Millán Mon insiste na necesidade dun diálogo efectivo da Comisión Europea co sector pesqueiro máis alá da “mera retórica”

O eurodeputado popular Francisco Millán Mon interveu onte no debate e intercambio de puntos de vista coa Directora Xeral de Asuntos Marítimos e Pesca da Comisión Europea, Charlina Vitcheva, á que preguntou polo amplo desenvolvemento normativo que require o novo Regulamento de Control pesqueiro. “Son cuestións complexas, técnicas e de gran importancia, polo que o sector ten que estar implicado”, apuntou.

Fixo novamente mención á carta que enviou, xunto ao tamén eurodeputado popular Gabriel Mato, ao Comisario Kadis, onde se facían eco do malestar do sector pola falta de diálogo coa Comisión Europea. Nesta liña reiterou a necesidade de levar a cabo o desenvolvemento normativo en estreito contacto co sector –“pero que sexa un contacto efectivo, de fondo, non mera retórica”, subliñou– de cara á elaboración do Pacto polos Océanos, insistindo en que o diálogo non podía ser só coas ONG, nin ver o pacto desde unha perspectiva unicamente ambiental.

O eurodeputado galego abordou tamén a problemática de Tailandia e a conserva do atún e denunciou novamente o retroceso na lexislación de pesca aprobado polo Parlamento tailandés a finais do pasado decembro: “Quero reiterarlle a miña preocupación por que as negociacións do tratado de libre comercio poidan afectar ao sector conserveiro europeo, español e galego en particular”.

En canto á prohibición da pesca de fondo en 87 áreas do Atlántico nororiental, Millán Mon apuntou que “se necesitan estudos de impacto serios, que non houbo e, se a sentenza non nos dá a razón, será imprescindible reformar o Regulamento correspondente”.

Pediu igualmente unha reforma do Regulamento do plan plurianual do Mediterráneo Occidental. “Quero lembrar que, desde o Partido Popular español, votamos en contra deste Regulamento cando se aprobou en 2019”, apuntou.

O eurodeputado popular celebrou o optimismo da Comisión con respecto ás relacións pesqueiras co Reino Unido. “Espero que ese optimismo se traduza en resultados positivos cando termine o período de transición”, sinalou Millán Mon antes de concluír preguntándolle á Comisión pola súa análise do alcance da sentenza do Tribunal de Xustiza da UE sobre o acordo pesqueiro con Marrocos.

O PPdeG esixe explicacións ao BNG por incluír nas súas listas electorais a un condenado por abusos sexuais a unha menor

O Partido Popular de Galicia esixe explicacións ao BNG por ter incluído como titular nas súas listas ás eleccións municipais a un condenado por abusos sexuais a unha menor e insta a Ana Pontón a investigar cal é o grao de participación actual desta persoa no seu partido.

A secretaria xeral Paula Prado recorda que recentemente se puido ver á líder do independentismo galego “compartindo pancarta” con quen, logo de estar sete anos no cárcere tras unha condena xudicial por abusar dunha nena de 4 anos, foi integrante da candidatura do BNG ao concello ourensán de Coles nos comicios do pasado 28 de maio.

Tal e como publicaron os medios de comunicación, os vínculos políticos desta persoa esténdense tamén ao entorno do PSOE e de Podemos/Sumar na provincia de Ourense e de aí que apelen tamén á responsabilidade de Xosé Ramón Gómez Besteiro á hora de dar explicacións sobre “esta situación o suficientemente grave como para ser investigada”.

“A oposición é moito de investigar todo o relativo a outros partidos, pero en cambio cústalles moito cando se trata do seu”, conclúe Paula Prado incidindo na súa demanda de explicacións e poñendo o foco en que esta persoa actualmente “está traballando con persoas con discapacidade e con menores de idade”.

O PPdeG reclama ao Goberno de Sánchez que cese na súa pretensión de eliminar paradas de autobús estatais en 22 concellos de Galicia

O Partido Popular de Galicia reclama ao Goberno de Pedro Sánchez que garanta a mobilidade nos concellos galegos asegurando o mantemento das 22 paradas que o novo mapa de concesións de liñas de autobús estatais pretende suprimir e recuperando as xa suprimidas.

