Prado pide ao BNG que deixe de apoiar a Sánchez e rompa co PSOE nos concellos e nas deputacións para “non ser cómplice da corrupción”

A secretaria xeral do PPdeG, Paula Prado, pediu hoxe ao BNG que deixe de apoiar ao Goberno de Sánchez e, ao mesmo tempo, rompa co PSOE nos concellos e nas deputacións galegas para “non ser cómplice da corrupción”.

“O BNG e Ana Pontón teñen que rachar con todos os gobernos locais socialistas que está apoiando en Galicia, que non son poucos, e tamén nas deputacións. Ese sería o verdadeiro favor que lle farían á cidadanía. Mentres non o fagan, seguirán sendo cómplices da corrupción que cada día está asolando a España”, sinalou en declaracións aos medios antes de participar na 54ª Festa do Peixe de Bande, acompañada pola alcaldesa e secretaria xeral do PP da provincia de Ourense, Sandra Quintas, e polas deputadas nacionais Ana Vázquez, Marta González e Irene Garrido.

Prado abundou en que o BNG e Ana Pontón “teñen que deixarse xa de chíos e comunicados”, porque o que teñen que facer, e tamén Xosé Ramón Gómez Besteiro, é “aparcar o cinismo” e esixirlle ao presidente do Goberno de España que, “por dignidade”, convoque eleccións.

“Lamentablemente, o PSdeG segue agarrado a ese sanchismo que non trae nada bo para Galicia”, afondou.

Neste sentido, asegurou que o todo o que se está coñecendo estes días “é a forma de traballar dun Goberno central que xa non se preocupa dos problemas reais nin dos galegos nin do resto de españois, porque só ten unha ocupación: a corrupción e o ‘sálvese quen poida’”.

“Para nós isto é insoportable. Son precisas máis dimisións, pero sobre todo convocar eleccións”, deixou claro, tendo en conta que “a cidadanía está farta de erguerse cada día cun novo titular de corrupción”.

Prado lamentou que “están roubando a mans cheas os cartos dos españois, que tamén son os dos galegos”, pero “logo non hai financiación para facer novas infraestruturas ou para manter os servizos sociais en Galicia”.

“Levamos anos escoitando a este Goberno de España falar de fango, de corrupción e de bulos, cando o fango é o que están xerando eles cada día, estalles chegando ao pescozo e está asolando España”, concluíu, reiterando a petición “urxente” de que Sánchez “deixe paso e que os españois decidan se queren seguir sendo gobernados por un partido que non goberna España e que o único que está preocupado é por tapar a súa corrupción”.

A FORMA DE TRABALLAR DA XUNTA FRONTE A DO GOBERNO CENTRAL

Por outra parte, Paula Prado quixo destacar hoxe, como modelo do traballo do Partido Popular, o incremento en máis do 50% das frecuencias de transporte público entre Bande e Celanova con Ourense, anunciado pola Xunta esta semana.

“Mellorar o servizo de bus interurbano desde aquí coa capital da provincia é coñecer as necesidades dos veciños e das veciñas destas comarcas e atender as súas demandas. Esa é a nosa forma de traballar”, sinalou.

Isto “contrasta claramente”, dixo, coa forma de traballar do Goberno de Sánchez, que “cada día que pasa prexudica dunha forma ou outra á provincia de Ourense”, como ocorreu recentemente coa supresión da parada de Alta Velocidade na Gudiña ou co colapso esta semana na estación de Chamartín.

Así mesmo, Prado asegurou que era un pracer volver á Festa do Peixe de Bande, acompañada de grandes compañeiras como Sandra Quintas e Ana Vázquez, “dous grandes referentes do que son as políticas do PP”.

Mentres, Quintas asegurou que foi “un orgullo” a visita da secretaria xeral do PPdeG a unha celebración que “non é unha simple festa gastronómica, senón que é o resultado das tradicións e da identidade de Bande como pobo”.

O PPdeG destaca o 19 % máis de investimento na formación do persoal contra incendios forestais para o período 2025-2026

Os deputados do Grupo Popular Ángel Rodríguez e Carmen Pomar visitaron hoxe a base da unidade operativa da brigada de bombeiros forestais de Ames e destacaron que a Xunta investirá entre os anos 2025 e 2026 preto de 1,8 millóns de euros na formación e adestramento do persoal dos servizos de prevención de incendios forestais, o que supón un incremento do 19 por cento respecto do bienio anterior.

A Xunta vén de investir case 75.000 euros na mellora desta nova base, unhas obras que consistiron esencialmente no acondicionamento de vestiarios, duchas, zonas de descanso, almacéns para material e instrumental de traballos, ademais dos recintos para gardar os vehículos, co obxectivo de favorecer a conciliación entre o descanso e o traballo dos bombeiros e os axentes forestais.

Os deputados trasladaron aos profesionais do servizo de prevención de incendios forestais o esforzo que a Xunta vén realizando para a formación e adestramento deste persoal, que terán á súa disposición máis de 3.500 cursos e accións formativas ao longo de 2025 e 2026, tal e como se recolle no plan de formación integrado dentro do Pladiga.

