O Grupo Popular pedirá no Pleno que o Parlamento de Galicia solicite á Mesa e á Presidenta do Congreso o desbloqueo da tramitación da proposición de Lei de transferencia da AP-9

O Grupo Popular proporá no Pleno da vindeira semana a aprobación polo Parlamento de Galicia dunha resolución a través da que se pide á Mesa e á Presidenta do Congreso que desbloquee a tramitación da proposición de Lei orgánica de transferencia da titularidade e competencias da AP-9, acordando de xeito inmediato a finalización do prazo para a presentación de emendas para que este texto lexislativo avance cara a súa aprobación definitiva. Así mesmo, pedirase ao Goberno central que recupere o 100 por cento da bonificación polas baixas de maternidade ou paternidade, logo de que as substituíra por unha bonificación fixa de 366 euros sobre a cotización do empregado en situación de baixa.

Ao remate da Xunta de Portavoces, o portavoz popular, Alberto Pazos, comezou a súa comparecencia ante os medios celebrando que “hoxe fai un ano das eleccións autonómicas nas que os galegos volveron confiar maioritariamente no Partido Popular de Galicia e Alfonso Rueda conseguiu a súa primeira maioría absoluta para seguir gobernando con todo o sentidiño Galicia”. “Foron 12 meses nos que Alfonso Rueda xa deu mostras do seu xeito de gobernar e de ter cumprido ou en proceso de realización os máis de 800 compromisos recollidos no programa electoral co que se presentou ás eleccións”, anotou.

“Nos imos seguir gobernando centrados no que realmente preocupa e necesitan todos os galegos, deixando para BNG e PSdeG a demagoxia e as difamacións coa que xa nos teñen acostumados, sen iniciativas que aporten algo novidoso ao que xa está facendo a Xunta ou viables coas que poder complementar a acción do Goberno de Rueda, pero con continuas faltas de respecto a conselleiros e funcionarios públicos”, manifestou.

En concreto, Alberto Pazos referiuse á “indignante e sexista caricatura da conselleira de Política Social realizada polo sindicato satélite do BNG que coñecemos onte, e que aínda estamos á espera de que as tan cacarexadas feministas galegas rexeiten e pidan a retirada desa campaña, así como unha rectificación pública desta falta de respecto a unha conselleira, que por enriba de todo é unha muller traballadora e respectable”.

Respecto da orde do día da sesión plenaria que terá lugar a vindeira semana, o Grupo Popular defenderá unha proposición non de lei a través da que se pide á Mesa e á Presidencia do Congreso o desbloqueo da tramitación da proposición de Lei orgánica de transferencia da titularidade da AP-9, de xeito que se poña fin ao prazo de presentación de emendas para que este texto lexislativo avance cara ao seu debate de aprobación definitivo.

“Ademais, incluímos nesta ocasión que o Ministerio de Transportes e Mobilidade Sostible avalíe a oportunidade do rescate da AP-9, tendo en conta que, coas novas bonificacións das peaxes anunciadas polo Goberno central, o custo da indemnización polo rescate e o custo das bonificacións ata o final da concesión supoñen uns importes moi semellantes”, apuntou.

20 PRÓRROGAS

Alberto Pazos criticou que “levamos 20 prórrogas no Congreso, contando xa a que se aprobou esta mesma mañá, ao prazo de presentación de emendas á proposición de lei para a transferencia da titularidade da AP-9, prórrogas que chegan ata as 35 se contabilizamos as habilitadas pola Mesa do Congreso desde a chegada de Pedro Sánchez á Moncloa, o que pon de manifesto o nulo interese do Partido Socialista en tramitar esta transferencia a Galicia, manexando ao seu antollo á Presidenta da Mesa do Congreso”.

A segunda das proposicións non de lei que o Grupo Popular defenderá no Pleno da vindeira semana ten que ver coa recuperación do 100 por cento da bonificación polas baixas de maternidade, logo de que o Goberno de Pedro Sánchez fixera desaparecer esta bonificación, sendo substituída por unha fixa de 366 euros sobre a cotización do empregado en situación de baixa.

“Estas medidas representan un risco para a estabilidade laboral das persoas que substitúen a traballadores durante situacións vinculadas ao nacemento e coidado de menores, así como no exercicio da atención aos menores lactantes ou os riscos asociados ao embarazo e lactancia natural, polo que consideramos que a bonificación na contratación nestes casos é esencial para avanzar na materialización dos dereitos das mulleres e promover unha participación máis equitativa dos homes nas responsabilidades do coidado”, afirmou Alberto Pazos.

A sesión plenaria inclúe a comparecencia do conselleiro de Educación, Ciencia, Universidades e Formación Profesional para informar das liñas de actuación en materia de I+D+i da Xunta de Galicia.

Dentro do apartado de preguntas ao Goberno galego, o Grupo Popular interesarase pola actualización das entregas a conta a Galicia, logo do cambio de criterio discrecional do Goberno central para tentar forzar a aprobación das medidas esixidas polos seu socios de goberno, “unha decisión arbitraria que no caso de Galicia suporá unha redución das entregas a conta de 700 millóns de euros respecto das que se comunicaron a comezos de ano”.