Con este obxectivo e en aras de defender o dereito dos galegos e galegas a unha mobilidade axustada ás especificades poboacionais do territorio, os populares presentarán unha moción en todos os concellos afectados e organizarán recollidas de firmas entre a veciñanza dos mesmos. Unha acción encabezada polo coordinador de Infraestruturas e Territorio do PPdeG, Antonio Ameijide.

“O Goberno central debe garantir por lei a maior conectividade posible nas zonas rurais, ademais de dotar orzamentariamente e de forma suficiente os novos mapas concesionais para garantir o servizo de transporte público”, defenden sinalando que que a reestruturación de liñas de autobús estatais proposta vai no sentido contrario e ademais afectaría de xeito moi negativo aos veciños de 22 concellos galegos. En total, veríanse afectados máis de 130.000 galegos.

Nesta liña afirman que o novo mapa concesional de transporte por estrada de competencia estatal no que traballa o Goberno de Sánchez suporía deixar aos concellos de Arzúa, Melide, Chantada, O Corgo, Guitiriz, Baralla, Meira, Monterroso, As Nogais, Palas de Rei, Quiroga, A Pontenova, Trasmiras, A Mezquita, Ribadavia, Rios, A Rúa, Forcarei, Lalín, Tui, Silleda e O Porriño sen parada. De feito, neste último e noutros, as paradas da liña estatal xa foron suprimidas.

“Esta decisión é inadmisible para estes municipios polo seu gran impacto social, económico e territorial”, conclúen desde o PPdeG e por iso na súa moción instan ás diferentes corporacións municipais a trasladar ao Goberno de España dúas demandas claras en nome dos seus veciños.

A primeira, garantir a mobilidade dos veciños dos distintos municipios galegos retirando a proposta do mapa de concesións estatais de liñas de autobús, mantendo as paradas que se pretenden suprimir e recuperando as xa suprimidas.

Seguidamente, que calquera proposta que pretenda establecerse en relación con este servizo de mobilidade incorpore as demandas trasladadas desde Galicia para garantir así que se teñan en conta as peculiaridades xeográficas e de poboación da Comunidade e se preste especial atención ás conexións do e no rural.

UNHA PROPOSTA FEITA DESDE A IMPOSICIÓN

Os populares galegos recordan que en 2022 tivo lugar un primeiro intento por parte do Goberno de Sánchez de impoñer un novo mapa de rutas de autobús estatal que “provocou gran alarma e alegacións tanto entre os gobernos autonómicos como entre a cidadanía” porque nel xa se prevía a supresión de paradas e rutas.

A pesar de que no seu momento se retirou esta proposta ante o rexeitamento que provocou, o Executivo estatal, lonxe de rectificar, volveu propoñer un novo mapa concesional co que “retomaba a indisimulada intención de suprimir paradas e rutas en termos semellantes aos do ano 2022”.

“A nova proposta faise desde a imposición, sen contar coas comunidades autónomas e sen atender nin ás alegacións presentadas desde Galicia nin ás peticións dos veciños afectados”, sosteñen no PPdeG destacando que o Goberno galego sempre defendeu que se tiveran en conta as peculiaridades xeográficas e poboacionais da Comunidade e se prestase especial atención ás conexións rurais.

De aí que conclúan denunciando que “con este modo de entender o servizo público, Pedro Sánchez pon por riba do equilibrio territorial criterios económicos que só levan ao deterioro do transporte público e que van en contra de comunidades como Galicia, dos dereitos dos concellos do rural, da igualdade de oportunidades dos seus veciños e do obxectivo de acadar o asentamento poboacional”.

Alfonso Rueda anuncia que o Goberno galego dará luz verde este luns ao Bono Emancípate para axudar á mocidade cos gastos da súa primeira vivenda

O presidente do PPdeG, Alfonso Rueda, anunciou hoxe que o Goberno galego dará luz verde este luns ao Bono Emancípate prometido en campaña e que consistirá nunha tarxeta moedeiro para axudar aos mozos de entre 18 e 35 anos a afrontar gastos da súa primeira vivenda como poden ser aqueles derivados das xestións notariais ou a adquisición de mobiliario e electrodomésticos.

