O PPdeG esixe ao Goberno central que asuma as súas competencias e flexibilice o novo regulamento europeo de control pesqueiro

Os deputados do Grupo Popular Miguel Fidalgo, Manuel Santos, Loli Hermelo e Raúl Santamaría trasladaron ao patrón maior da Confraría de Pescadores de Bueu e presidente provincial da Federación de Confrarías, José Manuel Rosas, o seu apoio á demanda para que o Goberno de España asuma as súas competencias e flexibilice o novo regulamento de control pesqueiro, que obriga aos barcos, entre outras medidas, a preavisar da súa chegada a porto ou levar un rexistro electrónico de capturas ao longo da xornada.

Neste sentido, anunciaron que o PPdeG levará, tanto ao Parlamento de Galicia como aos concellos do litoral galego, iniciativas reclamando estas reformas da normativa europea, que afecta negativamente á viabilidade económica da pesca galega, á seguridade no mar e ao mantemento do tecido social e produtivo das zonas costeiras.

Acompañados da portavoz do PPdeG en Bueu, Elena Estévez, os deputados populares consideraron necesario un período de adaptación ao novo regulamento de control pesqueiro. Porén, lamentaron que “o Goberno de España non dispón dun plan operativo público suficientemente definido que garanta a correcta aplicación da nova normativa e que evite consecuencias negativas para o sector pesqueiro galego, particularmente para a pesca costeira artesanal”.

RISCO OPERATIVO E DESVIACIÓN DA ATENCIÓN

A obriga de avisar electronicamente da entrada a porto dos barcos con varias horas de antelación ou a declaración exhaustiva de capturas en tempo real “son medidas máis propias da pesca industrial que da artesanal, e supoñen un risco operativo e unha desviación da atención principal á propia actividade de pesca”, manifestaron.

Os deputados populares amosaron o seu apoio ás reivindicacións dos pescadores galegos e consideran que “o Goberno de Pedro Sánchez tense extralimitado na aplicación do regulamento europeo, que non está adaptado á realidade social, económica e técnica da pesca de baixura galega, polo que é imprescindible que se proceda a flexibilizar ao máximo estas medidas que non tiveron en conta para nada a realidade do sector do mar”.

Por este motivo, o PPdeG levará ao Parlamento galego e aos concellos costeiros de toda Galicia iniciativas co fin de que o Goberno central reaccione e tome a iniciativa, “facilitando unha adaptación ao novo regulamento de control pesqueiro porque se fai imprescindible que estas novas normas se apliquen con proporcionalidade e sentido común, e que se deixe traballar a sector pesqueiro galego, que ten demostrado o seu compromiso coa sostibilidade do mar e dos recursos mariños”.

O PPdeG recoñece a traxectoria de Julio García-Luengo tras dúas décadas á fronte de Crecente

A secretaria xeral do PPdeG, Paula Prado, asistiu á comparecencia pública do alcalde de Crecente, Julio César García-Luengo, acompañada polo presidente provincial do PP de Pontevedra, Luis López.

Durante o acto, Julio García-Luengo anunciou que, tras 20 anos de maiorías absolutas á fronte da alcaldía, deixará paso no ano 2027, poñendo fin a unha etapa marcada pola estabilidade, o compromiso e o traballo constante polo ben dos veciños e veciñas de Crecente.

Desde o Partido Popular destacouse e agradeceuse a súa dedicación, a súa vocación de servizo público e a súa contribución á fortaleza do proxecto popular en Galicia, recoñecendo tamén que seguirá sendo unha peza clave da gran familia do PP.

O Grupo Popular esixe ao Goberno central que protexa ao sector primario galego e garanta que os produtos de terceiros países que se comercialicen cumpran os mesmos estándares que os europeos

O portavoz do Medio Rural do Grupo Popular, Miguel Ángel Viso, esixiu hoxe no Parlamento de Galicia que o Goberno central “protexa ao sector primario, defenda as cláusulas de salvagarda no acordo de libre comercio entre a Unión Europea e Mercosur ante posibles ameazas, e garanta e intensifique os controis de fronteira co fin de que os produtos agroalimentarios de terceiros países que pretendan comercializarse no mercado comunitario cumpran os mesmos estándares de calidade, sanidade e benestar animal que os esixidos en Europa”.

