O PPdeG insta a Inés Rey a “desmarcarse” de Pedro Sánchez pedindo a dimisión da ministra de Igualdade e condenando a corrupción do PSOE

O PPdeG insta á alcaldesa socialista da Coruña, Inés Rey, a demostrar o seu feminismo e “desmarcarse” de Pedro Sánchez pedindo a dimisión da ministra de Igualdade e esixindo “dunha vez por todas” explicacións polas tramas de corrupción do seu partido.

En declaracións aos medios esta mañá e antes de participar nunha reunión con representantes do PP na cidade da Coruña, a secretaria xeral Paula Prado acusou á rexedora herculina de ser “unha das máis fieis soldados sanchistas” e cualificou de “inexplicable” que “unha alcaldesa e muller siga mantendo o seu apoio férreo, sen unha crítica, ao Goberno central despois dos escándalos que coñecemos de corrupción e contra as mulleres”.

Recordou neste sentido que “non hai nada menos feminista” que a Lei do ‘só si é si’, con “máis de 1.500 agresores sexuais beneficiados”; que “pretender combater a prostitución rodeándote de compañeiros que a consumen” ou que “comprar en AliExpress unhas pulseiras antimaltrato defectuosas”.

A número dous dos populares galegos reivindicou, en contraposición á situación interna do PSOE, a “unidade” que caracteriza ao PPdeG: “O noso proxecto é común e grazas a iso somos o partido con máis apoio nos concellos, no Parlamento galego, no Congreso, no Senado e no Parlamento Europeo”.

Proba disto é, tal e como subliñou, que o PP foi quen gañou as eleccións municipais de 2023. “Despois de máis de dous anos de lexislatura, demostrouse que os pactos de perdedores non están para gobernar, senón para manterse no poder. Hai infinidade de cuestións que son unha prioridade para os veciños e veciñas da Coruña e non están resoltas”, engadiu.

“A Coruña podería estar falando de prosperidade da man dun alcalde como Miguel Lorenzo, pero no seu lugar fala das pelexas entre PSOE e BNG, de presupostos aprobados logo de cuestións de confianza e da corrupción que emerxe do goberno municipal”, incidiu a secretaria xeral do PPdeG.

Para concluír, dixo que na Coruña dixo que “dá gusto ver como están traballando todos os compañeiros nas diferentes cámaras”. “Seguimos traballando para que en algo máis de ano e medio esta cidade teña un goberno do Partido Popular”, rematou.

“ESTAMOS FARTOS DO NINGUNEO DE SÁNCHEZ AOS CORUÑESES”

Pola súa banda, o líder local dos populares coruñeses explicou que son moitas as promesas incumpridas na cidade por parte do Goberno central “co silencio cómplice de Inés Rey e do BNG” e que, por iso, a través dos seus representantes nas diferentes cámaras, o PP da Coruña “traballará de xeito coordinado para denunciar e reverter eses incumprimentos”.

Miguel Lorenzo apelou así aos deputados autonómicos Gonzalo Trenor e Roberto Rodríguez para que “sigan defendendo á cidade no Parlamento galego” e traballen para “asegurar que os Orzamentos da Xunta para 2026 teñan os fondos necesarios para continuar coa execución de obras como o novo CHUAC, construír novas vivendas e continuar coa tramitación do Monte Mero”.

“A Xunta de Galicia é a única administración que inviste na nosa cidade”, asegurou afeando ao Goberno local a súa “incapacidade” para executar obras públicas que “acumulan retraso tras retraso” e “non adoptar ningunha medida para solucionar o problema da vivenda”.

No que se refire ao labor dos deputados nacionais Álvaro Pérez e Tristana Moraleja e da senadora Rosa Gallego, o líder do PP da Coruña destacou que, grazas ás súas preguntas, esta semana descubriuse que o Goberno central “só ten a 23 persoas contratadas na AESIA cando tiña que haber 80” e confirmouse que a posta en marcha do novo Xulgado de Violencia de Xénero implicará a eliminación dun de Instrución “cando Inés Rei afirmou que conseguira que non se suprimise”.

