O Grupo Popular pedirá no Pleno que o Goberno central habilite os mecanismos para que as empresas que desexen patrocinar o Xacobeo 2027 poidan facelo a partir do vindeiro 1 de xaneiro

O Grupo Popular demandará no Pleno da vindeira semana que o Goberno central habilite os mecanismos necesarios para que as empresas que desexen patrocinar o Xacobeo 2027 poidan facelo a partir do vindeiro 1 de xaneiro e beneficiarse dos correspondentes beneficios fiscais. Así mesmo, solicitará ao Goberno do Estado accións inmediatas para mellorar a estrada N-541 entre Ourense e Pontevedra, garantindo a seguridade tanto de vehículos como dos habitantes dos núcleos de poboación que atravesa, ademais de realizar un estudo de viabilidade sobre a construción dunha autovía ou vía de alta capacidade entre os concellos de O Carballiño e Pontevedra.

 

Ao remate da Xunta de Portavoces, o portavoz popular, Alberto Pazos, informou que o Parlamento galego acollerá a vindeira semana dúas sesións plenarias. Unha primeira terá como obxectivo aprobar os orzamentos da Xunta para o vindeiro ano 2025 e a Lei de medidas fiscais e administrativas.

 

ORZAMENTOS EN TEMPO E FORMA

 

“Galicia contará, un ano máis, e xa van 16 consecutivos con gobernos do PPdeG, con orzamentos en tempo e forma, uns orzamentos que acadan a cifra histórica de 13.954 millóns de euros, e que teñen catro obxectivos principais: impulsar a oferta de vivenda; sentar as bases da Galicia futura, con máis innovación; reforzar os servizos públicos; e apostar polos sectores produtivos e a transición verde”, sinalou Alberto Pazos. Así mesmo, lembrou que tres de cada catro euros destinaranse a gasto social, superando por primeira vez a barreira dos 10.000 millóns de euros; e se impulsan novas rebaixas fiscais, ao reducir o imposto de sucesións para parentes colaterais e con bonificacións destinadas a dinamizar o mercado da vivenda.

 

Respecto da aprobación do proxecto de Lei de medidas fiscais e administrativas, o portavoz popular lembrou que permitirá a implantación a partir do vindeiro 1 de xaneiro de medidas como a nova taxa turística, actuacións para incrementar o mercado de vivendas en aluguer en Galicia través de incentivos aos pequenos propietarios con inmobles baleiros para que os poñan no mercado ou accións dirixidas ao impulso ao sector eólico galego.

 

Polo que respecta ao Pleno ordinario, tamén dará comezo co debate para a súa aprobación dunha nova lei: a de estatística de Galicia, que chega ao debate definitivo sen votos en contra da oposición ao ditame. Este novo texto lexislativo facilita ao Instituto Galego de Estatística contar cunha información máis completa que permitirá tomar decisións estratéxicas e concluíntes tanto á Administración pública como ás empresas e os cidadáns.

 

A nova Lei de Estatística de Galicia actualiza a norma vixente desde hai 36 anos, tendo en conta as novas fontes de información, así como os potentes métodos de tratamento de datos, baseados no big data e na Intelixencia Artificial, que permiten reforzar a colaboración e os fluxos de datos estatísticos entre os distintos niveis da administración, así como incrementar a difusión e o acceso aos recursos estatísticos que se xeran.

 

BENEFICIOS FISCAIS PARA O XACOBEO 2027

 

Dentro do apartado de proposicións non de lei, o Grupo Popular demandará ao Goberno central que habilite os procedementos necesarios para que as empresas que desexen patrocinar actividades turísticas ao abeiro do Xacobeo 2027 o poidan facer a partir do vindeiro 1 de xaneiro de 2025, acolléndose aos correspondentes beneficios fiscais ao declararse o Ano Santo Xacobeo 2027 como Acontecemento de Excepcional Interese Público.

 

Alberto Pazos lembrou que o Ministerio de Cultura, no Pleno do Consello Xacobeo celebrado o pasado 1 de xullo en Pamplona, xa adquiriu o compromiso de promover a inclusión do Ano Santo Xacobeo nos orzamentos do Estado para 2025 como acontecemento de excepcional interese público, no período comprendido entre o 1 de xaneiro de 2025 e o 31 de decembro de 2027. “Porén, a complexa situación política na que se atopa o Goberno de Pedro Sánchez fainos temer que esta declaración non sexa unha realidade a tempo para que se poidan acadar os obxectivos que se perseguen e que as empresas que desexen colaborar co Xacobeo 2027 poidan facelo e acollerse a beneficios fiscais para iso”.