Un anunciou que realizou no acto ‘Vivenda, Mocidade, Galicia’ organizado esta mañá polos populares galegos na cidade da Coruña e do que explicou que contará cun orzamento “ampliable” de 2 millóns de euros e que poderá solicitarse xa a partir do 6 de febreiro. “Axudas como estas son as que marcan a diferencia entre poder empezar unha nova vida nunha vivenda propia ou non poder facelo”, argumentou.

Rueda avanzou ademais que Galicia seguirá apostando por “fórmulas innovadoras” como son as vivendas compartidas e que, do mesmo xeito que xa se anunciaron para Santiago de Compostela, as seguintes serán en Vigo e en Lugo e “seguiremos impulsando esta medida noutras cidades”.

“O acceso á vivenda é un problema e para combatelo é necesario buscar solucións reais, pragmáticas e eficaces. Nós levamos moito tempo sendo conscientes e poñendo en marcha medidas para poñerlle remedio”, explicou o presidente incidindo na problemática que supón o feito de que a mocidade galega “vexa truncado o seu futuro por non dispoñer de algo tan básico como un teito no que comezar a formar a súa propia vida de xeito independente”.

De aí que cualificase como “obriga da boa política” ofrecer solucións aos problemas reais da cidadanía tal e como fai o Goberno galego coas súas políticas de vivenda e especialmente con aquelas destinadas de xeito especifico á xuventude. Como, por exemplo, reservando o 40% das novas vivendas de promoción pública en réxime de alugueiro aos menores de 36 anos, que serán destinatarios tamén do 20% de aquelas que se poñan á venda.

Un apoio que se complementa con outras iniciativas xa en marcha –como o Aval Mozo ou as rebaixas fiscais aplicadas ao tramo autonómico do Imposto de Transmisións Patrimoniais– e que se saldaron coa cifra de preto de 6.000 mozos beneficiados das políticas de vivenda da Xunta nos últimos anos.

“En políticas de vivenda non cabe escusarse na burocracia, na incapacidade de negociación con socios de goberno nin no feito de non ter aprobados uns Orzamentos”, subliñou o presidente contrapoñendo a inacción do Goberno central nesta materia co traballo intenso que está a facer o Goberno galego para acadar o obxectivo de duplicar o parque público de vivenda de Galicia nesta lexislatura.

Algo para o que, tal e como incidiu, é necesario traballar coa iniciativa privada “que outros demonizan” e apoiar aos propietarios “desprotexidos por Pedro Sánchez” para que poñan as súas vivendas no mercado “ofrecéndolles seguridade, confianza e acompañamento”.

CRÍTICAS AO GOBERNO CENTRAL

Alfonso Rueda esixiu ao presidente do Goberno de España que “deixe por un momento os seus problemas persoais e xudiciais e a súa incapacidade para poñerse de acordo coa ‘maioría Frankenstein’ na que se apoia” e sexa consciente de que a vivenda “é un problema serio ante o que non cabe a propaganda”.

Recordou así as 180.000 vivendas da SAREB que Pedro Sánchez anunciou hai máis de ano e medio en Galicia e que, a pesar de que o Goberno galego reclamou a súa cesión para arranxalas e poñelas a disposición da xente a prezos competitivos, o Goberno central decidiu vender “para facer caixa co problema da vivenda”.

Tamén se referiu á Lei de Vivenda estatal que regula a declaración de zonas tensionadas e que, onde se aplicou, acabou provocando que suban os prezos dos alugueiros e que haxa menos vivendas no mercado”. Por iso, engadiu, ningún concello galego ten reclamado esta medida.

O presidente galego concluíu nesta liña reclamando ao Goberno central un Plan Estatal de Vivenda en coordinación coas comunidades autónomas pero matizando que “se tamén vai ser propaganda, mellor que nos deixe seguir traballando en solitario con receitas que funcionan”.