“Seguiremos preguntando polo atraso na licitación das obras do Estado nos accesos á cidade, como son a gran promesa de Inés Rey, a Cuarta Ronda, o Vial 18 ou a ampliación da Pasaxe”, explicou concluíndo que “non haberá nada disto a pesar dos anuncios da alcaldesa porque non hai Presupostos Xerais do Estado”.

Alberto Pazos denuncia os novos ataques do Goberno central a Galicia deixando a Lugo fora da nova planificación enerxética e con recursos contra a repotenciación eólica e a atención aos dependentes

O portavoz do Grupo Popular, Alberto Pazos, denunciou hoxe os novos ataques realizados polo Goberno central para prexudicar o futuro do sector industrial galego e a atención que reciben as persoas dependentes. En concreto, avanzou que “solicitaremos que a provincia de Lugo non quede fora da nova planificación eléctrica estatal ata 2030”, ao tempo que considerou “incompresible” o recurso de inconstitucionalidade que o Goberno de Pedro Sánchez anunciou para paralizar a repotenciación dos parques eólicos e as homologacións automáticas dos expedientes de dependencia e discapacidade que se realizan en Galicia.

Alberto Pazos lembrou que a nova planificación eléctrica prevista ata 2030 “atende razoablemente as demandas realizadas desde o Goberno galego para as provincias de A Coruña, Pontevedra e Ourense, pero deixa fora e sen a posibilidade de albergar novos proxectos industriais no futuro a toda a provincia de Lugo”.

CASTIGO POLÍTICO A LUGO

“É intolerable que a decisión política e sectaria de vetar a posta en marcha do proxecto de Altri en Palas de Rei, conleve que toda unha provincia como a de Lugo se quede fora do mapa industrial galego, condenándoa a que nos próximos anos non se poida instalar ningunha industria de mediano ou gran tamaño en territorio lucense por falta dun subministro eléctrico axeitado”, manifestou.

Deste xeito, anunciou que desde o Grupo Popular “non imos permanecer parados ante esta situación e desde o Parlamento galego imos solicitar que Lugo non quede á marxe da nova planificación eléctrica estatal”, porque afirmou que esta decisión “só se entende como castigo político a esta provincia, precisamente a provincia á que representa o secretario xeral dos socialistas galegos, que sorprendentemente anunciou a bombo e prato esta decisión do Goberno central como unha gran vitoria para botar abaixo o proxecto de Altri aínda que sexa a costa de enterrar o futuro industrial da súa provincia”.

“Lugo non merece que os seus representantes poñan os seus intereses políticos por enriba dos intereses de todos os lucenses, e o señor Besteiro demostrou o pouco que lle importan os lucenses e o moito que lle debe a Pedro Sánchez para seguir na política galega”, lamentou.

RECURSOS DE INCONSTITUCIONALIDADE

O portavoz popular engadiu que, “se a decisión do Goberno central de deixar a Lugo fóra da planificación eléctrica para os anos 2025-2030 é preocupante, non o é menos o anuncio de que presentará recurso de inconstitucionalidade polos artigos da Lei de acompañamento que aprobamos o pasado ano e que recollen medidas no ámbito da dependencia e do sector eólico”.

Alberto Pazos considerou “incomprensible que o Goberno de Pedro Sánchez vaia presentar un recurso de inconstitucionalidade o proceso de homologacións automáticas dos expedientes de dependencia e discapacidade, unha medida que copiou para implantala a nivel estatal e que nos oito primeiros meses deste ano permitiu que en Galicia se recoñecese o grao de discapacidade sen ter que facer papeleo algún a máis de 9.300 persoas dependentes”.

Neste sentido, criticou que esta medida “non pode paralizarse por unha decisión arbitraria do Goberno de Pedro Sánchez, que parece máis preocupado pola perda de recadación que suporá a implantación destas homologacións automáticas que por axilizar a atención ás persoas dependentes”.