 

A segunda proposición non de lei do Grupo Popular ten que ver coa estrada N-541 e os numerosos accidentes de tráfico que se producen neste viario pola súa perigosidade. Diante desta situación, o portavoz popular lembrou que os alcaldes e alcaldesas de todos os concellos polos que transcorre a N-541 (Punxín, Maside, O Carballiño, Boborás, Beariz, O Irixo e Cerdedo-Cotobade, ademais dos de Ourense e Pontevedra) crearon o Pacto do Pedre, a través do que se demandan melloras inmediatas para esta estrada, que soporta un tráfico importante non só de turismos senón de transporte industrial vital para o desenvolvemento das comarcas.

 

“Desde o Grupo Popular consideramos necesario que desde o Parlamento de Galicia se esixa ao Goberno de España que leve a cabo actuacións inmediatas de mellora na N-541 para reducir a alta sinistralidade nesta vía de comunicación, adaptando esta estrada ás necesidades de tráfico que garantan a seguridade de vehículos así como dos habitantes dos núcleos de poboación polos que transcorre; e realizando, ao mesmo tempo, un estudio de viabilidade que contemple unha autovía ou vía de alta capacidade sen pasar por núcleos de poboación entre O Carballiño e Pontevedra”, concretou Alberto Pazos.

 

Por último, dentro do apartado de preguntas ao Goberno galego, o Grupo Popular interesarase pola situación da factoría de Alcoa na Mariña lucense e as previsións do Goberno de Pedro Sánchez para dar unha solución enerxética a esta fábrica; polo compromiso do Goberno central de poñer en marcha o tren de alta velocidade entre Galicia e o norte de Portugal; e polo grao de execución das liñas complementarias en apoio aos autónomos galegos, onde Galicia destaca como a comunidade cun maior número de convocatorias de axudas a este sector: case un 10 por cento do total do Estado.

Aprobado o ditame do proxecto de Lei de estatística de Galicia, paso previo para o seu debate definitivo en sesión plenaria

A Comisión 3ª, de Economía, Facenda e Orzamentos do Parlamento de Galicia aprobou hoxe o ditame do proxecto de Lei de estatística de Galicia, un texto que adapta á nova realidade a norma existente desde 1988 tendo en conta a achega de nova regulamentación, o desenvolvemento da tecnoloxía e a multiplicación das fontes de datos. O texto lexislativo queda agora pendente da súa aprobación definitiva en sesión plenaria.

 

A viceportavoz do Grupo Popular, Cristina Sanz, explicou que “estamos ante unha lei eminentemente técnica” pero destacou a importancia da estatística porque “toda actividade política baséase en datos, que son os que permiten facer proposicións ou tomar decisións”. Así, subliñou a necesidade de contar con “datos oficiais obxectivos e imparciais, tanto para que os políticos gobernen como para que os cidadáns exerzan control sobre o seu goberno”.

 

AUTOGOBERNO

 

Cristina Sanz asegurou, ademais, que “para o exercicio dun bo autogoberno é necesario dispor dunha boa información e, con tal fin, os redactores do Estatuto de Autonomía de Galicia incluíron como competencia exclusiva a estatística de interese galego”.

 

“Esa foi a primeira pedra na construción dun sistema estatístico propio, que se consolidou coa aprobación en 1988 da Lei de estatística de Galicia e a creación do Instituto Galego de Estatística e do Consello Galego de Estatística”, lembrou a viceportavoz popular, quen anotou que “agora cómpre adaptar a normativa á nova realidade á luz da experiencia e tendo en conta a achega da nova regulamentación, o desenvolvemento da tecnoloxía e a multiplicación das fontes de datos”.

 

Respecto da tramitación parlamentaria desta nova lei, a viceportavoz popular destacou “o espírito de consenso e de chegar a acordos amosado por todos os grupos parlamentarios”. Deste xeito, explicou que se incorporaron ao texto, ben directamente ou a través de transaccións, 4 das 9 emendas que presentou o PSdeG e 8 das 19 que rexistrara o BNG.

A Comisión 3ª remata a elaboración dos ditames dos proxectos de lei de orzamentos da Xunta para 2025 e de medidas fiscais e administrativas, co que quedan pendentes da súa aprobación en Pleno

A Comisión 3, de Economía, Facenda e Orzamentos,  do Parlamento de Galicia rematou esta mañá a elaboración dos ditames do proxecto de Lei de orzamentos da Xunta para o vindeiro 2025 e do proxecto de Lei de medidas fiscais e administrativas, co que ambos textos quedan pendentes da súa aprobación definitiva na vindeira sesión plenaria.

