Paula Prado pide a José Tomé que dimita de todos os seus cargos: “Fai dano á provincia de Lugo”

A secretaria xeral do PPdeG, Paula Prado, reivindicou este martes, á espera de que a Audiencia Provincial “confirme” a resolución do xulgado que determina que a investigación por suposto acoso sexual contra o exconselleiro Alfonso Villares “acabou en nada”, que o partido que dirixe Alfonso Rueda, a diferenza do PSOE, “sempre” puxo “a verdade por diante”.

Prado atendeu aos medios antes de participar nunha reunión con alcaldes e portavoces da comarca da Mariña lucense, en Viveiro. “Finalizamos o ano con máis da metade dos concellos de Galicia tinguidos de azul”, destacou.

E aproveitando a súa presenza na Mariña, de onde procede Villares, a número dous do PPDEG aludiu á decisión do xulgado de Ferrol de non abrir xuízo contra el. “Agora estamos pendentes de que a Audiencia ratifique esa resolución na que se demostrou que a investigación acabou en nada, pero desde o PPdeG o que queremos dicir neste caso, como noutros, é que respectamos absolutamente as decisións da Xustiza”, indicou.

“E neste caso sempre puxemos a verdade por diante en todo momento, a diferenza do PSOE, un PSOE que sempre tenta darnos leccións”, recalcou, para engadir que os populares, pola contra, “nunca” o fan. “Pero o PSOE si que é moi dado a dar leccións e logo non aplicarse ningunha”, contrapuxo.

A continuación, esgrimiu que a Villares se lle esixiu “unha dimisión con todas as letras”, mentres que José Tomé, tras a denuncia pola canle interna do PSOE, presentou a súa renuncia como presidente da Deputación de Lugo, pero retén a acta provincial e tamén a Alcaldía de Monforte de Lemos.

“DIMISIÓN PARCIAL QUE NON ADMITIMOS”

“É unha dimisión parcial que nós non admitimos e onte mesmo pediámoslle a súa dimisión como alcalde de Monforte”, sentenciou Prado, quen acusou a Tomé de estar “a facer moito dano aos seus veciños e veciñas e tamén á provincia de Lugo”.

Por iso, os populares insisten en que debe presentar “a súa dimisión completa como deputado provincial” e a número dous do PPdeG insistiu en que “non pode ser” que o PSdeG “siga consentindo esta situación e o BNG actúe coa hipocrisía” de reivindicarse como “feminista” sen aplicar “para nada” o feminismo “en realidade”.

Ao seu xuízo, ao BNG “o único que lle preocupa” é “manterse nos cargos”, polo que non “rompe” co PSOE nas institucións nas que gobernan.

Rueda avoga por seguir apostando en 2026 por Vigo, a cidade onde máis vivenda pública está desenvolvendo o Goberno galego

O presidente do PPdeG, Alfonso Rueda, avogou hoxe por seguir apostando, no ano 2026 que está a piques de comezar, por Vigo, á que salientou como a cidade onde máis vivenda está desenvolvendo o Goberno galego.

Durante a súa intervención no pincho de Nadal organizado polo partido na cidade, con máis de medio millar de asistentes e no que tamén participaron o presidente provincial do PP de Pontevedra, Luis López, e a presidenta local, Luisa Sánchez, ademais da secretaria xeral do PPdeG, Paula Prado, e varios membros do Goberno autonómico, o líder dos populares galegos puxo en valor a aposta que fai por Vigo tanto a Xunta como o Partido Popular.

Así, sinalou que agora mesmo se están a desenvolver 1.600 vivendas públicas en Navia, outras 2.300 no Ofimático e 1.400 máis en Ramón Nieto. Ao mesmo tempo, puxo de exemplo outros grandes proxectos como o IES Domingo Villar, con máis de 10 millóns de euros de investimento; o centro de saúde Olimpia Valencia, preto de finalizarse; ou o avance na rehabilitación do histórico Teatro Fraga.