Miguel Ángel Viso considerou “absolutamente comprensible a preocupación dos gandeiros e agricultores galegos ante o acordo entre a Unión Europea e Mercosur”, unha situación ante a que “a Xunta non se agocha, e por iso a conselleira do Medio Rural convocou o Consello Agrario para analizar coas organizacións profesionais o impacto da PAC e do novo escenario europeo, ao tempo que porá en marcha medidas concretas en ámbitos como a saúde animal e vexetal, para detectar enfermidades, pragas e problemas nos alimentos”.

“E todo isto cun obxectivo claro e inequívoco: defender o sector agrogandeiro galego, apostar polos produtos de calidade e estar sempre ao carón das necesidades reais do campo galego”, incidiu o portavoz popular.

SEN ESCOITAR ÁS COMUNIDADES AUTÓNOMAS

Na súa intervención, Viso explicou que o acordo Unión Europea-Mercosur “é un tratado de política comercial internacional, polo que son os estados membros os que teñen a obriga de defender os intereses dos seus territorios durante a negociación, de escoitar ás comunidades autónomas e de trasladar esas posicións á Comisión Europea”. Porén, lamentou que “en España isto non se fixo, e o Goberno de Pedro Sánchez negociou e posicionouse sen escoitar de maneira real ás comunidades autónomas, sen integrar as preocupacións específicas de territorios como Galicia, onde o sector primario é estrutural”.

O portavoz popular insistiu en que “calquera produto que entre desde países terceiros debe cumprir exactamente as mesmas esixencias que se lles impoñen aos produtores galegos”, porque demandou que “Galicia non pode ser tratada como un dano colateral aceptable dun acordo global, nin ser o territorio ao que se lle pide comprensión, paciencia e silencio mentres outros deciden”. “O sector primario galego non é un problema que xestionar, é un activo que protexer”, indicou.

Para rematar, Miguel Ángel Viso criticou a actitude do BNG porque esta situación “non se evita facendo discursos grandilocuentes aquí mentres se sostén en Madrid ao mesmo goberno que negocia estes acordos sen contar coas comunidades autónomas”. “Ultimamente semella que algúns están máis preocupados por exhibir bandeiras alleas que por defender con firmeza os intereses de Galicia onde realmente se deciden as cousas”, dixo.

O Parlamento de Galicia demanda ao Goberno de España un maior nivel de cogobernanza na execución dos fondos europeos

O Parlamento de Galicia aprobou hoxe a proposición non de lei do Grupo Popular, co voto en contra do PSdeG e a abstención do BNG, a través da que se demanda ao Goberno de España que aplique, en colaboración coas comunidades autónomas, un maior nivel de cogobernanza na execución dos recursos previstos no Mecanismo para a Recuperación e a Resiliencia (MRR), nomeadamente, aqueles dirixidos a unha xestión forestal sostible, incluída a loita contra os lumes, chegando incluso a transferir a Galicia os recursos correspondentes, de tal xeito que se favoreza un impacto máis positivo sobre o territorio e sexa posible acadar un maior nivel de execución.

A deputada popular Nicole Grueira lamentou que o Goberno central “optara por un modelo excesivamente centralizado para a xestión dos fondos do Plan Nacional de Recuperación e Resiliencia, uniformizando criterios e procedementos sen ter en conta a diversidade territorial”. “E isto fíxose sen unha cogobernanza real e efectiva coas comunidades autónomas, que son as que ostentan as competencias, dispoñen do coñecemento directo do territorio e teñen capacidade contrastada de execución en moitos dos ámbitos clave deste plan”, indicou.

PROBLEMAS DE DECISIÓNS MAL TOMADAS

Deste xeito, manifestou que, “cando as decisións se toman mal, aparecen os problemas, como convocatorias excesivamente ríxidas que non se adaptan ás necesidades do medio rural, distintos criterios segundo o ministerio que publique a orde de axudas, unha falta absoluta de claridade sobre o réxime de reintegro dos fondos ou a falta dun marco plurianual claro, que non permite ás comunidades autónomas coñecer con antelación os fondos dos que van dispoñer e impide unha planificación estratéxica seria”.

Nicole Grueira reclamou “máis respecto e participación das comunidades autónomas na planificación, deseño e xestión dos fondos europeos, de xeito que respondan realmente ás necesidades reais dos territorios”. Así mesmo, pediu que o Goberno de Pedro Sánchez “mellore os mecanismos de coordinación e garantía xurídica destes fondos europeos ou, no seu defecto, transfira os recursos á Xunta, que xa demostrou capacidade, coñecemento do territorio e solvencia técnica para xestionalos con maior eficacia e impacto positivo”.

