Autor: ppdegaliciaredes

Os deputados do Grupo Popular Ángel Rodríguez e Carmen Pomar visitaron hoxe a base da unidade operativa da brigada de bombeiros forestais de Ames e destacaron que a Xunta investirá entre os anos 2025 e 2026 preto de 1,8 millóns de euros na formación e adestramento do persoal dos servizos de prevención de incendios forestais, o que supón un incremento do 19 por cento respecto do bienio anterior.

A Xunta vén de investir case 75.000 euros na mellora desta nova base, unhas obras que consistiron esencialmente no acondicionamento de vestiarios, duchas, zonas de descanso, almacéns para material e instrumental de traballos, ademais dos recintos para gardar os vehículos, co obxectivo de favorecer a conciliación entre o descanso e o traballo dos bombeiros e os axentes forestais.

Os deputados trasladaron aos profesionais do servizo de prevención de incendios forestais o esforzo que a Xunta vén realizando para a formación e adestramento deste persoal, que terán á súa disposición máis de 3.500 cursos e accións formativas ao longo de 2025 e 2026, tal e como se recolle no plan de formación integrado dentro do Pladiga.

O Plan de formación e adestramento para o persoal do Servizo de prevención e defensa contra incendios (SPIF) estruturase en seis programas. Entre as accións que se acometerán destacan os cursos monográficos sobre cuestiones relacionadas coa prevención e extinción de incendios forestais, así como a posibilidade de desenvolver un itinerario formativo profesional, que suporá a preparación diversificada e por grupos de categorías profesionais desde unha cualificación inicial ata a especialización do persoal.

Para rematar, os deputados populares trasladaron o agradecemento de toda a sociedade galega polo labor que estas brigadas forestais desenvolven no día a día na defensa dos montes galegos, tendo presente que o vindeiro 1 de xullo comezará a época de perigo de alto risco de incendios forestais.

Os deputados do Grupo Popular Miguel Viso e Víctor Baladrón salientaron hoxe a importancia do bono turístico que a Xunta lanzará o vindeiro mes de xullo para a desestacionalización do turismo na Comunidade galega, sobre todo nunha provincia como a de Ourense, que destaca pola chegada de visitantes sobre todo fora da tempada estival.

Nunha visita á casa de turismo rural A Gandarela de Cenlle, en compañía da alcaldesa, Rebeca Sotelo, os deputados populares destacaron o papel do turismo como motor de desenvolvemento, de fixación de poboación e de xeración de oportunidades no rural. Deste xeito, subliñaron “a necesidade de seguir apoiando este sector que amosa, cada día, a mellor cara de Galicia: hospitalidade, patrimonio, paisaxe e identidade”.

Miguel Viso e Víctor Baladrón referíronse, en concreto, á nova convocatoria do bono turístico que a Xunta lanzará o vindeiro mes de xullo, a través do que se prevé mobilizar arredor de 2,5 millóns de euros neste sector ao longo do vindeiro outono a través do cofinanciamento de estadías e actividades. Os interesados poderán descargarse os bonos a través da web www.bonoturismo.gal, que terán un importe de 150 euros, dos que a Xunta financiará 60 euros.

IMPULSO AO TURISMO INTERIOR

Durante a visita, Miguel Viso destacou que “apostar polo turismo é apoiar directamente a quen mantén abertas as portas, crea emprego e ofrece experiencias que nos conectan co noso propio territorio”. Pola súa banda, Víctor Baladrón salientou que “non se trata só de cifras, senón de garantir que negocios que levan anos resistindo teñan agora un impulso real para continuar”.

Pola súa banda, Rebeca Sotelo puxo o foco na importancia deste tipo de programas para os concellos pequenos. “O turismo achega vida, actividade e esperanza a moitas zonas do interior, e iniciativas como esta do bono turístico axuda a que máis persoas descubran todo o que temos para ofrecer e contribúen a que os negocios locais poidan mirar ao futuro con máis seguridade”, apuntou.

Os deputados do Grupo Popular Nicole Grueira e Enrique Barreiro avanzaron hoxe que a partir de mediados do vindeiro mes de xullo poderanse solicitar as axudas para a incorporación de agricultores mozos entre 18 e 40 anos ou a modernización ou mellora de explotacións agrarias. “Son un claro incentivo e mostra da aposta da Xunta pola incorporación de mozos ao rural, un rural vivo e que día tras día conta con máis xente nova á fronte das explotacións”, manifestaron.

