O Grupo Popular solicita no Parlamento galego unha homenaxe a José Manuel Costas Capelo, profesor e experto no ámbito da náutica-pesqueira

O Grupo Popular solicitará no Parlamento de Galicia a celebración dun acto de homenaxe en lembranza e recoñecemento do capitán José Manuel Costas Capelo, profesor da Universidade Laboral de A Coruña que marcou o norte de moitas xeracións náutico-pesqueiras e proxectou a súa vocación marítima moito máis alá das aulas, xa que a súa preocupación pola formación e a seguridade do persoal náutico-pesqueiro foi o fundamento da súa vida.

Nun encontro con ex profesores e ex alumnos de Costas Capelo na Universidade Laboral, o deputado popular Jesús María Fernández Rosende anunciou hoxe en A Coruña a presentación desta iniciativa no Parlamento galego a través da que se pretende recoñecer a importancia do traballo realizado por este experto no sector náutico-pesqueiro e na mariña mercante de Galicia.

Nado no barrio vigués de Coia e coruñés de adopción, José Manuel Costas Capelo obtivo o título da Escola Oficial de Náutica de A Coruña en 1964 e desde 1972 foi profesor de Navegación e Meteoroloxía da Universidade Laboral coruñesa. Ademais, ao longo da súa vida foi un dos maiores impulsores da Asociación Española de Titulados Náutico-Pesqueiros (Aetinape).

SENTIMENTO DE ORFANDADE

Fernández Rosende afirmou que “o recente pasamento de Costas Capelo espertou no mundo académico relacionado coa pesca e coa mariña mercante un fondo sentimento de orfandade, porque somos conscientes de que con el foise unha das principais fontes de coñecemento do sector, a cuxa dimensión técnica contribuíu de xeito decisivo ao longo da súa vida”.

En concreto, o deputado popular lembrou as aportacións feitas por José Manuel Costas Capelo en materia de seguridade marítima para a elaboración dunha iniciativa, que foi aprobada no Parlamento galego, relacionada coa sinalización das bateas, a prohibición de que os buques pesqueiros faenen e naveguen en condicións meteorolóxicas extremas, a necesaria incorporación de botes de rescate en substitución das balsas salvavidas para aqueles buques que faenen en augas xélidas ou a substitución das bengalas por luces LED.

O PPdeG levará aos concellos e deputacións unha moción en defensa do estado democrático e de dereito e en repulsa da corrupción

O PPdeG levará a todos os concellos galegos e deputacións unha moción en defensa do estado democrático e de dereito e en repulsa da corrupción coa que pretenden dicir “basta xa” á complicidade do PSOE galego e do BNG ante os feitos “extremadamente graves” que envolven ao Goberno de Sánchez.

Anunciouno esta mañá a secretaria xeral do partido, Paula Prado, na visita que realizou a Monforte de Lemos. Unha cidade que definiu como “zona cero en Galicia da corrupción do PSOE” logo de que o informe da UCO sobre a trama de Koldo lle dedicase catro páxinas ante un presunto amaño na contratación dunha obra.

“O asesor de José Luis Ábalos levou a cabo negociacións para adxudicar unha obra de emerxencia do tramo ferroviario Lugo-Monforte a través dun contrato público de Adif por valor de 1,5 millóns de euros”, explicou incidindo en que isto aconteceu “nun momento no que Óscar Puente xa era ministro de Transportes”. Ademais, apuntou, cando se empezaron a facer estas prácticas, a lucense Isabel Pardo de Vera presidía a entidade pública que administra as infraestruturas ferroviarias.

A número dous dos populares galegos criticou que o PSOE, que goberna neste concello, permita que “se dane a imaxe de Monforte e da provincia de Lugo” desta maneira e afea aos socialistas que permitisen que Puente fose condecorado como ‘Veciño do Ano’ na cidade de Lugo e que Pardo de Vera, implicada en varias conversas, fose pregoeira das festas de Monforte.

“É indecente que a corrupción campara ás súas anchas polo PSOE durante tanto tempo e difícil de crer que ninguén soubera nada”, asegurou sacando a relucir as imaxes de Santos Cerdán paseando en catamarán pola Ribeira Sacra en compañía do alcalde de Monforte e presidente da Deputación de Lugo, José Tomé.