A segunda das preguntas ten que ver coa sanidade e a atención nos hospitais comarcais e, en concreto, o resultado das medidas postas en marcha pola Xunta para incentivar a cobertura de prazas nestes hospitais comarcais. E, por último, o Grupo Popular tamén se interesará pola evolución e a finalidade das axudas extraordinarias ao retorno que ofrece a Secretaría Xeral de Emigración, dirixidas especialmente a facer fronte aos gastos derivados do seu regreso a Galicia.

SOLICITUDE INFORMACIÓN INTERRUPCIÓN DO PLENO

Por outra banda, Alberto Pazos informou de que na Xunta de Portavoces “solicitamos
información sobre a interrupción premeditada, planificada e coordinada que sufrimos do pasado Pleno”. Neste sentido, considerou “intolerable que grupos políticos amparen actuacións claramente antidemocráticas como é a interrupción deliberada dunha sesión plenaria do máximo órgano de representación e debate de Galicia”.

“Consideramos necesario garantir que calquera grupo se exprese con total liberdade e cando é o quenda do Goberno galego o poida facer nas mesmas condicións”, manifestou o portavoz popular, quen lamentou que “parece que hai quen aplaude que esas condicións non sexan as mesmas e consideran que o Goberno de Galicia e a representación do PPdeG non temos dereito a expresarnos con mesma liberdade como a que o fan outros grupos políticos”.

O PPdeG denuncia que as prórrogas á tramitación da transferencia da AP-9 no Congreso alcanzan xa 20 só no que vai desta lexislatura e 35 en total

Os deputados do PPdeG no Congreso denuncian que as prórrogas á tramitación da proposición de lei para a transferencia da AP-9 alcanzan xa as 20 só no que vai desta lexislatura e ascenden ata as 35 desde a chegada de Pedro Sánchez á Presidencia do Goberno de España.

Fano logo de que hoxe mesmo a Mesa do Congreso dos Deputados, dominada polo PSOE e Sumar, acordase a 20ª prórroga no prazo de presentación de emendas a esta proposta a pesar de que no seu día se acordou que se tramitaría polo procedemento de urxencia.

“Unha vez máis acredítase o boicot do Goberno de Sánchez, coa conivencia do PSOE galego, impedindo que unha iniciativa avalada pola unanimidade do Parlamento de Galicia poida pasar a Comisión para ser debatida na ponencia”, sostén o deputado galego e vicepresidente segundo da Comisión de Transportes e Mobilidade Sostible do Congreso, Celso Delgado. Ademais, engade non entender “como o BNG apoia constantemente a este Goberno”.

Denuncia tamén que, mentres isto ocorre nesta e noutras cuestión de vital importancia para Galicia, outras comunidades autónomas, en cambio, están a recibir un trato diferenciado e moito máis beneficioso por parte do Goberno de España.

Pon o exemplo de que hai poucos días o Goberno acordou prorrogar un ano máis a gratuidade da AP-7 en Alicante e traballa para levantar definitivamente a peaxe de dita autopista. En cambio, nunha situación análoga, négase a liberar de peaxe o tramo Vigo-O Porriño da AP-9.

O PPdeG acusa ao Goberno central de estar máis ocupado en tapar a súa corrupción que en axilizar o traspaso da xestión do litoral a Galicia

O PPdeG denuncia os escasos avances por parte do Goberno de Pedro Sánchez no referido ao traspaso dos medios necesarios para que Galicia poida exercer as súas competencias sobre a xestión do litoral e apunta á “corrupción na que está sumido o PSOE” como motivo desta “parálise”.

Así o manifestou esta mañá a secretaria xeral dos populares galegos, Paula Prado, nunha visita ao concello de Cangas na que estivo acompañada polo presidente provincial do PP de Pontevedra, Luis López, e a deputada autonómica e concelleira do partido nesta localidade, Loli Hermelo, e na que afirmou que “Galicia necesita xa os medios para desenvolver a súa Lei do litoral”.

Recordou que xa hai máis de ano e medio que se aprobou esta norma que, partindo do convencemento de que “para os galegos o mar é emprego, riqueza e vida”, ten como obxectivo que “o noso litoral poida ser xestionado desde Galicia e para os galegos”. Algo para o que é necesario que o Goberno central transfira á Xunta non só as competencias de xestión do dominio público marítimo-terrestre, senón tamén os medios persoais, materiais e económicos para exercelas.

“Chegamos a febreiro de 2025 e Galicia aínda non recibiu eses medios”, lamentou ao tempo que denunciaba que “non se pode seguir perdendo o tempo” nesta cuestión e moito menos a causa da “parálise” dun Goberno central “ocupado exclusivamente en tapar a corrupción que envolve ao PSOE e que se estende xa por todo o territorio”.

