O PPdeG salienta que o futuro protocolo de prevención fronte a situacións de violencia para traballadoras do SAF mellorará a seguridade e tranquilidade coa que se presta este servizo

Os deputados do Grupo Popular Ethel Vázquez e Jesús María Fernández Rosende salientaron hoxe que o futuro protocolo de prevención fronte a situacións de violencia ou agresións para as traballadoras do servizo de axuda no fogar (SAF), no que están a traballar conxuntamente a Xunta e a Fegamp, permitirá mellorar a seguridade e tranquilidade coa que se presta este servizo en Galicia.

“A pesar de tratarse dun servizo de competencia municipal, o Goberno galego está firmemente comprometido coa prestación deste importante servizo a máis de 23.000 galegos e en garantir a máxima seguridade ás traballadoras que o prestan”, manifestou Ethel Vázquez. Así, afirmaron que neste momento estase a recompilar información sobre os procesos, funcións e tarefas das traballadoras do SAF co obxectivo de avanzar na redacción dun borrador que será presentado a todas as partes implicadas na prestación deste servizo.

USUARIOS MULTIPLICADOS POR 8

Neste sentido, os deputados destacaron que o numero de usuarios do servizo de axuda no fogar en Galicia multiplicouse por 8 desde 2009, “un incremento de beneficiarios que non se viu acompañado por unha suba das aportacións do Goberno de Pedro Sánchez para a prestación dos servizos de dependencia”. En concreto, criticaron que, mentres a Xunta incrementou un 12 por cento o orzamento destinado á dependencia, chegando a sufragar na actualidade máis do 65 por cento do custo, o Goberno central abona menos do 34 por cento, cando a lexislación vixente obrígao a aportar o 50 por cento.

Fernández Rosende considerou “indignante que mentres o Goberno de Pedro Sánchez rebaixou en Galicia a súa aportación para a prestación da dependencia do 40 ao 34 por cento entre os anos 2023 e 2024, xa se comprometeu co País Vasco a asumir o 50 por cento da dependencia”.

“A esta situación súmase os máis de 2.500 millóns de euros que o Goberno central xa debe a Galicia pola prestación da dependencia, unha cifra resultante da suma de todo o tempo que leva sen abonar o 50 por cento do custo da prestación deste servizo que lle corresponde por lei”, apuntaron.

O PPdeG salienta que a Xunta dispón de axudas de ata 200.000 euros para os viticultores afectados polos incendios forestais

Os deputados do Grupo Popular Nicole Grueira, Enrique Barreiro e Raquel Arias, acompañados do alcalde de Pantón, José Luís Álvarez, visitaron hoxe distintas zonas de viñedo deste concello lucense afectadas polos incendios forestais e salientaron “a axilidade e o forte compromiso da Xunta coa rehabilitación dos espazos que resultaron queimados, que se traduce en que calquera produtor afectado polo lume pode acceder ata un máximo de 200.000 euros de subvención para recuperar a súa explotación, ademais de 12.700 euros por hectárea afectada polos incendios”.

Os deputados populares contrastaron “o importante esforzo económico que realiza a Xunta para paliar as consecuencias dos incendios forestais coas axudas ridículas que o Goberno de Pedro Sánchez porá enriba da mesa: un máximo de 10.000 euros de axuda directa por explotación e o abono dunha parte do seguro agrario”.

“Pero é que seguimos esperando a que o Goberno de España cumpra a súa promesa de actualizar as contías das axudas para, en principio, adecualas aos danos que causaron os incendios, xa que os importes que se concederán son os que aparecen nunha normativa que data de hai 20 anos e nunca se actualizou”, sinalou Nicole Grueira.

DILIXENCIA

Pola súa banda, Raquel Arias agradeceu ao operativo de loita contra os incendios, os veciños e voluntarios que participaron na extinción dos incendios, e lembrou que tanto desde o Concello de Pantón como desde o de Sober se axudará aos afectados na tramitación das axudas.

