Día: 22 Outubro, 2025

O portavoz do Medio Rural do Grupo Popular, Miguel Ángel Viso, asegurou hoxe no Pleno do Parlamento galego que “Galicia ofrece o maior esforzo económico feito nunca para axudar aos afectados pola vaga de incendios forestais, cun salto enorme respecto a convocatorias anteriores: agora asígnanse máis cartos e por máis tempo, garantindo unha resposta rápida ás necesidades urxentes”. “E cando remate a tramitación e teñamos avaliación completa, se a situación o require haberá novas ordes complementarias”, apuntou.

Miguel Ángel Viso concretou que neste momento a Xunta xa ten concedidas 42 axudas por vivendas afectadas, por valor de 2,9 millóns de euros; 10 axudas a empresas, por 280.000 euros; 24 axudas a tecores, por 180.000 euros; e máis de 1.600 solicitudes agrícolas e forestais que se atopan en tramitación, co compromiso de pagar o 80 por cento das axudas antes de que remate o presente ano. A isto súmase a ampliación da rede de videovixilancia, cun investimento de 2,2 millóns de euros, ata chegar ás 237 cámaras.

“Os socialistas galegos están tan desesperados por atopar cortinas de fume que tapen a corrupción que os envolve, que agora recorren ao único fume que lles queda: o dos incendios”, sinalou o portavoz popular, quen lamentou que “Pedro Sánchez e os ministros Marlaska e Planas viñeron a Galicia a falar moito, a prometer de todo, a anunciar fondos e medidas urxentes, pero a verdade é que os galegos afectados polos incendios seguen sen ver un euro do Goberno central”.

Deste xeito, Viso subliñou que “a Xunta responde e seguirá ao lado dos que traballan a terra, coidan o monte e manteñen viva esta terra”, e criticou “o descaro dos socialistas galegos para vir a este Parlamento a pedir responsabilidades e correccións nas liñas de axuda da Xunta mentres o Goberno de Pedro Sánchez maltrata, esquece e despreza a Galicia”.

A deputada do Grupo Popular Katy Varela volveu demandar no Pleno ao Goberno central a creación de novas prazas de xuíces de violencia sobre a muller nos xulgados de Ourense, Lugo, Pontevedra, Ferrol e Santiago, sen que esta decisión conleve a supresión das seccións de instrución existentes na actualidade, como fixo recentemente nos xulgados de A Coruña e Vigo. “A Xunta xa anunciou a súa disposición a reforzar tanto as infraestruturas como o persoal necesario nestas novas seccións de violencia de xénero, pero falta a decisión política do Goberno central para poder poñelos en funcionamento”, indicou.

Katy Varela lembrou que “a Comisión de Xustiza de Galicia leva moito tempo reclamando a creación de novas unidades de violencia sobre a muller, pero sen ser a costa da destrución doutras seccións de instrución”. Neste sentido, saudou que o Goberno central “decidira este ano ampliar catro novas prazas de xuíces de violencia sobre a muller en Galicia, pero só as de Santiago e Ourense son de nova creación, mentres as de Vigo e A Coruña se crean a costa de suprimir outras seccións de instrución”.

MÁIS CARGA DE TRABALLO

“Esta decisión suporá un aumento nos asuntos das restantes prazas de instrución de Vigo e A Coruña, que na actualidade xa asumen nalgúns casos un volume de causas que supera o 98 por cento do limiar obxectivo fixado polo Ministerio de Xustiza”, manifestou.

A deputada popular afirmou que “a Xunta xa leva anos defendendo a necesidade de reforzar a resposta institucional fronte á violencia de xénero, unha prioridade absoluta que require recursos suficientes e unha planificación rigorosa, ante o que o Goberno galego sempre estivo listo para activar estas novas estruturas xudiciais”.

O Pleno do Parlamento de Galicia amosou hoxe a súa satisfacción pola concesión do Premio Nobel da Paz 2025 a María Corina Machado, expresando a confianza de que este galardón contribúa a abrir para Venezuela un horizonte de democracia, reconciliación e paz duradeira. A través dunha proposición non de lei do Grupo Popular, á que o BNG votou en contra e o PSdeG se abstivo, tamén se condena enerxicamente o réxime de Nicolás Maduro, esixindo a liberación inmediata e incondicional de todos os prisioneiros políticos e das persoas detidas arbitrariamente en Venezuela, e ínstase a que poña fin á súa política de represión e ataques contra a sociedade civil e a oposición.

A iniciativa inclúe, ademais, a solicitude para que o Goberno de España recoñeza a Edmundo González Urrutia como lexítimo gañador das eleccións presidenciais do pasado 28 de xullo de 2024 en Venezuela; apoie as medidas de presión e as sancións impostas pola Unión Europea contra o réxime venezolano; e axude de forma decidida, responsable e prioritaria aos cidadáns españois, en particular aos galegos residentes en Venezuela, a través dunha dotación inmediata e suficiente de crédito para o programa Prestación por razón de necesidade para emigrantes españois no exterior.

