acto de clausura da Convención de concelleiros da provincia de Pontevedra, Tellado indicou que “hoxe acaba o reality televisado do Partido Socialista en Galicia”. Neste sentido, apuntou que “levamos semanas de puñaladas retransmitidas no seo do PSdeG, puñaladas nunha loita entre quen quere quedarse e quen quere volver”. 
 
“Á única militancia á que teñen ilusionado con este proceso é a do Partido Popular, que vai traballar con máis intensidade para que este tipo de espectáculos queden circunscritos á vida interna dalgúns partidos, pero que non cheguen nunca á Xunta”, sinalou.
 
ESCENARIO POLÍTICO
 
Miguel Tellado explicou que “o escenario é o seguinte: o PSdeG, en plena guerra civil; Beiras, pelexando con Podemos e IU por un sitio na foto; Ciudadanos, ensinando que na Cataluña da que veñen primarias significa dedazo; e o BNG, clamando de novo pola independencia, recuperando as súas siglas sen recuperar os seus votos”.
 
Por este motivo, sinalou que “ou traballamos todos os que formamos parte da familia do Partido Popular en Galicia ou isto é que nos vén”. “Ademais de traballar para que non cheguen eles, pídovos que nos axudedes a seguir elevando o PIB logo de oito meses consecutivos de subida; a que se siga incrementando o turismo e baixando o paro; a que sigamos facendo coches, barcos e avións, e crecendo por terra, mar e aire. En definitiva, a que Galicia manteña o respecto deste país máis aló do Padornelo”, manifestou.
 
DOUS TIPOS DE XUVENTUDE
 
O secretario xeral do PPdeG referiuse aos mozos e mozas presentes no acto e asegurou que “vós sodes a resposta aos que din que a xuventude non é do PP, aos que pretenden patrimonializar aos máis novos”. Neste sentido, alertou de que “aspiran a unha xuventude de pensamento único, a espertar nela unha conciencia crítica, pero só cara aos demais”.
 
“Para eles, hai dous tipos de xuventude: a que os apoia nos seus paseos con Otegi e cando van pedir a paga a papa Maduro, e os que non o fan e entón merecen ese sambenito de facha”, lamentou.
 
Tellado referiuse, por último, “aos que se queixan de que Feijóo viaxe a Cuba para traballar. Son os mesmos que apoiaban que á illa se fora a tomar mojitos coa carteira de todos os galegos. Era a época do bipartito e o único que nos separa de volver a aqueles tempos é o apoio de todos os galegos ao PP”.
 

Santiago de Compostela, 27 de maio de 2016.- A coordinadora interparlamentaria do PPdeG, Paula Prado, asegurou que os alcaldes das Mareas son “os curandeiros da política” e explicou que, tras prometer recetas máxicas imposibles de levar a cabo para resolver os problemas dos cidadáns, agora están perdendo efecto e a xente empeza a decepcionarse ao ver que amosan a peor cara da vella política. 

Nesta liña, lembrou que se acaba de cumprir un ano da entrada de partidos radicais nas institucións locais e autonómicas e que, en Galicia, observamos como son incapaces de xestionar cousas tan básicas como un concurso de Comedores escolares, un problema de contaminación da auga do seu Concello, ou mesmo tapar as fochancas das estradas e arranxar as baldosas das beirarrúas. 

Paula Prado afirmou tamén que as Mareas incumpriron sistematicamente as súas promesas electorais e fan o contrario do que dixeron. Así, indicou que, se ben antes dicían que había que sacar ás empresas das institucións públicas porque eran nichos de corrupción e había que municipalizar servizos, o único que foron quen de levar a cabo foi a externalización da democracia. Nese sentido puxo como exemplo o acontecido no concello de Santiago, onde se contratou unha empresa para facer os orzamentos participativos, gastando nesta contratación 18.000 dos 100.000 euros do presuposto de Xuventude.

Ademais, salientou as dificultades de moitos concellos para sacar adiante os orzamentos, que en moitos casos están prorrogados ou aprobados na metade do exercicio en curso. Tal e como admitiu, esta inestabilidade nas contas municipais tamén se observa na economía en xeral, vendo como “a economía naufraga entre as mareas vivas”.

“Vemos moito postureo e pouca responsabilidade política”, dicía ao tempo que aseveraba que se puxeron en marcha moitas medidas absurdas ou que non afectan a unha mellora dos problemas ou do benestar das familias. 

Por outra banda, Prado tamén avanzou que, nestas primeiras semanas tralo VXI Congreso autonómico do PPdeG, estanse a poñer en marcha as Oficinas Parlamentarias dos deputados e senadores galegos nos seus respectivos territorios.

Así, na provincia da Coruña xa están funcionando ao 100% as nove Oficinas Parlamentarias -Coruña, Betanzos, Santiago, Ordes, Ferrol, Narón, Ribeira, Noia e Carballo- e, segundo indicou, a idea e que tamén se empece a poñer en marcha este formato no resto de provincias. O obxectivo será atender as inquedanzas de calquera persoa que se achegue a estas sedes.

 

Santiago de Compostela, 27 de maio de 2016.- A coordinadora interparlamentaria do PPdeG, Paula Prado, asegurou que os alcaldes das Mareas son “os curandeiros da política” e explicou que, tras prometer recetas máxicas imposibles de levar a cabo para resolver os problemas dos cidadáns, agora están perdendo efecto e a xente empeza a decepcionarse ao ver que amosan a peor cara da vella política.

Nesta liña, lembrou que se acaba de cumprir un ano da entrada de partidos radicais nas institucións locais e autonómicas e que, en Galicia, observamos como son incapaces de xestionar cousas tan básicas como un concurso de Comedores escolares, un problema de contaminación da auga do seu Concello, ou mesmo tapar as fochancas das estradas e arranxar as baldosas das beirarrúas.

Paula Prado afirmou tamén que as Mareas incumpriron sistematicamente as súas promesas electorais e fan o contrario do que dixeron. Así, indicou que, se ben antes dicían que había que sacar ás empresas das institucións públicas porque eran nichos de corrupción e había que municipalizar servizos, o único que foron quen de levar a cabo foi a externalización da democracia. Nese sentido puxo como exemplo o acontecido no concello de Santiago, onde se contratou unha empresa para facer os orzamentos participativos, gastando nesta contratación 18.000 dos 100.000 euros do presuposto de Xuventude.

Ademais, salientou as dificultades de moitos concellos para sacar adiante os orzamentos, que en moitos casos están prorrogados ou aprobados na metade do exercicio en curso. Tal e como admitiu, esta inestabilidade nas contas municipais tamén se observa na economía en xeral, vendo como “a economía naufraga entre as mareas vivas”.

“Vemos moito postureo e pouca responsabilidade política”, dicía ao tempo que aseveraba que se puxeron en marcha moitas medidas absurdas ou que non afectan a unha mellora dos problemas ou do benestar das familias. 

Por outra banda, Prado tamén avanzou que, nestas primeiras semanas tralo XVI Congreso autonómico do PPdeG, estanse a poñer en marcha as Oficinas Parlamentarias dos deputados e senadores galegos nos seus respectivos territorios.

Así, na provincia da Coruña xa están funcionando ao 100% as nove Oficinas Parlamentarias -Coruña, Betanzos, Santiago, Ordes, Ferrol, Narón, Ribeira, Noia e Carballo- e, segundo indicou, a idea e que tamén se empece a poñer en marcha este formato no resto de provincias. O obxectivo será atender as inquedanzas de calquera persoa que se achegue a estas sedes.
 
Página 5 de 22

Síguenos nas redes sociais