O Grupo Popular subliña a importancia das casas-niño como modelo de conciliación e apoio ao rural galego

Os deputados do Grupo Popular Víctor Baladrón, Noelia Pérez e Juan Casares visitaron as dúas casas-niño do concello de Vilardevós, “proxectos fundamentais para fixar poboación, apoiar ás familias e asegurar que as novas xeracións poidan medrar con oportunidades no seu propio entorno”, destacaron.

Durante o percorrido, o deputados populares destacaron o valor deste modelo pioneiro en España, pensado para dar resposta á conciliación da vida familiar e laboral no rural e que a Xunta xa garantiu a súa continuidade, cando menos, ata o ano 2028. As casas-niño, como a de Lala e Garabatos en Vilardevós, representan unha aposta firme por garantir servizos educativos e sociais de proximidade nos pequenos concellos.

Na actualidade, Galicia conta con máis de 100 casas-niño en funcionamento, das que máis da metade se localizan na provincia de Ourense, o que amosa un forte compromiso co desenvolvemento do interior. Ademais, recentemente, o Consello da Xunta aprobou a posta en marcha de 20 novas casas-niño, o que reafirma a vontade do Goberno galego de seguir ampliando esta rede tan necesaria para apoiar ás familias do rural.

O PPdeG denuncia o abandono turístico que sofre O Grove a consecuencia da falta de xestión do Goberno municipal

Os deputados do Grupo Popular Julio García Comesaña e Manuel Santos denunciaron hoxe a falta de xestión turística por parte do Concello de O Grove, polo que anunciaron a presentación de iniciativas políticas tanto a nivel local, como autonómico e nacional para demandar actuacións que melloren o atractivo turístico desta localidade pontevedresa.

En compañía do portavoz do PP en O Grove, Pablo Leiva, Julio García Comesaña e Manuel Santos realizaron diversas visitas a puntos turísticos estratéxicos de O Grove e constataron o abandono ao que os ten sumidos o Goberno socialista local. En concreto, demandaron actuacións urxentes en miradoiros ou no acceso ás praias deste municipio, así como a axilización inmediata do Plan de Sostibilidade Turística en Destino (Gastromeca), dotado con 2 millóns de euros procedentes de fondos europeos que o Concello está a retrasar inexplicablemente a súa execución.

OPORTUNIDADE PERDIDA

“Estamos ante un exemplo claro dunha oportunidade perdida por culpa da inacción municipal, porque hai fondos e hai proxecto, pero o que non hai é vontade política nin capacidade de xestión”, sinalou García Comesaña, quen lamentou tamén que non se convocase o Consello Local de Turismo nin exista unha mínima planificación para a Festa do Marisco de 2025, que a estas alturas segue sen cartel anunciador nin bases para as Centolas de Ouro.

Os deputados populares tamén puxeron o foco na falta de limpeza urbana, a ausencia de aparcadoiros disuasorios e o deterioro de servizos básicos, cuestións reiteradamente denunciadas polos veciños e tamén polos empresarios, como puxo de manifesto a asociación Emgrobes nas súas reunións co alcalde.

“O Grove merece unha xestión turística á altura do seu potencial, porque hoxe, por culpa do desleixo do seu alcalde, está a perder oportunidades mentres outros concellos da contorna avanzan e aproveitan os recursos dispoñibles”, concluíu Manuel Santos.

Diante desta situación, os deputados populares e o voceiro local do PP anunciaron a presentación de iniciativas políticas no concello, para que se convoque de forma inmediata o Consello Local de Turismo e dinamice a mesa de seguimento da Gastromeca; no Parlamento de Galicia, para esixir ao Goberno central que garanta a execución dos fondos europeos concedidos ao Grove e que supervise a súa correcta aplicación; e no Congreso e no Senado, para que o Goberno central explique os atrasos acumulados e detalle os mecanismos de control sobre os plans financiados con cargo ao Plan de Recuperación.