Paula Prado fixo así referencia aos casos nos que están implicados desde varios ministros do Goberno de Pedro Sánchez ata o propio irmán do presidente, así como o fiscal xeral do Estado. Unhas tramas corruptas ás que se engade ademais a recente detención dun concelleiro socialista en Cangas logo de ser acusado dun presunto delito tráfico de influencias e suplantación de identidade.

“Unha detención da que aínda non escoitamos ningunha explicación do seu xefe de filas, o señor Besteiro, e ante a que a alcaldesa nacionalista de Cangas garda o mesmo silencio que a señora Pontón no que se refire á corrupción dun Pedro Sánchez ao que segue a apoiar incondicionalmente”, subliñou.

A número dous dos populares galegos esixiu aos dirixentes do socialismo e do independentismo galego que dean explicacións sobre este caso e que tomen as accións pertinentes xa que, en casos como estes, asegura “non hai cabida para o silencio nin a indiferenza”.

O ÚNICO PARTIDO QUE DEFENDE O LITORAL GALEGO

O presidente provincial do PP de Pontevedra, Luis López, insistiu na reclamación ao Goberno central para que cumpra e axilice o traspaso dos medios precisos para que a transferencia das competencias sexa efectiva: “Mentres o Goberno de Sánchez nin xestiona nin deixa xestionar, Galicia conta cun goberno que goberna e avanza”.

O presidente provincial precisou tamén que, malia todas as novas que se están coñecendo estes días e que están manchando o nome de Cangas, o Partido Popular “será sempre a solución para devolver a dignidade, a boa política e a estabilidade a Cangas e para defender a súa imaxe e a dos seus veciños”.

“Cangas xa era noticia polas liortas do seu Goberno tripartito, pero agora, ademais, o é tamén por ser un buraco negro de escándalos”, asegurou citando a dimisión forzosa da tenente de alcalde socialista en agosto e o recente arresto doutro membro socialista do goberno. Feitos que, na súa opinión, “repercuten moi negativamente na estabilidade e no futuro do Goberno local, ademais de  abochornar aos veciños deste gran concello”.

A deputada canguesa Loli Hermelo, pola súa banda, quixo aproveitar a ocasión para reivindicar que o PPdeG é “o único partido que pelexa para que Galicia poida xestionar o seu litoral” e lamentou a parálise na que está sumido o seu Concello.

Alfonso Rueda: “Seguiremos correspondendo a confianza dada con traballo, con compromiso e co obxectivo de que Galicia siga crecendo”

O presidente do PPdeG, Alfonso Rueda, apelou hoxe á confianza que os galegos depositaron nel hai un ano comprometéndose a “seguir renovándoa cada día” e ofrecéndolles a cambio “traballo sen descanso” para “responder aos compromisos dados e facer que Galicia siga crecendo”.

Fíxoo no acto organizado polos populares galegos en Santiago para celebrar o primeiro aniversario da maioría absoluta acadada o pasado 18 de febreiro. Un acto que superou todas as expectativas de afluencia –asistiron 2.500 persoas– e na que o presidente invitou a todos a involucrarse no que considera a “tarefa colectiva” de “seguir escribindo as mellores páxinas de Galicia”.

“Quero unha Galicia na que caiba todo o mundo, na que haxa igualdade de oportunidades e na que a vivenda sexa un dereito e non unha ilusión. Unha Galicia con identidade, aberta aos investimentos que crean traballo, e potente en I+D+i”, salientou como algúns dos seus obxectivos neste sentido.

Uns obxectivos que han de ser acadados “ao estilo de Galicia” e desde o inconformismo, a esixencia, a humildade e a ambición. “O noso estilo é máis de convencer que de impoñer, máis de convivir que de dividir, máis de sentidiño que de tolerías e máis de esixirnos a nós que de esixir aos demais”, explicou.

“Nós somos de cumprir a palabra dada e por iso estou orgulloso de que 2 de cada 3 medidas das que estaban no noso programa electoral xa están feitas ou en marcha para que sexan unha realidade antes do remate da lexislatura”, engadiu.

Enumerou así medidas como a gratuidade das matrículas universitarias, o reforzo da FP, as 2.000 vivendas públicas xa en marcha, as baixadas de impostos, as facilidades para as mulleres que se queiran someter a tratamentos de fertilidade, o plan de choque en dependencia, o rescate das autovías con peaxes en sombra ou a posta a disposición das empresas de solo público gratuíto durante oito anos.

“DERIBAREMOS OS OBSTÁCULOS COA FORZA DA CONSTITUCIÓN, DA RAZÓN E COA CONFIANZA DA XENTE”

“Xa sexa ‘Galicia cumpre’, ‘Galicia funciona’ ou ‘Galicia goberna’, o significado dos nosos lemas é sempre o mesmo e todo o contrario da oposición que temos”, afirmou Rueda referíndose a partidos que “fan cero autocrítica, cren que teñen a razón absoluta e están enfadados porque a xente non os vota”.