“En Galicia seguiremos traballando en serio pola vivenda e sendo conscientes de que, un ano despois de obter a maioría nas eleccións, a xente que nola concedeu demándamos que sexamos eficaces e non perdamos o tempo. Por iso seguiremos como ata o de agora: sendo menos de anuncios baleiros e máis de chaves en man dos galegos e galegas”, rematou.

VIVENDA, MOCIDADE, GALICIA

O acto celebrado hoxe na Coruña foi posible grazas á implicación tanto de Novas Xeracións de Galicia como do Grupo Popular no Comité Europeo das Rexións, do que Alfonso Rueda forma parte en calidade de presidente do Goberno galego.

Tras a benvida a cargo do líder local do partido, Miguel Lorenzo, os primeiros en intervir no acto foron os responsables de Xuventude e Vivenda no Goberno galego, José López Campos e María Martínez Allegue, que abordaron os retos da xuventude en Galicia e os obxectivos e prioridades da Xunta en materia de vivenda.

Acto seguido tiveron lugar dúas mesas redondas. A primeira delas, baixo o título ‘As dificultades no acceso á vivenda: situación actual do mercado, ocupación ilegal e inseguridade xurídica’, foi moderada polo eurodeputado Adrián Vázquez e nela participaron Carlos San Claudio, concelleiro do PP na Coruña e membro do programa Young Elected Politicians (YEP) do Comité Europeo das Rexións, e María Deza, portavoz de Vivenda do Grupo Popular no Parlamento de Galicia e concelleira de Planificación Urbanística e Vivenda en Sanxenxo.

‘A emancipación: o reto dos mozos no acceso á vivenda’ foi o título da segunda mesa redonda e que estivo moderada polo eurodeputado Francisco Millán Mon. Nesta ocasión os encargados de debater sobre a cuestión foron Nicole Grueira, presidenta de Novas Xeracións de Galicia, Sandra Quintas, secretaria provincial do PP de Ourense e alcaldesa de Bande, e Blanca García Olivares, concelleira de Urbanismo, Accesibilidade, Vivenda e Rehabilitación en Ferrol.

O Parlamento galego pide ao Goberno central medidas dirixidas a reducir a sinistralidade asociada ao envorco de tractores agrícolas

O Parlamento de Galicia aprobou hoxe a proposición non de lei do Grupo Popular, que non contou co voto favorable dos deputados do BNG, a través da que se demanda ao Goberno de España o desenvolvemento de medidas dirixidas a reducir a sinistralidade asociada ao envorco de tractores agrícolas, co obxecto de garantir a seguridade e o benestar dos profesionais e avanzar cara unha agricultura máis segura e sostible.

O portavoz popular do Medio Rural, Miguel Viso, lembrou que, segundo os datos do Instituto de Seguridade e Saúde Laboral de Galicia (Issga), máis do 60 por cento das mortes por accidentes de tractor están relacionadas con envorcos. En concreto, en 2024 rexistráronse en Galicia 74 accidentes laborais relacionados co tractor, mentres que os accidentes non laborais ascenderon a 39.

MEDIDAS A ADOPTAR

Miguel Viso explicou que “para previr estes accidentes e minimizar o seu impacto é fundamental fomentar a modernización do parque de tractores agrícolas, co impulso de axudas para a renovación de tractores antigos; desenvolver campañas de sensibilización e formación para concienciar sobre os riscos do envorco e a importancia do uso de medidas de seguridade; reforzar a obrigatoriedade de inspeccións técnicas periódicas en tractores; e establecer incentivos económicos para os agricultores que incorporen sistemas de protección nos seus tractores”.

Neste sentido, considerou “fundamental reforzar as campañas de sensibilización e formación; avanzar na modernización do parque de maquinaria agrícola; ampliar as accións formativas, tanto para agricultores en activo como para estudantes de formación profesional e obradoiros de emprego; e intensificar a colaboración entre o Issga e a Dirección Xeral de Tráfico”.

“A nosa meta é clara: unha agricultura máis segura e sostible”, sinalou o portavoz popular, quen asegurou que “a prevención funciona porque a tecnoloxía, a formación e a concienciación son armas poderosas contra os accidentes”.