Respecto do recurso de inconstitucionalidade que o Goberno central tamén anunciou contra o proceso de repotenciación dos parques eólicos que está a impulsar a Xunta, Alberto Pazos indicou que esta decisión “paralizará a substitucións dos aeroxeneradores existentes na actualidade por outros de maior potencia, o que permitirá reducir o número de muíños existentes e a conseguinte contaminación visual”.

“Resulta lamentable que, unha vez superadas as trabas xudiciais que bloqueaban o desenvolvemento do sector eólico en Galicia, sexa agora o Goberno de Pedro Sánchez o que torpedee o futuro deste sector ao recorrer unha medida que só busca reducir o impacto ambiental e aumentar os beneficios económicos e sociais na contorna dos parques eólicos”, manifestou.

O portavoz popular anotou que esta decisión demostra que o Goberno central “está máis do lado dos intereses de determinadas promotoras que non estaban de acordo coa decisión da Xunta respecto da repotenciación dos parques eólicos, que do lado dos cidadáns e do coidado do medio ambiente”.

EXPEDIENTE EUROPEO DA AP-9

Alberto Pazos sinalou que estas medidas adoptadas esta semana polo Goberno de Pedro Sánchez coñecéronse “cando aínda estamos asumindo o seu desinterese para rescatar e facer gratuíta a AP-9, aproveitando o ditame da Unión Europea sobre a nulidade das ampliacións das concesións feitas desta autoestrada”. Así, considerou esta decisión “inexplicable cando, segundo o estudo elaborado pola Xunta, o custo do rescate da autoestrada é semellante ao que se deberá abonar polas peaxes na sombra ata o remate da concesión, co agravante de que cada día que pasa o lucro da concesionaria se incrementa, na mesma medida que se incrementa o prexuízo para os galegos e os seus usuarios”.

Diante desta situación, Pazos criticou que o Goberno de España siga sen facer público o expediente aberto pola Comisión Europea en relación á xestión da AP-9. “Estamos a falar dun expediente que se iniciou hai máis de seis anos e do que non sabemos absolutamente nada, a pesar de que Galicia é parte afectada e temos todo o dereito a coñecer todo o relacionado con este expediente”, manifestou, para demandar que traslade á Xunta toda a información sobre este expediente aberto pola Comisión Europea, de xeito que o Goberno galego poida adoptar as medidas oportunas e poder comprobar, ao mesmo tempo, se as medidas adoptadas polo Goberno de España foron as correctas e en beneficio de todos os galegos”.

O Parlamento de Galicia rexeita o acordo do Goberno central co Goberno de Cataluña que condiciona calquera sistema de financiamento das comunidades autónomas

O Parlamento de Galicia aprobou hoxe a proposición non de lei do Grupo Popular, co voto en contra de BNG e PSdeG, a través da que se rexeita o acordo bilateral do Goberno de España co Goberno autonómico de Cataluña, pactado ao marxe do Consello de Política Fiscal e Financeira, e que condiciona de inicio calquera sistema de financiación das comunidades autónomas de réxime xeral. Neste sentido, demándase o impulso dun diálogo construtivo e multilateral no seo do Consello de Política Fiscal e Financeira para abordar, entre todas as comunidades, a reforma do sistema de financiamento autonómico, buscando unha repartición equitativa e xusta dos recursos, que preserve a autonomía fiscal, a solidariedade e o equilibrio interterritorial, e que garanta que todos os cidadáns accedan en condicións de igualdade aos servizos públicos con independencia do territorio no que residan.

O deputado popular Gonzalo Trenor asegurou que “Galicia sae perdendo como consecuencia da cesión do Goberno de Pedro Sánchez en favor dos intereses dos independentistas cataláns, coa creación dun cupo separatista e un novo sistema fiscal propio non previsto na Constitución”. En concreto, lembrou que unha primeira aproximación realizada polo Goberno galego estimou en 627 millóns de euros ao ano o que perdería a Comunidade galega polo financiamento singular de Cataluña, chegando aos 2.000 millóns de euros se este modelo se estende ao resto de comunidades autónomas.