Pero para Paula Prado “máis indecente aínda” é que, ante todo isto, Besteiro e o PSOE galego, coa complicidade do BNG, “sigan ríndolle as gracias a Sánchez e non pidan explicacións nin eleccións”. De aí que considere que é o momento de dicir “basta xa” ante toda esta corrupción socialista.

ELENA CANDIA: “PEDIMOS EXPLICACIÓNS E CONTUNDENCIA”

A secretaria xeral do PPdeG estivo acompañada tanto pola líder local do partido en Monforte, Katy Varela, como pola presidenta provincial do PP de Lugo, Elena Candia, que tamén considera “moi preocupantes” os feitos que se están coñecendo e en especial por estar vinculados ao ámbito das infraestruturas, no que o Goberno de Sánchez leva demasiado tempo castigando aos lucenses.

“O ano previo á moción de censura a Mariano Rajoy, Lugo tiña consignado nos Presupostos Xerais do Estado un investimento que superaba os 1.000 millóns de euros para conectarnos coa Alta Velocidade. Pero despois da moción de censura quedamos cunha licitación que non chegou nin é metade”, denunciou.

Candia criticou o silencio do líder dos socialistas na provincia, José Tomé, sobre estes feitos e afeoulle que “aplauda e premie a quen castiga aos lucenses no eido das infraestruturas”.

“Os representantes do PSOE en Lugo, como os socialistas doutros lugares de España, deberían condenar todo o que está pasando”, concluíu facendo un chamamento á “contundencia e a exemplaridade”.

O APOIO DO GOBERNO GALEGO A MONFORTE

Pola súa banda, Katy Varela, aparte de agradecer o apoio do partido tanto a nivel autonómico como provincial, agradeceu especialmente o apoio do Goberno galego á cidade de Monforte “con investimentos millonarios” como os do hospital comarcal.

E neste sentido pediu ao Goberno local “maior colaboración institucional” coa Xunta para que todos os veciños se poidan beneficiar das axudas que a Administración autonómica pon a disposición dos concellos en diferentes eidos.

O Parlamento de Galicia demanda ao Concello de Vigo que faga autocrítica e asuma as súas responsabilidades na xestión das praias

O Parlamento de Galicia aprobou hoxe a proposición non de lei do Grupo Popular a través da que se demanda ao Concello de Vigo que faga autocrítica e asuma as súas responsabilidades na xestión das praias, desenvolvendo cantas accións sexan precisas para acadar os estándares de calidade nas augas que permitan mellorar a calidade dos areais vigueses, abandonando a confrontación e apostando polo diálogo e a cooperación institucional.

O deputado popular Miguel Fidalgo lamentou que “a perda da bandeira azul na praia de Samil non é un feito illado, senón a consecuencia directa dunha política ambiental fracasada, dunha falta de responsabilidade institucional e dunha xestión baseada no bulo, a desinformación e a propaganda, en lugar de nos feitos”. Neste sentido, deixou claro que “a responsabilidade da perda da bandeira azul na praia de Samil é de maneira exclusiva do goberno municipal de Vigo, encabezado polo señor Abel Caballero”.

DURO GOLPE Á IMAXE DA CIDADE

“Perder ese distintivo de calidade foi un duro golpe para a imaxe da cidade de Vigo”, afirmou o deputado popular, quen asegurou que “estamos ante unha consecuencia lóxica dunha mala xestión municipal”. Neste sentido, explicou que a bandeira azul se outorga polo cumprimento estrito de estándares ambientais, de calidade da auga, de seguridade e de servizos, “algo responsabilidade exclusiva do Concello que non o fixo por deixadez, por desinterese e por inacción”.

Miguel Fidalgo criticou que, “en lugar de asumir os seus erros, o Goberno municipal de Vigo sempre busca un culpable, e neste caso é a Xunta, a mesma Xunta que fixo un dos maiores investimentos da súa historia nunha obra hidráulica coa construción da EDAR do Lagares, que xestiona o Concello”.

“O obxectivo desta obra foi dotar a Vigo dunha depuradora con capacidade suficiente para tratar todas as augas residuais da cidade, pero, para que este sistema funcione correctamente, a auga residual debe chegar á depuradora, ser tratada axeitadamente e, a continuación, ser vertida á ría a través dun emisario submarino, nun punto seleccionado de xeito estratéxico para que non afecte nin ás actividades económicas da zona nin á praia”, indicou.