O Parlamento galego pide á Xunta que intensifique as axudas do Plan de mellora de camiños rurais

O Parlamento de Galicia aprobou hoxe por unanimidade a proposición non de lei do Grupo Popular a través da que se insta a Xunta de Galicia a seguir intensificando as axudas correspondentes ao Plan de mellora de camiños municipais. “Trátase de seguir apostando por un programa que funciona, ben valorado no rural, e de conseguir que cada vez máis profesionais e máis empresas se acheguen, decidan e aposten polo rural para desenvolver as súas actividades e evitar así o despoboamento que tanto nos preocupa”, sinalou o deputado popular Enrique Barreiro.

O Plan Marco para o mantemento dos camiños e estradas rurais contará para os anos 2024 e 2025 cun orzamento de 19,5 millóns de euros, un 16 por cento máis que nas anteriores convocatorias.

ABERTO A TODOS OS CONCELLOS

Enrique Barreiro explicou que “este plan está aberto a todos os concellos galegos, sempre que teñan remitidas ao Consello de Contas os orzamentos do último exercicio e estean ao día no cumprimento das súas obrigas tributarias e fronte á Seguridade Social. As actuacións subvencionables van desde a ampliación e incremento da seguridade dos camiños; o reforzo do firme existente e a drenaxe; e tamén todos aqueles traballos de mantemento dos viais.

“A mellor forma de asentar poboación no rural é asegurar unha boa calidade de vida e facilitar a posibilidade de desenvolverse laboralmente, para o que se requiren unhas axeitadas vías de comunicación”, indicou o deputado popular.

Alberto Pazos afirma que a “extrema debilidade” do Goberno de Sánchez “vai ser a mellor escusa de PSdeG e BNG para xustificar que non se cumpra a súa promesa de eliminar as peaxes da AP-9”

O portavoz do Grupo Popular, Alberto Pazos, afirmou hoxe que a “extrema debilidade” do Goberno de Pedro Sánchez para aprobar tanto decretos-lei como os propios orzamentos do Estado “vai ser a mellor escusa que van ter os socialistas e nacionalistas galegos para xustificar que non se cumpra a súa promesa de gratuidade da AP-9”.

“Nós imos seguir insistindo, tanto na eliminación das peaxes nesta autoestrada como na súa transferencia a Galicia, ao que sumamos agora a solicitude de liberación da peaxe do treito Vigo-Porriño, de xeito que se mellore a seguridade de forma inmediata na A-55 e como medida rápida e economicamente máis viable ante a construción dun novo túnel nesta autovía”, indicou.

Alberto Pazos lembrou que “o único que sufrimos os galegos nestes últimos meses respecto da AP-9 foi un novo incremento das súas peaxes: o 5,34 por cento desde o pasado día 1 de xaneiro, o que supón pagar máis de 20 euros para quen teña que facer o traxecto entre Vigo e A Coruña”.

RESCATE E BONIFICACIÓNS, O MESMO CUSTO

“Dáse o paradoxo de que, coas novas bonificacións das peaxes anunciadas polo Goberno de Pedro Sánchez, que esperemos que algún día sexan realidade, o custo da indemnización polo rescate da autoestrada e o custo total desas bonificacións ata o final da concesión aseméllanse de xeito considerable, xa que ronda os 2.300 millóns de euros”, explicou o portavoz popular, quen indicou que “o Ministerio debería valorar se realmente compensa manter esas bonificacións ou abonar o rescate da AP-9”.

Pazos avanzou que “imos seguir insistindo na demanda para que o Goberno de Pedro Sánchez transfira a Galicia a AP-9, tal e como o pediu este Parlamento por unanimidade en varias ocasións, pero agora imos dar un paso máis, co obxectivo de mellorar a seguridade nun dos treitos da autovía A-55 no que se rexistra o maior número de accidentes de España.