Nun ano, 2025, no que Luisa Sánchez foi nomeada presidenta local, Rueda puxo en valor as ganas, talante, ideas e sobre todo moitísimo traballo tanto por parte de Luisa como do seu equipo. “Facemos un balance máis que bo dos meses que pasaron desde entón”, asegurou.

“Sigamos demostrando altura de miras e facendo as cousas ben”, dixo, erixindo ao PP como a única alternativa, que hai que facer valer cada día desde calquera sitio, tendo en conta tamén que en ano e medio terán lugar as eleccións municipais.

Neste sentido, lamentou que o goberno socialista da cidade non levante a voz cos infinitos escándalos do PSOE, coa cifra en aumento de detidos, imputados e encarcerados, ou co desastre electoral de Estremadura. “España está farta do PSOE, hai que deixar paso ao Partido Popular, onde si sabemos facer as cousas ben”, manifestou Rueda.

LUIS LÓPEZ: “LUISA SÁNCHEZ ESTÁ EN TODOS OS LUGARES”

Pola súa banda, Luis López agradeceu aos afiliados e simpatizantes que sexan “os máis valentes da provincia”, porque, segundo destacou, “facer política en Vigo require unha dose extra de compromiso”.

“Este é un día para recoñecer aos que destes un paso á fronte, aos que acabades de chegar e aos que levades boa parte da vosa vida sumando para esta organización, ás veces soportando o que era directamente insoportable. É un día para darvos as grazas por todo iso, e para coller forzas para un 2026 que será decisivo”, destacou o líder provincial.

Luis López tamén fixo fincapé no traballo da presidenta do PP de Vigo e do seu equipo: “Comezamos o 2025 con moitos deberes pendentes e acabamos con moitos deles xa feitos. Comezamos cunha dirección e acabamos cunha flamante líder como Luisa Sánchez. Aparte da súa indiscutible valía e proximidade, Luisa está en todos os lugares, está con todos os colectivos, e ten unha presenza extraordinaria”.

O “PROXECTO DE UNIDADE E PERMANENCIA” DE LUISA SÁNCHEZ

Mentres, Luisa Sánchez recordou que neste ano que está a piques de rematar viuse “honrada” ao ser proclamada presidenta do Partido Popular de Vigo para liderar un “proxecto de unidade e de permanencia”.

A dirixente viguesa deu as grazas a Alfonso Rueda e Luis López polo seu “apoio constante” e tamén, en referencia á militancia, “a todas as persoas que nunca se renden e que cren en Vigo e neste partido”.

“Gáñanme a ilusión e a ambición por un futuro mellor para Vigo”, enfatizou Luisa Sanchez, quen amosou o seu desexo por construír unha cidade que “volva liderar, que non se conforme e que non viva de costas a Galicia nin España”.

O Grupo Popular propón a María Dolores Fernández Galiño para que continúe como Valedora do Pobo

O Grupo Popular vén de rexistrar no Parlamento de Galicia a súa proposta para que María Dolores Fernández Galiño continúe como Valedora do Pobo, dentro do proceso aberto para a renovación dos responsables desta institución recollida e regulada no Estatuto de Galicia.

Licenciada en Dereito pola Universidade de Santiago de Compostela (1981-1986) e diplomada en Práctica Xurídica pola mesma universidade (1985-1986), Fernández Galiño superou as oposicións de ingreso na carreira xudicial e tamén as oposicións de ingreso na carreira fiscal.

Na carreira xudicial estivo destinada, de 1990 a 1992, no Xulgado de Primeira Instancia e Instrución nº 1 de Ponteareas. Ascendeu en 1992 á categoría de maxistrada, con destino de 1992 a 2001 no Xulgado do Social nº2 de Pontevedra. Desde 2001 estivo destinada na Sección 2ª da Audiencia Provincial de A Coruña.

