O Grupo Popular apoia solicitar ao Goberno central unha regulación das comunidades enerxéticas de base cidadá, especialmente as radicadas no rural

O Grupo Popular apoiou hoxe a aprobación no Parlamento de Galicia dunha proposición non de lei a través da que se solicita ao Goberno central unha regulación das comunidades enerxéticas de base cidadá, especialmente as radicadas no ámbito rural, que recoñeza ás comunidades de montes veciñais en man común, sempre que o soliciten expresamente, como comunidades enerxéticas de pleno dereito segundo o disposto nos artigos 12 bis e seguintes da Lei 24/2013.

O portavoz popular de Industria, Rubén Lorenzo, lembrou que o Goberno de España “ten pendente desde hai case dous anos aprobar un proxecto de Real Decreto polo que se desenvolvan as figuras das comunidades de enerxías renovables e as comunidades cidadáns de enerxía”.

“Resulta fundamental dotar dun marco lexislativo claro ás comunidades enerxéticas e para iso é importante a aprobación desa norma que leva case dous anos no caixón do Goberno socialista, tendo en conta as aportacións que se fagan desde as comunidades autónomas”, indicou.

DEMOCRATIZACIÓN DA ENERXÍA

Rubén Lorenzo asegurou que as comunidades enerxéticas “son xa un mecanismo de democratización da enerxía e unha boa vía para fomentar a descarbonización da nosa economía” e por este motivo o PPdeG incluíu no seu programa electoral co que se presentou ás pasadas eleccións autonómicas o impulso destas figuras, que permiten acadar un aforro enerxético á cidadanía, que, ademais, amosan cada vez máis interese por este tipo de iniciativas comunitarias.

No debate desta iniciativa parlamentaria, o portavoz popular propuxo que as comunidades de montes veciñais en man común “non se consideren de xeito automático como comunidades enerxéticas, senón que teñan que solicitalo expresamente, de tal xeito que contan cuns estatutos onde quede claro os fins enerxéticos das mesmas”.

O Parlamento de Galicia demanda ao Goberno central un novo programa Moves para a compra de vehículos eléctricos e coches híbridos enchufables

O Parlamento de Galicia aprobou hoxe a proposición non de lei do Grupo Popular a través da que se solicita ao Goberno de España a elaboración dun novo programa Moves de xestión unificada para a compra de vehículos eléctricos e coches híbridos enchufables, que incorpore o desconto directo en factura. Neste sentido, tendo en conta o momento crítico no que se atopa o sector nun proceso de transición progresivo, apoiaranse con este programa outras tecnoloxías, incluídos os motores de combustión, en función do nivel de emisións de gases. A iniciativa inclúe, ademais, a simplificación dos trámites administrativos para impulsar o despregamento das infraestruturas de recarga e a creación dun Plan Moves Recarga para facilitar o seu desenvolvemento nas zonas que non contan coa cobertura necesaria.

O deputado popular Miguel Fidalgo lamentou que o Goberno central derrogou o Plan Moves III logo de “verse incapaz de prorrogar este programa debido a unha tramitación apresurada e improvisada”, co agravante de que o atraso na prórroga deste plan “xerou case 1.600 expedientes fora do programa, falta de uniformidade na xestión entre comunidades autónomas e incerteza por non saber como manexar estas solicitudes”.

MÁIS QUE URXENTE

“Hoxe a necesidade de impulsar un novo programa Moves IV é máis que urxente”, indicou o deputado popular, quen lembrou que esta iniciativa “foi unha promesa feita por Pedro Sánchez hai un ano”. Neste sentido, considerou “imprescindible que este novo programa se deseñe de forma que responda verdadeiramente ás necesidades da sociedade, cunhas bases afastadas da burocracia excesiva do Moves III, como veñen demandando as comunidades autónomas e todos os axentes implicados”.

Miguel Fidalgo urxiu “deseñar un programa Moves IV que elimine as complexidades actuais e permita aos beneficiarios acceder ás axudas de maneira áxil e sinxela, xestionado de maneira centralizada”.