En concreto, dixo que “pedimos que o Goberno central negocie coa concesionaria da AP-9 liberar inmediatamente a peaxe do treito entre Vigo e Porriño, de xeito que se mellore a seguridade de forma inmediata na autovía A-55, ao posibilitar aos condutores utilizar o treito da AP-9 de forma gratuíta, en vez de arriscarse a circular polas perigosas curvas de Mos que tanta sinistralidade rexistran”.

“Trátase dunha solución alternativa de uso inmediato ante a futura construción dun novo túnel na A-55 entre Vigo e Porriño”, unha obra que “comezou con gran polémica, logo de que o Goberno central presentara unha proposta que supón unha grave afección a parroquias como Bembrive en Vigo ou Sanguiñeda, Petelos, Pereiras e Tameiga en Mos”, apuntou.

Por este motivo, o Grupo Popular esixirá ao Goberno central no Pleno da vindeira semana que abra de xeito inmediato un período de interlocución con todos os concellos afectados por esta importante obra, de xeito que se defina unha actuación respectuosa co territorio, socialmente viable e dote á zona dunha infraestrutura axeitada e segura.

SOLUCIÓN EN MANS DO GOBERNO DE SÁNCHEZ

Alberto Pazos tamén se referiu ao “novo episodio da demostración da extrema debilidade do Goberno de Pedro Sánchez” vivido o pasado mércores no Congreso ao ver como se rexeitaba a aprobación do coñecido como Decreto Omnibus pola negativa chantaxista dos seus socios cataláns de Junts.

“O que debe quedar claro, desde o primeiro momento, é que quen traizoa e utiliza ao seu antollo a Pedro Sánchez e ao seu Goberno son os seus aliados de Junts,  que foron quen puxeron cos seus votos a este Goberno bicolor de PSOE e SUMAR e que agora decidiron, ao non atender as súas chantaxes, que non ían apoiar este decreto”, subliñou.

“O Partido Popular xa avisou, desde o primeiro momento, que non estaba disposto a apoiar este Real-Decreto na súa totalidade, simple e llanamente porque, ademais da revalorización das pensións, das bonificacións ao transporte ou das axudas aos afectados pola DANA, recollía outras moitas cuestións coas que non estaba de acordo, como subas de impostos, xa que non se prorrogan as baixadas do IVE que están vixentes para determinados alimentos ou electricidade; unha maior protección aos okupas, obrigando aos propietarios a seguir pagando do seu peto os gastos da súa vivenda okupada, coa imposibilidade de recuperala; a cesión, aceptando un novo chantaxe dos nacionalistas vascos, dun palacete en París ao PNV; ou inflixindo un recorte ao financiamento das comunidades autónomas, xa que non se actualizan as previsións de ingresos de 2025 nas entregas a conta ás comunidades, o que supón recortes de recursos económicos ás comunidades autónomas para destinalos a sanidade, educación ou políticas sociais, como a dependencia”, manifestou.

Alberto Pazos incidiu que “a solución neste momento está nas mans do Goberno de Pedro Sánchez, porque o Partido Popular xa anunciou que está plenamente disposto a aprobar un decreto que se centre no realmente importante: a revalorización das pensións, as bonificacións ao transporte público e as axudas aos afectados pola DANA”. Neste sentido, puxo de manifesto a vontade do PP de “apoiar medidas coherentes” ao aprobar cos seus votos no mesmo Pleno do Congreso o decreto que unicamente falaba de pensións, máis en concreto, de poder compatibilizar o cobro dunha pensión coa realización dun traballo remunerado.

Para rematar, Alberto Pazos criticou a postura adoptada polo único deputado do BNG nas votacións dese Pleno. “Paradoxicamente, votou a favor dos decretos que non saíron adiante a pesar dos agravios que supoñen para Galicia e votou en contra do decreto aprobado, gracias ao apoio do Partido Popular, que abre a posibilidade de cobrar unha pensión ao tempo que se realiza un traballo remunerado, sen esquecernos da súa nova e manifesta contradición: critican denodadamente en Galicia a aprobación, por maioría parlamentaria, das leis de acompañamento, ao tempo que apoian no Congreso a aprobación dun Decreto-Lei Omnibus, que inclúe unha chea de medidas enmascaradas nunha suba das pensións e unhas axudas ao transporte”, sinalou.