Animando aos seus a “non perder o tempo con eles”, o presidente non dubidou en subliñar: “Son os mesmos de sempre e elixidos a dedo polos de sempre: un polo dedo infalible de Pedro Sánchez e outra polo dedo infalible da UPG”.

O presidente recordou a campaña electoral á que o PSdeG se presentou “sen ter un programa electoral e coa única promesa de que a AP-9 ía ser gratuíta”, mentres que o BNG fíxoo cun “programa oculto que non lles interesaba que se soubese”. Un programa que, tal e como engadiu, supoñía un “branqueamento absoluto” do ideario nacionalista galego que “sempre defenderon e volveron defender desde o día seguinte das eleccións”.

Rueda apuntou a que a vitoria de hai un ano ten que servir para “derribar os obstáculos dun nacionalismo que levanta fronteiras utópicas e dun Pedro Sánchez que divide a sociedade en dous e non dá nada a Galicia” e facelo “coa forza da Constitución, da razón e coa confianza da xente”.

“Ao igual que o fixemos coa Lei do litoral, farémolo coa transferencia da AP-9 e co financiamento autonómico. E seguirémolo facendo cada vez que a oposición enfurruñada diga ‘non’ aos turistas, á industria, aos investimentos, e a os servizos públicos de calidade”, concluíu.

En clave nacional, o presidente do PPdeG remarcou que “a España lle iría moito mellor coa normalidade extraordinaria que temos en Galicia, coa seriedade coa que nos tomamos as cousas en Galicia, coa política útil que practicamos en Galicia e cun presidente como Alberto Núñez Feijóo”.

Rueda referiuse ao seu antecesor reafirmando o seu orgullo por suceder a quen apostou por el e a quen considera un mestre que “ten que ser presidente do Goberno de España porque el o merece e Galicia o necesita”.

Tamén reivindicou o orgullo por suceder “a quen foi o primeiro presidente elixido democraticamente en Galicia”, Xerardo Fernández Albor; e a “quen anos despois da súa partida temos que seguir reivindicando e que aínda provoca o nerviosismo dos que son incapaces de asimilar que sempre lles ganou as eleccións”, Manuel Fraga.

No acto tamén interviñeron o presidente nacional do PP, Alberto Núñez Feijóo, a secretaria xeral do PPdeG, Paula Prado, e os presidentes provinciais Diego Calvo, Elena Candia, Luis Menor e Luis López.

Alberto Pazos advirte que a reforma da Lei da dependencia estatal “derivará nun incremento considerable e preocupante da débeda de máis de 2.500 millóns de euros do Estado con Galicia”

O portavoz do Grupo Popular, Alberto Pazos, advertiu hoxe que a reforma da Lei de dependencia, aprobada o pasado martes polo Goberno central, “derivará inevitablemente nun incremento considerable e preocupante da débeda de máis de 2.500 millóns de euros que na actualidade xa ten con Galicia” pola atención aos dependentes, polo que demandou que o Goberno de Pedro Sánchez “adapte a súa aportación aos novos servizos que esta modificación obriga a prestar tanto a comunidades autónomas como a concellos”.

Alberto Pazos lembrou que na sesión plenaria celebrada esta semana aprobouse unha proposición non de lei do Grupo Popular, que non contou co apoio dos deputados socialistas, a través da que se reitera ao Goberno central a solicitude para que cumpra o recollido na Lei de dependencia e abone a Galicia os máis de 2.500 millóns de euros que lle debe por non sufragar o 50 por cento do custo da atención aos dependentes que lle corresponde.

MÁIS SERVIZOS SEN FINANCIAMENTO

“Cantas horas do servizo de axuda no fogar poderíamos financiar nos concellos con estes cartos?, cantas prazas de centros de día e novas casas do maior poderíamos poñer en marcha por toda a xeografía galega? ou canto poderíamos mellorar e axilizar a atención aos nosos dependentes se o Goberno central saldara a súa débeda de 2.500 millóns de euros con Galicia?”, cuestionouse Alberto Pazos.

O portavoz popular lamentou que “o Goberno de Pedro Sánchez, para tapar a súa incompetencia no cumprimento das súas obrigas en materia de dependencia, ponse de perfil e deu un paso máis o pasado martes aprobando unha reforma desta Lei de Dependencia, que obriga a comunidades autónomas e concellos a prestar máis servizos aos maiores e dependentes, pero sen poñer enriba da mesa o financiamento necesario para sufragar estes servizos nin ter feito consulta algunha previamente cos responsables autonómicos para a adopción destas novas medidas”.

“Saudamos a incorporación dalgunhas destas medidas ou os cambios introducidos na Lei de dependencia, máxime tendo en conta que a gran maioría foron propostos pola propia conselleira ao ministro o pasado mes de decembro e unha boa parte delas xa se están aplicando en Galicia desde tempo”, indicou o portavoz popular.

