O Grupo Popular lamenta que a deficiente xestión municipal do Concello de Ourense impida levar adiante proxectos como a construción dun novo centro multiusos

O portavoz de Deportes do Grupo Popular, Pablo Prieto, afirmou hoxe no Parlamento galego que “para que un proxecto de gran envergadura sexa unha realidade, como é a construción dun centro multiusos na cidade de Ourense, ten que facerse coa colaboración de diferentes administracións, unha cuestión imposible de levar adiante nesta cidade porque existen problemas importantes derivados da deficiente xestión municipal, como é a falta de Plan Xeral de Ordenación Municipal ou de orzamentos aprobados”.

No debate celebrado esta mañá sobre a posible construción dun novo polideportivo na cidade de Ourense, Pablo Prieto lembrou que “a Xunta está sempre aberta a estudar a posibilidade de acometer as actuacións que, no ámbito das instalacións e equipamentos deportivos, sexan necesarios e demandados polo tecido deportivo”.

ESFORZO INVERSOR

Neste sentido, lembrou que a Xunta ten realizado “un importante esforzo inversor na cidade e na provincia de Ourense nos últimos anos na dotación de infraestruturas deportivas, como a pista cuberta de atletismo de Expoourense, a reforma integral do pavillón dos Remedios, a remodelación das instalacións e do céspede do Couto ou o complexo deportivo e parque acuático de Monterrei, en Pereito de Aguiar”. En total, lévanse investidos nestas actuacións máis de 17 millóns de euros nos últimos sete anos.

Porén, o portavoz popular lamentou que “a realidade a día de hoxe é que no concello de Ourense existen importantes problemas pola mala xestión municipal para levar adiante o proxecto dun novo multiusos”, dada a ausencia de Plan Xeral de Ordenación Municipal e de orzamentos aprobados.

En concreto, Pablo Prieto lembrou que a remodelación integral do Pavillón dos Remedios, que estaba previsto fora cofinanciada entre a Xunta e o Concello de Ourense, finalmente foi a Administración galega a que tivo que facer fronte á totalidade do proxecto, “dado que o Concello non tiña nin ten orzamentos aprobados e a lei impedía levar adiante o convenio asinado para esta obra”.

O PPdeG destaca o incremento nun 228% das prazas nas escolas infantís da Costa da Morte grazas ao Goberno galego

A portavoz de Asuntos Sociais do Grupo Popular, Raquel Arias, salientou hoxe no Parlamento galego que a Xunta do Partido Popular incrementou nun 228 por cento o número de prazas en escolas infantís na Costa da Morte respecto ás existentes durante o Goberno bipartito de BNG e PSdeG. “Ademais, estas escolas infantís, do mesmo xeito que acontece en toda Galicia, son gratis para todas as familias, independentemente de onde vivan, do número de fillos que teñan e da titularidade da escola infantil escollida”, engadiu.

Raquel Arias concretou que nos últimos anos creáronse ou incrementáronse o número de prazas en escolas infantís nos concellos de Zas (pasou de 30 a 41 prazas), Ponteceso (ampliación de 41 a 61 prazas), Carnota (41 prazas), Fisterra (41 prazas), Mazaricos (41 prazas) e Malpica (41 prazas), ademais de manter as xa existentes en Muxía (20 prazas) e Camariñas (61 prazas). “En total, sumando estas escolas infantís  dependentes da Xunta xunto coas municipais, son 492 prazas totalmente gratuítas para as familias, gracias ao financiamento do Goberno galego”, incidiu.

GALICIA LIDERA A TAXA DE COBERTURA

Así mesmo, a portavoz popular explicou que o Diario Oficial de Galicia xa publicou o pasado día 30 de agosto a orde para que os concellos soliciten o financiamento para a gratuidade das escolas infantís municipais. “Son 7,7 millóns de euros para garantir, un ano máis, a aplicación desta medida en arredor de 7.300 prazas para nenos de 0 a 3 anos nos 140 centros que dependen dos concellos”, dixo.

“Galicia é a primeira comunidade autónoma coas escolas infantís gratis de 0 a 3 anos, liderando a taxa de cobertura con máis do 56 por cento, 12 puntos por enriba da media estatal”, manifestou Raquel Arias. Para iso, a Xunta destina cada ano 60 millóns de euros de fondos propios, polo que insistiu que “seguiremos a reclamar que o Goberno central achegue financiamento ás comunidades autónomas para establecer esta gratuidade, como leva repetido reiteradamente”.

Os deputados do PPdeG no Congreso sitúan o avance na transferencia da AP-9 como unha das súas prioridades no novo curso político

Os deputados do PPdeG no Congreso sitúan o avance na transferencia da AP-9 como unha das súas prioridades no novo curso político e, neste sentido, avogan por axilizar a súa tramitación parlamentaria para “evitar que se repitan boicots” como os que se deron na pasada Lexislatura por parte do PSOE e os seus socios de goberno.

Logo da toma en consideración da Proposición de Lei Orgánica de transferencia da titularidade e competencias da autoestrada do Atlántico a Galicia na Cámara Baixa o pasado mes de xuño, agora unha Ponencia debaterá o texto e terá que remitir un informe á Comisión de Transportes e Mobilidade Sostible. Un proceso no que os deputados galegos Celso Delgado, Tristana Moraleja e Pedro Puy exercerán como ponentes en representación do Grupo Popular.

Actualmente a tramitación da iniciativa atópase en fase de presentación de emendas por parte dos grupos políticos e, dado que na pasada Lexislatura o PSOE, Sumar e Podemos “boicotearon” este proceso “prorrogando ata quince veces o prazo de presentación de emendas”, os populares demandan á Mesa do Congreso que peche o prazo neste mes de setembro.

Desde o Partido Popular lamentan que esta iniciativa lexislativa teña que volver iniciar o seu proceso de tramitación no Congreso dos Deputados logo de chegar a acumular ata 15 prórrogas acordadas polos representantes do PSOE e Podemos na pasada Lexislatura. Un bloqueo especialmente “sorprendente” por parte das filas socialistas, xa que, tal e como recordan os populares, “bloquearon un texto literalmente idéntico ao aprobado por unanimidade no Parlamento de Galicia”.

“Sorprendeunos que o PSOE boicotease en Madrid o que en Galicia afirmaba que apoiaría”, engaden a este respecto insistindo en que o compromiso do Partido Popular foi en todo momento “respectar a literalidade da proposta aprobada no Parlamento galego”.

Pola contra, as emendas presentadas polos socialistas “buscaban desactivar a transferencia da titularidade e das competencias da AP-9 e limitala a unha transferencia de competencias sobre a administración e a explotación”. É dicir, que a titularidade da autoestrada continuase en mans da Administración Xeral do Estado, como ata o de agora.

“Foi a posición boicoteadora dos socialistas ao longo da pasada Lexislatura a que impediu que as Cortes aprobasen a Proposición de Lei Orgánica que faría efectiva a transferencia da AP-9 a Galicia”, conclúen neste sentido.

Desde o PPdeG piden “coherencia” ao PSOE neste novo proceso de tramitación e demándalles que cumpran coa súa palabra logo de que nas pasadas eleccións autonómicas “prometeran a gratuidade da AP-9 e da AP-53”, ademais de incluír este compromiso no seu pacto de investidura co BNG.