Ademais, recollendo as propostas que xa lle fixeron os conselleiros de Enerxía das comunidades autónomas á ministra, este novo plan debería incorporar descontos directos nas facturas dos beneficiarios ao adquirir vehículos eléctricos ou instalar puntos de recorga, así como unha redución do IVE, seguindo o exemplo doutros países europeos como Noruega, Países Baixos ou Alemaña.

O deputado popular rematou a súa intervención salientando o programa Renova, posto en marcha pola Xunta este ano e que conta con máis de 600 solicitudes, que xa esgotaron máis da metade do crédito dispoñible en apenas dúas semanas. “Con este programa, que xa leva dúas edicións, Galicia é das primeiras comunidades autónomas en aprobar un plan de apoio específico para incentivar a compra de vehículos eficientes entre particulares e empresas, cun orzamento de 3,1 millóns de euros e axudas máximas de 4.600 euros segundo o nivel de emisións”, concretou.

O Grupo Popular solicita ao Goberno central que exima do pago do IRPF a quen perciba o salario mínimo interprofesional

O Grupo Popular vén de rexistrar unha proposición non de lei a través da que demanda ao Goberno de España que exima do pago do imposto sobre a renda das persoas físicas (IRPF) a quen perciba o salario mínimo interprofesional. Neste sentido, o portavoz Alberto Pazos pediu que a suba do salario mínimo “non se converta nun negocio redondo para o Goberno de Pedro Sánchez que, primeiro, ponlle o carameliño doce na boca dos traballadores con menor remuneración para despois darlle o bocado amargo de que unha parte desa subida salarial vaia directamente ás arcas da Administración estatal”.

Alberto Pazos cualificou de “paragóxico que o Goberno central aprobara unha suba de 700 euros anuais do salario mínimo interprofesional sen ter en conta que con este incremento dos ingresos os seus perceptores estarán obrigados a presentar a corresponde declaración do imposto sobre a renda”. Así, explicou que o traballador deberá pagar o incremento correspondente ás cotizacións sociais (45 euros) e facer fronte ao imposto sobre a renda das persoas físicas (outros 301 euros), “o que supón que, aos 700 euros que verá incrementado o seu salario, deberá restarlle os 346 euros que deberá ingresar nas arcas da Administración estatal, que en total ingresará a non desdeñable cantidade de 1.400 millóns de euros”.

Diante desta situación, o Grupo Popular solicita que o Goberno de España exima do pago do imposto sobre a renda das persoas físicas a quen perciba o salario mínimo interprofesional, “de xeito que todos os traballadores beneficiados por esta suba ingresen integramente nos seus petos a totalidade do aprobado polo Goberno de España e non se converta esta decisión nun negocio redondo para a Administración estatal”, manifestou.

PARA SENTIRSE MOI ORGULLOSOS

Nunha comparecencia ante os medios centradas en políticas sociais, Alberto Pazos referiuse á recente enquisa de condicións de vida publicada polo Instituto Nacional de Estatística para salientar que “son uns datos, tendo sempre moi presente que todo o que se faga para combater a pobreza e mellorar o nivel de vida dos galegos será pouco, para sentirse moi orgullosos do traballo que veñen facendo os Gobernos do Partido Popular, en especial unha Consellería de Política Social disposta en todo momento a axudar a quen máis o necesita e conseguir que cada día sexan menos os galegos que chegan con dificultade a fin de mes, situando a Galicia como a comunidade con menores índices de desigualdade e un referente no eido da inclusión social”.

Segundo se recolle neste informe, Galicia foi a comunidade autónoma española na que máis baixou a taxa de risco de pobreza e exclusión social (o coñecido como taxa AROPE) ao pasar dun 25,5 por cento en 2023 ao 18,8 por cento en 2024, 6,,7 puntos de descenso nun só ano, fronte a unha baixada de só 0,7 puntos a nivel de toda España. Os datos desta enquisa tamén poñen de manifesto que Galicia avanza no descenso progresivo da poboación galega con carencia material e social severa, xa que rebaixou case á metade a taxa do 8,2 por cento que tiña en 2023, quedando o pasado ano no 4,8 por cento, unha cifra que tamén é practicamente a metade da que
se rexistra a nivel estatal.