Porén, criticou que, “unha vez máis, o Goberno de Pedro Sánchez obrigue a comunidades e concellos a prestar novos servizos en materia de dependencia sen o correspondente respaldo financeiro, o que inevitablemente vai derivar nun incremento considerable e preocupante da débeda que na actualidade xa ten con Galicia de 2.500 millóns de euros”. Ademais, apuntou que esta ampliación de actividades do servizo de axuda no fogar fora do domicilio “se faga sen ter en conta a opinión dos concellos e se dispoñen do persoal suficiente para prestar estes servizos, cando xa é patente, a día de hoxe, a manifesta falta de persoal que teñen os concellos para atender o actual servizo de axuda no fogar”.

Alberto Pazos demandou aos socialistas galegos que “deixen de poñerse de perfil ante este grave problema financeiro que ten a Comunidade galega polo desprezo que amosa o Goberno de Pedro Sánchez para atender as necesidades dos maiores e dependentes e amosen a valentía e decisión que se lles está pedindo, non só desde o Goberno galego, senón desde os propios concellos de Galicia, que, da boca do presidente socialista da Fegamp, xa amosaron a súa preocupación pola falta de financiamento dos servizos que se presta aos dependentes”.

BOICOT AO GALEGO

Por outra banda, o portavoz popular cualificou de “penoso espectáculo o BNG está protagonizando coa súa moi particular defensa da nosa lingua”. Así, indicou que “primeiro foi a súa rotunda negativa a participar no proceso aberto pola Xunta de Galicia para renovar o Plan Xeral de normalización lingüística, do que os nacionalistas galegos se botaron fora voluntariamente polo simple feito de que non se ía facer o que eles queren facer”.

“E non lles chegou con illarse voluntariamente deste proceso de renovación e impulso da nosa lingua senón que intentaron boicotear a celebración desta primeira reunión, incitando a todos os asistentes a abandonar o encontro”, sinalou Pazos, quen apuntou que “felizmente os dous individuos que o BNG mobilizou para incendiar esta reunión quedáronse totalmente sos e foron os únicos que se marcharon da reunión, quedando os máis de cen convocados traballando con normalidade e poñendo o seu grao de area para garantir o futuro e a promoción do galego a través do consenso, o diálogo e a vontade de escoita”.

Alberto Pazos criticou que “a loita do BNG e das súas organizacións satélites por apropiarse de todo o que teña que ver coa nosa lingua tamén a tivemos que sufrir na sesión plenaria desta semana, cando un grupo de exaltados, convidados todos polo BNG e entre os que figuraba mesmamente a súa coordinadora de Organización e moitos concelleiros e liberados sindicais da CIG, intentaron rebentar o Pleno no momento en que o conselleiro de Cultura estaba respondendo a dúas interpelacións da oposición sobre a situación do galego”.

ACCIÓNS PLANIFICADAS E PREMEDITADAS

“Estamos a falar de dúas accións totalmente planificadas e premeditadas, que forman parte da liña de acción coordinada entre o BNG, a Mesa pola Normalización Lingüística e Queremos Galego para apropiarse de todo o que teña que ver coa nosa lingua e someter aos cidadáns para que acaten a súa ideoloxía, porque son incapaces de entender e respectar que o galego é propiedade de todos e que será entre todos como debemos chegar a un pacto social e político para o impulso do galego”, incidiu.

Pazos afirmou que “o que pon de manifesto esta situación é que no BNG e, por suposto, no propio Grupo Parlamentario, xa hai quen manda máis e da ordes por enriba da propia Ana Pontón, atendendo expresamente os desexos sobre o futuro da lingua galega expresados pola propia UPG, disposta a abordar a situación da lingua desde ‘o activismo social e cultural de maneira permanente’, coa convicción de que ‘a plena normalización da nosa lingua precisa dun Estado propio soberano’, defendendo que ‘o galego ten que ser a lingua vehicular no ensino e o idioma normal e xeral de uso na administración e servizos públicos e no conxunto da sociedade’, renunciando expresamente a calquera uso tolerante das dúas linguas oficiais de Galicia”.

O PPdeG celebra o primeiro aniversario da primeira maioría absoluta de Alfonso Rueda estreando novo lema: “Galicia Goberna”

O Partido Popular de Galicia empregará “Galicia Goberna” como novo lema a partir deste sábado para conmemorar o primeiro aniversario da primeira maioría absoluta de Alfonso Rueda logo de que “os galegos dixeran si á Galicia que funciona, á estabilidade, á xestión, ao sentidiño e a catro anos máis de confianza no Partido Popular”.

Así o anunciou esta mañá a secretaria xeral Paula Prado nunha rolda de prensa na que explicou, entre os principais motivos polos que se pode afirmar que Galicia goberna é “porque presta atención ao que debe e arranxa os principais problemas das persoas, porque é quen de gobernarse ela mesma sen débedas impagables, peaxes, obrigas con terceiros nin rescates; e porque, a diferenza do Goberno de Sánchez, en Galicia hai un Goberno que goberna”.

