A secretaria xeral do PPdeG, Paula Prado, adiantou hoxe que Galicia estará “ben representada” na concentración que se celebrará este domingo, a partir das 12 do mediodía, no Templo de Debod de Madrid, e onde a nosa delegación estará liderada polo presidente Alfonso Rueda.
Así o subliñou en declaracións aos medios este mediodía antes de participar na comida de Nadal do Partido Popular de Ortigueira, á que asistiron máis de 150 persoas e na que o alcalde Valentín Calvín exerceu como anfitrión.
Prado avanzou que tamén ela estará en Madrid, co fin de “protestar contra os corruptos e contra todos os que os sosteñen”: “Todos os que acompañaron a Pedro Sánchez acabaron no cárcere: é a máxima degradación dun Goberno e dun partido, o PSOE”.
A número dous dos populares galegos fixo un chamamento a “non permanecer impasibles co que está ocorrendo en España, principalmente no Goberno central, e que leva anos afectando directamente a Galicia, porque as preocupacións de Sánchez e os seus ministros sempre foron outras”.
Nese sentido, lembrou a etapa de José Luis Ábalos á fronte do Ministerio de Fomento, xa que con el agora no cárcere, “pódese entender que as prioridades do seu Ministerio eran outras e non, por exemplo, o dereito ao tren de Ferrolterra, Eume e Ortegal”, dixo en referencia á mobilización que ten lugar mañá na estación de tren ferrolá e que o Partido Popular tamén apoia.
Nese sentido, citou o estado do ferrocarril Ferrol-Ribadeo, con parada en Ortigueira, que “segue en deterioro mentres Sánchez mira cara a outro lado”.
“Por España, por Galicia e por Ortigueira, saiamos mañá á rúa”, concluíu Prado, dando as grazas ao alcalde, pola invitación, e desexando un Bo Nadal e un Feliz Ano 2026, avogando por que “se nestas datas é importante xuntarnos para celebrar, tamén o é para analizar o que está ocorrendo en España”.
“DESEXAMOS QUE FEIJÓO CHEGUE CANTO ANTES Á MONCLOA”
Pola súa banda, o alcalde Valentín Calvín agradeceu a toda a militancia que acudira a esta cita de todos os anos, “cada ano con máis persoas”: “Isto énchenos de alegría para seguir traballando”, subliñou.
Así mesmo, dixo agardar que “en breve haxa citas electorais”, en referencia ás eleccións xerais, e desexou que Alberto Núñez Feijóo “chegue á Moncloa”. “É o que queremos todos que ocorra canto antes”, rematou.
Cómpre salientar que o Ortegal é unha comarca 100% do PP, xa que todos os concellos que a conforman —Cariño, Ortigueira, Mañón e Cerdido— están gobernados por alcaldes do Partido Popular.