 

O portavoz popular, Alberto Pazos, manifestou que o debate en ponencia e comisión das emendas realizadas polos diferentes grupos parlamentarios “demostrou que existen dous modelos diferenciados de entender a política”. Así, criticou que BNG e PSdeG “presentan emendas para despois inventar números para darlles respaldo orzamentario, porque creen que os ingresos deben responder á expresión dun desexo e, como lles fan falta máis cartos para as súas promesas, os pintan nos orzamentos”.

 

XESTIÓN SERIA E RAZOABLE

 

Deste xeito, sinalou que gobernar é facer “unha xestión seria e razoable, e non unha expresión de desexos”, polo que cuestionou “por que o BNG propón un incremento dos ingresos de 255 millóns de euros e o PSdeG aumenta esta cifra ata os 513 millóns de euros, cando podían ter pintado nos orzamentos unha suba de 2.000 millóns de euros para facer fronte á débeda que nos deixaron cando gobernaban”.

 

“Desde o Goberno do PPdeG levamos moitos anos levando adiante un traballo serio, con cálculos rigorosos e boa xestión, e estaría ben que nalgún momento a oposición se molestara en facer unha proposta crible e que se poida comparar realmente co proxecto do PPdeG”, sinalou.

VIVENDA, TURISMO E EÓLICO

 

Respecto do proxecto de Lei de medidas fiscais e administrativas, o viceportavoz popular, Julio García Comesaña, salientou, entre outras medidas, que permitirá impulsar novas actuacións para favorecer a incorporación de vivenda ao mercado, a través da equiparación dos locais comerciais a vivendas para os efectos de aplicar as deducións fiscais na modalidade de transmisións patrimoniais, así como apoiar as políticas de vivenda protexida, de xeito que o custo delas sexa o menor posible.

 

Outra das medidas incorporadas nesta lei é a regulación para a implantación do imposto galego sobre as estadías turísticas, facilitando aos concellos que pretendan establecer esta recarga todos os elementos precisos para levalo adiante. Esta modificación non terá impacto económico nos orzamentos da Xunta, xa que estará bonificado ao 100 por cento por parte da administración tributaria galega.

 

Por último, o proxecto de Lei de medidas afectará á regulación do canon eólico ao modificar a base impoñible e o tipo de gravame a consecuencia da redución do número de aeroxeneradores polas repotenciacións previstas e, en especial, ás afeccións visuais derivadas da súa altura.

Os eurodeputados do PPdeG celebran o cambio de postura de Europa sobre o lobo: “Agora tócalle a Sánchez mover ficha”

O Partido Popular de Galicia celebra que, grazas ao impulso do Grupo Popular no Parlamento Europeo, o Comité Permanente do Convenio de Berna veña de aprobar a redución do nivel de protección do lobo e se abra así a posibilidade de que se poida regular o control cinexético da especie.

Os populares fanse eco da recente votación na que se decidiu reducir o nivel de protección do lobo, pasando de “especie de fauna estritamente protexida” a “especie de fauna protexida”. Unha decisión que deberá ser complementada coa posterior reforma da Directiva de Hábitats da Unión Europea e que os eurodeputados galegos Francisco Millán Mon e Adrián Vázquez consideran “un paso imprescindible para poder controlar as poboacións de lobo”.

O lalinense Adrián Vázquez explica que “aínda que Europa fixo o seu traballo, é importante que agora o Goberno de Sánchez mova ficha”, recordando neste sentido que España e Irlanda foron os únicos países que votaron en contra desta modificación no Consello de Europa. De aí o seu temor a que “o sectarismo da esquerda siga dificultando o traballo dos nosos gandeiros”.

Millán Mon, pola súa banda, subliña que en 2023 morreron en Galicia preto de 3.000 cabezas de gando debido froito de 1.600 ataques de lobos que “non deixan de aumentar”. Por isto, sinalou, Galicia leva anos demandando un cambio na liña das modificacións europeas.

“É descorazonador comprobar as desfeitas causadas por esta especie sobre o terreo”, lamentou Vázquez rememorando a súa recente visita a unha explotación gandeira en Vilalba e subliñando a necesidade de alcanzar un novo equilibrio entre as necesidades do sector primario e a protección do lobo.

