O PPdeG destaca que a Xunta destinará o vindeiro ano 9,3 millóns de euros para sufragar a gratuidade das matrículas dos universitarios galegos

As portavoces de Educación e de Xuventude do Grupo Popular, Cecilia Vázquez e Nicole Grueira, respectivamente, trasladáronse hoxe ata o campus da Universidade de Santiago de Compostela para destacar que a Xunta destinará o vindeiro ano 9,3 millóns de euros para sufragar as bonificacións do programa de matrículas gratuítas universitarias, unha medida que desde a súa posta en marcha hai dos anos ten beneficiado a máis de 30.000 estudantes.

“Fronte ás teimas de BNG e PSdeG afirmando que os gobernos do PPdeG están a privatizar as universidades públicas, a realidade é que os estudantes galegos gozan das universidades máis accesibles de toda España”, asegurou Cecilia Vázquez, quen destacou que Galicia é a terceira comunidade autónoma con maior financiamento por alumno, ao tempo que a Xunta xa chegou ao 1 por cento do PIB en gasto público destinado ás universidades.

Pola súa banda, Nicole Grueira apuntou que Galicia leva 15 anos coas taxas universitarias conxeladas, o que, xunto ao programa de matrícula universitaria gratuíta, permite un aforro ás familias galegas de máis de 20 millóns de euros anuais.

O PP pide ao Goberno de Sánchez dende o Senado un plan de choque “para evitar o peche sistemático de peixerías tradicionais e garantir o relevo xeracional”

O Partido Popular esixe ao Goberno de Sánchez “un plan de choque que evite o peche sistemático de peixerías tradicionais e garanta o seu relevo xeracional”.

A iniciativa foi presentada esta mañá durante unha visita á Praza de Abastos de Lugo na que participou a presidenta do PP da provincia e voceira municipal, Elena Candia, o portavoz de Pesca do PP no Senado, Manuel Ruiz, e os senadores do PP da provincia, José Manuel Balseiro – tamén integrante da Comisión de Pesca e que defenderá a iniciativa este martes na Comisión de Pesca-, José Manuel Barreiro e Juan Serrano.

Os populares farán valer a súa maioría na Cámara Alta para aprobar a proposta coa que esixir ao Goberno de Sánchez “medidas de apoio fiscal aos emprendedores, facilidades para a apertura e transmisión destes negocios, programas de formación, impulso á dixitalización e á venda on line, así como actuacións en favor da sostenibilidade. Tamén deberá contemplar a mellora e incremento da formación dual, a redución da burocracia na súa xestión, a rebaixa do IVE do pescado e o reforzo de campañas que fomenten o consumo e poñan en valor as especies máis accesibles economicamente.

O portavoz de Pesca do Grupo Popular no Senado urxe ao Executivo central a adoptar medidas de forma “inmediata” toda vez que nos últimos tempos pecharon 5.000 peixerías -un terzo do total- e “a sangría non parece diminuír”.

As peixarías tradicionais enfróntanse a unha combinación de factores estruturais e conxunturais que explican por que moitas rematan pechando. “Como denuncian as asociacións máis representativas do sector: menos consumo polos cambios nos hábitos de consumo, máis competencia por parte da gran distribución, custos altos, excesiva burocracia e falta de relevo”, apunta Manuel Ruiz.

Os populares explicaron que “na análise de cada un destes problemas poden atoparse as posibles solucións para unha actividade esencial na comercialización dos produtos pesqueiros e o seu futuro inmediato”.

E engaden que “Galicia está a promover campañas para impulsar o consumo de produtos do mar e reducir a caída no seu consumo, ademais de recoñecer o esforzo dos traballadores do mar”. De feito, o Goberno galego puxo en marcha no último ano unha iniciativa pioneira, o ‘Bono Peixe’, para fomentar hábitos de consumo saudables e que foi empregado por máis de 146.000€ consumidores cun impacto económico en vendas de case 11M€. Ademais, a Xunta de Galicia ten demandando en numerosas ocasións ao Goberno de Sánchez sen éxito a rebaixa do IVE do peixe.