NOVO AGRAVIO PARA GALICIA

“A inconcreta vontade do Goberno de España de tentar compensar ao resto de comunidades autónomas, lonxe de corrixir esta situación, permite adiviñar un novo agravio para Galicia, xa que nos veriamos prexudicados por facer nestes anos o que se espera dunha Administración responsable: limitar o nivel de endebedamento que, no caso de Galicia, foi o que menos creceu de toda España, e que foi todo o contrario do que fixo o independentismo catalán”, sinalou.

Deste xeito, considerou “imprescindible reafirmar o compromiso de todas as institucións públicas coa igualdade de todos os cidadáns e co exercicio do autogoberno en condicións de equidade, evitando calquera disposición lexislativa que beneficie de maneira singular a unha comunidade autónoma en detrimento das demais ou calquera pretensión de negociar o sistema de financiamento fóra do marco multilateral”.

O deputado popular incidiu que “Galicia nin pode, nin debe, asistir con resignación e en silencio á substitución do Estado das Autonomías, tal e como o coñecemos hoxe, por un réxime de intereses ideolóxicos, partidistas e persoais”, polo que reclamou “un trato autenticamente equitativo e un sistema de financiamento que garanta que os servizos públicos e as infraestruturas cumpran cos mesmos estándares de calidade en todas as autonomías e no conxunto do territorio”.

O Grupo Popular salienta que o 93,3% do alumnado con necesidades educativas especiais de Galicia está matriculado en centros ordinarios, a cifra máis alta entre as comunidades españolas

O viceportavoz do Grupo Popular, Julio García Comesaña, salientou hoxe no Pleno do Parlamento galego que “Galicia é a comunidade máis inclusiva de España co 93,3 por cento do alumnado con necesidades educativas especiais matriculado en centros ordinarios”. “Esta situación anima a seguir incorporando melloras, como ser desde o pasado curso a única comunidade autónoma que pondera ao alumnado que presenta necesidades educativas especiais contabilizándoo por dous ou por tres dentro da aula, tanto en educación infantil como en primaria; e desde o pasado 1 de setembro está en marcha a Estratexia de Inclusión, aprobada hai uns meses no Consello da Xunta”, indicou.

Julio García Comesaña afirmou que “no sistema educativo desenvolven actualmente a súa labor máis de 5.000 profesionais dedicados á atención á diversidade, logo de que nos últimos 15 anos se duplicara o número de especialistas tanto de pedagoxía terapéutica como de audición e linguaxe”. “O sistema conta actualmente con máis de 700 profesionais por riba do catálogo aprobado para os centros”, destacou.

MELLORAS PARA O PROFESORADO

Respecto da Estratexia Galega de Inclusión, García Comesaña lembrou que está dotada con 116 millóns de euros ata o 2030 para avanzar en propostas como a creación de ciclos de formación profesional adaptada, en colaboración cos centros de educación especial; a posta en marcha de medidas e programas de acompañamento ao alumnado con necesidades específicas; a mellora da formación do profesorado en activo e do futuro, en coordinación coas facultades; e o impulso de itinerarios formativos adaptados aos ritmos e necesidades do alumnado en risco de abandono.

Por último, o viceportavoz popular asegurou que “o profesorado goza en Galicia de melloras acordadas cos sindicatos que as quixeron” e explicou que “o horario do profesorado de primaria xa se reduciu en Galicia de 25 a 23 horas no curso 2024-25, e o paso de 20 a 18 horas en secundaria tamén está previsto no acordo acadado cos sindicatos”.