MELLORAS NA REDE DE SANEAMENTO

Porén, o deputado popular afirmou que “o problema de Samil ocorre, principalmente, cando as augas residuais non chegan á depuradora debido aos alivios na rede municipal de saneamento”, polo que sinalou que “de pouco vale todo o esforzo inversor da Xunta se o Concello non inviste o suficiente na súa rede de saneamento e na súa xestión para asegurar que todas as augas residuais e contaminantes sexa conducidas cara á EDAR”.

Para rematar, Miguel Fidalgo criticou que o alcalde de Vigo e desde o Concello “puxeran en dúbida o traballo técnico e rigoroso dos funcionarios da Xunta, insinuando que os resultados serían diferentes se as análises as fixese o propio Concello”. “Lamentablemente, as faltas de respecto e os ataques aos funcionarios na esquerda de Galicia non son nada novo”, dixo.

O Parlamento de Galicia pide ao Goberno de España que impulse reformas lexislativas para poñer freo á okupación de vivendas

O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se solicita ao Goberno de España que impulse as necesarias reformas lexislativas que axuden a poñer freo ao fenómeno da okupación de vivendas. En concreto, pídese que modifique as normas penais e procesuais vixentes para endurecer as penas por okupación de vivenda ou inmobles, evitar a inscrición no padrón municipal dun okupante ilegal e modifique a lexislación tributaria para a redución de obrigacións contributivas de arrendadores que xustifiquen a non percepción de rendas.

A portavoz popular de Vivenda, María Deza, afirmou que “tanto os datos do Ministerio do Interior como do Consello Xeral do Poder Xudicial veñen confirmar a afirmación categórica dos expertos de que as okupacións de vivendas non están a baixar en España, senón máis ben soben a un ritmo superior ao 5 por cento”. “Sobre todo poñen o foco na inquiokupación, que abarca aqueles inquilinos que deixaron de pagar a renda de forma voluntaria e premeditada e que non entran dentro das estatísticas oficiais de denuncias”, anotou.

BAIXAN OS DESAFIUZAMENTOS

Ademais, a estas cifras hai que engadir aqueles casos que non se denuncian e nos que cada vez máis propietarios afectados optan por vías alternativas para recuperar canto antes a posesión dos seus inmobles, ben sexa a través da negociación e o pago aos okupas ou contratando empresas especializadas en desaloxos.

“E mentres as estatísticas de okupación seguen á alza, as dos desafiuzamentos manteñen a tendencia á baixa que viñeron mostrando nos últimos tempos”, dixo a portavoz popular. En concreto, explicou que, segundo o Consello Xeral do Poder Xudicial, o número de desafiuzamentos practicados entre o 1 de xaneiro e o 31 de marzo deste ano diminuíu un 1,2 por cento respecto ao mesmo período de 2024.

Diante destes datos, María Deza lamentou que “o problema da okupación ilegal non só persiste, senón que medra ano tras ano, tanto en Galicia como no conxunto de España”, polo que considerou necesario que o Goberno de España adopte unha serie de medidas.

MEDIDAS CONCRETAS

En primeiro lugar, pediu que o Goberno central endureza as penas para quen okupa ilegalmente unha vivenda, sobre todo cando hai detrás bandas organizadas. “Ademais, é necesario que se establezan mecanismos que permitan á policía actuar de xeito inmediato, desaloxando en 24 horas en casos de flagrante delito”, apuntou.

En segundo lugar, demandou que “se evite que a okupación ilegal se vexa amparada por trámites administrativos, como a inscrición no padrón”. Así, dixo que “un okupante ilegal non pode beneficiarse de dereitos nin obter recoñecementos oficiais pola súa okupación dunha vivenda allea, ao tempo que os propios concellos deben dar de baixa de oficio estas inscricións tan pronto teñan coñecemento da situación”.

Por último, a portavoz popular considerou necesario unha modificación da normativa tributaria para que quen non percibe renda algunha porque a súa vivenda está okupada non teña que seguir soportando as mesmas obrigas fiscais.