Así mesmo, manifestou que “esperamos que o Goberno de Pedro Sánchez sexa máis dilixente coas axudas para os afectados polos incendios forestais en Galicia que o está sendo para paliar os danos provocados hai catro anos pola erupción do volcán na illa da Palma: a día de hoxe, milleiros de familias seguen malvivindo en aloxamentos provisionais, pequenos empresarios seguen esperando unha resposta ás súas demandas e os agricultores e gandeiros continúan sen recibir as compensacións polos danos que sufriron as súas explotacións”.

“O mínimo que lle pedimos ao Goberno de Pedro Sánchez é un esforzo económico semellante ao que está a facer o Goberno galego para axudar aos afectados polos incendios, que dispuxo de inmediato dun amplo paquete con oito liñas de axudas destinadas a explotacións agrícolas, gandeiras, forestais e apícolas”, dixo o deputado Enrique Barreiro.

O PPdeG contrapón a “máxima prioridade” que se lle dá á vivenda en Galicia fronte aos “anuncios baleiros” e as “improvisacións” do Goberno central

O PPdeG sitúa a vivenda como unha das “máximas prioridades” do Goberno galego nesta lexislatura e contrapón este compromiso “ambicioso” e “decidido” fronte aos “anuncios baleiros” e as “improvisacións” dun Goberno central cuxa política neste ámbito é “inexistente”.

Así o manifestaron hoxe a secretaria xeral Paula Prado e o presidente provincial do PP de Ourense, Luis Menor, durante a clausura da xornada informativa organizada polo partido en Barbadás para abordar, desde distintas perspectivas e con especial atención á mocidade, o problema do acceso á vivenda.

“É unha obriga buscar solucións reais, pragmáticas e aplicables ante este problema”, sinalou ao respecto a número dous populares galegos ao tempo que poñía en valor as “receitas eficaces” que se levan aplicando desde hai anos en Galicia e entre as que destacou o compromiso do presidente Alfonso Rueda de duplicar o parque público de vivenda ata chegar ás 8.000.

Entre as medidas pensadas especificamente para a mocidade, e dada a importancia que teñen para unha provincia como Ourense, citou as axudas dirixidas a menores de 36 anos para a adquisición da súa primeira vivenda en concellos de menos de 10.000 habitantes. Unhas axudas das que se concederon un total de 49 nesta provincia e 15 delas só no concello de Xinzo de Limia.

“Así é como se fai unha política seria, realista e apegada ao territorio”, subliñou ao tempo que criticaba “as políticas de vivenda inexistentes ou, no mellor dos casos, erradas”, do Goberno central nesta materia. Puxo como exemplo a Lei de Vivenda, que “venderon como remedio para todos os males e só conseguiu agudizalos”.

De aí que demandase ao Executivo estatal, como xa ten reivindicado o presidente Alfonso Rueda en numerosas ocasións, a cesión das vivendas que a Sareb ten en Galicia, un novo Plan Estatal de Vivenda “eficiente e dialogado” e máis seguridade para os propietarios ante a ocupación ilegal.

Paula Prado concluíu a súa intervención animando a todas as administracións a “remar na mesma dirección” e evocando as palabras do presidente do PPdeG, quen no seu día sinalou o camiño a seguir afirmando que “en Galicia somos menos de anuncios baleiros e máis de chaves en man dos galegos e galegas”.

LUIS MENOR: “O GOBERNO DE RUEDA DEMOSTROU UNHA GRAN CAPACIDADE DE RESPOSTA E AXILIDADE ANTE A PERDA DE VIVENDAS NOS LUMES”

Pola súa banda, Luis Menor afirmou que os partidos políticos e os gobernos teñen “a imperiosa obriga” de ofrecer solucións reais a un problema como a vivenda, “que leva camiño que converterse no maior obstáculo de progreso da sociedade do século XXI”.