Na carreira fiscal atópase, desde o seu ingreso, coa categoría de avogada-fiscal, en excedencia.

Así mesmo, María Dolores Fernández Galiño ten recoñecida a especialización de Dereito Civil de Galicia.

Desde xullo de 2019, exerce a súa función como Valedora do Pobo de Galicia, cargo para o que agora volve a ser proposta polo Grupo Popular.

Alfonso Rueda felicita a María Guardiola por uns resultados en Estremadura que a “lexitiman” para formar goberno

O presidente do PPdeG, Alfonso Rueda, felicitou á presidenta en funcións de Estremadura, María Guardiola, pola súa vitoria nas eleccións autonómicas deste domingo nas que conseguiu 29 escanos que, na súa opinión, a “lexitiman” para formar goberno.

Nunhas declaracións aos medios de comunicación antes de participar na Xunta Directiva Nacional do Partido Popular, Rueda apoiou á gañadora das eleccións estremeñas destacando que conseguiu “máis escanos dos que tiña ata o de agora” e que estes 29 asentos na Asemblea de Estremadura supoñen ter máis que toda a esquerda xunta, quen suma 25 entre o PSOE e Unidas por Estremadura.

Ao ser preguntado polas posibles negociacións co líder do PSOE estremeño, Miguel Ángel Gallardo, para que Guardiola poida formar goberno en solitario, o líder do PPdeG evitou dar consellos pero definiu os 18 escanos dos socialistas como un “trompazo espectacular peor do que se esperaban”.

Alfonso Rueda pon o mandil para cociñar na cea de Nadal a receita de Galicia: “Tratar o noso con respecto e cariño e facer as cousas ben”

O Partido Popular de Galicia estrea hoxe o seu vídeo de Nadal, no que o presidente Alfonso Rueda pon o mandil para cociñar, na cea de Noiteboa, a receita do que Galicia sabe facer mellor: “Tratar o noso con respecto e cariño, e intentando facer as cousas ben para todos os galegos e galegas”.

Logo de percorrer Galicia en moto e en autobús e de poñerse á fronte dunha coral nos vídeos de anos anteriores, nesta ocasión o líder dos populares galegos decidiu asumir a tarefa de cociñar para toda Galicia e así escenificar ese momento de encontro no que as familias se reúnen en torno a unha mesa para degustar os mellores pratos da nosa terra e brindar por todo o bo que deixa o ano que remata.

Como non podía ser doutro xeito, a decisión do presidente de poñerse o mandil e manexar os fogóns suscita unha gran expectación e sobre todo sorpresa entre aqueles que mellor o coñecen. Así, mentres as súas fillas recordan que “os bocadillos saíanlle ben”, o presidente do Partido Popular, Alberto Núñez Feijóo, amósase convencido do éxito: “Mellor a cociña de Rueda que a cociña do CIS”.

O presidente de honra do PPdeG, Mariano Rajoy, aínda que non o pareza, ofrécese como “un bo pinche de cociña” para que Rueda poida triunfar e o secretario xeral do Partido Popular, Miguel Tellado, pola súa banda, propuxo vir a Galicia para “apaciguar o clima” ante a tormenta que xerou a nova de que o presidente Rueda ía cociñar polo Nadal.

Decidido a materializar esta cea con éxito, Alfonso Rueda conta coa axuda da secretaria xeral Paula Prado e dos presidentes provinciais do partido, que son os encargados de complementar o menú da noite: Diego Calvo (A Coruña) aporta un rape da lonxa de Ribeira, Elena Candia (Lugo) un capón de Vilalba, Luis López (Pontevedra) pan de Rodeiro e Luis Menor (Ourense) unha bica de Trives. De feito, este último elemento non podía faltar, xa que logo dos incendios deste verán, Ourense ten que seguir estando na mente e no corazón de todos.