“Outro dato que merece terse en conta desta enquisa do INE é a relativa á renda media por fogar, onde Galicia rexistrou o pasado ano un incremento do 11,5 por cento, ata situarse en 34.892 euros por fogar e achegarse aos case 37.000 euros da media nacional”, apuntou Alberto Pazos.

No apartado de persoas que non poden permitirse manter a vivenda cunha temperatura adecuada, Galicia pasou de estar cinco puntos por enriba da media estatal en 2009 a situarse o pasado ano por baixo da media estatal: 16,6 por cento en Galicia fronte ao 17,6 por cento de media nacional. No caso dos fogares que recoñecen chegar con moita dificultade a fin de mes, Galicia, logo dun descenso de tres puntos entre 2023 e 2024, pasou de estar por enriba da media estatal a situarse máis de dous puntos por baixo (8,7 en España e 6,6 por cento na Comunidade galega).

BASTA XA DE FEMINISMO SECTARIO

Por último, o portavoz popular lamentou que “seguimos á espera de que tanto a lideresa do BNG, a señora Pontón, como todas as feministas nacionalistas que con tanto orgullo ondean a bandeira en favor da igualdade amosen o seu rotundo rexeitamento e repulsa a noxenta e machista campaña impulsada pola CIG contra a conselleira de Política Social”.

Pazos criticou que esta campaña “non fai máis que atentar contra a dignidade dunha muller traballadora, que, como todos e todas, terá os seus acertos e os seus erros, pero á que non lle podemos negar ninguén un respecto absoluto, fuxindo de estereotipos repugnantes como o que utiliza a CIG neste panfleto, que é o máximo expoñente do machismo que domina ao BNG e a todas as súas organizacións satélites”.

“Basta xa deste feminismo sectario que agocha o nacionalismo galego, que tanto se queixa de supostos ataques machistas, cando en realidade se lle está confrontando con argumentos e feitos contrastados a súa demagoxia política, pero que non é quen de condenar un ataque persoal como o sufrido esta semana pola conselleira de Política Social ou por calquera muller que non comulgue coa súa doutrina política”, rematou.

O PPdeG reivindica o legado de Alfredo Brañas como motivación para “seguir traballando por Galicia coa unidade e o respecto que guiaron a nosa Historia”

O Partido Popular de Galicia reivindica o legado e o exemplo de Alfredo Brañas como motivación para “seguir traballando polo benestar e o futuro de Galicia, coa unidade e o respecto que nos guiaron ao longo da nosa Historia” e “sen máis obediencias que a que lle debemos aos galegos e galegas”.

Así o manifestou esta tarde a secretaria xeral do partido, Paula Prado, na súa intervención no acto organizado pola Fundación Alfredo Brañas en Carballo co gallo do 125º cabodano do escritor. Un acto no que tamén interviñeron María Baleato, coordinadora de Cultura do PPdeG, Jorge Cubela, membro do padroado da fundación e alcalde de Cerdedo-Cotobade, e Rubén Lorenzo, líder local do partido, e que contou coa participación do alumnado do IES Alfredo Brañas e de dous regueifeiros.

A número dous dos populares galegos definiu ao escritor como “un galego comprometido coa súa terra cuxo compromiso con Galicia nunca concibiu como algo exclusivo e excluínte, senón como unha tarefa colectiva que nos obriga a todos” e asegurou que Brañas “entendeu mellor que ninguén a necesidade de que Galicia tivera voz propia”.

“Desde o PPdeG seguiremos traballando para que a voz de Galicia sexa escoitada no resto de España fronte a un centralismo que busca diluíla e neutralizala e fronte a un independentismo que pretende encerrala dentro dos límites da comunidade autónoma”, remarcou.