O Parlamento galego pide ao Ministerio de Agricultura que axilice a autorización de produtos fitosanitarios, en especial os que xa están autorizados noutros países da Unión Europea

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se demanda ao Ministerio de Agricultura, Pesca e Alimentación que axilice a autorización de produtos fitosanitarios de eficacia contrastada, especialmente os que xa están autorizados noutros países da Unión Europea. Así mesmo, pídese que se fomente a investigación na industria fitosanitaria para desenvolver novos principios activos e ínstase a que continúe a produción de produtos autorizados de eficacia contrastada.

O deputado popular Juan Casares manifestou que “a produtividade agrícola decae por diversas razóns, entre as que destaca o cambio climático e a actual política ambiental, que propicia a prohibición de produtos fitosanitarios necesarios para garantir uns rendementos mínimos nos cultivos”.

REVISIÓN CONSTANTE

“Para evitar danos ambientais e na saúde pública é necesaria unha revisión constante da efectividade, dos protocolos de uso e dos efectos sobre as persoas e o medio ambiente destes produtos químicos”, sinalou Juan Casares, quen apuntou que “como resultado destas revisións deben ser prohibidos aqueles que resulten perniciosos”. Porén, sinalou que esta prohibición “debe acompañarse da autorización de novos produtos que non teñan efectos negativos co gallo de non deixar desprotexidos aos nosos produtores”.

Neste sentido, segundo os datos do Rexistro Oficial de Produtos Fitosanitarios do Ministerio de Agricultura, nos últimos cinco anos canceláronse 540 produtos, mentres que só se rexistraron 120 novos. A este balance sumáronse tres cuestións: hai produtos eficaces que non se comercializan pola súa escasa marxe comercial; algúns produtos novos autorizados non contan coa efectividade dos anteriores; e existe o compromiso do Pacto Verde Europeo que prevé a redución do uso de fitosanitarios.

“Como resultado desta constelación causal, moitas pragas e enfermidades son máis difíciles de controlar, unha cuestión que compromete non só a viabilidade económica de moitas explotacións, senón tamén a súa capacidade de competir cos produtos procedentes de terceiros países”, sinalou o deputado popular.

MARXE DE MANOBRA

Por este motivo, asegurou que “o Goberno de España ten marxe de manobra para mellorar a situación axilizando as autorizacións, posto que hai produtos autorizados na Unión Europea que en España non se poden usar”, e puxo como exemplo principios activos que están autorizados no norte de Portugal que os produtores galegos non poden utilizar.

Juan Casares pediu, ademais, que “se dote de máis recursos ao Instituto Nacional de Investigación e Tecnoloxía Agraria e Alimentaria, co fin de axilizar as liñas de traballo en produtos fitosanitarios, impulsar a investigación na loita biolóxica de pragas e abrir o campo á obtención de novas variedades de cultivo máis resistentes ás pragas e enfermidades”.

“De xeito paralelo, o Goberno de España debe apoiar o mantemento da produción dos fitosanitarios pouco rendibles para a industria química, pola súa escasa marxe comercial, ao tempo que se implementan medidas complentarias como a mellora dos controis nas fronteiras, co gallo de evitar a entrada de pragas procedentes doutros países; apoiar a agricultura de precisión, posto que fai máis eficiente o uso de fitosanitarios; e aumentar o nivel de aseguramento dos cultivos a través da Entidade Estatal de Seguros Agrarios, en colaboración coas comunidades autónomas”, rematou.

Paula Prado anuncia que o PP esixirá no Parlamento de Galicia a dimisión de Tomé de todos os seus cargos tralo “pacto guarro”, que supón “unha vergoña para todos os galegos”

A secretaria xeral do PPdeG, Paula Prado, anunciou hoxe que esixirá no Parlamento de Galicia a dimisión de José Tomé de todos os seus cargos. “Veremos, unha vez máis, que queda do falso feminismo do PSOE e do BNG, máis ocupados en darlle normalidade a este tipo de acordos”, dixo en referencia á postura dos socialistas e independentistas, que aceptaron o voto necesario dun presunto acosador sexual para manterse no goberno na Deputación de Lugo, o que supón “unha vergoña para todos os galegos”.

