Día: 5 Novembro, 2024

O portavoz do Medio Rural do Grupo Popular, Miguel Viso, pediu hoxe no Pleno do Parlamento galego a BNG e PSdeG que “abandonen o seu discurso catastrofista e pesimista sobre o sector agrogandeiro galego” e animounos “a defender e promover o noso rural, e construír un futuro no que a súa xente se sinta valorada, apoiada e, sobre todo, orgullosa de vivir e traballar na súa terra”.

No debate dunha iniciativa sobre a política de control da transmisión da enfermidade hemorráxica epizoótica (EHE) no gando galego, Miguel Viso subliñou que “Galicia foi pioneira ao habilitar, a comezos de 2024, un sistema de indemnizacións por animais falecidos, calculándose os baremos en función do Real Decreto 389/2011 que establece as compensacións por sacrificio en programas nacionais para enfermidades como a lingua azul, tuberculose e outras patoloxías”.

“A Xunta ampliará estas subvencións para 2024 e as explotacións que xa recibiran indemnizacións recibirán agora a diferenza con respecto aos novos importes establecidos, onde a compensación por morte de bovinos poderá alcanzar os 1.500 euros por animal”, apuntou. Así mesmo, Viso engadiu que ofreceranse axudas para tratamentos veterinarios e desinsectantes a todas as explotacións afectadas.

O portavoz popular manifestou que “esta é a axuda máis ambiciosa das convocadas polas comunidades autónomas, xa que cubrirá o censo completo de bovinos de cada explotación e non só os afectados pola enfermidade”.

A portavoz de Sanidade do Grupo Popular, Encarna Amigo, criticou hoxe no Pleno do Parlamento galego que a Federación Galega de Municipios e Provincias (Fegamp) estea a dilatar o proceso para a integración no Servizo Galego de Saúde das unidades asistenciais de atención á drogodependencia xestionadas polos concellos. Neste sentido, avogou por intensificar o traballo da comisión mixta creada para levar adiante este proceso, de xeito que se materialice ao longo desde ano 2024 a plena integración orgánica e funcional destes servizos.

Encarna Amigo explicou que en Galicia existen 13 unidades asistenciais de drogodependencias de titularidade municipal, situadas nos concellos de Burela, Cangas, Carballo, Monforte, Noia, O Grove, O Porriño, Ourense, Pontevedra, Ribeira, Santiago de Compostela, Vigo e Vilagarcía.

MÁIS DE 4 MILLÓNS DE EUROS PARA O FINANCIAMENTO

“A Xunta traballa no obxectivo de facer efectivo o traspaso destas unidades no menor tempo posible e cumprir a folla de ruta acordada no seo da comisión mixta de traspaso, integrada por representantes da Administración autonómica e municipal”, sinalou a portavoz popular, quen afirmou que para iso “resulta imprescindible que se cumpran os prazos establecidos e se poidan constituír as ponencias técnicas especializadas no seo da comisión”.

Respecto do financiamento destes servizos, Encarna Amigo subliñou que a Xunta lévao facendo desde o ano 2014 e nos orzamentos para 2025 figura unha partida de máis de catro millóns de euros para o financiamento destas unidades de adiccións e drogodependencias.

Ademais, Amigo dixo que “o Sergas está a reemprazar as xubilacións e vacantes dos profesionais destas unidades con persoal propio, polo que tamén está financiando desta maneira o seu correcto funcionamento, a pesar das dificultades que existen para atopar e contratar profesionais”.

A viceportavoz do Grupo Popular, Paula Prado, salientou hoxe no Pleno do Parlamento galego que os concellos galegos recibirán no 2025 a cantidade récord de 641 millóns de euros dos orzamentos da Xunta. “Ao mesmo tempo, o Goberno de Pedro Sánchez impón aos concellos máis cargas, como a suba da taxa do lixo, a xestión da retirada do amianto ou a Lei de benestar animal”, apuntou.