O Parlamento pide ao Goberno central que convoque con urxencia o Comité de Coordinación para analizar a repercusión da decisión de Ryanair de reducir a súa actividade en Galicia

O Pleno do Parlamento de Galicia aprobou hoxe a proposición non de lei do Grupo Popular, que non contou co voto favorable do PSdeG, a través da que se demanda ao Goberno de España que convoque urxentemente o Comité de Coordinación Aeroportuaria para analizar a repercusión da decisión de Ryanair de reducir a súa actividade en Galicia e buscar solucións ao prexuízo que esta situación causará aos galegos. Así mesmo, pídese que elabore un plan estratéxico dos aeroportos de Santiago, A Coruña e Vigo, que asegure a súa operatividade, a súa viabilidade económica e unha oferta de servizos axeitada ás necesidades de mobilidade dos usuarios; ao tempo que revise as taxas aeroportuarias aplicadas por AENA co fin de favorecer a competitividade dos aeroportos galegos.

Así mesmo, a través desta proposición non de lei manifestouse o apoio aos traballadores e traballadoras obxecto do ERE anunciado por Ryanair para o persoal do aeroporto de Santiago de Compostela, por considerar o devandito ERE como totalmente inxustificado, demandando que se realicen as xestións que sexan necesarias ante a compañía aérea para a súa retirada.

O portavoz popular de Turismo, Borja Verea, lembrou que a Administración Xeral do Estado ten a titularidade e as competencias sobre os aeroportos de España, “e quen ten toda a información, todos os recursos humanos, todos os recursos económicos” sobre estas infraestruturas.

PRIMAR O INTERESE PÚBLICO

Por este motivo, afirmou que “AENA e Ryanair terán que solucionar canto antes un conflito económico, no que os prexudicados son todos os galegos”. “Como empresa pública, AENA ten que primar o interese público por enriba do beneficio empresarial, contribuíndo ao equilibrio territorial e potenciando os pequenos e medianos aeroportos”, manifestou.

“Queremos unha Galicia aberta ao mundo e máis universal, polo que non caben discursos irresponsables que levan á confusión”, sinalou o portavoz popular, quen dirixíndose aos deputados do BNG apuntou que “falar de turismo depredador, de masificación ou de saturación e despois enfadarse porque desaparecen conexións aéreas non é coherente nin responsable”.

UNHA GALICIA MÁIS ABERTA AO MUNDO

Neste sentido, cuestionou aos nacionalistas galegos se “queren vostedes máis conexións aéreas e que veña máis xente a Galicia, porque se é que si pidan desculpas polo dito ata agora sobre masificación e saturación; pero se é que non, aplaudan a perda de conexións aéreas e o peche do billa a un exceso de visitantes”.

“A resposta do PPdeG é clara: si a unha Galicia máis aberta ao mundo, máis universal e máis conexións aéreas, porque a perda de conexións aéreas de Ryanair é unha malísima noticia para Galicia e hai que traballar para recuperar esas conexións e conseguir abrir máis”, sinalou Borja Verea.

Para rematar, asegurou que “necesitamos tres aeroportos en Galicia que funcionen, para o que é imprescindible unha planificación eficiente de rutas, mellorando a súa viabilidade e competitividade e, en definitiva, sendo máis útiles e mellores”.

O Parlamento galego condena de forma unánime o ataque ás instalacións do futuro centro de acollida de menores estranxeiros de Monforte

O Parlamento de Galicia acordou hoxe, a través dunha proposición non de lei, amosar a máis firme e rotunda condena do ataque que sufriron as instalacións do futuro centro de acollida de menores estranxeiros de Monforte. Así mesmo, demándase ao Goberno de España que abandone a súa política de imposición sobre un reparto de menores inxusto e arbitrario, que só beneficia aos seus socios parlamentarios, ao tempo que dote ás comunidades autónomas do financiamento necesario para manter a estes menores migrantes e cumpra de xeito inmediato a orde do Tribunal Supremo de acoller a 1.000 menores solicitantes de asilo que se atopan en Canarias.

A portavoz popular de Política Social, Raquel Arias, cualificou de “intolerable” o ataque que sufriu en Monforte o centro da Asociación Prodeme que vai acoller migrantes menores e asegurou que “Galicia non vai tolerar actitudes de racismo ou xenofobia”. Así, criticou que “o primeiro que a nivel local amosou a súa incomodidade con que os menores migrantes fosen a Monforte foi o seu alcalde socialista, moi solidario e a favor de que veñan 317 menores a Galicia, pero se algún deles ten que ir para Monforte entón xa hai problemas, a pesar de que a decisión e o reparto vén imposto polo Goberno socialista de Pedro Sánchez”.