Os eurodeputados do PPdeG celebran o primeiro aniversario das eleccións europeas coa satisfacción de “cumprir con Galicia” no eido da pesca, o sector primario ou a industria

Os eurodeputados galegos Francisco Millán Mon e Adrián Vázquez, fan balance do primeiro ano transcorrido desde a maioritaria vitoria do PPdeG nas eleccións europeas de 2024 destacando o alto grado de cumprimento dos compromisos electorais adquiridos con Galicia no eido da pesca, o sector primario ou a industria.

“O PP cumpre e, cando nós cumprimos, Galicia, España e Europa avanzan”, subliña Millán Mon citando como exemplos a creación dun comisario específico de Pesca ou o acordo ao que se chegou co Reino Unido para “garantir o acceso mutuo a augas ata 2038 e dar seguridade e previsibilidade aos nosos pescadores”.

No que se refire á agricultura, destaca tamén que, logo de conseguir a rebaixa do nivel de protección do lobo, os populares foron quen de “ofrecer maior protección ao sector gandeiro e devolver equilibrio ao medio rural”. Algo que, na súa opinión, foi posible grazas ao compromiso da nova Comisión Europea por “facilitar a vida” tanto ao sector primario como ao industrial.

A redución prioritaria da burocracia é para o eurodeputado pontevedrés unha boa mostra disto, tal e como se pode comprobar nos avances de cara á simplificación da PAC, na posposición dun ano do regulamento de deforestación ou no aprazamento das sancións por emisións ao sector da automoción.

Tamén en política exterior e na liña da defensa dos intereses de Galicia, Millán Mon pon en valor a acordo comercial ao que se chegou con Mercosur e a defensa da democracia e dos dereitos humanos en Venezuela que se fixo desde o Parlamento Europeo logo do “fraude electoral” protagonizado por Nicolás Maduro o pasado ano.

Como presidente do Intergrupo sobre Patrimonio Cultural Europeo, Camiños de Santiago e outras Rutas Culturais Europeas, celebra así mesmo a continuidade –por cuarta lexislatura consecutiva– desta asociación de eurodeputados.

CRISE ARANCELARIA, INDUSTRIA E TRANSPARENCIA ELECTORAL

Adrián Vázquez, pola súa banda, tamén celebra a consecución da rebaixa de nivel de protección do lobo “ata un nivel manexable e asumible para os nosos gandeiros e agricultores” e o compromiso da Comisión Europea na eliminación de burocracia tanto para a industria como para o campo.

Pero, sobre todo, salienta o apoio do seu partido ao sector vitivinícola fronte á actual crise arancelaria. Un apoio que volveu quedar demostrado coa recente visita a Bruselas de representantes das Denominacións de Orixe de viños galegos e que se ten materializado en axudas á produción e noutras medidas destinadas a garantir a competitividade e resiliencia do sector.

A designación da Mina de Doade como proxecto estratéxico para a autonomía da Unión Europea é tamén outro dos fitos que destaca o eurodeputado lalinense na medida en que, na súa opinión, incide na contribución da industria ao fortalecemento do Estado do Benestar e no desenvolvemento económico “fronte a aqueles que queren que volvamos a vivir en castros e pretenden eliminar calquera industria”.

Unha referencia implícita ao BNG que Vázquez explicita recordando a recente misión da Comisión de Asuntos Constitucionais do Parlamento Europeo para denunciar “enganos electorais” como o do independentismo galego coa súa papeleta compartida con ERC e Bildu: “Agora toda Europa sabe que nas eleccións europeas mentiron aos galegos e galegas obviando que ían da man cos herdeiros de ETA”.

Outro dos fitos deste primeiro ano foi, segundo recordan os eurodeputados galegos, o encontro que mantivo a secretaria xeral do PPdeG, Paula Prado, coa presidenta do Parlamento Europeo, Roberta Metsola, para trasladarlle as prioridades de Galicia.