O PPdeG defende Galicia como unha terra aberta aos investimentos e aos visitantes fronte á imposición e a parálise que promove a esquerda

O PPdeG reiterou hoxe o seu compromiso de seguir defendendo Galicia como “unha terra aberta a quen queira investir aquí e a quen nos queira visitar” en contraposición a unha esquerda á que acusa de pretender bloquear a prosperidade da nosa comunidade.

Fíxoo a través da súa secretaria xeral, Paula Prado, que compareceu ante os medios nunha rolda de prensa na que deixou claro que o que Galicia “non precisa de inimigos que a paralicen”, senón gobernos que, como o que preside Alfonso Rueda, aposten por “unha Galicia innovadora, referente e que desenvolva todo o seu potencial como comunidade autónoma punteira na industria e na empresa”.

A este respecto celebrou a aposta de Stellantis pola súa planta de Vigo a través da nova plataforma de coches eléctricos anunciada onte. Con decisións como esta, valorou, contribúese á consolidación de Galicia como “terra de oportunidades, emprego e riqueza”.

“Aquí, sempre que se cumpra coa normativa, a industria atopará a estabilidade que necesita e o apoio das administracións”, subliñou contrapoñendo a aposta polo futuro do seu partido fronte a un BNG que “abandeira o ‘non’ a todo” e fronte a un Goberno de Sánchez que “segue bloqueando a concesión de fondos europeos e sen tomar unha decisión respecto aos miles de millóns que seguen sen mobilizarse”.

Reivindicou así eses fondos europeos que corresponden a Galicia e recordou que “o Goberno galego está cumprindo” e que, a data de 31 de decembro, os fondos europeos do Plan de Recuperación adxudicados ascendían a 1.223 millóns de euros, o que representa o 90% dos importes publicados.

Aproveitando a celebración de Fitur nestes días, tamén destacou a hospitalidade como “un dos principais valores dos galegos” e puxo en valor que “o turismo galego é un turismo sostible que ademais xera riqueza e emprego”, argumentou sinalando que este sector representa o 13% do PIB e dá traballo a preto de 130.000 persoas.

De aí precisamente a importancia de que “Galicia siga sendo unha comunidade de portas abertas e na que todo o mundo é benvido”. Nesta liña apuntou que “ao redor do 90% dos galegos valoran o turismo de forma positiva ou moi positiva” para, acto seguido, criticar a “esas pequenas minorías que queren impoñer a ideoloxía sobre as ideas e queren impoñer o ‘non’ aos turistas, ao Xacobeo, ao emprego e á riqueza”.

ACTO DE VIVENDA NA CORUÑA

A secretaria xeral do PPdeG anunciou tamén que este próximo sábado o partido celebrará na cidade da Coruña un acto que, baixo o lema Vivenda, Mocidade, Galicia, abordará cuestións clave para o futuro da nosa comunidade.

O evento será clausurado polo presidente Alfonso Rueda e contará coa participación dos eurodeputados galegos Francisco Millán Mon e Adrián Vázquez, así como de representantes do partido que están traballando día a día nestas cuestións.

“Será unha oportunidade para debater e para escoitar todo o que está facendo Galicia tanto pola vivenda como pola nosa mocidade, con novas medidas e infraestruturas”, concluíu Paula Prado.

O Parlamento pide que se formalice a colaboración entre as direccións xeral de Patrimonio Cultural e de Emerxencias e Interior para mellorar a protección e salvagarda dos bens existentes en Galicia

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta a formalizar a colaboración en materia de protección do patrimonio cultural entre a Dirección Xeral de Patrimonio Cultural e a Dirección Xeral de Emerxencias e Interior para mellorar a protección e salvagarda do bens culturais de Galicia.

O deputado popular José Luís Ferro afirmou que “para que a colaboración entre estas dúas direccións xerais sexa máis precisa e eficaz débese formalizar e protocolizar, establecendo as actuacións da policía autonómica a prol dun eficaz cumprimento da normativa sobre protección do patrimonio cultural de Galicia derivado da lexislación galega vixente”.

