O PPdeG conmemora os dous anos desde a vitoria electoral de Rueda, comprometido “cos problemas dos galegos”, como a vivenda

O Partido Popular de Galicia conmemora os dous anos desde a vitoria electoral de Alfonso Rueda, a súa primeira maioría absoluta, facendo balance das súas políticas “centradas nos problemas e preocupacións dos galegos, como é a vivenda”.

Así o manifestou a secretaria xeral do PPdeG, Paula Prado, durante unha visita a uns terreos en Pontevedra nos que se construirán 53 inmobles promovidos pola Xunta de Galicia, onde estivo acompañada polo presidente local do PP de Pontevedra, Rafa Domínguez, e a concelleira e senadora Pepa Pardo.

A número dous dos populares galegos destacou que un dos principais compromisos do Goberno de Rueda é solucionar a preocupación da vivenda. “Na campaña electoral dixemos que nesta lexislatura iamos duplicar o número de vivendas públicas, pasando de 4.000 a 8.000, e a gran maioría xa están en marcha”, destacou. Ademais, lembrou que o Goberno galego xa foi máis alá dese anuncio e adiantou que a cifra medrará ata as 10.000 vivendas públicas en 2030.

“No PP resolvemos os problemas da xente: en vivenda, en sanidade… Sempre conectados co territorio e coas demandas dos galegos. Por iso cando preguntamos nas urnas a xente vota ao PP”, sinalou.

En contraste co modelo de Rueda, mencionou a xestión de Sánchez centrada en “vender fume”, ofrecendo “datos novos de vivenda que despois non se constrúe” e cunha Lei estatal de vivenda que “só favorece a ‘okupación’, porque non protexe aos propietarios”. Para Prado, esta normativa repercute negativamente na dispoñibilidade de vivenda, porque os propietarios “non teñen garantías” para acceder ao parque público con seguridade.

Reiterou que Sánchez e os seus socios independentistas mantéñense nun goberno “instalado na deriva, na corrupción e sen preocuparse dos problemas da xente”.

IMPULSO NECESARIO PARA OS PONTEVEDRESES

Durante o percorrido polos terreos nos que se construirá vivenda pública, Rafa Domínguez sacou músculo das iniciativas da xestión de Rueda nesta materia, e apuntou que, no caso concreto da superficie de hoxe, a inversión ascenderá a 10 millóns de euros.

Domínguez fixo balance do conxunto de vivenda pública na cidade de Pontevedra, con 74 vivendas en construción, 56 adxudicadas, 48 licitadas e 122 en proxecto. “Hai un impulso absolutamente necesario para intentar paliar un dos principais problemas de mozos e non tan mozos”, destacou.

“Alfonso Rueda vai na dirección correcta cando intenta resolver o que creo que é o primeiro problema de todos os galegos”, engadiu Domínguez.

Así mesmo, Paula Prado aproveitou a visita a Pontevedra para poñer en valor o traballo do presidente do PP de Pontevedra, ao que augura “converterse no próximo alcalde da cidade, despois de 30 anos de independentismo galego cun proxecto esgotado”.

Así, lembrou que este independentismo galego “aínda non condenou” os actos vandálicos que sofren as sedes dos populares en toda Galicia, feitos “violentos e afastados do sentir dos galegos, que prefiren o sentidiño e a tranquilidade”.

XUNTA DIRECTIVA AUTONÓMICA

A secretaria xeral do PPdeG tamén anunciou que este domingo se celebrará en Santiago unha Xunta Directiva Autonómica para facer balance dos dous anos desde as últimas eleccións autonómicas e dos proxectos levados a cabo neste tempo.

O PPdeG insta ao Goberno central a que abandone a política de anuncios e adopte medidas urxentes para afrontar o absentismo laboral

A portavoz da área de Emprego do Grupo Parlamentario Popular, Noelia Pérez, instou ao Goberno central a que impulse medidas reais e eficaces que permitan afrontar o absentismo laboral de forma estrutural.

Durante unha reunión coa Asociación Provincial de Empresarios da Construción de Ourense, a representante popular incidiu no impacto crecente que esta problemática está a ter sobre a produtividade e a competitividade das empresas, moi especialmente nas deste sector; así como na Seguridade Social e o funcionamento dos servizos sanitarios.

Segundo os datos da Autoridade Independente de Responsabilidade Fiscal (AIReF), as situacións de incapacidade temporal incrementáronse arredor dun 60% no período e 2017 e 2024, ao igual que a súa duración media, que se sitúa ao redor dos 46 días. É a propia AIReF a que alerta dun risco de prolongacións innecesarias e dun uso ineficiente dos recursos públicos. Neste punto, o Grupo Popular propón impulsar unha reforma do sistema de incapacidades temporais que permita mellorar o control, seguimento e avaliación dos procesos de baixa laboral.

Así, Noelia Pérez avogou por unha mellora da coordinación institucional, un seguimento rigoroso dos procesos de baixas, na prevención de prolongacións innecesarias e na dotación de recursos suficientes ás Comunidades, respectando sempre as súas competencias en materia sanitaria.

SEN SOLUCIÓNS DO GOBERNO CENTRAL
Tras recordar as reiteradas advertencias feitas desde Galicia sobre esta problemática, criticou o desleixo amosado polo Goberno central. E é que, tal e como indicou, o Executivo de Pedro Sánchez limitouse a anunciar un Observatorio do Absentismo Laboral, sen medidas concretas nin calendario definido nin tampouco propostas normativas que afronten de maneira efectiva un problema que continúa agravándose. Tal e como advertiu, estase a disparar o gasto público e a tensión nos sistemas sanitarios autonómicos é cada vez maior, ao tempo que esta problemática xera unha forte incerteza e perdas no tecido produtivo.

Asemade, a voceira de Emprego avogou por unha coordinación entre os servizos públicos de saúdes das Comunidades e o Instituto Nacional da Seguridade Social e as mutuas colaboradoras mediante protocolos comúns. E reclamou un maior financiamento estatal para afrontar o incremento da carga asistencial, derivada do aumento das situacións de incapacidade temporal e do absentismo laboral.

O PLAN GALEGO DE MELLORA DA INCAPACIDADE TEMPORAL
Fronte ao Goberno de Pedro Sánchez que non propón ningunha solución eficaz, o Plan de mellora da incapacidade temporal da Xunta, posto en marcha en agosto de 2024, permitiu unha revisión de máis de 107.000 procesos e motivou preto de 26.000 altas. Un plan que, tal e como explicou Noelia Pérez, busca que estes procesos de incapacidade temporal sexan máis eficientes, tanto para o paciente que solicita, o facultativo que a prescribe e o sistema que financia a prestación. Isto é, estas medidas pretenden acadar unha xestión das baixas máis operativa, eficaz e áxil.