“Galicia foi e é unha terra acolledora, e a Xunta e o Partido Popular tamén, como o demostra o feito de que esta Comunidade autónoma teña acollido ata o momento, de forma voluntaria, o 16 por cento dos menores non acompañados, cando por poboación nos correspondería o 6 por cento”, sinalou.

Raquel Arias lembrou que o sistema de reparto dos menores migrantes “funcionaba ata que a principios de 2025 o Goberno de Pedro Sánchez, a través de decretos e logo dun acordo cos independentistas cataláns, aplaudido polo BNG, modificou a Lei de estranxeiría para que o reparto o fixera o goberno e as comunidades o tivesen que aceptar forzosamente”. “Ademais, o PSOE creou un sistema de cálculo para que fosen as comunidades gobernadas polo PP as que acollesen o maior número de menores, deixando tanto a Cataluña como ao País Vasco fora deste reparto”, apuntou.

FINANCIAMENTO E NEGOCIACIÓN

“Deste xeito, será a Comunidade galega a que terá que facerse cargo de absolutamente todos os gastos de vivenda, manutención, roupa, sanidade e educación sen que o Estado nos dea financiamento algún, o que suporá un desembolso para Galicia de 30 millóns de euros ao ano”, indicou.

A portavoz popular incidiu que “a Xunta está a favor de acoller inmigrantes e inmigrantes menores, como veu facendo sempre, pero ese acollemento ten que facerse non pola imposición, senón logo dunha negociación co Goberno; con financiamento por parte do Goberno central; e nun número adecuado ás nosas posibilidades de acollida”.

Neste sentido, explicou que “o noso sistema de acollemento consiste en pequenas residencias repartidas por toda Galicia e na que conviven menores de España e de calquera outra nacionalidade, o que o converte nun dos modelos máis inclusivos e integradores de España”.

Raquel Arias lamentou que “neste momento estas residencias están xa ao 108 por cento de ocupación, polo que a imposición de acollida sen previsión de 317 menores máis irremediablemente nos leva a ter que habilitar residencias con máis capacidade”.

El PPdeG pide a la Defensora del Pueblo Europeo que medie para conseguir el expediente de la AP-9 que el Gobierno de Sánchez sigue sin facilitar

El eurodiputado del PPdeG Adrián Vázquez ha solicitado a la Defensora del Pueblo Europeo que medie para conseguir el expediente abierto por la Comisión Europea en relación con la gestión de la AP-9, una información que el Gobierno de Sánchez sigue sin facilitar a Galicia.

Vázquez le ha realizado la consulta a Teresa Anjinho durante la celebración de la Comisión de Asuntos Jurídicos del Parlamento Europeo y también por escrito, y la Defensora del Pueblo Europeo se ha comprometido a analizarlo.

“En Galicia tenemos una situación compleja con la AP-9, una autopista sobre la que llevamos años desde el Gobierno autonómico exigiendo al Gobierno central que nos explique qué alegaciones ha presentado a la Comisión Europea, por ahora sin respuesta”, ha expuesto el eurodiputado popular.

Vázquez le ha explicado que el PPdeG ya solicitó recientemente a la Comisión Europea que aportara esa información, dado que el Gobierno de Sánchez no la quiere dar. “Y por eso deseamos en que al menos sea usted quien exija a la Comisión que el Gobierno gallego sepa en qué situación está la AP-9, qué es lo que ha dicho el Gobierno de España y cuál es la respuesta de las instituciones europeas”, le ha pedido el eurodiputado gallego a modo de mediación.

Cabe recordar que, recientemente, la Xunta anunció que también por su parte volverá a exigir al Gobierno central el expediente y, si no hay respuesta, acudirá a la vía judicial. “Este expediente se instruye desde hace seis años y de él no sabemos absolutamente nada, a pesar de que Galicia es parte implicada”, lamentó la responsable autonómica de Infraestructuras, María Martínez Allegue.