MERCADO MUNICIPAL

Candia reivindica “máis apoio e menos trabas” por parte do goberno local sumándose ás demandas dos praceiros e praceiras en relación aos horarios ou ao uso de instalacións dispoñibles na propia Praza de Abastos de Lugo.

A portavoz do Grupo Municipal Popular lembrou que “o Grupo Municipal Popular fixo varias iniciativas e comunicacións públicas e seguiremos insistindo en reclamar que as súas demandas sexan escoitadas” porque “o que estamos a pedir é algo tan sinxelo como deixar traballar á xente”.

O PPdeG lamenta que o BNG dea “un paso máis no conflito” e agora “paga salarios para que haxa máis manifestacións e alboroto”

O Partido Popular de Galicia lamenta que o BNG dera nas últimas semanas “un paso máis na súa estratexia de conflito” e agora decidira “pagar salarios para que haxa máis manifestacións e máis alboroto”.

“Onte soubemos, a través dun medio de comunicación, que o sindicato do BNG, a CIG, activou por primeira vez nunha folga do sector da educación a súa chamada caixa de resistencia”, expresa a secretaria xeral do PPdeG, Paula Prado, en declaracións remitidas aos medios.

Prado considera que o partido independentista “está tan desesperado por estimular o conflito, por crear unha sensación de malestar en Galicia”, que “xa ofrece un salario por ir á folga”.

“Todos sabemos desde hai tempo cal é a estratexia do BNG: manifestación e alboroto. Pero agora deron un paso máis e pagan para que haxa máis manifestacións e máis alboroto”, critica.

A número dous dos populares galegos cre que “a única proposta do Bloque ‘Negacionista’ Galego segue sendo o ‘non’ a todo”: “O seu discurso é dicir que todo vai mal, xerar crispación e crear a idea de que nada funciona”.

“Mentres o PPdeG ten Orzamentos para traballar polo benestar dos galegos e das galegas, os ‘presupostos’ do independentismo galego só van para pancartas e algarada”, conclúe Prado.

O PPdeG traslada aos afectados pola talidomida que os Orzamentos da Xunta recollen unha exención fiscal das súas axudas

A portavoz de Política Social do PPdeG no Parlamento, Raquel Arias, acompañada do deputado no Congreso Pedro Puy, reuníronse con afectados pola talidomida en Galicia entre 1950 e 1985 para trasladarlles que os Orzamentos da Xunta para o vindeiro ano inclúen a exención no tramo autonómico do IRPF das axudas que reciben estas persoas desde o 2023.

Os afectados pola talidomida son persoas que sufriron malformacións conxénitas ou danos neurolóxicos debido a que a nai tomou este medicamento durante o embarazo. As vítimas en España inclúen aos nenos que naceron entre 1950 e 1985 con malformacións severas, como a ausencia o redución de extremidades, e outras alteracións orgánicas, visuais e auditivas

Raquel Arias salientou que “o Goberno galego volve amosar o seu compromiso e sensibilidade coas persoas con discapacidade, neste caso as afectadas pola talidomida, atendendo a súa demanda de exención fiscal das axudas que reciben”.

O obxectivo é que a axuda que perciben sexa destinada integramente a atender as necesidades destas persoas, para o que gozarán dunha dedución na cota íntegra autonómica do imposto sobre a renda, que consistirá no importe resultante de aplicar os tipos medios de gravame ao importe da axuda pública na base liquidable. Ademais, esta dedución terá efectos desde o 1 de xaneiro de 2023, ano desde o que as persoas afectadas comezaron a percibir estas axudas estatais.

Pola súa banda, Pedro Puy criticou a negativa do Goberno central de aceptar no Congreso a proposta do Partido Popular para recoñecer esta exención fiscal para as axudas que reciben as persoas afectadas pola talidomida a nivel de toda España. “Coa escusa de que esta medida suporía unha diminución dos ingresos orzamentarios do Estado, o Goberno de Pedro Sánchez negou a este colectivo esta bonificación fiscal, da que si están a beneficiarse outras cidadáns españois que padecen outras deficiencias físicas ou patoloxías médicas”, sinalou.