Defendeu ao PPdeG como “un partido sen líos”, fronte a xestión de PSOE e BNG, encabezados por Xosé Ramón Gómez Besteiro e Ana Pontón, que “pretenden darlle normalidade a este tipo de acordos, pero en ningún caso pode ser normal que unha Deputación conte co apoio dun presunto agresor sexual e que un concello como Monforte teña de alcalde un presunto agresor sexual”. Ademais, subliñou o apoio do PP as vítimas, que anunciaron que acudirán á Fiscalía “porque o socialismo non quere saber delas”.

“Queda claro que, como en Leiro e no conxunto de Galicia, o lugar común da gran maioría, onde se sente máis identificada, segue sendo o Partido Popular”, sinalou durante un percorrido por este municipio de Ourense. Estivo acompañada pola secretaria xeral provincial do PP, Sandra Quintas, e o alcalde de Leiro, Francisco José Fernández.

Reivindicou o PPdeG como “o partido do rural”, centrado “nas preocupacións da xente” e cunha xestión “pensada por e para o rural, desde a estabilidade e coas medidas do Goberno de Alfonso Rueda para facilitar o asentamento de poboación”. Así, despois de poñer como exemplo e visitar o centro de día de Leiro, lembrou que o PP goberna en Galicia no 60% dos concellos de menos de 5.000 habitantes, como é o caso deste municipio.

FRANCISCO JOSÉ FERNÁNDEZ: “TRABALLAR PARA ACHEGAR SERVIZOS AO RURAL”

Pola súa banda, o alcalde de Leiro, Francisco José Fernández, fixo fincapé na xestión do Partido Popular para “traballar por achegar servizos ao rural”.

Así, sacou peito do centro de día do seu municipio, que supón “un servizo fundamental para a veciñanza” e que, ademais, conta cunhas expectativas de crecemento “espectaculares”.

O Parlamento galego demanda ao Goberno central que regule a prestación universal de servizos financeiros básicos ou esenciais

O Parlamento de Galicia aprobou hoxe, sen o apoio de BNG nin de PSdeG, a proposición non de lei do Grupo Popular a través da que solicita ao Goberno central que regule a prestación universal de servicios financeiros básicos ou esenciais, como oficinas ou caixeiros automáticos, de xeito que se garanta a súa prestación para todos os usuarios, cunha calidade determinada e a un prezo asumible.

A viceportavoz popular Cristina Sanz lembrou que desde a crise financeira de 2008 “España viviu un proceso acelerado de concentración bancaria que reduciu drasticamente a rede de oficinas, especialmente na zona do rural, un proceso que viu acompañado dunha dixitalización forzosa que non tivo en conta a realidade social de milleiros de persoas maiores, nin a fenda dixital que existe en amplas zonas do territorio”.

PROBLEMA ESTATAL

“Diante desta situación, a Xunta, en colaboración coa Federación Galega de Municipios e Provincias, foi unha das primeiras administracións autonómicas en poñer en marcha medidas para evitar que os concellos do rural quedasen completamente excluídos do sistema financeiro”, lembrou Cristina Sanz. En concreto, explicou que no ano 2020 asinouse un convenio entre o Goberno galego e a Fegamp para a adhesión de concellos sen oficina bancaria co fin de facilitarlles a instalación dun caixeiro e servizos financeiros básicos. Esta iniciativa permitiu dotar a 41 concellos galegos destes servizos, que beneficiaron a máis de 51.000 galegos e galegas, que puideron realizar máis de 480.000 operacións bancarias no seu propio concello.

Porén, Cristina Sanz manifestou que “a exclusión financeira non pode resolverse so desde o ámbito autonómico, porque se trata dun problema estrutural, de alcance estatal, que require unha resposta global e coordinada por parte do Goberno de España”.

“Por este motivo, solicitamos ao Goberno central que regule a prestación universal dos servizos financeiros básicos ou esenciais, de maneira que se garanta o seu acceso a toda a cidadanía con independencia do seu lugar de residencia ou da súa idade”, rematou.

Alberto Pazos critica que a nova Presidenta da Deputación de Lugo estea sustentada “no voto dun presunto acosador sexual e en 500.000 euros que o BNG repartirá entre os seus afíns”

O portavoz do Grupo Popular, Alberto Pazos, criticou hoxe que a nova presidenta da Deputación de Lugo estea sustentada “no voto favorable dun presunto acosador sexual e en 500.000 euros que o BNG se axenciou das arcas de todos os lucenses para repartidos entre os seus concellos e organizacións afíns á causa nacionalista”. Respecto do novo sistema de financiamento autonómico, demandou que sexa “falado e consensuado por todas as comunidades autónomas, tendo presente as particularidades e as necesidades de todas elas”.