Nesta liña subliñou o “absoluto compromiso” do Goberno de Alfonso Rueda para combater as dificultades de acceso á vivenda, cunha folla de ruta “ben definida” e que terá o seu impacto positivo en toda a cidadanía, “contribuíndo a que haxa vivenda dispoñible, sexa nas cidades, vilas e sobre todo no rural”.

O presidente provincial incidiu no mundo rural, salientando “a gran capacidade de resposta” da Xunta de Galicia fronte aos lumes de agosto, que provocaron a perda de preto de 200 vivendas. O Goberno galego atendeu coa máxima axilidade ás persoas que perderon os seus fogares e propiedades ofrecendo unha ampla cobertura de axudas para inmobles habituais, rehabilitacións, enxoval doméstico ou segunda residencia. “E o que máis importa é que non só comezaron a tramitarse, senón que xa empezaron a pagarse”, dixo.

SEGURIDADE XURÍDICA E PLANS DE AXUDA EN VIVENDA

A xornada comezou coa intervención do coordinador da Área de Vivenda e Urbanismo do PPdeOU, Benito Iglesias, quen subliñou a necesidade de derrogar a Lei Estatal de Vivenda “para dotar de seguridade xurídica a propietarios e inquilinos e mobilizar vivenda baleira cara o mercado de aluguer”.

Mentres, a concelleira do grupo popular no Concello de Ourense, Sonia Ogando, desmontou cunha análise xurídica o mito da recualificación urbanística de terreos tras un incendio forestal, ao tempo que repasou as axudas impulsadas pola Xunta en materia de vivenda tralos devastadores lumes de agosto.

Pola súa banda, Pilar Fernández, directora territorial en Ourense da Consellería de Vivenda e Planificación de Infraestruturas, debullou ás liñas de axuda para facilitar o acceso á vivenda da mocidade, así como para os propietarios de pisos baleiros que queiran incorporalos ao mercado de aluguer. Axudas, dixo que abren o camiño a un fogar digno, “porque ofrecer vivenda tamén é ofrecer futuro”.

O Parlamento de Galicia demanda seguir reforzando o desenvolvemento educativo e persoal do alumnado de etnia xitana

O Parlamento de Galicia aprobou hoxe a proposición non de lei do Grupo Popular, que non contou co voto favorable do BNG, a través da que se solicita á Xunta de Galicia que siga reforzando as liñas de actuación dirixidas a favorecer o desenvolvemento educativo e persoal do alumnado de etnia xitana, promovendo a súa inclusión e loitando contra os prexuízos e estereotipos que aínda poidan existir.

O deputado popular Raúl Santamaría salientou que “Galicia deu pasos firmes, recoñecidos por entidades e pola propia comunidade educativa na inclusión do alumnado de etnia xitana, e queremos que esa senda se consolide e reforce”.

VANGARDA EN INCLUSIÓN

Neste sentido, lembrou a posta en marcha pola Xunta da Estratexia de Inclusión Educativa 2030, “que marca un modelo educativo inclusivo, equitativo e de calidade, e que inclúe iniciativas pioneiras como o proxecto piloto Impulso Mentor dirixido especificamente ao alumnado de etnia xitana”.

“Galicia debe continuar sen vangarda en inclusión, de xeito que ningunha alumna nin alumno quede atrás por cuestións de etnia, orixe ou condición social”, incidiu o deputado popular, quen recordou que “o noso sistema educativo é recoñecido pola súa calidade, pero queremos que tamén o sexa pola súa humanidade e pola súa capacidade de integrar a todos”.

O Parlamento de Galicia solicita ao Goberno central que permita a participación activa das comunidades autónomas na Conferencia Mundial sobre Políticas Culturais que terá lugar en Barcelona

O Parlamento de Galicia aprobou hoxe a proposición non de lei do Grupo Popular, que non foi apoiada polo PSdeG, a través da que se solicita ao Goberno central que reconsidere a participación das comunidades autónomas na Conferencia Mundial sobre Políticas Culturais e Desenvolvemento Sustentable 2025 (Mondiacult), outorgándolles a posibilidade de participar activamente con dereito a voz e voto.