UN ANO DE ESTREAS

Xunto a todos eles hai outras caras coñecidas que, ademais, se estrean por primeira vez neste tradicional vídeo dos populares galegos. É o caso, ao igual que Miguel Tellado, da deputada nacional Ana Vázquez, o coordinador de Medio Rural do PPdeG, Avelino Souto, e mesmo a nai do presidente, Lola de Valenzuela, que non está disposta a perderse o ‘debut’ do seu fillo como cociñeiro.

Pero como ningún proceso de cociñado está exento de imprevistos, Alfonso Rueda ten que facer fronte a problemas como un Peugeot mal aparcado, un Ábalos que quere apuntarse á festa no piso número ‘Uno’ coas súas chistorras e, por se isto non bastase, mesmo a un apagamento como o que España sufriu en abril.

Nada disto consigue frear a determinación do presidente de acoller na súa mesa a todos os galegos e galegas: pais, nais, nenos pequenos, avós, mozos e mesmo un ‘perro’. No caso deste último, unha cadela moi querida pola familia dos populares galegos: Pipa. Xunto a eles, finalmente, logo de superar con éxito a tarefa que se propuxo, decide propoñer un brinde.

“Pode que non sexa o mellor cociñeiro do mundo, pero o que si é verdade é que trato o noso con respecto, cariño e intentando facer as cousas ben, por todos os galegos e galegas. E isto é algo que aquí sabemos facer moi ben”, asegura ao tempo que desexa a todos un Bo Nadal, unhas Felices Festas e un moi Próspero Ano 2026.

 

 

 

O PPdeG salienta a aposta da Xunta pola remuda xeneracional nos oficios artesáns de Galicia, que reciben recoñecementos a nivel estatal

A deputada do Grupo Popular Noelia Pérez e o alcalde de Esgos, José Antonio Blanco, visitaron hoxe o centro de alfarería Alto do Couso co obxectivo de poñer en valor o apoio da Xunta de Galicia á remuda xeracional nos oficios artesáns e destacar o momento de recoñecemento que vive a artesanía galega a nivel estatal.

Durante a visita, Noelia Pérez lembrou que nos orzamentos da Xunta existe unha partida económica específica destinada a axudar á formación de aprendices de oficios artesáns, unha medida clave para garantir o futuro dun sector no que a transmisión do coñecemento é fundamentalmente práctica. Estas axudas permiten cubrir o custo salarial das persoas aprendices durante 12 meses, así como unha achega específica para o módulo formativo.

“A remuda xeracional é un dos grandes retos que temos como sociedade, e especialmente nos oficios artesáns, onde o saber facer se transmite de persoa a persoa. Se non apoiamos hoxe a aprendizaxe, mañá perderemos patrimonio, emprego e identidade”, sinalou a deputada popular.

APOIO DA XUNTA DE GALICIA

Neste sentido, Noelia Pérez destacou que desde a Consellería de Emprego, Comercio e Emigración existen diferentes mecanismos de apoio, como as axudas á remuda xeracional, que poden acadar ata 30.000 euros, ou o acompañamento que ofrecen os Polos de Emprendemento. No ámbito específico da artesanía, estas novas axudas supoñen un paso máis, ao cubrir o importe íntegro da contratación dos aprendices e apoiar tamén a formación asociada.

Como obxectivo complementario da visita, a deputada popular quixo tamén poñer en valor a presenza destacada de Galicia na gala dos Premios Nacionais de Artesanía celebrada o pasado mércores, na que dous dos cinco galardóns recaeron en proxectos galegos. Aitor Martínez, de Tomiño, foi recoñecido na categoría de produto; mentres que a Fundación Pública Artesanía de Galicia foi premiada pola iniciativa Artesanía no Prato como mellor iniciativa dunha entidade pública. Ademais, a artesá galega Sandra Vilas resultou finalista na categoría de emprendemento.