Nunha visita ás obras que se están a facer na granxa Adriago, S.L. no concello lucense de Friol, que se levan adiante gracias a estas axudas da Xunta para facilitar a implantación de mozos ao sector agrogandeiro galego, os deputados populares lembraron que o pasado ano a Xunta distribuíu case 46 millóns de euros entre 832 proxectos, dos que 370 eran plans de mellora para grandes e pequenas explotacións, 320 solicitudes de incorporación de mozos e 133 expedientes de novos agricultores de entre 41 e 55 anos.

DÚAS LIÑAS DE AXUDA

De cara ao presente ano 2025, Nicole Grueira e Enrique Barreiro avanzaron que a Xunta repartirá 30,5 millóns de euros para apoiar ás persoas agricultoras mozas. En concreto, explicaron que haberá dúas liñas de axuda: unha primeira, dotada con 16 millóns de euros, destinada ao establecemento de agricultores mozos; e a segunda, con 14,5 millóns de euros, para a realización de investimentos en modernización ou mellora de explotacións agrarias.

A estas dúas liñas, sumaranse 5,5 millóns de euros cos que a Xunta financiará os plans de mellora non aprobados aos mozos que resultaron beneficiarios da convocatoria de 2024, co obxectivo de facilitar o inicio da súa actividade produtiva e favorecer que poidan completar o seu investimento na explotación.

Entre os requisitos para acceder ás axudas para a incorporación de mozos á actividade agrogandeira, os interesados deberán presentar un plan empresarial, permanecer na actividade agraria cinco anos desde o pago do final da axuda e participar no programa de titorización que presta a Consellería do Medio Rural a persoas agricultoras mozas.

O Grupo Popular impulsará no Parlamento de Galicia unha proposición de lei a través da que se reforma a Lei do deporte de Galicia para implementar tres medidas importantes: que a Administración poida exercer a acción popular nos procedementos que se sigan por delitos e actos de violencia perpetrados no ámbito deportivo; para clarificar o réxime de prescricións das infraccións e das sancións no ámbito deportivo; e para afondar no bo goberno no deporte nas organizacións e federacións galegas.

O portavoz popular Alberto Pazos informou do rexistro esta mañá desta proposición de lei a través da que se introducen “importantes cambios na Lei do deporte que aprobamos hai máis de 13 anos e que nos van permitir adaptala á realidade da sociedade actual, porque non podemos consentir e debemos poñer fin aos actos de violencia deportiva que cada vez están a manchar máis a boa práctica do deporte en Galicia”.

FOMENTAR VALORES

“O deporte e as competicións deportivas deben fomentar os valores deportivos, a socialización dos participantes e un intercambio de experiencias positivas, e todo iso velando pola seguridade e a protección de deportistas e espectadores, para que a práctica deportiva sexa libre de violencia en calquera das súas formas, tanto física como verbal”, indicou.

Porén, lamentou que “estamos comprobando como a violencia no deporte comeza a ser algo habitual, polo que consideramos urxente que se adopten as medidas oportunas para poñer fin a estas prácticas violentas que afectan tanto a deportistas, como árbitros e xuíces, e incluso o público asistente aos acontecementos deportivos”.

Alberto Pazos explicou que a través desta proposición de lei “abrimos a posibilidade para que a Xunta poida exercer a acción popular nos procedementos penais por violencia no deporte”. “Queremos facer realidade un deporte libre de calquera forma de violencia, porque é a mellor representación do respecto, a tolerancia, a inclusión e a participación cívica, polo que cada acto violento que se produce contravén estes valores e a propia esencia deportiva”, manifestou.

En segundo lugar, a iniciativa lexislativa modifica a Lei do deporte existente para clarificar o réxime de prescrición das infraccións e as sancións. Así, fixa tres anos para as infraccións ou sancións por faltas moi graves; dous anos para as infraccións ou sancións por faltas graves; e seis meses para as infraccións leves e un ano para as sancións por faltas leves.

En último lugar, a través desta proposición de lei elévase o nivel de esixencia das súas normas de bo goberno para as organizacións e federacións deportivas, “a través tanto do respecto da súa democracia interna, a transparencia, a integridade, a solidariedade, a igualdade de xénero, a apertura, a rendición de contas ou a responsabilidade social; como tamén dunha xestión irreprochable dos seus recursos financeiros, con controis para previr os conflitos de intereses ou a duración limitada ata un máximo de tres anos dos seus cargos electos”, apuntou Alberto Pazos.

“Con este fin, propoñemos que as federacións deportivas aproben un Código de Bo Goberno no que se establezan todas estas prácticas de boa gobernanza e integridade, as regras en materia de transparencia, o código de conduta para os seus órganos de goberno ou as normas relativas á xestión e control de todas as transaccións económicas que efectúe a entidade deportiva”, concretou.