Alberto Pazos comezou a súa comparecencia ante os medios de comunicación dando conta dos cambios realizados no Grupo Parlamentario Popular logo da marcha de Ethel Vázquez, a quen desexou “o mellor na súa nova etapa laboral, agradecendo todo o bo traballo que desenvolveu ao longo destes case dous anos que nos acompañou como deputada neste Parlamento e como secretaria da Mesa”. En concreto, Nazareth Cendán será a nova deputada pola provincia de A Coruña e para a Secretaría da Mesa do Parlamento o Grupo Popular propuxo ao actual viceportavoz e presidente da Comisión 1ª, Julio García Comesaña.

ANSIAS DE PODER SOCIALISTA

Na súa intervención, o portavoz popular referiuse á elección no día de onte da nova Presidenta da Deputación Provincial de Lugo, que “nace logo dun vergoñento pacto, ou pacto guarro, como o ten cualificado acertadamente a nosa secretaria xeral, Paula Prado, capitaneado por un presunto acosador sexual e que demostra ás claras o pouco que lle importan as mulleres tanto a BNG como a PSdeG”.

“O esperpento chega ata tal punto que unha muller foi capaz de aceptar o voto deste presunto acosador sexual para facerse coa Presidencia da Deputación”, indicou Pazos, ante o que se cuestionou “ata que punto poden chegar as ansias de poder das mulleres socialistas, cando neste caso a nova Presidenta da Deputación é capaz de aceptar un goberno totalmente enlamado polo voto dun presunto acosador sexual?”

Respecto do BNG, a terceira pata deste Goberno tripartito na Deputación de Lugo, Alberto Pazos manifestou que “volveu demostrar o seu feminismo de pancarta, deixando a un lado a súa defensa das mulleres para conseguir manterse no Goberno da Deputación de Lugo”. Ademais, criticou “a pouca vergoña coa que desde o BNG nos xustificaron o seu apoio á nova presidenta socialista da Deputación: 500.000 euros bastaron para que os nacionalistas galegos esqueceran as falcatruadas levadas a cabo polo presunto acosador sexual sendo presidente da Deputación, pecharan os ollos e deran o seu voto favorable á nova presidenta socialista”. “Ata que punto debe chegar esta vergoñenta situación protagonizada polo BNG na Deputación de Lugo que nin a súa propia lideresa, Ana Pontón, tivo a ben asistir á toma de posesión da nova Presidenta”, indicou.

SETE PUNTOS MENOS DE FINANCIAMENTO POR HABITANTE

Por outra banda, sobre a proposta de financiamento autonómico pactada polo Goberno de España cos independentistas cataláns e a inútil reunión do Consello de Política Fiscal e Financeira celebrada onte en Madrid, o portavoz popular incidiu que “Galicia non vai aceptar que o novo salvavidas que lle lanzaron os independentistas cataláns a Pedro Sánchez para manterse a frote na Moncloa se converta nunha realidade”.

“Non pode ser que este novo modelo, pensado unicamente para beneficiar a Cataluña, supoña un recorte de máis de sete puntos no financiamento por habitante de Galicia, situándose como a segunda comunidade con menor financiación por habitante; que Galicia, cando representa un 6 por cento da poboación das comunidades de réxime común, só reciba o 2,8 por cento do suposto incremento dos recursos: 587 millóns dos case 21.000 previstos; ou que se dea unha situación totalmente anómala e nunca vista con anterioridade: que Galicia reciba menos recursos do financiamento do Estado que os que aporta ao fondo común”, explicou.

Alberto Pazos demandou aos socialistas galegos “un firme rexeitamento desta proposta de financiamento, do mesmo xeito que o están a facer compañeiros de partido doutras comunidades autónomas españolas onde gobernan, como Castela A Mancha ou Asturias”, aínda que lamentou que “a súa submisión a Pedro Sánchez non lles permita enfrontarse ás directrices que lles marcan desde Moncloa, a pesar de que recoñezan que Galicia sae prexudicada e xa é necesaria unha modificación do sistema de financiamento proposto”.