O portavoz popular, Alberto Pazos, subliñou que esta iniciativa “reafirma o compromiso deste Parlamento cos principios democráticos e a solidariedade do pobo galego co pobo irmán de Venezuela, que continúa a padecer o terror e a opresión baixo o brutal réxime ditatorial presidido por Nicolás Maduro”. “Un réxime corrupto e torturador responsable do asasinato de opositores, responsable da detención en condicións inhumanas de centenares de presos políticos, responsable do maior éxodo da historia da humanidade e responsable de sumir a inmensa maioría do país nun inferno de fame, miseria e penuria sen precedentes”, apuntou.

REALIDADE MIGRATORIA DRAMÁTICA

Neste sentido, referiuse ao informe de ACNUR sobre a situación humanitaria neste país, “que describe unha realidade migratoria dramática: preto de 7,9 millóns de persoas, dun censo de 28,1 millóns, saíron de Venezuela buscando protección e unha vida mellor; máis de 1,3 millóns de solicitantes de asilo de Venezuela no mundo; e a propia poboación galega no país reduciuse de 46.000 a 30.000 galegos en apenas cinco anos”.

Alberto Pazos lembrou que “a oposición foi quen de gañar as eleccións e forzar a Maduro a autoproclamarse Presidente por decreto, ilexitimamente, sen ofrecer resultados desglosados e sen amosar actas do reconto electoral”. “Unhas actas que si foron recabadas por un grupo de demócratas valentes, que con risco da súa vida as recompilaron e fixeron públicas para amosar que o presidente elixido nas urnas polos venezolanos chámase Edmundo González Urrutia”, destacou.

Ademais, anotou que “o triunfo da oposición venezolana non tería sido posible sen o liderado dunha muller valente, galardoada co Nobel da Paz polo seu incansable labor en pro dos dereitos democráticos do pobo venezolano e pola súa loita para lograr unha transición xusta e pacífica da ditadura á democracia”. “Esa muller chámase María Corina Machado e foi gravemente insultada polo BNG neste Parlamento polos que prefiren estar do lado dun ditador que do lado da democracia, unha mancha que o Parlamento de todos os galegos non pode aceptar”, rematou.

O Pleno do Parlamento de Galicia aprobou hoxe a proposición non de lei do Grupo Popular, co voto en contra do PSdeG, a través da que se demanda ao Goberno de España a posta en marcha das medidas urxentes necesarias para que non se volva repetir o caos que se desata cada vez que se suspende o servizo ferroviario pola causa que sexa, tanto no referente aos medios a dispoñer, información ás persoas usuarias e comunicación e coordinación coas administracións afectadas. Así mesmo, pídese que desbloquee con carácter urxente os proxectos prioritarios en materia de transporte ferroviario que se atopan retrasados e dos que non se teñen novas.

O portavoz popular de Mobilidade, Gonzalo Trenor, demandou “un servizo ferroviario de calidade e homologable co resto de rexións europeas” e lamentou que, “ante esta reclamación lexítima, o Goberno de Pedro Sánchez nos responde con investimentos pendentes; trens convencionais suprimidos durante a pandemia; falta de oferta de prazas e de frecuencias en alta velocidade e media distancia; incumprimento dos horarios, tempos de viaxe e supresión de servizos sen previo aviso; avarías constantes; e problemas coa web e coa compra de billetes anticipada”.

INFRAESTRUTURAS PENDENTES

“Son moitas as infraestruturas que o Goberno central debe acometer en materia ferroviaria en Galicia e que vai demorando, como o Plan Director do Corredor Atlántico; as melloras necesarias nas conexións A Coruña-Ferrol, A Coruña-Lugo, Ferrol-Ribadeo ou Vigo-Ourense; ou a execución de obras importantes para optimizar o AVE Galicia-Madrid en tempos de percorrido, como o impulso da variante exterior de Ourense ou a dotación da dobre vía nos treitos nos que aínda non a hai”, concretou.

Gonzalo Trenor lembrou que “a vaga de lumes deste pasado mes de agosto tivo unha afección moi importante sobre a conexión ferroviaria de Galicia, e a resposta do Goberno central pasará á historia por abandonar a milleiros de persoas á súa sorte”. “Foron máis de 50.000 os viaxeiros afectados e máis de 100 os trens suprimidos”, sinalou o portavoz popular, quen criticou que “a responsa de Renfe e Adif a todas estas persoas e ao caos ferroviario ocasionado foi unha comunicación e información deficientes, a ausencia de alternativas de transporte ou o abandono de competencias e ameaza de demanda aos gobernos autonómicos”.

Diante desta situación, manifestou que “desde a Xunta e tamén desde este Parlamento denunciamos desde hai tempo a necesidade de que Renfe mellore a súa provisión de información ante retrasos, avarías e incidencias que lamentablemente son constantes”, pero lamentou que “o Goberno central non asume as súas competencias e pretende que sexan outros os que asuman as perdas económicas resultado das súas decisións e carencias”.