O Grupo Popular salienta que “nunca se investiu tanto en Galicia en prevención de incendios forestais como este ano: 50 millóns de euros”

O deputado popular Ángel Rodríguez Conde salientou hoxe no Pleno do Parlamento galego que “nunca se investiu tanto en Galicia en prevención de incendios forestais como este ano: 50 millóns de euros” e recoñeceu o traballo desenvolvido polos “cerca de 7.000 profesionais que integran o dispositivo da Xunta contra os incendios forestais, que seguen velando pola seguridade do territorio e das persoas, e que xa foron capaces de defender este ano dos lumes cerca de 500 núcleos de poboación por toda Galicia”.

Ángel Rodríguez criticou que o BNG “insista en repetir unha mensaxe que non se sostén acusando ao Goberno galego de ser os responsables do abandono do rural, do despoboamento, da perda do gando extensivo e de converter Galicia nunha masa forestal uniforme, cando a verdade é que o Goberno galego actúa, traballa e inviste no rural con feitos contrastables”.

En concreto, o deputado popular destacou que na última década investíronse cerca de 4.000 millóns de euros en investimentos e achegas ao medio rural, e destacou que desde 2020 se remataron 34 concentracións parcelarias, que abarcan máis de 22.600 hectáreas e beneficiaron arredor de 18.000 propietarios. Ademais, subliñou que existen 44 agrupacións forestais en marcha, cun investimento de máis de 2 millóns de euros.

500.000 HECTÁREAS ORDENADAS

“A planificación tamén está garantida gracias ao Plan Forestal de Galicia 2021-2040, que xa superou os seus obxectivos de ordenación para 2035, pasando de 117.000 a máis de 500.000 hectáreas ordenadas”, sinalou o deputado popular.

Ademais, referiuse ás axudas dispostas para a creación de superficies forestais, que contarán con máis de 11 millóns de euros, ás que se suman os máis de 15 millóns de euros que entre os anos 2025 e 2026 se destinarán ao impulso da selvicultura produtiva de coníferas e para actuacións silvícolas con obxectivos ambientais.

Respecto do dispositivo de loita contra os incendios forestais, Ángel Rodríguez asegurou que “nunca se tiveron máis medios humanos e materiais que nesta campaña” e demandou aos grupos da oposición “respecto polos profesionais que día a día o dan todo pola nosa seguridade e polo noso patrimonio”.

O Grupo Popular avoga por continuar centrados en desenvolver a folla de ruta contra os incendios forestais marcada pola Comisión de Estudo celebrada en 2017

O portavoz do Grupo Popular, Alberto Pazos, avogou hoxe no Pleno do Parlamento galego por “continuar centrados en desenvolver a folla de ruta de loita contra os incendios forestais que nos demos na Comisión de Estudo celebrada en 2017, un plan trazado para reverter o abandono do rural e que tardará décadas en desenvolverse, como xa estaba previsto nas conclusións, pero que avanza a bo ritmo e polo bo camiño”.

Alberto Pazos criticou a “hipocrisía” do BNG ao solicitar a creación dunha comisión de investigación sobre a vaga de lumes do mes de agosto “porque unha vez máis esixen que celebremos un xuízo político cuxa sentenza xa fixeron pública”. “Estamos diante dun novo chanzo na súa estratexia de difamación, de insulto e de confrontación, un novo intento de polarización dunha sociedade galega allea aos seus intentos por impoñer un relato totalmente alonxado da realidade deste país”, apuntou.

QUINTA SOLICITUDE DE COMISIÓN DE INVESTIGACIÓN

“Prantexan o quinto debate da lexislatura solicitando unha comisión de investigación, despois de que neste Parlamento xa comparecera para falar dos incendios o Presidente da Xunta, foran interpeladas as conselleiras de Medio Rural e de Medio Ambiente e o director xeral respondeu a preguntas da oposición na Comisión correspondente”, lembrou.

