O PPdeG critica a falta de compromiso e as contradicións do PSOE coa transferencia da AP-9

O Partido Popular de Galicia critica a falta de compromiso e as contradicións do PSOE no que se refire á transferencia da AP-9 logo de que hoxe os socialistas optaran por absterse na votación dunha iniciativa no Congreso na que se demandaba, precisamente, a supresión das peaxes e o impulso da transferencia desta autoestrada.

A moción que se votou esta mañá na Cámara Baixa insta ao Goberno de España a iniciar os trámites para a anulación da prórroga outorgada á concesionaria da AP-9, a asunción da xestión directa da autoestrada, a supresión das peaxes e o impulso da súa transferencia a Galicia. Así mesmo, demándaselle un estudo das vías xurídicas para a anulación da prórroga e unha avaliación dos custos económicos que tería para o Estado a asunción directa desta infraestrutura.

Grazas á maioría parlamentaria do Partido Popular e a pesar da abstención do PSOE –que se aliñou nesta postura cos seus socios de Junts e PNV– e o único voto en contra de VOX, esta iniciativa puido saír adiante na mesma semana na que o Congreso aprobou a toma en consideración da proposición de lei do Parlamento de Galicia para a transferencia da AP-9.

Neste sentido, o deputado galego e vicepresidente segundo da Comisión de Transportes e Mobilidade Sostible do Congreso, Celso Delgado, sostén que é necesario reverter a actual situación na que a empresa concesionaria está obtendo beneficios a costa de que os galegos paguen unhas peaxes demasiado elevadas.

“A única maneira de que poidamos sacar isto adiante é con intelixencia, con prudencia, analizando a viabilidade das súas consecuencias xurídicas e económicas, pero sen renunciar no obxectivo final: que a cidadanía galega poida circular de balde por unha infraestrutura que durante anos pagaron a un prezo desorbitado”.

Sobre o cambio de postura do PSOE, que hoxe se abstivo a unha iniciativa que –logo dunha emenda presentada polo PP– recolle os mesmos acordos que a que apoiaron no Parlamento galego, o deputado popular critica que os socialistas “digan unha cousa en Santiago e voten a contraria en Madrid” e que se limiten a afondar nun sistema de bonificacións que resulta insuficiente.

“Non ten sentido que se pretenda reducir todo a continuar co sistema de bonificacións cando o propio líder do PSOE en Galicia, e de conformidade con Pedro Sánchez, comprometía a gratuidade da AP-9 en campaña electoral”, explica Delgado recordando ademais o “boicot” á tramitación desta demanda no Congreso por parte do Goberno durante a pasada lexislatura.

A pesar dos cambios de opinión do socialismo, os populares comprometen así que farán todo o posible para que “os anhelos dos galegos e galegas non queden unha vez máis en dique seco” e que, dunha vez por todas, se faga realidade “unha AP-9 100% galega e libre de cargas”.

O PPdeG celebra o peche dun ciclo electoral de éxitos: “Rematamos un gran ano con 4 eleccións e 4 grandes triunfos”

O Partido Popular de Galicia celebra o remate dun ciclo electoral con catro eleccións e catro grandes triunfos, que se materializou nunhas cifras que ratifican o bo momento do partido: case 2 millóns e medio de votos, 151 alcaldes e alcaldesas, 1.775 concelleiros e concelleiras, 13 deputados nacionais, 14 senadores, 40 deputados autonómicos, o Goberno de Galicia e, desde o pasado domingo, dous eurodeputados en Bruxelas.

Nunha rolda de prensa ofrecida na sede autonómica do partido, a secretaria xeral Paula Prado contrapuxo así a estabilidade e o sentidiño polos que optaron os galegas e galegas ao longo deste ano fronte ao balance que presenta a oposición: “Un BNG que non deixou de enganar, unha Ana Pontón que segue perdendo eleccións, un PSOE que non cesou nas súas liortas internas e unha Yolanda Díaz que segue destruíndo partidos”.

“Elección tras elección demostramos que, cando se lle pregunta aos galegos e galegas nas urnas, somos a súa resposta”, engadiu facendo referencia ao lema de campaña dos recentes comicios europeos nos que “Galicia volveu pedirlle a España e a toda Europa responsabilidade, bo goberno e progreso”.

Todo o contrario, asegurou, do que exemplifica o PSOE e o que significa o Goberno de Sánchez, que “volveu tirar de trilerismo lexislativo para presentar a Lei de Amnistía xusto despois das eleccións”. De aí que Paula Prado non dubidase en afirmar que “Sánchez debe rematar máis pronto que tarde unha lexislatura que nunca debeu empezar”.

Centrándose no PSdeG, a secretaria xeral dos populares galegos afeoulles o “papelón” de ter que escoller entre “seguir apoiando a estafa a Galicia ou apostar polo futuro da nosa Comunidade”. Dúas cousas que “xa se demostrou que son incompatibles”.

O ESCANO GALEGO DO BNG CONVERTEUSE NUN ENGANO GALEGO

“As opcións nacionalistas e identitarias que triunfan noutros lugares non o fan aquí porque somos galegos, españois e europeos. Sen tensións nin disxuntivas”, manifestou Prado referíndose a un BNG que, na súa opinión, “adiantou as rebaixas de verán cun desconto dos seus votos á metade respecto ás autonómicas e un desconto no tempo de uso dun escano medio galego, medio catalán”.

Acusou neste sentido ao Bloque de “estafar” reiteradamente aos galegos logo de “mentir sobre o seu programa nas eleccións autonómicas, ocultar aos seus socios de papeleta durante a campaña das europeas e esconder o seu reparto de tempos co independentismo catalán”. Por todo isto, concluíu, Ana Miranda “non merece” representar a Galicia no Parlamento Europeo: “O seu escano galego converteuse nun engano galego”.

O PARTIDO CON MÁIS CONCELLEIRAS E MÁIS ALCALDESAS

A secretaria xeral do PPdeG anunciou tamén que esta fin de semana celebrarase na Cidade da Cultura un acto no que se reunirá a concelleiras do partido en toda Galicia para reivindicar que “somos o patido con máis concelleiras (700) e máis alcaldesas (29) de Galicia”.

O acto será inaugurado polo presidente Alfonso Rueda e as concelleiras protagonizarán unha mesa redonda sobre o traballo que “as fixo protagonistas da vitoria do PPdeG nas municipais”. “Xuntas celebraremos os catro triunfos electorais e seguiremos escribindo, tamén en feminino, a historia de Galicia”, concluíu.