O PPdeG reivindicou hoxe o seu “proxecto de futuro” para Galicia a través duns Orzamentos pensados para mellorar os servizos públicos e que contrastan coa corrupción, a falta de xestión e as liortas de PSOE e o BNG.
Así o manifestou a secretaria xeral Paula Prado en declaracións aos medios antes de participar no Magosto do PP de Lalín, ao que asistiron máis de 1.000 persoas e no que tamén participaron o presidente provincial do PP de Pontevedra, Luis López, varios responsables do Goberno galego como Román Rodríguez e Ánxeles Vázquez e o alcalde José Crespo, entre outros.
“A estabilidade, o sentidiño e a xestión que caracterizan a Galicia permítennos aprobar os nosos Orzamentos ano a ano e, grazas a iso, contar cunha mellor sanidade, unha mellor educación ou mellores servizos de dependencia en Lalín e no resto de Galicia”, explicou a número dous dos populares galegos ao respecto dunhas contas que seguen avanzando na súa tramitación e que serán as décimo sétimas “aprobadas en tempo e forma” de xeito consecutivo.
En contraposición, recordou que o Goberno de Pedro Sánchez segue guiándose por uns Presupostos Xerais do Estado aprobados en 2022. Algo que, na súa opinión, fai “imposible” atender as necesidades de mellora constante dos servizos públicos.
Unha falta de xestión e un desleixo coas necesidades do territorio das que puxo como exemplo a Lei de Mobilidade coa que o Goberno central, coa “complicidade” do BNG, pretendía suprimir as paradas de bus estatais de 22 concellos galegos e unha delas en Lalín. “Por sorte e grazas ao traballo dos nosos deputados e senadores a través das emendas que foron aprobadas esta semana, o PP evitou que esas paradas se suprimiran”, apuntou.
“Menos mal que en Galicia, como en Lalín, goberna un partido que fala de futuro, de proxectos e de prosperidade e non de corrupción e pelexas”, concluíu a secretaria xeral dos populares galegos.
“ANA PONTÓN FOI A ARXENTINA A AVALAR A CORRUPCIÓN”
Paula Prado tamén aproveitou á ocasión para referirse á viaxe que Ana Pontón realizou a Arxentina e na que se reuniu con Cristina Fernández de Kirchner, condenada a arresto domiciliario por delitos de corrupción e inhabilitada para exercer cargos públicos.
“Ana Pontón foi alí a avalar a corrupción e a criticar aos xuíces”, asegurou sobre este asunto ao tempo que confirmaba que “o modelo do BNG non pode estar máis afastado do modelo de sentidiño da maioría dos galegos e galegas”.
O “MÚSCULO FORTE” DO PP NA COMARCA DO DEZA
Pola súa banda, o alcalde José Crespo puxo en valor a asistencia de máis dun milleiro de persoas ao acto celebrado por primeira vez no Lalín Arena –debido á gran afluencia– na medida en que “isto demostra que o músculo do PP de Lalín e de toda a comarca do Deza está forte”.
O obxectivo do partido na xornada de hoxe é, segundo explicou, facer partícipe á militancia do proxecto que o PP ten para Lalín: “Aínda nos queda camiño por percorrer, pero sen un partido como este sería difícil conseguir todos os obxectivos que temos marcados e que se están conseguindo pouco a pouco”.