Para Paula Prado é máis necesario que nunca reivindicar a pegada de Alfredo Brañas na lingua galega nuns momentos nos que “mentres algúns queremos facer avanzar Galicia, outros seguen instalados en entorpecer facendo un ruído que o único que fai é prexudicar aos galegos e ao prestixio da nosa lingua e cultura”.

UN CARBALLÉS INSIGNE NO CULTURAL E NO INTELECTUAL

Pola súa banda, o líder do PP en Carballo, Rubén Lorenzo, quixo manifestar a súa satisfacción polo feito de que a fundación escollera a súa vila para celebrar “a un dos carballeses máis insignes para a nosa herdanza cultural e intelectual”.

Diante da casa natal de Alfredo Brañas, o dirixente popular destacou que aquí foi “onde comezou todo” e amosou o seu orgullo polo feito de que un carballés da altura do escritor repouse no Panteón de Galegos Ilustres en Santiago de Compostela, onde mañá terá lugar unha misa e ofrenda floral na súa honra.

O PPdeG denuncia o “falso feminismo” do BNG e acusa a Pontón de “estar de acordo na utilización do sexismo e do machismo nas súas políticas”

O PPdeG denuncia o “falso feminismo” do BNG e acusa a Ana Pontón de “estar de acordo na utilización do sexismo e o machismo nas súas políticas” logo do acontecido esta semana coa “vergoñenta” viñeta difundida polo sindicato CIG sobre a responsable de Política Social do Goberno galego.

Na rolda de prensa que ofreceu esta mañá na sede autonómica dos populares galegos, a secretaria xeral do partido criticou que Ana Pontón “non se atreveu a corrixir ao seu sindicato e nin sequera censurou a viñeta” e respondeu ás “escusas” ofrecidas pola líder do BNG para non asumir a súa responsabilidade a este respecto.

“É unha broma a comparación que fixo co que se escoitou no Pleno de Parlamento, onde Ana Pontón inventa conflitos e saca o comodín do machismo cada vez que non lle gusta unha resposta. Do mesmo xeito que é unha broma que diga que o PPdeG non pode dar leccións de feminismo cando é incapaz de criticar estas barbaridades e cando apoiou a Lei do ‘só si é si’, que beneficiou a milleiros de agresores sexuais”, asegurou.

Nesta liña preguntouse “con que cara pode mirar o independentismo galego ás vítimas e acudir ás manifestacións do 8 de marzo” e manifestou que ten claro que “volverán poñer a careta” coa que “a esquerda radical pretende agochar casos como os de Xabier Ron, Monedero, Pablo Iglesias, Errejón e o candidato do BNG que estivo no cárcere por agredir sexualmente a unha nena de catro anos”.

DEIXAR TRANQUILA A LINGUA GALEGA

Paula Prado fixo referencia ao contido do documento aprobado recentemente polo Comité Central da UPG para lamentar que “as únicas propostas do BNG sobre a lingua sexan combater os discursos a prol do bilingüismo ou a liberdade de lingua, expulsar o castelán do ensino ou contribuír ás mobilizacións de plataformas afíns”.

“O BNG leva tanto tempo manipulando a lingua galega, poñendo por diante axitar a rúa e impoñer a súa ideoloxía, que xa ninguén cre que a súa defensa sexa real”, concluíu censurando o “dano” que o independentismo galego está facendo ao galego “coas súas manifestacións e mensaxes manipuladas”.

Un dano do que fai cómplice tamén a un PSOE que “en vez de axudar fai seguidismo e mesmo pon autobuses para acudir ás manifestacións financiados con cartos públicos” e polo que pide a ambos que “deixen tranquila a lingua galega”.

Paula Prado recordou que “Galicia non apoiou as propostas lingüísticas do BNG e do PSOE e segue sen apoialas a día de hoxe”. De aí que insista en que a oposición debe “parar de contar bólas sobre a nosa lingua aos galegos e galegas”.