Algo sobre o que Millán Mon apunta que “ata agora estábase primando excesivamente a conservación do lobo, cando o que debemos facer é alcanzar unha coexistencia máis equilibrada” . Por iso fai un chamamento a que “Europa volva poñer o sector primario primeiro” nesta lexislatura.

“Empezamos con bo pe, pero é moi importante que sigamos de cerca as necesidades e preocupacións dun mundo rural que non aguanta máis regulacións e decisións adoptadas sen contar con eles”, finaliza Vázquez.

INICIATIVA DO PARTIDO POPULAR

O cambio aprobado no Comité de Berna comezou cunha resolución aprobada polo Parlamento Europeo en novembro de 2022, a iniciativa do Partido Popular, que instaba á Comisión Europea a revisar a Directiva Hábitats para permitir a coexistencia do lobo e a gandería.

Para que esta modificación fose posible, era necesario modificar previamente o Convenio de Berna, xa que a Unión Europea é parte asinante deste tratado internacional que ten prioridade sobre as normativas europeas. Tras un largo proceso de debate, en decembro de 2023, a Comisión Europea presentou a proposta de cambio que finalmente foi aprobada esta semana.

A modificación do status do lobo permitirá á Unión Europea cambiar a Directiva de Hábitats, o que permitirá aos países adaptar os seus plans de protección, especialmente en áreas onde o lobo xa non está en perigo pero afecta á gandaría. O cambio entrará en vigor en tres meses, salvo obxeccións dun terzo das partes.

 

O PPdeG asegura que a muller e a igualdade seguirán sendo protagonistas das súas políticas en 2025

A secretaria xeral do Partido Popular de Galicia, Paula Prado, asegurou hoxe que a muller e a igualdade seguirán sendo protagonistas das políticas do partido no novo ano 2025 que está preto de comezar.

Durante a tradicional cea de Nadal do PP de Mos, no pavillón Óscar Pereiro, á que asistiron 1.000 persoas, Prado salientou que hai un dato do que se sente “realmente orgullosa”, e non e outro que o feito de que o PPdeG sexa o partido con máis alcaldesas de Galicia, un total de 28, que “no futuro serán máis”.

Así, puxo de exemplo a Nidia Arévalo, que leva máis de 16 anos á fronte do Concello de Mos, a máis veterana das catro rexedoras populares do sur da provincia de Pontevedra, onde tamén lideran os seus concellos Marta Valcárcel, en Salvaterra de Miño; Cristina Correa, en Oia; e Nava Castro, en Ponteareas.

Ademais, a secretaria xeral sinalou que grazas a valores como Nidia Arévalo ou a concelleira Feli Rodríguez, deputada no Parlamento, “queda clara a importancia do éxito dos proxectos a longo prazo que levan o selo do PP”.

Por último, Paula Prado non quixo esquecer a achega de Mos “aos dous grandes éxitos deste ano do PP en Galicia”: en febreiro, co apoio ao presidente Alfonso Rueda con case un 44% de voto, e en xuño, con máis de 2.500 votos no concello para triunfar nas eleccións europeas.

LUIS LÓPEZ: “É UN ORGULLO CONTAR CON LÍDERES COMO NIDIA”

O presidente provincial do Partido Popular de Pontevedra, Luis López, destacou que un ano máis esta xuntanza de Mos se consolida como un dos referentes do Nadal da provincia, ao que acoden ano tras ano arredor dun milleiro de persoas.

“Penso que estas xuntanzas son moi boas. Serven para que compartamos uns intres nestas datas festivas e sobre todo para amosar a unidade e compromiso do noso partido, algo fundamental sempre, porque unidos traballaremos moito mellor e acadaremos os nosos obxectivos”, indicou.

O presidente popular fixo especial fincapé no magnífico resultado nas eleccións municipais en Mos e gabou o traballo da alcaldesa e senadora, Nidia Arévalo: ¨É unha muller incansable que traballa arreo por Mos, que atende as súas demandas e que escoita aos seus veciños, e que ademais nos representa no Senado, onde é un orgullo poder contar con ela alí defendendo os intereses de Pontevedra e de Galicia”.

NIDIA ARÉVALO: “SOMOS UN CONCELLO CON IDENTIDADE PROPIA”

A senadora e alcaldesa Nidia Arévalo dedicou parte da súa intervención a expresar a súa  “gratitude” tanto aos afiliados e simpatizantes do partido a nivel local como ao presidente Alfonso Rueda, de quen destacou “unha fidelidade a Mos demostrada con apoio económico, con investimentos e con xestión”.