A portavoz de Cultura do Grupo Popular, Carmen Pomar, manifestou que esta conferencia mundial é “unha ocasión única para facer balance do que se ten logrado a escala nacional, rexional e internacional trala adopción da Declaración de Mondiacult, que veu definir un conxunto de dereitos culturais que deben estar garantidos”.

“Ante unha oportunidade de gran calado como esta, as comunidades autónomas, como posuidoras das competencias exclusivas nas principais materias culturais, deberían participar activamente, non só formulando achegas senón tamén tomando parte no proceso de toma de decisións”, sinalou Carmen Pomar.

Porén, lamentou que “o Ministerio de Cultura optou unicamente por convidas ás comunidades autónomas a participar sen voz nin voto, e unicamente de xeito indirecto a través dunha caixa de correo electrónica”.

“Os agravios do Goberno central pretenden, unha vez máis, silenciar ás comunidades autónomas impedindo, neste caso, a súa participación activa nunha conferencia mundial sobre políticas culturais que se vai celebrar, mal que lle pese aos independistas cataláns, en Barcelona”, criticou a portavoz popular, quen avanzou que Galicia estará presente coa presenza do conselleiro de Cultura e o director xeral de Cultura.

O Parlamento pide ao Ministerio de Agricultura que suavice os requisitos e tramitación das axudas para a promoción do viño en terceiros países

O Parlamento de Galicia aprobou hoxe a proposición non de lei do Grupo Popular, que non contou co voto favorable do PSdeG, a través da que se demanda ao Ministerio de Agricultura, Pesca e Alimentación que suavice os requisitos e a tramitación das axudas da medida da intervención sectorial do viño na liña de promoción do viño en terceiros países, tanto no ámbito do programa coas actuacións a desenvolver como nas penalizacións sobre os cambios desta previsión de actividade.

O deputado popular Juan Casares destacou “a evidente mellora experimentada durante as últimas décadas polo sector vitivinícola galego, sobre todo no que atinxe aos procesos de elaboración e á calidade do produto final, que, acompañado do dinamismo dos consellos reguladores, posibilitou un crecemento notable das vendas de viños de calidade tanto na Unión Europea como en terceiros países”.

Porén, lamentou “a debilidade da capacidade exportadora do sector vitivinícola galego, con pouco máis de 140.000 hectolitros exportados na campaña 2024-25, o que representa o 2,25 por cento do conxunto de España se falamos de viños con selo de calidade diferenciada”.

CONDICIÓNS ESTRITAS

Juan Casares lembrou que “as políticas agrarias das administracións públicas, nomeadamente a Unión Europea, apoian os investimentos en viñas e adegas con diversas axudas desde hai máis de 20 anos”. En concreto, referiuse á axuda máxima do 50 por cento destinada á intervención nas actividades de promoción e comunicación en terceiros países, que entre os anos 2018 e 2025 supuxeron en Galicia un gasto público total de 9,61 millóns de euros, cun importe medio por beneficiario que pasou dos 39.000 euros en 2018 aos 71.000 en 2025.

“As estritas condicións de concesión destas axudas, xa que os beneficiarios deben presentar un programa coas actuacións a desenvolver, o que esixe un nivel de previsión e de capacidade de xestión que poucas adegas galegas posúen por tamaño e recursos, así como as penalizacións sobre os cambios destes programas aprobados, derivaron nunha tendencia á baixa do número de expedientes aprobados, que pasaron de 25 en 2018 a 18 en 2025, xunto cunha concentración de beneficiarios na denominación de orixe Rías Baixas”, explicou.

