O PPdeG esixe ao Goberno de Sánchez que atenda os “reiterados requirimentos” da Xunta sobre a resposta á Comisión Europea respecto a AP-9

O PPdeG esixe ao Goberno de Sánchez que atenda os “reiterados requirimentos” da Xunta de Galicia e facilite a resposta que lle dirixiu o Estado español á Comisión Europea despois do ditame sobre o cumprimento da normativa comunitaria en relación coas prórrogas da concesión da AP-9.

Os deputados populares no Congreso rexistraron unha nova pregunta na que censuran así mesmo que, unha vez máis, o Executivo central se negue ao rescate da Autoestrada do Atlántico, máxime despois do informe do Goberno galego que cifra o custo en 2.356 millóns de euros, similar ao das bonificacións que se están aplicando neste momento.

Deste xeito, o PPdeG quere coñecer se o Goberno central vai atender as demandas da Xunta de Galicia, á vez que advirte de que as condicións do rescate da autopista serán “máis gravosas a medida que pase o tempo”.

Neste sentido, o deputado do PPdeG e vicepresidente segundo da Comisión de Transportes e Mobilidade Sostible, Celso Delgado, lamenta que “Sánchez e Puente seguen desprezando a Galicia cunha infraestrutura vital para os galegos e que vertebra a Comunidade”. “Un maltrato que non se xustifica”, critica.

Os populares esixen coñecer que decisión está adoptando o Goberno de Sánchez tralos ditámenes europeos, afeando que “desaproveita claramente a viabilidade do rescate e ata discute coa Comisión Europea, mesmo indo aos tribunais de xustiza”.

Delgado urxe ao Goberno de Sánchez a que “se sente coa Xunta de Galicia”, lembrando que o pasado 2 de febreiro, o propio PSOE votou no Parlamento galego a favor de demandar toda a documentación relativa ao devandito expediente da Comisión Europea e das comunicacións mantidas pola administración do Estado con este obxecto. Unha petición impulsada polo PPdeG que, cos votos a favor socialistas e dos seus socios do BNG, saíu aprobada por unanimidade.

Para os populares existe un “tratamento diferenciado” con outras comunidades, lembrando a finalización da AP-7 en Alacante ou a transferencia da A-68 a Navarra. “Non podemos seguir con este agravio a Galicia e dende o PPdeG imos seguir reclamando o que é de xustiza: unha AP-9 libre de peaxes e transferida a Galicia”, subliña Delgado.

O PPdeG contrapón o “modelo Marín” de conxelación de taxas do lixo fronte ao “rolo totalitario” do BNG e o “taxazo” no Morrazo

As deputadas do Grupo Popular Dolores Hermelo e Patricia García denunciaron hoxe a “deriva autoritaria e a incompetencia xestora” amosada polo BNG e o PSdeG na Mancomunidade do Morrazo, logo dos lamentables acontecemento vividos na asemblea celebrada na tarde do venres. Neste sentido, contrastaron a imposición do novo “taxazo” do lixo nos concellos mancomunados fronte á xestión eficiente do Concello de Marín, que, estando fóra do ente supramunicipal e baixo goberno do PP, logrou manter o recibo conxelado aos seus veciños.

Dolores Hermelo e Patricia García cualificaron de “atentado democrático” o sucedido o pasado venres durante a Asemblea da Mancomunidade, onde se aprobaron as novas taxas desoíndo o clamor social. Así, criticaron duramente o despregamento de seguridade ordenado para manter aos veciños afastados da toma de decisións e a expulsión dunha concelleira do Partido Popular polo mero feito de cuestionar a xestión da presidenta.

O “BÚNKER” DE SANTOS

Dolores Hermelo foi taxativa ao valorar a actitude da alcaldesa de Moaña e presidenta da Mancomunidade, Leticia Santos (BNG), a quen acusa de instaurar un réxime de “ordeno e mando”. “O que vivimos o venres non foi un acto administrativo, foi unha cacicada na que Leticia Santos converteu a Mancomunidade nun búnker, utilizando a seguridade como escudo ante os veciños e aplicando unha mordaza totalitaria á oposición”, lembrou a deputada popular, quen afirmou que “expulsar unha concelleira democraticamente elixida por dicir a verdade é o síntoma definitivo de que o BNG perdeu os papeis e o respecto pola cidadanía”.

Hermelo lembrou que o “rolo” do BNG e os seus socios socialistas pasou por riba de 3.600 alegacións presentadas polos veciños, das cales se rexeitaron o 99 por cento sen apenas debate. “Desprezaron a 3.600 familias do Morrazo. Non é xestión, é imposición”, sentenciou a deputada.

O ESPELLO DE MARÍN

Pola súa banda, Patricia García desmontou a escusa económica do BNG, lembrando que, aínda que a suba vén provocada pola Lei de Residuos e Economía Circular do Goberno de Pedro Sánchez, existen ferramentas para paliar o golpe, que a Mancomunidade ignorou por “vagancia e ineficacia”.

Deste xeito, a deputada popular puxo como exemplo o modelo de Marín, municipio veciño que comparte a mesma realidade xeográfica e normativa, pero que logrou resultados opostos grazas á xestión do Partido Popular. “Mentres no Morrazo o BNG mete a man no peto dos veciños para pagar a factura de Pedro Sánchez, en Marín o PP fixo os deberes conxelando o recibo porque soubo xestionar, acolleuse ás bonificacións do canon de Sogama que ofrece a Xunta de Galicia e priorizou o benestar das familias”, explicou, para sentenciar que “no Morrazo prefiren a pancarta e a sablada fiscal; en Marín, a xestión e o aforro”.

As deputadas populares conclúen advertindo que a suba de taxas en Bueu, Cangas e Moaña é consecuencia directa “dunha dobre pinza: a lexislación sanchista que obriga ao cobro e a incapacidade dos gobernos locais do BNG e PSdeG para xestionar os residuos de maneira eficiente e bonificada, tal e como si fixo Marín”. “O BNG demostrou que o seu único modelo de xestión é o ruído, a prohibición da crítica e a suba de impostos”, finalizaron.