Puxo en valor que nestes anos Mos “pasou de ser un concello descoñecido e de paso a converterse nun municipio con identidade, con nome propio, con cinco polígonos empresariais, catro escolas infantís, oito colexios e un instituto, así como coa Cidade deportiva do Real Club Celta e con case taxa cero de desemprego”.

Unha transformación que foi posible grazas á aposta por proxectos como os que botaron a andar durante este 2024 e que se farán realidade de cara ao vindeiro ano como: a humanización da estrada Pereiras-Tameiga na Pardaucha; o centro de coidados intermedios e a escola infantil do novo proxecto sociosanitario do Rebullón; a posta en valor da contorna parroquial da Igrexa de San Miguel de Pereiras; as novas vivendas protexidas en San Eleuterio; o novo polígono empresarial de Arrufana; e o proxecto Galicia Sports 360 do Celta.

Arévalo tivo tamén unhas breves pero contundentes palabras para a oposición, á que acusou de “buscar só o seu beneficio persoal e non interesarse por Mos”. Máis concretamente, reprochou ao nacionalista Gustavo Barcia que “queira meterse na política autonómica, aínda que sexa en contra da lideresa do seu partido, só para seguir vivindo de non facer nada” e á socialista Victoria Alonso que “defende a un Pedro Sánchez que o único que fai polos concellos é cargalos de novos impostos”.

Rematou asegurando que só cun presidente do Goberno como Alberto Núñez Feijóo, un presidente da Xunta como Alfonso Rueda, un presidente da Deputación provincial como Luis López e un goberno municipal do Partido Popular “poderemos manter unha España, unha Galicia, unha Pontevedra e un Mos prósperos e que sexan o mellor lugar para vivir”.

 

O PP condena “a falta de compromiso de Sánchez con Alcoa e o emprego na Mariña” tras anular a mesa de seguimento

O PP condena, unha vez máis, “a falta de compromiso do Goberno de Sánchez” coa continuidade da actividade na planta de Alcoa na Mariña e o mantemento dos postos de traballo directos e indirectos tras anular a reunión da mesa de seguimento do acordo de viabilidade prevista para este luns 9 de decembro na que se debería tratar aspectos fundamentais sobre o futuro da factoría mariñá e que permitirían dar respostas aos traballadores.

A presidenta provincial e deputada no Parlamento de Galicia, Elena Candia, presidiu unha reunión na que participaron os senadores José Manuel Balseiro e José Manuel Barreiro, os deputados no Congreso Jaime De Olano e Cristina Abades, alcaldes e portavoces de concellos da comarca na que reivindicaron o cumprimento dos acordos no Parlamento de Galicia e no Congreso dos Deputados.

Os populares lamentaron “tanto as propias faltas de acción do Goberno de Sánchez que non está a cumprir o que promete como a falta de aclaracións nas respostas oficiais a preguntas dos senadores en relación a asuntos pendentes que contribuirían a garantir a viabilidade da planta e, polo tanto, á continuidade da súa actividade”.

Por unha banda, subliñaron que “a través das súas respostas recoñecen que a intención inicial do Goberno era que non participasen na mesa de seguimento ningún dos ministros implicados -Transición Ecolóxica e Reto Demográfico e Industria e Turismo-; xa que explican que estará presidida pola Secretaria de Estado de Industria”. Neste sentido, lembran que “o presidente da Xunta manifestou a súa vontade de asistir para garantir que a reunión sexa do máximo nivel e forzar a asistencia tamén dos respectivos Ministros”.

En relación ás medidas para garantir un prezo da enerxía competitivo, que é un dos principais problemas desta industria como o propio Goberno recoñece nas súas respostas, “non podemos ser moi optimistas coa implicación do Goberno de Sánchez” toda vez que “resolveron fóra de prazo e, a pesar de que prometeron reverter a situación, seguen sen autorización os parques eólicos de competencia estatal” vinculados a contratos de longa duración (PPA) con Alcoa. “Recoñecen por escrito que, dende decembro do ano pasado no que caducaba o prazo, non fixeron nada por darlle solución”. É dicir, “desautorizaron as promesas do secretario xeral do PSOE galego”.

Sobre a modificación do estatuto para a industria electrointensiva, “tampouco aclaran dende o Executivo cando estará aprobado nin en que condicións”. Do mesmo xeito, “non explican porque non esgota os instrumentos públicos de apoio a esta industria” coma a mellora das ferramentas de interrompibilidade ou establecendo a compensación máxima por CO2 permitida pola UE.