“Falamos dun sector vivo, con preto de 800 artesáns e artesás integrados na Fundación Artesanía de Galicia ou que se están formando na FP de Artesanía , e iso demostra que tradición, innovación e emprego poden ir da man cando hai apoio institucional”, concluíu Noelia Pérez.

O PPdeG destaca o impulso que suporá para o polígono industrial de As Gándaras a mellora das redes de comunicación e a conexión exterior, para as que a Xunta destina 5,6 millóns o vindeiro ano

Os deputados do Grupo Popular Cristina Sanz e José Manuel Mato salientaron hoxe o impulso que recibirá o polígono industrial de As Gándaras en Lugo coas obras de mellora das redes de comunicación e a súa conexión exterior que realizará a Xunta, para as que destinará o vindeiro ano 5,6 millóns de euros.

Cristina Sanz e José Manuel Mato subliñaron que, “a pesar de que falamos dun polígono industrial novo, estamos a falar dun espazo totalmente consolidado no que xa están asentadas máis de 130 empresas”.

NOVA AMPLIACIÓN

Ademais destas obras de comunicación e mellora dos accesos, a Xunta xa está a traballar nunha nova ampliación do polígono industrial de As Gándaras. En concreto, está previsto a urbanización de dúas novas fases que superan os 350.000 metros cadrados, coas que a capacidade deste parque achegaríase aos 1,6 millóns de metros cadrados.

“O compromiso do Goberno galego coa industria e o desenvolvemento económico de Lugo e de toda a provincia é total, e a mellor mostra disto témolo neste polígono de As Gándaras, no que a Xunta xa leva investidos máis de 60 millóns de euros tanto na dotación de solo industrial como nos accesos ou na mellora da seguridade”, indicaron os deputados populares.

O PPdeG destaca o traballo social que desenvolven en A Coruña entidades como Dignidad Galicia

Os deputados do Grupo Popular Roberto Rodríguez e Paula Mouzo visitaron a tenda solidaria que a asociación Dignidad Galicia ten en A Coruña (Avda. Alcalde Liaño Flores, 17) para destacar o seu labor de atención a máis dun milleiro de persoas e familias en risco de exclusión social que vén realizando nesta cidade

Roberto Rodríguez e Paula Mouzo explican que Dignidad Galicia xestiona, co apoio económico da Xunta, un ambicioso programa de inclusión de persoas sen fogar. En concreto, as dúas casas de familia coas que conta esta entidade na provincia de A Coruña, integradas na rede de centros concertados da Xunta, dan cobertura a nenos e nenas en situación de desprotección.

Así mesmo, Dignidad Galicia ofrece apoio en materia de inserción social e laboral para que cada persoa sexa capaz de desenvolverse por si mesma en todas as facetas da súa vida, co obxectivo de que poida acadar o pleno desenvolvemento da súa dignidade humana.

Os deputados populares visitaron a tenda solidaria que Dignidad Galicia ten na cidade de A Coruña, uns locais que serven para canalizar a roupa doada por particulares, empresas e outros centros a aquelas persoas que realmente a necesitan. Estas tendas tamén supoñen unha fonte de ingresos para a entidade, xa que a través delas procédese á reciclaxe e venda desta roupa, xerando uns recursos económicos que se destinan a outros proxectos de atención social.

O PPdeG destaca o impulso ao turismo náutico da comarca de Arousa que suporá a posta en marcha da nova estación marítima de Vilagarcía

O deputado do Grupo Popular Raúl Santamaría, acompañado do deputado nacional Juan Bayón e a portavoz do PP en Vilagarcía, Ana Granja, visitaron as obras de construción da nova estación marítima de Vilagarcía nas que a Xunta investirá preto dun millón de euros. Neste momento, estanse ultimando os traballos de demolición das antigas edificacións existentes na zona para, de seguido, dar paso á construción da nova estación, co obxectivo de que estea rematada ao longo do vindeiro 2026.