INCREMENTO DA PRESENZA DO LOBO

Por outra banda, o portavoz popular referiuse ao auto do Tribunal Superior de Xustiza de Galicia que suspende cautelarmente ata o vindeiro 31 de xullo a posibilidade para que en Galicia se adopten medidas de control do lobo cando haxa danos acreditados en explotacións gandeiras, unha decisión que cualificou de “totalmente sorprendente, porque en Galicia só se tiñan autorizado dúas solicitudes e aínda non se tiña abatido ningún animal, algo que si ten acontecido noutras comunidades como Asturias ou Cantabria; e porque é contraria ao criterio empregado polos mesmos tribunais en comunidades como Cantabria ou Castela e León”.

“Os principais prexudicados deste auto xudicial son os gandeiros galegos, que ven como o lobo vai continuar campando ás súas anchas por toda Galicia atacando aos seus rebaños e provocándolles considerables perdas económicas” sinalou Alberto Pazos, quen avogou porque a Xunta “defenda, ante quen sexa necesario, o mantemento da biodiversidade e as accións de control sobre esta especie tendo en conta o estado favorable das súas poboacións”.

Neste sentido, lembrou que o numero de manadas na Comunidade galega incrementouse das 84 existentes en 2014 ás 93 contabilizadas na actualidade, estando presente en máis do 90 por cento do noso territorio, unha situación que veu aparellada a un aumento dun 77 por cento dos ataques do lobo e que o número de reses afectadas subira tamén un 55 por cento.

As portavoces de Política Social e de Xuventude do Grupo Popular, Raquel Arias e Nicole Grueira, respectivamente, salientaron hoxe a provincia de Lugo conta na actualidade con case 3.500 prazas gratuítas para a atención dos nenos de entre 0 e 3 anos.

Nunha visita ao punto de atención á infancia de Guntín, en compañía do alcalde Ángel Pérez, as deputadas popular subliñaron “a aposta do actual Goberno galego pola escolarización de nenos e mozos galegos, poñendo en marcha medidas pioneiras para posibilitar a gratuidade dos estudos desde o momento de nacer ata que rematan a carreira universitaria”.

En concreto, no que atinxe ao coidado dos menores entre 0 e 3 anos, a Xunta está a investir na provincia de Lugo arredor de 12 millóns de euros, “unha partida que sae do peto de todos os galegos porque, a día de hoxe e a pesar das promesas feitas por Pedro Sánchez, o Goberno central non aporta un só euro para esta iniciativa”, lamentou Raquel Arias.

Froito destas medidas impulsadas pola Xunta, Galicia é a comunidade autónoma coa maior taxa de escolarización entre os nenos de 0 a 3 anos co 60,6 por cento, unha porcentaxe que supera amplamente o obxectivo da Unión Europea de chegar cando menos ao 45 por cento en 2030.

Raquel Arias e Nicole Grueira destacaron, ademais, que a Xunta outorgou o Bono Concilia Familia a 1.315 familias da provincia de Lugo nas que traballan os dous proxenitores. Con este bono, o Goberno galego da unha axuda de ata 200 euros por neno para poder acceder a un recurso de conciliación durante os períodos non lectivos.

O portavoz de Lingua do Grupo Popular, José Luís Ferro, acusou hoxe ao BNG no Pleno do Parlamento de utilizar o galego “para castigar, sinalar ou dividir, cando debe ser un espazo de encontro, valor común e unha lingua viva que nos une”. Así mesmo, incidiu que “a proposta de oficializar o galego, o catalán e o euskera no Parlamento Europeo require seriedade, diálogo institucional e garantías de viabilidade, e non pode ser que unha cuestión tan relevante sexa utilizada como moeda de cambio política para pagar pactos de investidura con partidos independentistas”.

“A única verdade contrastada é que o Goberno de España non contou coa Xunta para a proposta de oficializar o galego no Parlamento Europeo, senón que a impuxo nun contexto de débeda política cos seus socios parlamentarios e que agora pretende culpabilizar aos demais da súa propia falta de planificación”, manifestou José Luís Ferro.

COMPROMISO INDISCUTIBLE COA LINGUA

Así, reiterou que “o noso compromiso coa lingua galega é indiscutible, pero recoñecer unha lingua nunha institución como o Parlamento Europeo non se resolve con boas intencións: é un proceso complexo, require apoio diplomático, informes técnicos, tradutores, orzamento asignado e, sobre todo, consenso e seriedade”. “O Goberno de Pedro Sánchez levou esta proposta a Europa sen falar coas institucións autonómicas, sen negociar cos demais Estados membros e sen asegurar os votos necesarios nunha manobra improvisada, electoralista e puramente simbólica”, dixo.

