O PPdeG lembra a Miguel Ángel Blanco como presidente honorífico das Novas Xeracións, “símbolo da coraxe democrática” e “exemplo para os mozos” fronte os que non condenan a ETA

O PPdeG homenaxea a Miguel Ángel Blanco no noveno aniversariodo seu nomeamento como presidente honorífico das Novas Xeracións do Partido Popular, como “exemplo moral e de coraxe democrática” para os mozos, fronte os partidos que “non condenan a historia recente de España”.

“Nós, no Partido Popular, temos a conciencia tranquila: estamos onde temos que estar. O que non entendemos é como hai partidos que non condenan os asasinatos de ETA e pretenden lexitimar a súa existencia”, sinalou a secretaria xeral do PPdeG, Paula Prado, durante o acto celebrado no Monumento á Liberdade, en A Merca, erixido en honra ao concelleiro galego de Ermua asasinado pola banda terrorista en 1997. Tamén participaron a presidenta das Novas Xeracións de Galicia, Nicole Grueira; o alcalde, Manuel Garrido, e a secretaria xeral do PP da provincia de Ourense, Sandra Quintas.

Prado amosou o seu rexeitamento o emprego partidista de discursos sobre memoria histórica de partidos “aliados cos herdeiros da banda terrorista e mesmo asesorados por eles”, citando ao BNG. Tamén fixo referencia a saída de prisión da ex-xefa de ETA, ‘Anboto’, que acaba de réxime de semiliberdade grazas ao acordo PSOE-Bildu co beneplácito do PNV. “Vemos que a inmoralidade da esquerda non ten fin”, critica.

Para a número dous dos populares galegos, é unha “falta de respecto para as vítimas e as familias” que saian á rúa persoas que “tanto dano fixeron, sen pedir perdón e sen axudar a esclarecer os crimes que custaron a vida a tantas persoas, tamén compañeiros, como foi Miguel Ángel Blanco”. Igualmente, afeou a esquerda que “veñan darnos leccións cando queren tapar a memoria máis recente de España”.

Por outra banda, puxo en valor o impulso de alcaldes como José Manuel Garrido e o seu equipo a iniciativas e servizos nos concellos do rural, felicitando neste caso ao rexedor porque o centro educativo do municipio incrementou o número de alumnado.

NICOLE GRUEIRA: “SOMOS UNHA XERACIÓN CON RESPONSABILIDADE”

A presidenta das Novas Xeracións do PPdeG reafirmou o “compromiso” dos mozos como unha xeración que “colle o relevo de Blanco con orgullo, con responsabilidade e convicción”.

Nicole Grueira lembrou que o terrorismo de ETA deixou máis de 853 vítimas mortais, milleiros de feridos e unha pegada “imborrable” nas familias que sufriron a inxustiza e a violencia. Así, referiuse ás vítimas do terrorismo coma o edil do PP asasinado, “símbolo da defensa da liberdade, da democracia e da dignidade fronte á barbarie”.

“Este ano cúmprense nove anos do seu nomeamento como presidente honorífico das Novas Xeracións nacionais, e para nós non é só unha data. É unha responsabilidade manter vivo o seu legado político e humano, e lembrar que hai cousas que nunca poden volver ocorrer”, indicou.

Referiuse a Miguel Ángel Blanco coma un mozo que decidiu dar un paso adiante nun momento no que facer política era “xogar a vida”, representando “a unha xeración que non cedeu ao medo e decidiu defender os seus principios”. Para Grueira, as novas xeracións teñen agora a “responsabilidade” de lembrar o que ocorreu e defender os valores da liberdade, o pluralismo, a convivencia e o respecto. “Miguel Ángel Blanco demostrou que a xente nova pode e debe ser protagonista na vida pública. Que implicarse paga a pena”, xustificou.

JOSÉ MANUEL GARRIDO: “É UN SÍMBOLO DE LIBERDADE”

Durante a súa intervención, o alcalde de A Merca reivindicou as orixes de Miguel Ángel Blanco neste municipio, no que repousan os seus restos mortais. “Aquí naceu, aquí tiña á súa familia, de aquí era a súa esencia… E aquí é onde seguimos recordando e honrando o seu legado”, apuntou.