Por este motivo, Casares considerou necesario apoiar a demanda que xa trasladou a Consellería do Medio Rural ao Ministerio de Agricultura para que faga a axuda “máis sinxela e accesible, menos esixente e cun orzamento maior, de xeito que poidan acollerse un maior número de adegas e evitar a concentración de beneficiarios que se presentan todos os anos”.

O Parlamento de Galicia demanda incentivar a promoción dos produtos de proximidade nos mercados locais galegos

O Parlamento de Galicia aprobou hoxe a proposición non de lei do Grupo Popular, que non contou co voto favorable do PSdeG, a través da que se demanda incentivar a promoción de produtos de proximidade nos mercados locais dos concellos galegos mediante apoios e subvencións específicas dirixidas a esta finalidade.

A deputada popular Nicole Grueira expresou “o firme compromiso cos produtos de calidade diferenciada e de proximidade, xa que son os mellores embaixadores da Galicia calidade dentro e fora das nosas fronteiras”. “Son símbolos dunha Galicia que conserva, que innova e que comparte, e dunha Galicia que hai que coidar”, indicou.

“É importante mercar e consumir produtos de proximidade polo que representan e polas múltiples vantaxes que ofrecer, tanto para os consumidores; como para a transparencia sobre a súa orixe, prácticas de produción ou trazabilidade; para o medio ambiente; e para o rural galego, porque cada vez que compramos un produto de calidade diferenciada estamos apoiando ás explotacións agrogandeiras, ás pequenas industrias agroalimentarias e aos profesionais que os traballan e manteñen vivos os nosos territorios”, manifestou.

FEIRAS TRADICIONAIS

Nicole Grueira considerou “unha prioridade promover a produción e o consumo destes produtos de proximidade e calidade diferenciada” e referiuse, en concreto, ao “compromiso firme da Axencia Galega da Calidade Alimentaria, que traballa para incentivar a súa promoción e divulgación nos mercados locais dos nosos concellos a través de apoios e subvencións específicas, que só neste ano 2025 ascenderon a 1,2 millóns de euros”.

Para rematar, a deputada popular afirmou que “se hai un espazo perfecto para poñer en valor os produtos locais e de proximidade son as feiras tradicionais, que forman parte da nosa vida comercial, cultural e social, e son un escaparate único para promocionar os produtos agroalimentarios galegos”. “Son lugares onde a xente proba, fala cos produtores e coñece a súa historia e comprobade primeira man o que significa Galicia Calidade”, sinalou.

O PPdeG insta a Inés Rey a “desmarcarse” de Pedro Sánchez pedindo a dimisión da ministra de Igualdade e condenando a corrupción do PSOE

O PPdeG insta á alcaldesa socialista da Coruña, Inés Rey, a demostrar o seu feminismo e “desmarcarse” de Pedro Sánchez pedindo a dimisión da ministra de Igualdade e esixindo “dunha vez por todas” explicacións polas tramas de corrupción do seu partido.

En declaracións aos medios esta mañá e antes de participar nunha reunión con representantes do PP na cidade da Coruña, a secretaria xeral Paula Prado acusou á rexedora herculina de ser “unha das máis fieis soldados sanchistas” e cualificou de “inexplicable” que “unha alcaldesa e muller siga mantendo o seu apoio férreo, sen unha crítica, ao Goberno central despois dos escándalos que coñecemos de corrupción e contra as mulleres”.

Recordou neste sentido que “non hai nada menos feminista” que a Lei do ‘só si é si’, con “máis de 1.500 agresores sexuais beneficiados”; que “pretender combater a prostitución rodeándote de compañeiros que a consumen” ou que “comprar en AliExpress unhas pulseiras antimaltrato defectuosas”.

A número dous dos populares galegos reivindicou, en contraposición á situación interna do PSOE, a “unidade” que caracteriza ao PPdeG: “O noso proxecto é común e grazas a iso somos o partido con máis apoio nos concellos, no Parlamento galego, no Congreso, no Senado e no Parlamento Europeo”.