“Con este instrumento poderemos garantir un axeitado coñecemento do marco legal de aplicación por todos os implicados e incrementar a calidade na prestación deste servizo público, que ambas unidades directivas consideran de especial preocupación e sensibilidade”, indicou Ferro.

AMPLA COLABORACIÓN

En concreto, apuntou que as actuacións de colaboración poderían abarcar desde a vixilancia e control dos bens de patrimonio cultural e do seu ámbito de protección; ata indentificación dos presuntos responsables das actuacións irregulares; así como as pescudas para reunir probas e información; apoio policial na paralización de obras ilegais; colaboración nos casos de emerxencia; control dos rexistros obrigatorios para as entidades dedicadas ao comercio de bens do patrimonio cultural; ou a vixilancia das actuacións realizadas nos ámbitos de protección dos Camiños de Santiago.

Para o desenvolvemento de todas estas actividades, o deputado popular indicou que a Dirección Xeral de Patrimonio “poñerá a disposición da Policía Autonómica o inventario de bens integrantes do patrimonio cultural de Galicia”, ao tempo que a colaboración tamén implicará o asesoramento técnico e xurídico necesarios para facer unha mellor planificación e coordinación das actividades entre os responsables da Dirección Xeral de Patrimonio Cultural e os da Policía Autonómica, establecéndose así unhas canles áxiles e continuas de comunicación.

O Parlamento galego solicita ao Goberno de España que asegure a continuidade na asistencia sanitaria ao colectivo docente adscrito a MUFACE

O Parlamento de Galicia aprobou hoxe a proposición non de lei do Grupo Popular, que non contou co apoio de PSdeG e Grupo Mixto, a través da que se solicita ao Goberno de España que tome as medidas necesarias para asegurar a continuidade na asistencia sanitaria a todo o colectivo docente adscrito a MUFACE. “Vemos como BNG e PSdeG usan moitas veces ao profesorado de parapeto aos seus intereses partidistas, pero á hora da verdade esquecen a este colectivo, como está a acontecer nesta ocasión coa posible desaparición desta mutualidade”, sinalou a deputada popular Felisa Rodríguez.

O pasado 5 de novembro coñeceuse que a licitación do concerto para prestar asistencia sanitaria no ámbito de MUFACE quedara deserto debido a un infrafinanciamento e unhas coberturas máis esixentes das que presta o propio Sistema Nacional de Saúde nalgúns aspectos. “A día de hoxe, a incerteza segue a ser absoluta, tanto para os 1,5 millóns de funcionarios e familiares que reciben cobertura sanitaria en España, como para calquera cidadán que entende que a falta de planificación do Goberno central pode prexudicar ao sistema de sanidade público”, indicou Felisa Rodríguez.

GOBERNO CENTRAL DIVIDIDO

“O Goberno de Pedro Sánchez continúa dividido, porque mentres desde o Ministerio de Función Pública confían en que con este proceso MUFACE seguirá existindo, desde Sanidade xa estudan as formas para que os mutualistas poidan incorporarse á sanidade pública, cumprindo o plan da propia ministra de desmantelar unha mutualidade que leva moito tempo funcionando correctamente”, explicou.

A deputada popular engadiu que “o Goberno central parece esquecer as súas responsabilidades e non é consciente de que a desaparición de MUFACE tería un notable impacto na asistencia sanitaria pública, pois só en Galicia tería que absorber máis de 60.000 adscritos, dos que arredor de 40.000 proceden do ámbito do sector educativo”.

“Esta situación, sumada ao déficit de médicos causado tamén pola rixidez nas directrices formativas do Ministerio, incrementaría os tempos medios de espera para os pacientes, tanto en cirurxías como en consultas, ademais de que produciría unha discontinuidade asistencial, pois os pacientes deixarían de estar atendidos polo seu médico de toda a vida”, manifestou a deputada popular.

Outra consecuencia negativa da desaparición de MUFACE sería a desconexión da historia clínica dos pacientes, pois o sistema IANUS de historia clínica da sanidade pública galega non conta cos datos da sanidade privada.