Santiago, 10 de abril de 2019.- O portavoz de Universidades do Grupo Popular, Martín Fernández Prado, cualificou hoxe de “pouco progresiva e non redistributiva a proposta dos socialistas galegos de eximir a todos os estudantes do pago das taxas universitarias, sexan cales sexan os seus ingresos”. “Veñen agora cunha proposta incumprida por Pedro Sánchez para que a paguemos os galegos”, indicou.
O Grupo Popular cualifica de “extemporánea” a proposta do PSOE de reclamar o uso do superávit
Santiago, 10 de abril de 2019.- O portavoz do Grupo Popular, Pedro Puy, cualificou hoxe de “extemporánea” a proposición non de lei do Grupo Socialista debatida hoxe no Pleno sobre a reclamación ao Goberno central destinar o superávit da Comunidade galega a sanidade, educación e servizos sociais, “porque foi o Presidente da Xunta o que tomou a iniciativa, á que sumou a demanda dos 170 millóns de euros das liquidacións negativas en compensación por ser unha comunidade cumpridora, os 200 millóns da última mensualidade do IVE de 2017 e os 330 millóns das entregas a conta correspondentes ao presente exercicio”.
Pedro Puy lembrou que o superávit da Xunta no pasado ano “é consecuencia de que Galicia cumpriu o déficit público, o límite de débeda, a regra de gasto e fomos líderes no pago aos provedores” e que “o superávit non foi xerado pola inexecución do gasto, senón por unha recadación superior á prevista como consecuencia da boa marcha da economía galega.
CARTA Á MINISTRA ANTES QUE PROPOSTA SOCIALISTA
Diante desta situación, o Presidente da Xunta mandou unha carta o 27 de febreiro á ministra de Facenda solicitando poder facer uso deste superávit para atender necesidades de Galicia en materia sanitaria, educativa e de servizos sociais, “moitos días antes de que o Grupo Socialista rexistrara o 15 de marzo a proposición non de lei que hoxe debatemos”.
“Por tanto, a posición do Goberno de Galicia fixo rectificar ao Goberno central, que o pasado 29 de marzo aprobou o Real Decreto que habilita a posibilidade de utilizar este superávit, que foi publicado no boletín oficial do Estado do 30 de marzo e convalidado no Congreso o 3 de abril”, concretou.
O portavoz popular criticou que a decisión do Goberno de Pedro Sánchez de eliminar a posibilidade de que as comunidades autónomas cumpridoras puideran utilizar o seu superávit “era unha discriminación entre administracións públicas, xa que si se permitía ás entidades locais cumpridoras”.
“O esforzo feito polos galegos, que fixo que Galicia tivera un superávit de 125 millóns de euros, ten que ser recoñecido”, manifestou Puy, quen engadiu que “ten que haber flexibilidade para gastar o que é dos galegos no que necesitan os galegos”.
O Parlamento demanda a Fomento que elabore un plan director para o Corredor Atlántico consensuado coas comunidades autónomas
Santiago, 10 de abril de 2019.- O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Ministerio de Fomento que elabore un plan director para o Corredor Atlántico consensuado, que recolla planificación e proxectos concretos de calidade para conseguir fondos europeos que se traduzan nunha verdadeira modernización desta liña ferroviaria. Así mesmo, pídese que traballe con intensidade na elaboración de documentos técnicos de calidade que favorezan a recepción de fondos europeos para a liña Vigo-Porto, ao tempo que redacta un plan de conservación e modernización do resto da rede ferroviaria de Galicia, no que se recollan actuacións de mellora e modernización das liñas Ferrol-Ribadeo, Ferrol-A Coruña, Vigo-Porto e Ourense-Lugo.
O Parlamento galego rexeita o cambio de criterio da Avogacía do Estado respecto da prórroga a Ence
Santiago, 10 de abril de 2019.- O Parlamento de Galicia aprobou hoxe a proposición non de lei do Grupo Popular, co voto en contra de PSOE, En Marea e BNG, a través da que se expresa o rexeitamento ao cambio de criterio da Avogacía do Estado de allanarse aos recursos interpostos contra a prórroga outorgada á factoría de Ence en Pontevedra, e demándase ao Goberno do Estado que asuma un compromiso expreso cos máis de 5.000 postos de traballo ameazados e as 80.000 familias galegas que verían afectadas as súas rendas da venda da madeira, e rectifique esta decisión. Tamén se lle pide que avalíe os custos que esta declaración de nulidade da prórroga podería ter para o erario público en concepto de responsabilidade patrimonial do Estado.
O PPdeG reitera que o proxecto da mina de Touro “só será viable se salvagarda o respecto ao contorno e o estrito cumprimento da legalidade vixente”
Santiago, 10 de abril de 2019.- O deputado do Grupo Popular, Moisés Blanco, reiterou hoxe no Parlamento que “tanto desde a Xunta como o PPdeG estamos a favor dunha minaría sustentable, moderna e respectuosa co medio ambiente”, polo que incidiu que o proxecto da mina de Touro “só será viable se salvagarda o total respecto ao contorno, o estrito cumprimento da legalidade vixente e dota de todas as garantías urbanísticas, medioambientais e técnicas”.