Apuntou nesta liña que “a diferenza do Executivo estatal, aquí si temos un Goberno forte, centrado e unido que non perde o tempo en leas internas nin nos xulgados”; ao tempo que subliñaba que “Galicia goberna en acceso á vivenda, en apoio á mocidade, en impulso ao emprego ou en conciliación e fronte a unha oposición que desde o día despois das eleccións só tratou de paralizar a Comunidade”.

“Galicia goberna porque os galegos elixiron gobernar e non bloquear e porque en Galicia mandan os galegos e galegas”, concluíu Paula Prado explicando que todo isto é o que o PPdeG celebrará este sábado 15 de febreiro nun acto multitudinario que terá lugar en Santiago de Compostela.

Un acto no que os populares galegos lembrarán que o 18 de febreiro de hai un ano “os galegos e as galegas apostaron firmemente pola Galicia que funciona” e no que o presidente Alfonso Rueda estará arroupado por máis dun milleiro de persoas. Entre elas atoparanse membros do Goberno galego, deputados, senadores e representantes dos 313 concellos, así como o presidente Alberto Núñez Feijóo.

UN 18-F DE GRANDES FITOS

Paula Prado quixo remarcar que as eleccións autonómicos supuxeron unha serie de fitos que “non convén esquecer” e entre os que destacou que o PPdeG recibiu 711.713 votos, máis que BNG, PSOE e Sumar xuntos.

Ademais, Alfonso Rueda logrou o seu triunfo con récord de participación nas urnas (votaron o 67,3% dos galegos) e converteuse, cun 47,41% de apoio, no presidente autonómico con máis apoio na súa comunidade.

A secretaria xeral do PPdeG tamén puxo en valor que o partido presentou o programa máis completo de todos os partidos, con 870 medidas, e que celebrou o mitin máis multitudinario da campaña. Trátase do que tivo lugar na Praza de Touros de Pontevedra e no que se deron cita 14.000 persoas.

PACTO POLA LINGUA

Paula Prado recordou que a proposta electoral do BNG no que se refire á lingua era “un modelo de inmersión lingüística cun ensino totalmente en galego” e recordoulle a Ana Ponton que os galegos e galegas non apoiaron esa proposta nas urnas e seguen sen apoiala a día de hoxe.

Algo que na súa opinión se constata cos resultados dunha enquisa encargada recentemente polo Goberno galego e na que se conclúe que “só o 1% das familias galegas optarían polo modelo de inmersión lingüística nas aulas do BNG”.

“Mentres algúns queremos facer avanzar Galicia, outros seguen instalados en entorpecer”, engadiu facendo referencia ao acontecido onte na reunión para renovar o Plan xeral de normalización lingüística, na que “o independentismo deixou caer a máscara e mostrou que non queren un acordo polo galego, senón que o seu único obxectivo é rachar con todo”.

Tamén no día de onte, no Parlamento de Galicia, todos os presentes asistiron ao que en palabras de Paula Prado foi “un boicot vergoñento claramente teledirixido polo BNG e ante o silencio atronador dos socialistas galegos”.

Fronte a todo isto, concluíu, o Goberno galego seguirá dialogando desde o convencemento de que “a nosa lingua é para unir e non para dividir” e consciente de que “o coñecemento dos profesionais que nas mesas de traballo si queren mirar cara o futuro é clave para trazar o mellor camiño para o galego”.

O Grupo Popular acusa ao BNG de pretender que a Xunta incumpra a Constitución desautorizando o grao de Dereito na Universidade Intercontinental da Empresa

A portavoz de Educación do Grupo Popular, Cecilia Vázquez, acusou hoxe no Pleno do Parlamento galego ao BNG de pretender que a Xunta incumpra a Constitución Española ao solicitar que non se autorice un grado universitario na Universidade Intercontinental da Empresa, “algo que sería totalmente arbitrario e limitaría a liberdade das persoas á iniciativa empresarial”. “O BNG odia a iniciativa privada e a liberdade de elección, porque so contemplan unha posibilidade: impoñer o pensamento único”, apuntou.

“Pola súa actitude sectaria, no BNG nunca lles gustou a Universidade Continental da Empresa, a pesar de que as universidades privadas son unha realidade en España e noutros países da nosa contorna, e que a súa posta en marcha supuxo ampliar o abano de opcións formativas para os universitarios galegos”, manifestou.

DUPLICIDADE DE TITULACIÓNS

Cecilia Vázquez asegurou que “é falso que a Lei 6/2013 do Sistema Universitario de Galicia impida a duplicidade de titulacións”, e explicou que “limitar que unha universidade privada imparta unhas ensinanzas, despois de superar os trámites preceptivos, é inconstitucional”. Neste sentido, lembrou unha sentenza recente que declarou inconstitucional unha parte da Lei universitaria de Aragón por impedir aos centros privados duplicar o plan de estudos do público.

“En Galicia podemos estar orgullosos de contar cun mapa de titulacións con máis de 130 graos públicos co obxectivo de que cada alumno galego poida cursar os estudos que queira en Galicia”, sinalou a portavoz popular.