Proba disto é, tal e como subliñou, que o PP foi quen gañou as eleccións municipais de 2023. “Despois de máis de dous anos de lexislatura, demostrouse que os pactos de perdedores non están para gobernar, senón para manterse no poder. Hai infinidade de cuestións que son unha prioridade para os veciños e veciñas da Coruña e non están resoltas”, engadiu.

“A Coruña podería estar falando de prosperidade da man dun alcalde como Miguel Lorenzo, pero no seu lugar fala das pelexas entre PSOE e BNG, de presupostos aprobados logo de cuestións de confianza e da corrupción que emerxe do goberno municipal”, incidiu a secretaria xeral do PPdeG.

Para concluír, dixo que na Coruña dixo que “dá gusto ver como están traballando todos os compañeiros nas diferentes cámaras”. “Seguimos traballando para que en algo máis de ano e medio esta cidade teña un goberno do Partido Popular”, rematou.

“ESTAMOS FARTOS DO NINGUNEO DE SÁNCHEZ AOS CORUÑESES”

Pola súa banda, o líder local dos populares coruñeses explicou que son moitas as promesas incumpridas na cidade por parte do Goberno central “co silencio cómplice de Inés Rey e do BNG” e que, por iso, a través dos seus representantes nas diferentes cámaras, o PP da Coruña “traballará de xeito coordinado para denunciar e reverter eses incumprimentos”.

Miguel Lorenzo apelou así aos deputados autonómicos Gonzalo Trenor e Roberto Rodríguez para que “sigan defendendo á cidade no Parlamento galego” e traballen para “asegurar que os Orzamentos da Xunta para 2026 teñan os fondos necesarios para continuar coa execución de obras como o novo CHUAC, construír novas vivendas e continuar coa tramitación do Monte Mero”.

“A Xunta de Galicia é a única administración que inviste na nosa cidade”, asegurou afeando ao Goberno local a súa “incapacidade” para executar obras públicas que “acumulan retraso tras retraso” e “non adoptar ningunha medida para solucionar o problema da vivenda”.

No que se refire ao labor dos deputados nacionais Álvaro Pérez e Tristana Moraleja e da senadora Rosa Gallego, o líder do PP da Coruña destacou que, grazas ás súas preguntas, esta semana descubriuse que o Goberno central “só ten a 23 persoas contratadas na AESIA cando tiña que haber 80” e confirmouse que a posta en marcha do novo Xulgado de Violencia de Xénero implicará a eliminación dun de Instrución “cando Inés Rei afirmou que conseguira que non se suprimise”.

“Seguiremos preguntando polo atraso na licitación das obras do Estado nos accesos á cidade, como son a gran promesa de Inés Rey, a Cuarta Ronda, o Vial 18 ou a ampliación da Pasaxe”, explicou concluíndo que “non haberá nada disto a pesar dos anuncios da alcaldesa porque non hai Presupostos Xerais do Estado”.

Alberto Pazos denuncia os novos ataques do Goberno central a Galicia deixando a Lugo fora da nova planificación enerxética e con recursos contra a repotenciación eólica e a atención aos dependentes

O portavoz do Grupo Popular, Alberto Pazos, denunciou hoxe os novos ataques realizados polo Goberno central para prexudicar o futuro do sector industrial galego e a atención que reciben as persoas dependentes. En concreto, avanzou que “solicitaremos que a provincia de Lugo non quede fora da nova planificación eléctrica estatal ata 2030”, ao tempo que considerou “incompresible” o recurso de inconstitucionalidade que o Goberno de Pedro Sánchez anunciou para paralizar a repotenciación dos parques eólicos e as homologacións automáticas dos expedientes de dependencia e discapacidade que se realizan en Galicia.

Alberto Pazos lembrou que a nova planificación eléctrica prevista ata 2030 “atende razoablemente as demandas realizadas desde o Goberno galego para as provincias de A Coruña, Pontevedra e Ourense, pero deixa fora e sen a posibilidade de albergar novos proxectos industriais no futuro a toda a provincia de Lugo”.