O Plan de formación e adestramento para o persoal do Servizo de prevención e defensa contra incendios (SPIF) estruturase en seis programas. Entre as accións que se acometerán destacan os cursos monográficos sobre cuestiones relacionadas coa prevención e extinción de incendios forestais, así como a posibilidade de desenvolver un itinerario formativo profesional, que suporá a preparación diversificada e por grupos de categorías profesionais desde unha cualificación inicial ata a especialización do persoal.

Para rematar, os deputados populares trasladaron o agradecemento de toda a sociedade galega polo labor que estas brigadas forestais desenvolven no día a día na defensa dos montes galegos, tendo presente que o vindeiro 1 de xullo comezará a época de perigo de alto risco de incendios forestais.

O PPdeG aposta polo bono turístico como ferramenta para impulsar o turismo interior en Ourense

Os deputados do Grupo Popular Miguel Viso e Víctor Baladrón salientaron hoxe a importancia do bono turístico que a Xunta lanzará o vindeiro mes de xullo para a desestacionalización do turismo na Comunidade galega, sobre todo nunha provincia como a de Ourense, que destaca pola chegada de visitantes sobre todo fora da tempada estival.

Nunha visita á casa de turismo rural A Gandarela de Cenlle, en compañía da alcaldesa, Rebeca Sotelo, os deputados populares destacaron o papel do turismo como motor de desenvolvemento, de fixación de poboación e de xeración de oportunidades no rural. Deste xeito, subliñaron “a necesidade de seguir apoiando este sector que amosa, cada día, a mellor cara de Galicia: hospitalidade, patrimonio, paisaxe e identidade”.

Miguel Viso e Víctor Baladrón referíronse, en concreto, á nova convocatoria do bono turístico que a Xunta lanzará o vindeiro mes de xullo, a través do que se prevé mobilizar arredor de 2,5 millóns de euros neste sector ao longo do vindeiro outono a través do cofinanciamento de estadías e actividades. Os interesados poderán descargarse os bonos a través da web www.bonoturismo.gal, que terán un importe de 150 euros, dos que a Xunta financiará 60 euros.

IMPULSO AO TURISMO INTERIOR

Durante a visita, Miguel Viso destacou que “apostar polo turismo é apoiar directamente a quen mantén abertas as portas, crea emprego e ofrece experiencias que nos conectan co noso propio territorio”. Pola súa banda, Víctor Baladrón salientou que “non se trata só de cifras, senón de garantir que negocios que levan anos resistindo teñan agora un impulso real para continuar”.

Pola súa banda, Rebeca Sotelo puxo o foco na importancia deste tipo de programas para os concellos pequenos. “O turismo achega vida, actividade e esperanza a moitas zonas do interior, e iniciativas como esta do bono turístico axuda a que máis persoas descubran todo o que temos para ofrecer e contribúen a que os negocios locais poidan mirar ao futuro con máis seguridade”, apuntou.

O PPdeG destaca as novas axudas de 30,5 M€ para mozos agricultores e modernización de explotacións a partir de xullo

Os deputados do Grupo Popular Nicole Grueira e Enrique Barreiro avanzaron hoxe que a partir de mediados do vindeiro mes de xullo poderanse solicitar as axudas para a incorporación de agricultores mozos entre 18 e 40 anos ou a modernización ou mellora de explotacións agrarias. “Son un claro incentivo e mostra da aposta da Xunta pola incorporación de mozos ao rural, un rural vivo e que día tras día conta con máis xente nova á fronte das explotacións”, manifestaron.

Nunha visita ás obras que se están a facer na granxa Adriago, S.L. no concello lucense de Friol, que se levan adiante gracias a estas axudas da Xunta para facilitar a implantación de mozos ao sector agrogandeiro galego, os deputados populares lembraron que o pasado ano a Xunta distribuíu case 46 millóns de euros entre 832 proxectos, dos que 370 eran plans de mellora para grandes e pequenas explotacións, 320 solicitudes de incorporación de mozos e 133 expedientes de novos agricultores de entre 41 e 55 anos.

DÚAS LIÑAS DE AXUDA

De cara ao presente ano 2025, Nicole Grueira e Enrique Barreiro avanzaron que a Xunta repartirá 30,5 millóns de euros para apoiar ás persoas agricultoras mozas. En concreto, explicaron que haberá dúas liñas de axuda: unha primeira, dotada con 16 millóns de euros, destinada ao establecemento de agricultores mozos; e a segunda, con 14,5 millóns de euros, para a realización de investimentos en modernización ou mellora de explotacións agrarias.

A estas dúas liñas, sumaranse 5,5 millóns de euros cos que a Xunta financiará os plans de mellora non aprobados aos mozos que resultaron beneficiarios da convocatoria de 2024, co obxectivo de facilitar o inicio da súa actividade produtiva e favorecer que poidan completar o seu investimento na explotación.

Entre os requisitos para acceder ás axudas para a incorporación de mozos á actividade agrogandeira, os interesados deberán presentar un plan empresarial, permanecer na actividade agraria cinco anos desde o pago do final da axuda e participar no programa de titorización que presta a Consellería do Medio Rural a persoas agricultoras mozas.