Para Garrido, despois de 29 anos do asasinato de Miguel Ángel Blanco, falar del é “falar dun símbolo de defensa da liberdade e de loita contra a violencia”.

Tamén sinalou que o seu asasinato a mans de ETA “marcou un antes e un despois na historia de España e na loita da democracia contra o terrorismo, facendo que o seu recordo perdure sempre na nosa memoria persoal e colectiva”.

OFRENDA FLORAL NO CEMITERIO DE FARAMONTAOS

A homenaxe desenvolveuse no Monumento á Liberdade e, con posterioridade, os asistentes trasladáronse ao cemiterio de Faramontaos no que repousan os restos de Miguel Ángel Blanco, onde se realizou unha ofrenda floral.

O PPdeG logra a constitución do relatorio da AP-9 no Congreso, crucial para avanzar no desbloqueo da transferencia da Autopista do Atlántico a Galicia

O PPdeG logra, tras meses de reclamacións e bloqueo por parte do PSOE, a constitución formal no Congreso dos Deputados do relatorio da proposición de lei orgánica de transferencia da titularidade e competencias da autoestrada do Atlántico (AP-9) á comunidade autónoma de Galicia. Os deputados populares Celso Delgado, Pedro Puy e Tristana Moraleja celebran este logro, despois das intencións do Goberno de Sánchez, que pretendía adiar este trámite ata despois de Semana Santa.

“O PSOE quería dilatar novamente o proceso ata despois de Semana Santa, pero dende o PPdeG insistimos na celeridade e na importancia de abordar un calendario de reunións”, apuntan os populares. Lembran que a proposición de lei orgánica de transferencia á Comunidade Autónoma de Galicia da titularidade e as competencias da autoestrada da Atlántico AP-9 proveñen da unanimidade do Parlamento de Galicia á iniciativa, e foi tomada en consideración polo Pleno do Congreso en xuño de 2024, só co voto en contra de VOX.

“A pesar de decretarse a súa tramitación polo procedemento de urxencia, o Goberno, que controla ferreamente a Mesa do Congreso impuxo un boicot á tramitación, con 45 prórrogas do prazo de presentación de emendas ao articulado ata que, como consecuencia das presións do Grupo Parlamentario Popular, se pechou o prazo o 22 de outubro do presente ano”, subliña Delgado.

COMPORTAMENTO ESCANDALOSO E DEPLORABLE

O deputado popular tacha de “escandaloso e deplorable”  que o grupo Parlamentario Socialista, por indicacións do Goberno, rexistrase oito emendas ao articulado, opoñéndose á transferencia da titularidade da AP-9, expondo unha simple transferencia de competencias sobre administración e explotación e, ademais, que esta autoestrada se manteña dentro da rede de estradas do Estado.

“Estas emendas referendadas polo ministro Óscar Puente van na dirección contraria ao que demanda por unanimidade o Parlamento de Galicia, que é a transferencia á comunidade autónoma da titularidade e as competencias sobre o réxime xurídico da concesión e as funcións e os servizos que ata o de agora exerce a Administración Xeral do Estado”, insiste Delgado.

Os relatores do Grupo Popular, Celso Delgado, Pedro Puy e Tristana Moraleja seguirán impulsando a tramitación da que é unha “xusta demanda da sociedade galega”, tendo como obxectivo unha autoestrada AP-9 galega e libre de peaxes.

A CONSTITUCIÓN

A constitución do relatorio celebrouse hoxe ás 8,30 horas e asistiron os tres relatores do PP, os tres do PSOE, os dous de Sumar e  un relator de Junts, PNV, ERC. Non estiveron presentes os relatores de VOX e de Bildu. O deputado Celso Delgado solicitou que, tendo en conta o número de emendas rexistradas, tan só 11 (3 de Sumar e 8 do PSOE), se debería ter unha nova reunión do relatorio despois Semana Santa, para organizar e comezar os traballos.