CASTIGO POLÍTICO A LUGO

“É intolerable que a decisión política e sectaria de vetar a posta en marcha do proxecto de Altri en Palas de Rei, conleve que toda unha provincia como a de Lugo se quede fora do mapa industrial galego, condenándoa a que nos próximos anos non se poida instalar ningunha industria de mediano ou gran tamaño en territorio lucense por falta dun subministro eléctrico axeitado”, manifestou.

Deste xeito, anunciou que desde o Grupo Popular “non imos permanecer parados ante esta situación e desde o Parlamento galego imos solicitar que Lugo non quede á marxe da nova planificación eléctrica estatal”, porque afirmou que esta decisión “só se entende como castigo político a esta provincia, precisamente a provincia á que representa o secretario xeral dos socialistas galegos, que sorprendentemente anunciou a bombo e prato esta decisión do Goberno central como unha gran vitoria para botar abaixo o proxecto de Altri aínda que sexa a costa de enterrar o futuro industrial da súa provincia”.

“Lugo non merece que os seus representantes poñan os seus intereses políticos por enriba dos intereses de todos os lucenses, e o señor Besteiro demostrou o pouco que lle importan os lucenses e o moito que lle debe a Pedro Sánchez para seguir na política galega”, lamentou.

RECURSOS DE INCONSTITUCIONALIDADE

O portavoz popular engadiu que, “se a decisión do Goberno central de deixar a Lugo fóra da planificación eléctrica para os anos 2025-2030 é preocupante, non o é menos o anuncio de que presentará recurso de inconstitucionalidade polos artigos da Lei de acompañamento que aprobamos o pasado ano e que recollen medidas no ámbito da dependencia e do sector eólico”.

Alberto Pazos considerou “incomprensible que o Goberno de Pedro Sánchez vaia presentar un recurso de inconstitucionalidade o proceso de homologacións automáticas dos expedientes de dependencia e discapacidade, unha medida que copiou para implantala a nivel estatal e que nos oito primeiros meses deste ano permitiu que en Galicia se recoñecese o grao de discapacidade sen ter que facer papeleo algún a máis de 9.300 persoas dependentes”.

Neste sentido, criticou que esta medida “non pode paralizarse por unha decisión arbitraria do Goberno de Pedro Sánchez, que parece máis preocupado pola perda de recadación que suporá a implantación destas homologacións automáticas que por axilizar a atención ás persoas dependentes”.

Respecto do recurso de inconstitucionalidade que o Goberno central tamén anunciou contra o proceso de repotenciación dos parques eólicos que está a impulsar a Xunta, Alberto Pazos indicou que esta decisión “paralizará a substitucións dos aeroxeneradores existentes na actualidade por outros de maior potencia, o que permitirá reducir o número de muíños existentes e a conseguinte contaminación visual”.

“Resulta lamentable que, unha vez superadas as trabas xudiciais que bloqueaban o desenvolvemento do sector eólico en Galicia, sexa agora o Goberno de Pedro Sánchez o que torpedee o futuro deste sector ao recorrer unha medida que só busca reducir o impacto ambiental e aumentar os beneficios económicos e sociais na contorna dos parques eólicos”, manifestou.

O portavoz popular anotou que esta decisión demostra que o Goberno central “está máis do lado dos intereses de determinadas promotoras que non estaban de acordo coa decisión da Xunta respecto da repotenciación dos parques eólicos, que do lado dos cidadáns e do coidado do medio ambiente”.