Respecto da proposta do novo grao de dereito na Universidade Intercontinental da Empresa, Cecilia Vázquez explicou que “a Xunta non autorizou nada e se limitou a emitir un informe de pertinencia socioeconómica que se remitiu á Axencia para a Calidade do Sistema Universitario de Galicia (ACSUG), quen deberá emitir o informe final favorable ou desfavorable”.

Para rematar, Vázquez cuestionou aos grupos da oposición “como poden falar de privatización da universidade galega?, cando temos en marcha o Plan de financiamento universitario 2022-2026, dotado co maior apoio da historia por parte da Xunta: 538 millóns de euros; avanzamos no obxectivo de acadar o 1 por cento de investimento de recursos públicos nas universidades fixado polo Estado para antes do 2030; ou coa posta en marcha da matrícula universitaria gratuíta ou a conxelación das taxas universitarias desde hai 14 anos”.

O PPdeG avoga por incentivar a participación voluntaria nas comunidades enerxéticas para impulsar o autoconsumo compartido

O portavoz de Industria do Grupo Popular, Rubén Lorenzo, avogou hoxe no Pleno do Parlamento galego por incentivar a participación voluntaria da cidadanía nas comunidades enerxéticas para impulsar as vantaxes do autoconsumo compartido, ao tempo que demandou ao Goberno de España a creación, de xeito coordinado coas comunidades autónomas, un marco lexislativo común e un rexistro de comunidades enerxéticas para coñecer a súa natureza e o impacto positivo de cada unha delas onde operan.

Rubén Lorenzo asegurou que “compartimos plenamente os beneficios e vantaxes das comunidades enerxéticas e, por este motivo, o PPdeG levaba no seu programa electoral o impulso destas figuras que permiten acadar un aforro enerxético á cidadanía”. “Debemos seguir avanzando na transición enerxética cara un modelo descarbonizado e dixitalizado”, manifestou o portavoz popular, quen apuntou que “cómpre seguir avanzando nunha maior presenza de enerxías renovables no mix enerxético, e facer un maior esforzo neses obxectivos de descarbonización a través tanto da autosuficiencia enerxética como no aforro enerxético”.

DOUS ANOS ESPERANDO POLO REAL-DECRETO

Porén, criticou que o Goberno central “ten pendente desde hai case dous anos aprobar un proxecto de Real-Decreto polo que se desenvolvan as figuras das comunidades de enerxías renovables e as comunidades cidadáns de enerxía”.

“Resulta fundamental dotar dun marco lexislativo claro ás comunidades enerxéticas, pero sempre tendo en conta as aportacións que se fagan desde as comunidades autónomas”, indicou Rubén Lorenzo. En concreto, esta norma aportaría un marco lexislativo común, ao tempo que contemplaría un rexistro de comunidades enerxéticas compartido para todo o territorio español. “Se falamos das comunidades enerxéticas, a normativa ten que evolucionar e atender a clara evolución na normativa relacionada co autoconsumo, democratizando a súa implantación”, dixo.

Rubén Lorenzo salientou o apoio da Xunta de Galicia ás comunidades enerxéticas e “xa vai pola terceira convocatoria de axudas” para estas iniciativas, a través da que se complementa as liñas de axuda do Instituto para a Diversificación e Aforro da Enerxía (IDAE) cos programas CE Implementa e CE Oficinas.

O Parlamento galego demanda por unanimidade ao Goberno central que axilice os trámites para construír a Biblioteca Pública do Estado en Vigo

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que axilice todos os trámites necesarios para poñer en marcha o Proxecto da Biblioteca Pública do Estado en Vigo.

O deputado popular Miguel Fidalgo lembrou “a historia do proxecto de Biblioteca do Estado en Vigo comeza no mes de agosto de 2007, cando o entón ministro de cultura galego César Antonio Molina comprometeu unha gran biblioteca nesta cidade, despois da negativa da súa antecesora no cargo, Carmen Calvo a quen non lle facía gracia este proxecto para Vigo”.

“A partir dese momento comeza o baile porque o alcalde de Vigo propuxo neste tempo ata nove localizacións para a Biblioteca do Estado: o antigo Colexio Cluny; a Praza do Rei, xunto á Casa Consistorial; a Escola de Artes e Oficios; o Auditorio Mar de Vigo; o polígono de Navia; a Panificadora, en dúas ocasións; a rúa Lalín, ao lado dos antigos xulgados; e, finalmente, os terreos que o Concello expropiara para ampliar a Cidade da Xustiza”, lembrou.

“Nove posibles localizacións, con nove ministros á fronte de Cultura no Goberno de España e 18 anos esperando”, criticou.

ACORDO DEFINITIVO

As negociacións mantidas o longo de todos estes anos entre o Concello de Vigo (que cede o terreo), o Goberno de España (que se encargaría de financiar a construción) e a Xunta de Galicia (que xestionaría o edificio e os futuros servizos bibliotecarios) frutificaron finalmente en 2022 nun acordo polo que o Ministerio de Cultura aceptaba o programa de necesidades enviado pola Xunta en 2020, que establecía que a futura biblioteca tería unha dimensión de máis de 8.000 metros cadrados para cumprir coas necesidades da cidade máis grande de Galicia.