Paula Prado cuestionou que o BNG “estea a pedir máis fondos para os concellos galegos cando alí onde gobernan son incapaces de executar os seus propios orzamentos e de levar a cabo os investimentos previstos”. En concreto, sinalou que na Deputación de A Coruña o nivel de execución orzamentaria é de apenas un 9 por cento; na Deputación de Lugo, o nivel de execución é de pouco máis dun 27 por cento; e nos concellos do BNG o nivel de execución orzamentaria apenas supera o 50 por cento e, incluso, deixan cartos sen gastar, como acontece no caso de Ribeira ou Santiago.

INCREMENTO DOS FONDOS DUN 38%

Diante desta situación, a viceportavoz popular subliñou que o Goberno galego “apoia aos 313 concellos galegos na súa demanda dun financiamento municipal máis xusto e acorde cos servizos que prestan. “Proba disto é que desde 2009 os fondos autonómicos para os concellos se incrementaron un 38 por cento e no 2023 os concellos recibiron máis de 600 millóns de euros do Goberno galego, unha cifra que se incrementará ata os 641 millóns en 2025”, explicou.

Para rematar, Prado considerou “curioso que BNG e PSdeG critiquen ao Goberno galego por apoiar economicamente aos concellos, ao mesmo tempo que calan cando o Goberno de Pedro Sánchez lles impón máis cargas, como a suba da taxa do lixo ou os novos gastos derivados da xestión da retirada do amianto ou a aplicación da Lei do benestar animal”.

“Ademais, mentres o Goberno galego, a pesar de ser unha competencia municipal, fai unha aportación ao servizo de axuda no fogar de 12 euros por hora, o Goberno central pon só 2,5 euros cada hora”, rematou.

A deputada do Grupo Popular Carmen Pomar amosou hoxe “a nosa man tendida aos grupos da oposición para chegar a un pacto e a procura de consenso na tramitación da nova lei de servizo de medios públicos de comunicación de Galicia, unha vez inicie a súa tramitación democrática neste Parlamento galego”.

Carmen Pomar lembrou que a Xunta está a tramitar o anteproxecto de Lei de Servizos de Medios Públicos de comunicación audiovisual de Galicia, “unha lei que xurde para axustarse á nova lexislación estatal e europea, así como aos cambios tecnolóxicos e ás mudanzas no patrón de consumo audiovisual”. En concreto, dixo que esta iniciativa lexislativa é “transparente, participativo, plural e con sincera vocación de consenso na elección do director ou directora xeral da Corporación”.

BLÍNDASE A PLURALIDADE

Así mesmo, apuntou que esta Lei “mantén a elección dos integrantes do Consello de Administración, propostos polos grupos parlamentarios, por maioría cualificada de dous terzos do Parlamento de Galicia”. De non acadarse esa maioría, a votación repetirase nun prazo dun mes e abondará a elección por maioría de tres quintos, co que “blíndase a pluralidade do Consello de Administración e a súa elección por maioría reforzada”.

“Mentres en Galicia vese blindada a pluralidade e a elección do Consello de Administración por maioría reforzada, o Consello de Administración de RTVE poderá elixirse só por maioría absoluta das Cortes, cun reparto que prima ao PSOE e aos seus apoios no Congreso, de onde sairán 11 membros fronte aos 4 do Senado”, concretou a deputada popular.

Por último, Carmen Pomar incidiu en que “queremos, buscamos e alentamos o consenso na tramitación desta nova Lei galega, e está por ver que tanto BNG como PSdeG compartan este mesmo obxectivo, porque teñen convertido á CRTVG nunha ferramenta de confrontación permanente coa que atizar á Xunta”.

O deputado do Grupo Popular Gonzalo Trenor salientou hoxe no Pleno do Parlamento galego que o Plan de Transporte Público de Galicia “é un referente entre o resto de comunidades autónomas como pioneiro na renovación do transporte público interurbano, polo volume de recursos públicos que se dedica a financialo e polo marcado carácter social co que se aborda a mobilidade”.

Gonzalo Trenor afirmou que o Plan de Transporte Público de Galicia “supón máis cobertura territorial e un servizo de máis calidade, mellora continua, máis recursos, tarifas únicas e bonificadas, melloras tecnolóxicas para a información dos usuarios e o seguimento do servizo, e novas ferramentas de planificación”.