UN 18-F DE GRANDES FITOS

En referencia ao acto organizado polo PPdeG o pasado sábado para conmemorar o primeiro aniversario da primeira maioría de Alfonso Rueda, a secretaria xeral do partido definiuno como “un gran éxito” que “reuniu a 2.500 persoas para dicir alto e claro que Galicia Goberna”.

“Chegamos a este aniversario cos obxectivos cumpridos, con dúas de cada tres medidas do programa en marcha, con humildade e con moitos retos por diante en servizos públicos, vivenda, investigación ou emprego”, sostivo apuntando a que seguirán traballando nesta liña e agardando contar cunha oposición “máis construtiva e con maior capacidade de autocrítica”.

Nesta liña ironizou con que o BNG e o PSOE, máis que un aniversario, o que conmemoraron foi “un cabodano”. Non en balde, desde o 18 de febreiro de 2024 ambos partidos “están enfadados con Galicia e cos galegos e curan os seus traumas indo a polo PP e axitando a rúa”.

Paula Prado reivindicou que o seu partido ten “moito máis que celebrar que unha Ana Pontón que é unha máquina de perder eleccións e non sabe apartarse, que un BNG que só sabe discutir e facer ruído, que un Gómez Besteiro que é un simple pero magnífico soldado de Sánchez, e que un PSOE que cos peores resultados da súa historia aínda se atreve a dar algunha lección”.

O Grupo Popular pide que o Goberno central actualice canto antes as entregas a conta

A viceportavoz do Grupo Popular, Cristina Sanz, demandou hoxe no Parlamento galego ao Goberno central que “aprobe canto antes a actualización das entregas a conta”. “Aprobación inmediata, si; pero sen chantaxe e sen ser moeda de troco para outros fins que en nada benefician a Galicia”, engadiu.

Cristina Sanz lembrou que “a actual situación de incerteza respecto ao importe que van a recibir as comunidades autónomas en concepto de entregas a conta este 2025 deriva exclusivamente da incapacidade do Goberno de Pedro Sánchez para aprobar uns orzamentos en prazo por segundo ano consecutivo”.

“O Goberno de España ten que actuar, porque a demora na actualización das entregas a conta provoca que as comunidades autónomas teñan que recorrer, para evitar tensións de tesourería, a pólizas de crédito”, indicou a viceportavoz popular. En concreto, dixo que a demora da actualización das entregas a conta o pasado ano supuxo para Galicia un custo de 10 millóns de euros en concepto de maiores xuros, e a estimación para este ano 2025 sitúase en máis de 15 millóns de euros.

REFORMA DO SISTEMA DE FINANCIAMENTO

Así mesmo, Cristina Sanz considerou “imprescindible que se acade canto antes unha reforma do sistema de financiamento autonómico, insuficiente e caducado desde o ano 2014” e reiterou que “a nosa prioridade é conseguir que sexa un sistema de financiamento suficiente en recursos e cun reparto equitativo dos mesmos”. “Galicia leva anos defendendo que o sistema de financiamento debe basearse nun modelo que cubra o custo real dos servizos públicos, sendo a dispersión e o avellentamento as variables que máis impacto teñen no custe dos mesmos”, apuntou.

Respecto da débeda, a viceportavoz popular afirmou que “o acordo asinado entre o PSOE e ERC supón mutualizar a débeda de Cataluña entre todas as restantes comunidades autónomas”. Así, explicou que “a débeda non desaparece ata que se paga, polo que a quita autonómica pasa a engrosar a débeda do Tesouro de España e, polo tanto, a alícuota de débeda de todos os españois medra con esta operación”.

“Os españois máis prexudicados serán os dos territorios menos endebedados, como Galicia, que en termos netos pasan a deber máis”, sinalou Cristina Sanz, quen concretou que, no caso de aplicarse, cada galego debería un 20 por cento menos de débeda autonómica, pero a súa alícuota de débeda española subiría en 1.366 euros. “Ceder ante os cataláns carga a cada galego cunha débeda adicional de 470 euros”, concluíu.