Así mesmo, criticou que, “mentres os independentistas cataláns espremen todo o que poden a Pedro Sánchez a cambio do seu apoio para que se manteña no Goberno de España, o BNG segue, erre que erre, na súa eterna teima de demandar un cupo para Galicia, un modelo rexeitado por todos os expertos en financiamento autonómico, tal e como se puxo de manifesto na Comisión de Estudo que levamos a cabo neste Parlamento galego durante a pasada lexislatura”.

DIÁLOGO PARA CONSENSUAR O NOVO SISTEMA

“Galicia precisa un novo sistema de financiamento, pero non o sistema acordado entre o Goberno de España e os independentistas cataláns”, asegurou o portavoz popular, quen demandou un modelo que “supoña un incremento para Galicia moi superior ao previsto nese acordo pactado nas súas múltiples reunións entre Pedro Sánchez e Oriol Junqueras, e que permita atender todas as necesidades dos galegos, sen que existan diferencias respecto dos servizos públicos de calidade que gozan os españois que residen en comunidades máis ricas, como Cataluña ou o País Vasco”, concretou.

Deste xeito, avanzou que “desde o Grupo Popular seguiremos demandando que o Goberno central abra unha vía de diálogo con todas as comunidades autónomas para concretar este novo sistema de financiamento autonómico” e apuntou que “o mellor espazo para facelo é o propio Consello de Política Fiscal e Financeira, pero en reunións nas que se debata e se teñan en conta as posicións de todas e cada unha das comunidades autónomas”.

Paula Prado lamenta a consumación do “pacto guarro” entre PSOE, BNG e Tomé, que “enterra os intereses da veciñanza de Lugo”

A secretaria xeral do PPdeG, Paula Prado, lamenta a consumación do “pacto guarro” entre PSOE, BNG e o presunto acosador sexual, José Tomé, cuxo voto foi hoxe necesario para que a socialista Carmela López fose elixida como nova presidenta da Deputación de Lugo, semanas despois da dimisión forzada do seu ex compañeiro de filas, por varias acusacións de acoso sexual de mulleres vinculadas ao socialismo. “Hoxe só podo dar o pésame á veciñanza de Lugo porque este tripartito PSOE, BNG e Tomé acaba de enterrar a defensa dos intereses dos cidadáns”, sinala a número dous dos populares galegos.

Prado pregúntalle a socialistas e independentistas “con que cara van defender a partir de hoxe ás mulleres” tras formar goberno co voto dun presunto acosador sexual. Do mesmo xeito, apela a Ana Pontón e a Xosé Ramón Gómez Besteiro como “cómplices” deste pacto. “Que manual de feminismo recomenda formar goberno cun presunto acosador sexual?”, pregúntase.

Á nova presidenta da Deputación de Lugo recórdalle que foi elixida grazas ao apoio deste deputado sobre o que pesan denuncias de mulleres e cualifica de “desvergoña” que Carmela López falase de igualdade durante o seu discurso de investidura. “Ten que saber que ela tamén é cómplice deste pacto guarro”, reitera Paula Prado.

Ademais, o PPdeG amosa de novo a súa solidaridade coas vítimas e asegura que os populares si estarán pendentes de calquera atropelo ás mulleres e ao conxunto da veciñanza de Lugo, como o ocorrido hoxe coa sinatura do pacto. “Todo polo poder, todo polos cartos”, puntualiza Paula Prado.

O PPdeG lamenta o “pacto guarro” de PSOE e BNG con José Tomé para manterse na Deputación de Lugo a costa da “dignidade das mulleres”

O PPdeG lamenta que PSOE e BNG vaian consumir mañá o “pacto guarro” cun presunto agresor sexual, José Tomé, cuxo voto é necesario para que a esquerda se manteña no goberno da Deputación de Lugo trala dimisión forzada de Tomé por varias acusacións de acoso sexual.

A secretaria xeral dos populares galegos, Paula Prado, amosou hoxe en Lugo o seu rexeitamento a este “branqueo” dun comportamento “indigno” e que vai supor “escribir unha das páxinas máis negras da historia de Lugo coa complicidade de Xosé Ramón Gómez Besteiro e Ana Pontón”. Por outra banda, amosou o apoio do PP as vítimas do político socialista.

A secretaria xeral do PPdeG, Paula Prado, e a presidenta provincial do PP de Lugo, Elena Candia, fixeron declaracións aos medios na sede dos populares lucenses, onde mantiveron unha reunión na que participaron diferentes representantes, entre eles o portavoz na Deputación, Antonio Ameijide.