“Nun territorio tan disperso como o noso, o esforzo loxístico e orzamentario da Xunta para garantir a mobilidade dos galegos é o maior do Estado das Autonomías, con máis de 100 millóns de euros de orzamento anual”, indicou.

EVOLUCIÓN

Ademais, salientou a evolución vivida nos últimos anos polo Plan de Transporte Público de Galicia, pasando de 900 a máis de 3.600 rutas; de 20.000 a máis de 56.000 paradas; e de 1,5 millóns a máis de 2,5 millóns de servizos, con máis de 20 millóns de horarios.

Gonzalo Trenor rematou pedindo unha fronte contra a decisión do goberno central que pretende illar a 22 municipios con mais de 130.000 veciños das rutas de bus estatais co novo mapa concesional do transporte de estrada de competencia do ministerio.

A portavoz de Sanidade do Grupo Popular, Encarna Amigo, criticou hoxe no Pleno do Parlamento de Galicia que o BNG pretenda fixar por lei que se dedique o 25 por cento do orzamento de sanidade a atención primaria, “cando os orzamentos da Xunta para o 2025 xa destinan máis do 30 por cento do gasto sanitario á atención primaria”. Ademais, cualificou de “modelo caduco” a proposta nacionalista de incrementar ata 14 as áreas sanitarias, replicando as estruturas e altos cargos en cada unha delas, unha idea que “só se pode entender polo interese do BNG por converter o mapa sanitario de Galicia nun reino de taifas”.

Encarna Amigo lembrou que a Lei 8/2008 de saúde de Galicia, que o BNG pretende reformar agora, foi aprobada polo Goberno bipartito de socialistas e nacionalistas, polo que cuestionou aos nacionalistas se naquel momento “non lle importaba a sanidade pública galega o suficiente como para engadir que se lle dedicara a atención primaria o 25 por cento do gasto sanitario? ou está dicindo que o Servizo Galego de Saúde funcionaba mal coas 11 áreas sanitarias existentes?”.

CORTIÑA DE FUME

Amigo considerou que esta proposición de lei do BNG “é unha cortiña de fume para evitar que se fale de que a Xunta vai ter no 2025 o orzamento máis alto da historia para a sanidade publica galega: 5.458 millóns de euros, o que supón un incremento do 5,1 por cento e representa o 40 por cento do presuposto total da Administración galega”.

Máis en concreto, a portavoz popular apuntou que a atención primaria recibirá o vindeiro ano 1.668 millóns de euros, o que representa o 30,56 por cento do orzamento destinado a sanidade “dirixido especialmente a aumentar o persoal, renovar infraestruturas e equipamento, e potenciar a enfermería para garantir coidados personalizados no rural”.

Encarna Amigo asegurou que a Organización Mundial da Saúde sinala, en contra do criterio defendido polo BNG, que o gasto farmacéutico debe incluírse na atención primaria, recollido tanto na Declaración Alma-Ata de 1978 ou na Declaración de Astaná de 2018. “Pero é que tamén a propia Federación de Asociacións en Defensa da Sanidade Pública sinala que España dedica máis do 30 por cento do orzamento sanitario á atención primaria e que Galicia atópase por enriba desa media”, salientou.

DUPLICAR DIRECTIVOS

Respecto da petición do BNG de incrementar as áreas sanitarias, a portavoz popular cualificou como “un modelo caduco replicar estruturas e altos cargos en cada unha das 14 áreas que queren crear, duplicando os directivos que actualmente existen”.

Neste sentido, explicou que dentro das sete áreas sanitarias existentes na actualidade en Galicia existen 14 distritos sanitarios que teñen como referencia o seu hospital correspondente, construíndo un marco de referencia dentro de cada área sanitaria. “Isto permitiu consolidar o modelo de integración para facilitar o achegamento dos profesionais aos pacientes, evitando desprazamentos innecesarios porque os pacientes son atendidos nos hospitais máis próximos ao seu domicilio”, engadiu.

Encarna Amigo afirmou que “a clave é blindar os hospitais comarcais para que haxa accesibilidade, independentemente de onde viva o paciente, ao tempo que se amplían os recursos de asistencia dos hospitais galegos e se protexe e garante a calidade do servizo”.