“Ademais, nos últimos orzamentos xerais do Estado aprobados en 2023 había unha partida específica de 100.000 euros, máis outros 9,3 millóns de euros nos exercicios seguintes, a pesar de que o investimento total no proxecto se estima en 22 millóns de euros”, sinalou o deputado popular.

Deste xeito, Miguel Fidalgo manifestou que “a día de hoxe a pelota está no tellado no Concello de Vigo e do Goberno central”, polo que urxiu ao Goberno de Pedro Sánchez que “axilice os trámites necesarios para que a Biblioteca Pública do Estado sexa unha realidade o máis pronto posible na cidade viguesa”.

O deputado popular lamentou que Vigo “careza na actualidade dunha rede de bibliotecas municipais, xa que so conta con dúas bibliotecas públicas que prestan os seus servizos bibliotecarios completos”. Segundo os estándares de bibliotecas públicas de Galicia, o concello de Vigo, con cerca de 300.000 habitantes, debería contar cunha gran biblioteca central, cunha superficie de entre 5.000 e 8.000 metros cadrados, e 9 ou 10 bibliotecas de proximidade, cunha superficie por centro de 1.200 metros cadrados.

O Parlamento galego reitera a solicitude ao Goberno central para que cumpra a Lei de dependencia e salde a débeda de máis de 2.500 millóns con Galicia

O Pleno do Parlamento de Galicia aprobou hoxe a proposición non de lei do Grupo Popular, que non contou co apoio dos deputados do PSdeG, a través da que se reitera a solicitude ao Goberno de España que cumpra a Lei de dependencia que lle obriga a cofinanciar o 50 por cento da atención aos dependentes e salde a débeda de máis de 2.500 millóns de euros acumulada con Galicia.

A portavoz popular de Asuntos Sociais, Raquel Arias, criticou que “o Goberno central estea pagando pouco máis do 30 por cento do que lle corresponde coa Lei da dependencia, o que supón unha débeda anual de 200 millóns de euros”.

“Ata que o Goberno central non pague o que debe para a dependencia, a atención que se lle pode prestar aos dependentes non será o que por lei lles corresponde, por moito que a Xunta se esforce”, sinalou a portavoz popular, que salientou que na actualidade a Xunta destina tres veces máis orzamento á dependencia que cando gobernaban o PSdeG e o BNG.

NOVA REFORMA DA LEI SEN FINANCIAMENTO

Raquel Arias criticou que o Goberno de Pedro Sánchez aprobara onte unha nova reforma da Lei de dependencia “con normas desprovistas de financiamento e sen consultar con ninguén”. “Do mesmo xeito que fixo en 2023, cando obrigou aos concellos a dar máis horas de axuda no fogar a cada dependente, provocando serios problemas económicos nos municipios e incrementando en 80 millóns de euros a débeda anual que xa arrastraba con Galicia”, lembrou.

Na súa intervención, referiuse ao recente informe publicado pola Asociación de directores e xerentes de servizos sociais, no que se pon de manifesto que “o Goberno propón unha reforma da lei engadindo novos dereitos cando aínda están moi lonxe de garantir os que recoñece a actual norma”. E engade que “sen incremento de financiamento, os novos dereitos que esta reforma da lei propón recoñecer quedan en papel mollado, pura cosmética do sistema, que so servirá para xerar falsas expectativas ás persoas en situación de dependencia e aos seus familiares”.

Este informe tamén sinala que Galicia está entre as comunidades autónomas cunha maior valoración na prestación da dependencia, cunha puntuación de 6,4 sobre 10 cando a media estatal non chega ao 5; e recoñece que Galicia é unha das comunidades que máis reduciu as listas de agarda, a pesar de que no último ano o número de solicitudes se incrementou o 40 por cento.

INCONGRUENCIAS DA OPOSICIÓN

“O Goberno da Xunta, nunha absoluta lealdade cos galegos, pon 8 de cada 10 euros dos seus orzamentos para políticas sociais e 700 millóns de euros para a dependencia, incrementando nun 23 por cento a axuda aos concellos para esta prestación”, indicou Raquel Arias. Ademais, subliñou que “o Goberno galego puxo en marcha o pasado mes de xaneiro un novo plan de choque da dependencia, que xa beneficiou a máis de 5.000 persoas”.

Para rematar, a portavoz popular puxo de manifesto as incongruencias de BNG e PSdeG cando falan de atención á dependencia, porque “critican que a Xunta externalice algúns servizos de atención aos dependentes, pero eles privatizan todas as residencias que xestionan ou o servizo de axuda no fogar nas administracións e os concellos que gobernan; e tamén piden máis cartos para a atención aos maiores, pero o Concello de Pontevedra, gobernado polo BNG, é o terceiro de España con menor investimento en políticas sociais”.