EXPEDIENTE EUROPEO DA AP-9

Alberto Pazos sinalou que estas medidas adoptadas esta semana polo Goberno de Pedro Sánchez coñecéronse “cando aínda estamos asumindo o seu desinterese para rescatar e facer gratuíta a AP-9, aproveitando o ditame da Unión Europea sobre a nulidade das ampliacións das concesións feitas desta autoestrada”. Así, considerou esta decisión “inexplicable cando, segundo o estudo elaborado pola Xunta, o custo do rescate da autoestrada é semellante ao que se deberá abonar polas peaxes na sombra ata o remate da concesión, co agravante de que cada día que pasa o lucro da concesionaria se incrementa, na mesma medida que se incrementa o prexuízo para os galegos e os seus usuarios”.

Diante desta situación, Pazos criticou que o Goberno de España siga sen facer público o expediente aberto pola Comisión Europea en relación á xestión da AP-9. “Estamos a falar dun expediente que se iniciou hai máis de seis anos e do que non sabemos absolutamente nada, a pesar de que Galicia é parte afectada e temos todo o dereito a coñecer todo o relacionado con este expediente”, manifestou, para demandar que traslade á Xunta toda a información sobre este expediente aberto pola Comisión Europea, de xeito que o Goberno galego poida adoptar as medidas oportunas e poder comprobar, ao mesmo tempo, se as medidas adoptadas polo Goberno de España foron as correctas e en beneficio de todos os galegos”.

O Parlamento de Galicia rexeita o acordo do Goberno central co Goberno de Cataluña que condiciona calquera sistema de financiamento das comunidades autónomas

O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se rexeita o acordo bilateral do Goberno de España co Goberno autonómico de Cataluña, pactado ao marxe do Consello de Política Fiscal e Financeira, e que condiciona de inicio calquera sistema de financiación das comunidades autónomas de réxime xeral. Neste sentido, demándase o impulso dun diálogo construtivo e multilateral no seo do Consello de Política Fiscal e Financeira para abordar, entre todas as comunidades, a reforma do sistema de financiamento autonómico, buscando unha repartición equitativa e xusta dos recursos, que preserve a autonomía fiscal, a solidariedade e o equilibrio interterritorial, e que garanta que todos os cidadáns accedan en condicións de igualdade aos servizos públicos con independencia do territorio no que residan.

O deputado popular Gonzalo Trenor asegurou que “Galicia sae perdendo como consecuencia da cesión do Goberno de Pedro Sánchez en favor dos intereses dos independentistas cataláns, coa creación dun cupo separatista e un novo sistema fiscal propio non previsto na Constitución”. En concreto, lembrou que unha primeira aproximación realizada polo Goberno galego estimou en 627 millóns de euros ao ano o que perdería a Comunidade galega polo financiamento singular de Cataluña, chegando aos 2.000 millóns de euros se este modelo se estende ao resto de comunidades autónomas.

NOVO AGRAVIO PARA GALICIA

“A inconcreta vontade do Goberno de España de tentar compensar ao resto de comunidades autónomas, lonxe de corrixir esta situación, permite adiviñar un novo agravio para Galicia, xa que nos veriamos prexudicados por facer nestes anos o que se espera dunha Administración responsable: limitar o nivel de endebedamento que, no caso de Galicia, foi o que menos creceu de toda España, e que foi todo o contrario do que fixo o independentismo catalán”, sinalou.

Deste xeito, considerou “imprescindible reafirmar o compromiso de todas as institucións públicas coa igualdade de todos os cidadáns e co exercicio do autogoberno en condicións de equidade, evitando calquera disposición lexislativa que beneficie de maneira singular a unha comunidade autónoma en detrimento das demais ou calquera pretensión de negociar o sistema de financiamento fóra do marco multilateral”.

O deputado popular incidiu que “Galicia nin pode, nin debe, asistir con resignación e en silencio á substitución do Estado das Autonomías, tal e como o coñecemos hoxe, por un réxime de intereses ideolóxicos, partidistas e persoais”, polo que reclamou “un trato autenticamente equitativo e un sistema de financiamento que garanta que os servizos públicos e as infraestruturas cumpran cos mesmos estándares de calidade en todas as autonomías e no conxunto do territorio”.