 

Deputados do Grupo Popular reúnense con responsables do Consello Galego de Veterinaria

Os deputados do Grupo Popular Jesús María Fernández Rosende, Miguel Viso, Juan Casares e Enrique Barreiro mantiveron un encontro co presidente e o secretario do Consello Galego de Veterinaria, Ricardo Vecilla e Luís Núñez, respectivamente, no que abordaron todos os problemas que neste momento afectan ao exercicio da profesión veterinaria e que, en consecuencia, poden afectar á saúde dos animais.

“Hai que evitar o maltrato animal tanto por acción como por omisión”, sinalou o deputado popular Fernández Rosende, porque afirmou que “maltrato é non poder proporcionar aos animais os tratamentos veterinarios adecuados debido ao encarecemento dos mesmos, logo da entrada en vigor da nova normativa europea e nacional”.

A modo de exemplo, na reunión abordouse o problema que presentan algúns principios activos de determinados medicamentos que, polo feito de ser específicos para veterinaria, se venden a un prezo moito máis elevado que os destinados a humanos.

Tanto os deputados populares como os representantes do Consello Galego de Veterinaria acordaron continuar con este tipo de reunións nas que continuar afondando nos aspectos problemáticos para este sector.

 

 

 

O PPdeG considera intolerable a submisión de Ana Pontón á CIG ao non reprobar a repugnante campaña machista contra a conselleira de Política Social

A portavoz de Igualdade do Grupo Popular, Raquel Arias, considerou hoxe “intolerable que a señora Pontón escolla a súa submisión ao sindicato que goberna o BNG antes que reprobar a repugnante campaña machista da CIG contra a conselleira de Política Social”. “Ese é o feminismo sectario que practica o nacionalismo galego, totalmente mudo e indiferente cando se ataca a alguén que non comulga co seu ideario político”, indicou.

“A señora Pontón e todas as nacionalistas galegas deberían ter moi presente que o feminismo e a igualdade non entenden de cores políticas”, sinalou a portavoz popular, quen asegurou que “o Partido Popular non quere dar leccións de feminismo e a igualdade a ninguén, porque estamos convencidos que son obxectivos que debe afrontar e conseguir a sociedade no seu conxunto”.

AGOCHADA DETRÁS DA CIG

Raquel Arias lamentou que “a señora Pontón considere paternalistas e machistas as réplicas do Presidente Rueda ás súas intervencións no Pleno, cando o que queda patente en cada sesión é que o Presidente da Xunta refuta con datos e argumentos sensatos toda a demagoxia e a terxiversación coa que a portavoz nacionalista adorna as súas actuacións”.

“Coincidimos coa señora Pontón en que ás mulleres en política hai que criticarnos do mesmo xeito que aos homes, algo que parece que a ela tan mal lle senta cando a crítica ven desde os escanos do Grupo Popular, pero non chegamos a comprender que aparte a súa loita feminista e defensora das mulleres para agocharse detrás dunha noxenta campaña de quen realmente manda no BNG: a UPG e a CIG”, apuntou Raquel Arias.

O Parlamento de Galicia demanda ao Goberno central medidas para mellorar o sector apícola

O Parlamento de Galicia aprobou hoxe a proposición non de lei do Grupo Popular, que non contou co apoio dos deputados do PSdeG, a través da que se demanda ao Ministerio de Agricultura, Pesca e Alimentación medidas dirixidas a mellorar o sector apícola ante a insostible situación pola que está a atravesar pola competencia desleal existente e a alta mortalidade das abellas.

O portavoz popular do Medio Rural, Miguel Viso, subliñou que o sector apícola “desempeña un papel crucial na nosa sociedade, porque non só garante a produción de mel e outros produtos derivados, senón que é fundamental para a biodiversidade e a seguridade alimentaria”.

