A Comisión 5ª do Parlamento de Galicia aprobou esta mañá o ditame do proxecto de Lei de protección das persoas menores e prevención das condutas aditivas, unha norma que “protexe máis e mellor aos nosos menores fronte ás adicións tradicionais e emerxentes, moderniza o marco normativo, adapta Galicia á evidencia científica actual e reforza a prevención en escolas, familia e comunidade”, manifestou a portavoz de Sanidade do Grupo Popular, Encarna Amigo.
Esta nova lei, que queda agora pendente da súa aprobación definitiva na sesión plenaria, ten como obxectivo “protexer, anticipar e actuar fronte aos novos riscos que afectan diariamente á infancia e á adolescencia en Galicia”, dixo Encarna Amigo. Neste sentido, apuntou que a norma “actualiza o marco legal galego, integrándoo coa evidencia científica máis recente e aliñándoo cos estándares europeos, e faino cun enfoque integral que combina prevención, educación, regulación e protección, que parte dunha premisa fundamental: os menores teñen dereito a crecer en contornos seguros e saudables e as administracións están obrigadas a proporcionarllos”.
“Non estamos falando só de prohibicións: estamos falando de creación de oportunidades, de acompañamento, de reforzo das familias, dos centros educativos, dos concellos e dos propios profesionais de saúde e dos servizos sociais”, manifestou a portavoz popular. Deste xeito, afirmou que a lei “pretende actuar no que sabemos que funciona: información temperá, prevención desde a infancia, detección precoz e contornas protectoras”.
En concreto, a nova lei reforza a protección fronte ao tabaquismo e o consumo de alcohol, especialmente ante as novas modalidades que buscan captar xente nova, bebidas de alta gradación vendidas como inocuas e campañas publicitarias encubertas en redes sociais. Así, incorpora, por primeira vez de forma sistemática en Galicia, a regulación das condutas aditivas non asociadas a substancias, como o uso compartido das pantallas, videoxogos, apostas online ou contidos tóxicos.
PREVENCIÓN E CONTROL DA PUBLICIDADE
Encarna Amigo apuntou que a nova lei “aposta pola prevención pola ferramenta máis eficaz, establecendo programas educativos estruturados, obrigatorios e avaliables nos centros de ensino; impulsando a formación das familias, porque ninguén mellor ca eles para detectar os cambios no comportamento dos seus fillos; e dotando aos concellos de instrumentos normativos e recursos para protexer espazos públicos e actividades de ocio”.
“A norma tamén reforza o control sobre a publicidade, a promoción e a venta de produtos potencialmente aditivos, a través do endurecemento do acceso de menores a máquinas expendedoras, regulando espazos de risco, establecendo sancións proporcionadas e introducindo o principio de tolerancia cero fronte á captación comercial de menores”, manifestou.
Para rematar, Encarna Amigo lamentou a negativa de BNG e PSdeG a facer algunha transacción sobre o texto orixinario da lei, “incluso naquelas que tiñan pactadas con organizacións que nos fixeron chegar as súas propostas de mellora”. “Aínda que a oposición faga trincheira de todo e o politice todo, a protección da infancia merece unidade, pero a unidade require responsabilidade e xenerosidade, dúas actitudes que, por desgraza, non atopamos na oposición neste caso”, concluíu.