“Estamos a favor de que o galego teña máis presenza internacional, pero advertimos de que non se pode asumir unha proposta que supón un custo de 40 millóns de euros anuais e unha tramitación que require a unanimidade dos 27 estados membros da Unión Europea”, explicou o portavoz popular.

Para rematar, José Luís Ferro subliñou que “o galego deféndese sumando vontades, con políticas útiles e con consenso institucional”, polo que avogou por “afastar a lingua do combate político, traballar xuntos, con sentido institucional, con responsabilidade e con humildade”.

O Pleno do Parlamento de Galicia aprobou hoxe a proposición non de lei do Grupo Popular, que non contou co apoio dos deputados do PSdeG, a través da que se solicita ao Goberno de España que, a través do Ministerio de Igualdade, manteña o financiamento íntegro e estable do 100 por cento do Plan Corresponsables, sen recortes nin demoras, de forma que se garanta a continuidade dos programas iniciados desde 2021.

A portavoz popular de Política Social, Raquel Arias, criticou que o Goberno de Pedro Sánchez aprobara un recorte este ano de case 50 millóns de euros da súa achega ao Plan Corresponsables, ao pasar de 190 a 142,5 millóns de euros. “Un recorte do 25 por cento, sen marxe de manobra e chantaxeando ás comunidades autónomas con que ou poñen da súa parte ese 25 por cento ou non lles chegará nada do 75 por cento restante”, sinalou.

MARCHA ATRÁS

Deste xeito, demandou que “o Goberno de Pedro Sánchez dea marcha atrás ao seu anuncio de recortar o Plan Corresponsables, a única iniciativa que ten en marcha con medidas para a igualdade a través da conciliación e a corresponsabilidade, a pesar de presentarse como o goberno máis feminista da historia”.

Raquel Arias explicou que a través deste plan 60 Anpas, 170 concellos e unha vintena de entidades sen ánimo de lucro promoven actividades a favor da igualdade e a conciliación responsable, que o ano pasado beneficiaron en Galicia a máis de 30.000 nenos e nenas galegos e ás súas familias. Un plan que para Galicia tiña 9,3 millóns de euros anuais e que o Goberno central vén de recortar ata os 6,9 millóns, “case 2,5 millóns de euros menos para os programas madrugadores, para campamentos ou para actividades de corresponsabilidade”, concretou.

 

 

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que dote de fondos económicos a Lei da ELA para que sexa realmente efectiva e cumpra cos obxectivos para os que foi aprobada. “Se o Estado non financia esta lei non é por falta de recursos, senón por falta de vontade, lentitude, desidia e cero empatía con quen xa non ten tempo que esperar”, sinalou a portavoz de Política Social, Raquel Arias.

O 10 de outubro de 20245, o Congreso aprobou por unanimidade a Lei da ELA, “un acordo histórico que chegaba logo de tres anos de penurias parlamentarias e decenas de aprazamentos ata que foi posible o seu debate”, lembrou Raquel Arias.

“Pasaron oito meses e os enfermos de ELA segue sen chegarlles nin unha soa das axudas ás que esta lei lles da dereito, porque, do mesmo xeito que aconteceu coa Lei da dependencia, o Goberno de Pedro Sánchez non dotou orzamentariamente esta nova norma”, lamentou.

230 MILLÓNS PARA A APLICACIÓN DA LEI

A portavoz popular explicou que esta lei establece, entre outros aspectos, unha vía rápida para o recoñecemento da dependencia e a discapacidade, asistencia 24 horas en fases avanzadas ou o mantemento da base de cotización para os coidadores que teñen que abandonar as súas ocupacións para que non lle baixen as pensións. “Calcúlase que o custo da aplicación desta lei sitúase arredor dos 230 millóns de euros”, concretou Raquel Arias, quen criticou que “dos 60 millóns que pediron os afectados para empezar de forma urxente cun plan de choque, o Goberno de Sanchez limitou a unha achega de 10 millóns de euros, menos do 5 por cento do custe real de implementar a lei”.

Fronte a esta situación, Arias destacou que a Xunta “ten claro que o folio dos pacientes da ELA está cheo de necesidades que non poden agardar, polo que fomos a primeira comunidade, desde hai tres anos, que damos unha axuda directa anual de 12.000 euros aos enfermos, un apoio importante que lles permite comprar produtos de primeira necesidade, material ortopédico ou facer obras de adaptación nos seus fogares”.

Así mesmo, lembrou que Galicia xa fora en 2018 pioneira ao crear o proceso asistencial integrado de esclerose lateral amiotrófica, ao amparo do que se axilizou a atención establecendo vías rápidas a nivel sanitario, para axilizar o diagnóstico, e a nivel social, para a tramitación da dependencia e a discapacidade.