Os senadores do PPdeG denuncian que a transferencia da AP-9 “non é unha prioridade para o Goberno de Sánchez”

Os senadores do PPdeG denuncian que a transferencia da AP-9 “non é unha prioridade para o Goberno de Pedro Sánchez” e acusan ao PSOE de “faltar ao seu compromiso electoral nas autonómicas” e de “dicir unha cousa en Galicia e a contraria en Madrid”.

Logo da comparecencia do ministro de Transportes, Óscar Puente, esta tarde no Senado para abordar a cuestión da transferencia da autopista do Atlántico, o senador José Manuel Barreiro sostén que “o ministro deixou claro que entre as prioridades do seu Ministerio non se atopa a transfernecia da AP-9 a Galicia”.

“A comparecencia do señor Puente puxo de manifesto que para o PSOE non teñen valor nin o acordo que se adoptou por unanimidade –e polo tanto co apoio dos socialistas galegos– no Parlamento de Galicia sobre esta cuestión, nin o compromiso electoral de aplicar a gratuidade da AP-9 que manifestaron nas últimas eleccións autonómicas”, asegura.

O senador lucense reprocha neste sentido aos socialistas que “digan unha cousa e a contraria en Madrid” e ironiza con que este cambio de postura “probablemente sexa consecuencia do escaso peso que o PSOE galego ten no Goberno de Sánchez e da pouca importancia que o propio Sánchez lle dá a Galicia”.

“Tamén quedou claro que o compromiso do BNG coa transferencia da AP-9 non significa nada e que o seu apoio gratuíto á investidura de Sánchez foi a cambio de nada, xa que a día de hoxe non asumiu ningún tipo de compromiso co cumprimento dos seus acordos”, engade.

Por todo isto, Barreiro conclúe que nestes momentos “o único partido que ten unha posición firme, clara, comprometida e seria respecto a Galicia e respecto á transferencia da AP-9 é o Partido Popular de Galicia”.

O Grupo Popular salienta que os atrasos, a falta de prazas ou as avarías son a excepción no transporte interurbano de competencia da Xunta

O portavoz de Mobilidade do Grupo Popular, Gonzalo Trenor, salientou hoxe no Pleno do Parlamento galego que “os atrasos, a falta de prazas ou as avarías son a excepción no transporte interurbano de competencia da Xunta de Galicia”.

“Seguimos avanzando na consecución dun modelo de mobilidade optimizado, moderno, intelixente e responsables coa poboación galega e co medio natural”, que na actualidade xa conta con máis de 3.700 rutas, máis de 56.000 paradas, máis de 20 millóns de horarios e máis de 2,3 millóns de servizos ao ano.

REFERENTE

Gonzalo Trenor salientou que o transporte público de Galicia “é un referente entre o resto de comunidades autónomas, como pioneiro na renovación do transporte público interurbano, polos máis de 140 millóns de euros anuais que se dedican a financialo e polo marcado carácter social co que se aborda a mobilidade”.

Porén, ironizou con que tanto BNG como o PSdeG “non poñan en práctica nas cidades nas que gobernan as brillantes ideas que din que teñen para o transporte público” e criticou a situación na que se atopan os servizos que prestan desde nos concellos de Pontevedra, onde segue a ser a Xunta a que presta o transporte urbano; Santiago, onde aínda non renovaron o contrato; Lugo ou A Coruña, onde a previsión é que o contrato estea en situación irregular alomenos ata 2026.

O Grupo Popular reitera que non existe sobrecusto no Hospital Álvaro Cunqueiro, nin trato de favor a Eulen nin unha soa sospeita de irregularidade na contratación da Xunta durante a pandemia

O portavoz do Grupo Popular, Alberto Pazos, asegurou hoxe no Pleno do Parlamento galego que “non existe sobrecusto no Hospital Álvaro Cunqueiro, nin trato de favor a Eulen, nin unha soa sospeita fundada de irregularidade na contratación da Xunta durante a pandemia”, polo que animou ao BNG a constituír unha comisión de investigación “porque, de non levalo a cabo, estaría facendo gala dunha incoherencia política inasubmible e demostraría que o único que os nacionalistas poden aportar a Galicia é mentira, difamación e covardía política”.

Alberto Pazos criticou que “a señora Pontón, ao volante da máquina do fango, e co señor Besteiro no asento do copiloto, pretende enlamar a política galega espallando manipulación, bulos e fake news, coa esperanza de que iso sirva para tapar o seu enésimo fracaso electoral”. “Xa perdemos a conta das comisións de investigación formuladas pola oposición polas máis variopintas razóns, pero nin unha soa vez tiveron a coherencia e as agallas de facer uso da potestade que lles outorga o regulación deste Parlamento para constituír unha comisión de investigación automaticamente, sen apoio de ninguén e sen necesidade de votación”, lembrou.

UN DOS MELLORES HOSPITAIS DE EUROPA

Na súa intervención, considerou “unha vergoña que se atrevan a criticar a este goberno por construír durante a crise o hospital público que vostedes non foron quen de iniciar en plena bonanza económica”, ao que engadiu que “resulta dun mastodóntico cinismo que critiquen o método usado para financialo cando é similar ao escollido polo seu goberno bipartito”, como o demostrou cunha carta da asesoría Garrigues reclamando o pago polos servizos prestados para a realización dunha memoria na que se concretaba que o proxecto do hospital de Vigo tería unha participación pública do 10 por cento e tería externalizados todos os servizos non sanitarios.

“Afortunadamente, a demagoxia do Goberno bipartito foi substituída pola seriedade dun Goberno do PPdeG, que foi capaz de axustar as contas públicas, sen facer esas renuncias, ao tempo que poñía a disposición dos galegos un dos mellores hospitais de Europa”, destacou.

Respecto das contratacións da Xunta coa empresa Eulen, o portavoz popular reiterou os datos oficiais extraídos da plataforma e do rexistro de contratos da Xunta, que xa foron facilitados polo Goberno galego ao Parlamento galego en 2022, nos que se pon de manifesto unha redución do 65 por cento da contratación con esta empresa por parte do primeiro Goberno de Feijóo respecto do Goberno bipartito de socialistas e nacionalistas.

NIN UN SÓ REPARO DE LEGALIDADE

Por último, sobre as contratacións realizadas durante a pandemia da Covid-19, Pazos lembrou que “xa foi fiscalizada polo Consello de Contas, sen realizar nin un só reparo de legalidade”. “Sabendo isto, desde o BNG espallaron sospeitas de enriquecemento persoal do Presidente Feijóo durante a pandemia”, criticou o portavoz popular, quen cualificou de “noxento que aínda non se desculparan por tan baixeza”.

Alberto Pazos rematou asegurando que “os admiradores do exemplar sistema electoral bolivariano pretenden importar ao noso país a metodoloxía do réxime de Maduro, convenientemente adaptada á realidade española”, porque “ante a acumulación de casos de corrupción no entorno máis próximo ao Presidente do Goberno de España, a esquerda, tanto nacionalistas como socialistas, néganse a dar calquera explicación ao tempo que esixe que se investigue ao xefe da oposición”.