A número dous dos populares galegos cualificou de “hipocrisía” o comportamento do PSOE e do BNG, que primeiramente esixiron a José Tomé que deixara de ser tanto deputado provincial como alcalde de Monforte, dúas dimisións que semanas despois seguen sen consumarse. Porén, “despois de pedir o seu cese, mañá consuman ese pacto guarro”.

Neste sentido, criticou a postura do BNG, a quen define como “cómplice” de que mañá na Deputación de Lugo se elixa a unha presidenta co apoio dun presunto acosador sexual. Paula Prado pregúntase con que cara van mirar ás mulleres cando vicepresidan a Deputación co voto de José Tomé e formando goberno coa persoa que encubriu ese presunto acoso, en referencia a Pilar García Porto.

“Estamos ante dous partidos que non respectan os dereitos das mulleres e séntanse con Tomé, vendendo os dereitos das mulleres por medio millón de euros. Ese é o prezo da dignidade das mulleres”, sinalou a número dous dos populares galegos.

Do mesmo xeito, amosouse moi crítica co “aval” de Besteiro e Pontón a ese pacto guarro. “Son cómplices e autorizan esta operación, pola que mañá unha muller vai ser presidenta da Deputación de Lugo co voto dun agresor sexual”, puntualizou sobre os líderes de PSdeG e BNG.

“ONDE ESTÁ O FEMINISMO DA CIG?”

Tamén foi crítica con determinado sector do feminismo galego, preguntándose cantas organizacións se manifestarán mañá diante das portas da Deputación de Lugo. “Vai estar a Marcha Mundial das Mulleres? Vai estar a CIG? Mañá veremos a realidade do feminismo desas mulleres que se manifestan ras rúas pedindo que os agresores sexuais saian das institucións”, manifestou a secretaria xeral do PPdeG ante os medios.

ELENA CANDIA: “OS LUCENSES TEÑEN QUE SABER QUE OS PRINCIPIOS DO BNG VALEN 500.000 EUROS”

Pola súa banda, a presidenta provincial do PP, Elena Candia, analizou o “comportamento moi criticable e indigno dende a nosa humildade opinión” de PSOE e BNG no caso Tomé e no procedemento para a elección da nova presidenta da institución provincial.  “Os lucenses teñen que coñecer quen está ao fronte destes dous partidos políticos e o que valen os seus principios. No caso do BNG, 500.000 euros”.

Candia asegura que o PSOE perpetúa a presentación dunha candidata para a que precisa o voto do ex presidente, a quen o secretario xeral do PSdeG lle pediu a acta e lle pediu a súa dimisión.

A presidenta provincial lembra que o PSOE xa non fala de presunto: “Non imos poñer nós en dúbida se o propio PSOE tivo a contundencia de pedirlle a dimisión. Pero o PSOE ten a compracencia de ampararse no seu voto, que é necesario para a elección da que, como todo parece indicar, será a próxima presidenta da Deputación de Lugo”. E, ademais, ten que apoiarse noutra persoa que foi “absolutamente coñecedora, colaboradora, cooperadora que non deixou a acta e que vai ser imprescindible para esa votación”, engade.

Por outra banda, Candia asegura que  o BNG branquea o comportamento por moi indigno que sexa por 500.000 euros. O seu feminismo a súa defensa dos dereitos das mulleres, as súas reivindicacións que todo coñecemos e constantemente escoitamos quedan minimizadas, branqueadas, normalizadas a cambio de 500.000 euros. A coherencia non existe nestes comportamentos”, puntualiza.

A dirixente popular preguntouse “que foi do BNG” toda vez que “cunha posición férrea defendendo os seus principios esixiu que o candidato á alcaldía Orozco se apartara. De feito, non se sentou a negociar ata que Orozco deixou a súa acta”. E, do mesmo xeito, incluso abandonou o goberno provincial cando o PSOE chegara a un acordo con Martínez -unha vez fóra do PSOE- para aprobar os orzamentos da Deputación de Lugo.

Sobre Tomé lembra que “o ex presidente dicía que no seu momento tomaba esa responsabilidade para restablecer a normalidade democrática” na institución provincial e “acabou provocando a situación máis indigna e máis anómala dentro do análise democrático que tivo esta institución nunca”.