Raúl Santamaría manifestou que a nova estación marítima “permitirá ampliar a oferta de servizos turísticos que na actualidade xa se prestan en Vilagarcía, neste caso coa vista posta no impulso do turismo náutico, tanto para o atraque de embarcacións de visitantes á comarca de Arousa como para a chegada de peregrinos que fagan a ruta marítima cara Santiago remontando o río Ulla”.

INSTALACIÓNS MODERNAS E ACCESIBLES

“Logo dos imprevistos que se viviron para o inicio destas obras, agora a construción da nova estación marítima avanza segundo os prazos previstos, polo que todos esperamos que esta nova infraestrutura turística sexa unha realidade ao longo do vindeiro ano e podamos gozar dunhas instalacións modernas e accesibles que sirvan de atractivo turístico”, dixo o deputado popular.

As instalacións da estación marítima completaranse coa construción dun novo pantalán a cargo da Autoridade Portuaria de Vilagarcía, unhas instalacións que permitirán un atraque máis seguro e cómodo para as embarcacións e tamén unha maior seguridade para o embarque e desembarque dos pasaxeiros.

O Parlamento galego demanda ao Goberno de España que defenda ante a Comisión Europea a inclusión do hidroxenoduto A Coruña-Zamora na lista de proxectos de interese común

O Parlamento de Galicia aprobou hoxe por unanimidade unha proposición no de lei, logo dunha transacción entre o Grupo Popular e o BNG, a través da que se insiste na demanda ao Goberno de España para que defenda ante a Comisión Europea a inclusión do hidroxenoduto A Coruña–Zamora na lista de proxectos de interese común. Así mesmo, no caso de que finalmente non se abra ou se peche a vía para a súa incorporación a dita lista europea, pídese que a Xunta manteña o seu compromiso de defender este proxecto estratéxico desde Galicia por todas as vías dispoñibles.

O portavoz popular de Industria, Rubén Lorenzo, sinalou que o hidroxenoduto Guitiriz-Zamora “representa una oportunidade estratéxica para Galicia, porque falamos da posibilidade de que a nosa comunidade autónoma se sitúe no mapa europeo de transición enerxética, da descarbonización e da nova economía industrial vencellada ao hidróxeno verde”.

PROXECTO TRANSVERSAL

“Reclamamos ao Goberno de España que defenda este proxecto en Europa e que leve a voz de Galicia a Bruxelas presentando este hidroxenoduto como estratéxico para o conxunto do país, porque este proxecto representa a posibilidade de que nos coloquemos no mapa europeo da transición enerxética, unha garantía de que o noso potencial renovable se converta en industria, emprego e futuro”, indicou Rubén Lorenzo.

Ademais, reclamou que este proxecto “debe ser transversal a toda a comunidade e non pode quedar reducido á provincia de Lugo: debe partir de A Coruña, atravesar toda Galicia, conectar os nosos polos industriais e chegar a Zamora como porta de saída cara a rede española e europea”. “Deste xeito, poderemos atender todos os proxectos estratéxicos de xeración de hidróxeno en Galicia que están repartidos polo territorio, porque o futuro val do hidróxeno galego necesita unha infraestrutura que recolla todo o potencial”, indicou.

Por outra banda, Rubén Lorenzo cualificou de “paradóxico que o BNG, sendo un partido que pon trabas constantemente ao desenvolvemento eólico e a proxectos de renovables en Galicia, sexa o que pida agora impulsar o sector do hidróxeno verde, porque esta enerxía xérase mediante electrólise da auga empregando electricidade renovable”. “Se non se fai así, xa non podemos falar de hidróxeno verde”, asegurou.

“Para que ese potencial se converta en realidade, precisamos unha infraestrutura que conecte a produción coa demanda e que nos conecte á rede española e á rede europea, polo que sen hidroxenoduto o hidróxeno galego quedará atrapado”, rematou o portavoz popular.