“O Goberno de Sánchez di que incrementou nun 25% con respecto ao 2023 estas axudas ata os 300M€ no 2024, moi lonxe dos preto de 900 M€ que se corresponderían co 25% dos ingresos por dereitos de emisión de CO2 que permite a Directiva Europea. As axudas que pon enriba da mesa do Executivo estatal non alcanzan nin a metade do permitido”, censuran.

Por outra banda, “o Goberno de Sánchez evita en todo momento aceptar unha posible intervención temporal e instrumental no caso de que, unha vez facilitadas todas as medidas necesarias para garantir a viabilidade da planta, fora preciso para manter a súa actividade”, expoñen. Á vista de que “incluso o PSOE votou en contra deste punto no Parlamento de Galicia rompendo a unanimidade coa que foran aprobados todos os anteriores; non podemos ser optimistas”.

Candia subliñou o apoio por parte do Partido Popular impulsando iniciativas nas distintas cámaras para esixir ao Goberno de España medidas para garantir a viabilidade da fábrica e que resultaron aprobadas no Congreso dos Deputados e, máis recentemente, no Parlamento de Galicia. Pola contra, na Deputación de Lugo PSOE e BNG tampouco apoiaron as reivindicacións do Grupo Popular “a pesar de que coinciden coas demandas dos traballadores”.

A través das iniciativas aprobadas no Congreso dos Deputados e no Parlamento de Galicia, o Partido Popular esixe responsabilidades en relación ao incumprimento dos compromisos adquiridos no acordo de viabilidade”.

IMPLICACIÓN REAL DO GOBERNO PARA UNHA SOLUCIÓN

Os populares reivindican unha “implicación real do Goberno de Sánchez nunha solución real e efectiva que permita recuperar a actividade completa da planta en condicións de competitividade con respecto a outras industrias noutros países de Europa” e que, polo tanto, “se garantan os empregos directos e indirectos. Non pode ser que esta situación de incerteza se manteña no tempo e arredor de 2.000 familias da Mariña sufran esta situación cada Nadal”.

 

Adrián Vázquez subliña que, grazas ao PP, os concellos galegos confirmaron que o ‘taxazo’ ao lixo “vén de Madrid, non de Bruxelas”

O eurodeputado do PPdeG Adrián Vázquez subliña que, grazas ao Partido Popular, os concellos galegos confirmaron esta semana que a imposición do taxazo ao lixo que quere impoñer o Goberno de Sánchez “non é culpa de Bruxelas”, senón que “vén de Madrid”.

O vicepresidente executivo da Comisión Europea, Maros Sefcovic, negou nunha resposta aos populares que a lexislación europea obrigue ao Goberno español a aplicar unha taxa de lixo en todos os concellos a partir do mes de abril de 2025, tal e como levan defendendo moito tempo desde Moncloa e como pretenden impoñer.

“Non hai nada peor que empezar un novo traballo e que, na primeira semana, te pillen mentindo. Iso é o que lle pasou a Teresa Ribeira cando a Comisión Europea nos confirmou que ese taxazo ao lixo era mentira”, sinala Adrián Vázquez.

O eurodeputado galego explica que “non é unha obrigación que vén de Europa, é unha obrigación que fai o Goberno de Sánchez, que o único que lle interesa é recadar máis para gastalo onde non debe”.

Por iso, grazas o traballo que fixo o Partido Popular, os alcaldes e alcaldesas dos 313 concellos galegos saben agora que este “Sanchazo” é unha cousa que “vén de Madrid, non de Bruxelas”. “E si, estamos a favor da economía circular, pero non estamos a favor que se lle cargue ao cidadán, cada vez máis, o que non se lle ten que cargar”, conclúe Vázquez.

 

Millán Mon denuncia la ineficacia del Fondo Europeo Marítimo, de Pesca y de Acuicultura (FEMPA) en la modernización de la flota

El eurodiputado gallego Francisco Millán Mon intervino ayer en el debate e intercambio de puntos de vista en la Comisión de Pesca del Parlamento Europeo, de la que es miembro titular. Fue una reunión de la Comisión de Pesca extensa, en la que se abordaron diversos puntos.

Intercambio de puntos de vista con la Directora de la EFCA

Millán Mon participó en el intercambio de puntos de vista con la Directora de la Agencia Europea de Control de Pesca (EFCA, por sus siglas en inglés), la irlandesa Susan Steele. El eurodiputado gallego comenzó expresando su satisfacción por que la EFCA tenga su sede en Vigo, “la capital pesquera de la primera región pesquera de Europa, que es Galicia”.