Porén, lamentou que nos dous últimos anos a produción de mel en España caeu ata as 27.000 toneladas, o que supón un descenso do 21 por cento con respecto ao ano 2021. Entre os motivos causantes desta situación, Miguel Viso referiuse ás crecentes importacións de mel, cun crecemento do 19 por cento no último ano, e a conseguinte baixada do prezo do produto; e a alta mortalidade das abellas, provocada por enfermidades como a varroa, o impacto das alteracións climáticas ou a proliferación de especies invasoras, como a vespa velutina.

COMPROMISO DA XUNTA

“Galicia non é allea a esta crise”, sinalou o deputado popular, polo que considerou necesario reforzar os controis nas importacións de mel, asegurando que compren cos mesmos estándares de calidade e seguridade que se esixen aos produtores galegos; garantir unha rastrexabilidade efectiva en todo o proceso de comercialización, impedindo a venta de mel importada como se fose produción nacional; o cumprimento estrito da Lei da cadea alimentaria, para evitar abusos na formación de prezos e garantir que os apicultores reciban un prezo xusto polo seu traballo; e a promoción institucional dos produtos apícolas galegos, a través de campañas específicas.

Miguel Viso salientou que “a Xunta xa demostrou o seu compromiso coa apicultura, habilitando 1,4 millóns de euros en axudas este ano para modernizar o sector, combater enfermidades e loitar contra especies invasoras”, pero manifestou que “esta crise require unha resposta a nivel estatal, polo que é necesario que o Ministerio de Agricultura adopte medidas urxentes que garantan o futuro da apicultura”.

O Parlamento galego pide ao Goberno central que adapte os contratos da Lei da cadea alimentaria ás condicións particulares do sector cárnico galego

O Parlamento de Galicia aprobou hoxe, co voto en contra do PSdeG, a proposición non de lei do Grupo Popular a través da que se demanda ao Goberno de España que flexibilice e adapte os contratos da Lei de medidas para mellorar o funcionamento da cadea alimentaria ás condicións peculiares do sector cárnico galego.

O deputado popular Juan Casares lembrou que a Lei de cadea alimentaria “foi un paso crucial cara unha cadea alimentaria máis xusta e transparente, xa que fortaleceu a posición dos operadores máis vulnerables e promoveu as relacións comerciais equitativas no sector”.

Porén, Casares manifestou que o Goberno central “pode na actualidade implementar certos cambios que flexibilicen os termos da contratación alimentaria co fin de adaptarse á realidade cotiá e ás condicións peculiares do sector cárnico galego”.

DEMANDAS CONCRETAS

En concreto, o deputado popular demandou incrementar o monto mínimo establecido para a obrigatoriedade de formalizar o contrato por escrito en todas as operacións comerciais, que agora se sitúa en 1.000 euros, algo que permitiría flexibilizar o mercado de becerros; e aumentar o período obrigatorio a cumprir para a gravación dos contratos no Rexistro dixital de contratos alimentarios, xa que moitos dos tratantes que operan neste sector teñen serias dificultades para adaptarse á novas tecnoloxías.

Juan Casares tamén propuxo reforza-la parte do Observatorio da cadea alimentaria que se dedica ao sector cárnico, dotándoo de índices de referencia de prezos e calidades aos que os axentes do sector se poidan acoller; así como incrementar os controis da Axencia de Información e Control Alimentarios (AICA), para desenvolver un control exhaustivo dos prezos pagados, os tempos de cobro e os abusos de calquera natureza nas relacións comerciais.

O deputado popular cualificou de “estratéxico para a economía rural” o sector cárnico galego, xa que achega o 34,5 por cento do valor da produción final agraria e conta con máis de 40.000 explotacións e preto de 200 industrias de transformación que empregan a máis de 4.500 traballadores a tempo completo.

“Ademais, a súa importancia social e económica supera o que reflicten estas cifras, xa que o sector cárnico contribúe tanto ao mantemento da poboación rural como da superficie agraria utilizada, aspectos fundamentais para a sostibilidade tanto social como medioambiental ou económica do campo galego”, rematou Juan Casares.