Así mesmo, considerou “sorprendente que se cuestione a eficacia dun dos mellores servizos de extinción do mundo por número de efectivos, por formación dos mesmos e polos medios dos que dispón; que se cuestione o uso de axudas europeas en labores de prevención, que están perfectamente planificadas; e que se cuestione e medición provisional da superficie queimada, cando xa se explicou neste Parlamento as distintas formas de computar e os fallos nas mesmas”.

O Pleno do Parlamento toma en consideración a modificación da Lei do deporte, que combina prevención, educación, disciplina administrativa, acción penal e transparencia

O Pleno do Parlamento de Galicia aprobou hoxe a toma en consideración da proposición de lei de modificación da Lei do deporte de Galicia, “unha arquitectura normativa que combina prevención, educación, disciplina administrativa, acción penal e transparencia institucional e coa que Galicia se situará na vangarda do Estado no que respecta á loita contra a violencia no deporte e ao bo goberno das organizacións deportivas”, sinalou o deputado popular Argimiro Marnotes.

“Estamos ante unha reforma necesaria, oportuna e valente, que busca reforzar a protección do noso sistema deportivo e blindar a súa integridade fronte a dúas ameazas que non podemos ignorar: a violencia e a posible falta de bo goberno”, indicou o deputado popular.

Marnotes indicou que a normativa existente “necesitaba un paso máis: que a Xunta de Galicia poida exercer a acción popular en casos de violencia no deporte”. Así, dixo que “trátase de dar un salto cualitativo e pasar dunha administración que so sanciona administrativamente ou que da traslado ao Ministerio Fiscal, a unha administración que tamén pode estar presente no proceso penal defendendo o interese xeral do deporte galego”.

CON TODAS AS GARANTÍAS

En concreto, a través desta modificación da Lei do deporte habilítase á Administración da Xunta de Galicia a exercer a acción popular nos procedementos penais por violencia no deporte. “E facémolo con todas as garantías, pois se establece expresamente que non se poderá exercer a acción popular se a vítima ou o seu representante legal se opoñen de forma expresa”, apuntou.

Un segundo eixo desta reforma lexislativa é a clarificación do réxime de prescrición das infraccións e das sancións en materia deportiva, “unha cuestión de seguridade xurídica, de confianza no sistema disciplinario e tamén de xustiza para os clubs, federacións e deportistas”, manifestou Argimiro Marnotes. Así, introdúcese un novo artigo que establece prazos claros e inequívocos para a prescrición das infraccións, regulando tamén como se computan estes prazos e como se interrompen.

COHERENCIA, EFICIENCIA E XUSTIZA

A reforma da Lei do deporte incorpora, ademais, a regulación da concorrencia de procedementos penais e administrativos nos supostos de violencia e condutas contrarias á orde deportiva. Deste xeito, a incoación dun procedemento penal non impedirá o inicio doutro procedemento administrativo polos mesmos feitos, pero ese expediente quedará suspendido ata que exista sentenza firme ou auto de sobresemento na causa penal.

Esta ampliación garante tres cousas: coherencia, xa que non haberá contradicións entre o que diga o xuíz penal e o que resolva a administración; eficiencia, evitando duplicidades e aproveitando o traballo xudicial para fundamentar a resolución administrativa; e xustiza, evitando que unha mesma persoa sexa sancionada dúas veces polo mesmo feito con idéntico fundamento.

Por último, a modificación da Lei do deporte inclúe a obriga de que todas as federacións deportivas galegas aproben un código de bo goberno, no que se recolla expresamente, entre outras cuestións, a prohibición de que directivos federativos teñan relación contratual, comercial ou familiar con provedores da federación; que o presidente dunha federación non poderá permanecer no cargo máis de tres mandatos; que se aproben sistemas de autorización de operacións con máis dunha sinatura; que se publiquen nas webs federativas documentos básicos, como o propio código de bo goberno, as actas da asamblea, extractos das reunións de xunta directiva e comisión delegada, e os calendarios deportivos; ou se garanta a igualdade de xénero.