Aprovechó la ocasión para pedirle a los representantes de la Comisión Europea presentes en el debate “diálogo con el sector”, haciéndose así eco de su malestar por la falta de diálogo en la elaboración acelerada de los actos delegados y de ejecución previstos en el Reglamento de Control. “Hemos trasladado estas quejas al Comisario”, apuntó.

FEMPA 2021-2027 y el futuro de la flota pesquera

También se presentó, en la reunión de la Comisión de Pesca, un estudio sobre la contribución del Fondo Europeo Marítimo, de Pesca y de Acuicultura (FEMPA) 2021-2027 al futuro de la flota pesquera europea. Entre otras cuestiones, el estudio recogía que la edad media de la flota española es de 35 años. “La flota necesita una renovación urgente. Sin embargo, el FEMPA no se está utilizando para esto”, apuntó Millán Mon. “Este fondo es demasiado rígido y, lamentablemente, no está siendo eficaz a efectos de la modernización de la flota, como destaca el propio informe”, sentenció el eurodiputado gallego.

Acuerdos pesqueros con Guinea-Bissau y Cabo Verde

Millán Mon apoyó la conclusión de los acuerdos pesqueros con Guinea-Bissau y Cabo Verde, cuya importancia ponderó, especialmente la del primero, dado el muy elevado número de barcos europeos que faenan en sus aguas. El eurodiputado gallego aprovechó la ocasión para preguntarle a la Comisión Europea sobre la reforma de la llamada “cláusula social” en ambos textos. La Comisión respondió que, una vez confirmados los acuerdos, se podrían modificar incluso por canje de notas, por lo que no haría falta una reunión formal del Comité Mixto.

Para el caso concreto de Guinea-Bissau, el eurodiputado popular se refirió a la presencia china en esas aguas, “que no hace más que crecer”. “Hay preocupación, también en mi tierra, Galicia, por la explotación no sostenible de los recursos pesqueros por parte de la flota china”, señaló Millán Mon. En este caso, el problema es, especialmente, la sobrepesca de pelágicos para la fabricación de harina de pescado. “Esto puede perjudicar a las pesquerías a las que accede la flota europea y también a la seguridad alimentaria del país”, concluyó.

 

O Grupo Popular salienta que a Xunta sitúa a vivenda no centro das súas políticas, incrementando orzamentos, aumentando o parque público e creando novas liñas de axudas

A deputada do Grupo Popular María Deza asegurou hoxe no Pleno do Parlamento galego que a Xunta “pon a vivenda no centro das súas políticas incrementando orzamentos, aumentando o parque público de vivenda e creando novas liñas de axudas”. “Namentres, desde o Goberno de Pedro Sánchez estase a facer xusto o contrario, aplicando cada vez políticas intervencionistas que o único que provocan é un detrimento da oferta”, anotou.

María Deza asegurou que “o principal motivo da carestía é a existencia dun problema de escaseza da oferta, ante o que a Xunta está a traballar apoiada en tres piares fundamentais: a construción de vivenda pública, o desenvolvemento de solo residencial para aumentar o parque da vivenda, e na adopción de medidas lexislativas e fiscais que incentiven a posta de inmobles no mercado”.

AMPLO ABANO DE PROGRAMAS

En concreto, a deputada popular salientou que a Xunta inclúe nos seus orzamentos para o vindeiro ano máis de 240 millóns de euros para impulsar as súas políticas en materia de vivenda, dos que máis de 100 millóns serán para construír novas vivendas públicas, máis de 20 millóns para o desenvolvemento de solo residencial e preto de sete millóns para o programa Rexurbe.

“Ademais, o Goberno galego seguirá despregando un amplo abano de programas e liñas de axuda que faciliten o acceso á vivenda e á mobilización de vivendas baleiras; fomenten a construción de vivendas destinadas ao alugueiro accesible; a adquisición de vivendas protexidas, en cascos históricos ou en concellos de reto demográfico a través de axudas directas; a adquisición da primeira vivenda co aval mozo destinado para menores de 36 anos; sufragar o alugueiro a través de axudas directas; ou a rehabilitación de vivendas de titularidade municipal que pasan a vivenda pública”, afirmou.

María Deza contrapuxo “os anuncios baleiros aos que nos ten acostumados o Goberno de Pedro Sánchez co traballo e os pasos adiante que está a dar a Xunta en materia de vivenda, con exemplos tanxibles como a constitución o pasado novembro da Sociedade de Vivenda Pública de Galicia, que xestionará a promoción de 2.350 novas vivendas de promoción pública; o avance das actuacións para ter rematadas en 2026, polo menos, 1.500 das 4.000 vivendas de promoción pública comprometidas nesta lexislatura; dando pasos na Estratexia Galega de Solo Residencial; e avanzando nos trámites para a construción de 1.600 novas vivendas”.

AXILIZAR A TRAMITACIÓN DE PROCEDEMENTOS

Por último, a deputada popular considerou “necesario impulsar e axilizar a tramitación dos procedementos previstos nas normativas autonómicas relativas a vivenda e solo residencial, tentando reducir tempos de tramitación, sen perder garantías e seguridade xurídica nas actuacións a desenvolver”. “Por iso, na Lei de acompañamento dos orzamentos da Xunta para 2025 inclúese unha batería de medidas lexislativas e fiscais, así como unha serie de medidas excepcionais e temporais aplicables ata finais de 2028”, indicou.

“En concreto, levaranse a cabo modificacións na Lei de vivenda de Galicia e na Lei do Solo de Galicia que permitirán implantar os mecanismos que posibiliten a execución dos obxectivos de duplicar o parque de vivenda pública nos vindeiros anos e de xestionar solo para a construción das 20.000 vivendas protexidas”, rematou.

 

O Parlamento de Galicia solicita ao Goberno de España a transferencia das competencias en meteoroloxía e estudos oceanográficos

O Pleno do Parlamento de Galicia aprobou hoxe a proposición non de lei do Grupo Popular, que non contou co apoio do PSdeG, a través da que se solicita ao Goberno de España a transferencia da competencia dos servizos de meteoroloxía e estudos oceonográficos, que virán acompañados das funcións, medios financeiros e materiais relativos para o desenvolvemento destes traspasos.

A viceportavoz do Grupo Popular, Paula Prado, explicou que a Constitución Española establece como competencia exclusiva do Estado o servizo meteorolóxico, “pero isto non é inconveniente para que Galicia reciba a súa transferencia, xa que no Estatuto de Autonomía de Galicia existe unha previsión sobre ‘as restantes materias que con este carácter e mediante lei orgánica sexan transferidas polo Estado’”.

“Polo tanto, se o Goberno central fai o que nunca adoita facer, ceder, hai marco legal para dita transferencia”, asegurou Paula Prado, quen afirmou que “Galicia vai seguir facendo unha posición firme de defensa dos seus intereses como comunidade autónoma, sen hipotecas, nin mediacións, nin obediencias, máis alá da que se lle debe ao pobo galego”.

AMPLIACIÓN DO TEITO COMPETENCIAL

Prado manifestou que “seguimos insistindo na ampliación do noso teito competencial naquelas materias que son de especial interese para Galicia, co obxectivo de mellorar a súa xestión”. Así, lembrou que “os últimos acontecementos ocorridos no territorio español por fenómenos meteorolóxicos adversos, así como os que ocorren habitualmente en Galicia, poñen de manifesto a importancia de ter información precisa sobre os cambios meteorolóxicos, ademais da potestade de poder activar alarmas, baseándose na proximidade dos servizos e a precisión aportada pola experiencia”.

Meteogalicia é unha unidade de observación e predición creada hai 24 anos, que na actualidade depende da Consellería de Medio Ambiente e Cambio Climático. “Estamos a falar dunha entidade científica de referencia a nivel europeo que ofrece cada día información precisa, rigorosa e de calidade ao conxunto da cidadanía, que conta ademais coas ferramentas e recursos necesarios para predicir e anticiparse a posibles efectos adversos dos distintos fenómenos meteorolóxicos”, concretou a viceportavoz popular.

Así mesmo, apuntou que Meteogalicia conta con 160 estacións meteorolóxicas espalladas por toda Galicia, fronte ás 52 da Axencia Estatal de Meteoroloxía, ademais de contar cun conxunto de equipamentos e cun radar que ofrecen datos sobre a situación en cada zona cada 10 minutos.

INVESTIGACIÓN SOBRE GALICIA DESDE GALICIA

Respecto da solicitude de transferencia dos estudos oceanográficos, Paula Prado sinalou que “queremos que a investigación neste ámbito referida a Galicia non se decida desde un despacho do Paseo da Castellana”. “Somos a principal potencia pesqueira de España e de Europa, polo que é lóxico ter a capacidade de emitir informes e facer estudos, e non que o teña que facer o Goberno central”, afirmou.

“Non ten sentido que territorios sen mar opinen sobre o noso mar, ao igual que ocorre coas políticas sobre a protección do lobo”, rematou.