Día: 13 de septiembre de 2024

O Consello de Contas incorporará ao seu Plan de Traballo para 2024, a proposta do Grupo Popular, a realización dunha auditoría operativa dos concellos galegos que non cumpriron a súa obriga de render as súas contas, segundo o previsto no artigo 223 do texto refundido da Lei reguladora das facendas locais. A viceportavoz popular, Cristina Sanz, cualificou de “correcto, completo e exhaustivo” o Plan de Traballo deste organismo para o vindeiro ano, no que se incrementa case un 40 por cento o número de novas fiscalizacións realizadas en 2023, e criticou que BNG e PSdeG “estean pedindo que multiplique por catro o seu traballo, algo absurdo e imposible de cumprir triplicando os medios humanos e materiais dos que dispón o Consello de Contas”.

Cristina Sanz apuntou que a incorporación ao Plan de Traballo do Consello de Contas dunha auditoría operativa dos concellos galegos que non cumpriron coa obriga de render as súas contas é “unha recomendación xenérica, que se basea nun criterio obxectivo e resulta de aplicación con independencia da cor política que goberne”. Neste momento, esta auditoría afectaría aos concellos de Verín, A Rúa e Redondela, que son os que non cumpriron coa obriga de remitir ao Tribunal de Contas a Conta Xeral do exercicio anterior antes do 15 de outubro de cada ano.

AUDITORÍAS DO SAF E HOSPITALIZACIÓN A DOMICILIO

Ademais, a viceportavoz popular considerou acertado a incorporación, entre as 32 novas fiscalizacións que levara a cabo o Consello de Contas, de auditorías operativas do Servizo de Axuda no Fogar ou do Plan Galego de Hospitalización a Domicilio, porque “estamos ante fiscalizacións duns servizos prioritarios, no sentido de que están moi centrados nas persoas que teñen dificultade de mobilidade e que están garantindo que non teñan que abandonar o seu fogar para recibir coidados sanitarios e diarios na súa vida”.

APROBADA A CONTA XERAL DE 2021

Por outra banda, a Comisión para as relacións co Consello de Contas tamén aprobou esta mañá por unanimidade a Conta Xeral da Xunta correspondente a 2021, recoñecendo que Galicia cumpriu un ano máis cos obxectivos de déficit e de débeda pública recollidos no seu orzamento, “constatando que somos unha comunidade cumpridora e responsable no manexo dos fondos públicos”, subliñou Cristina Sanz.

A viceportavoz popular destacou, ademais, que a Conta Xeral amosa que a Xunta acadou unha execución do orzamento por enriba do 95 por cento, unha porcentaxe que chega ao 105 por cento no caso da gasto corrente. Todo iso, cun período medio de pago a provedores de 15 días, fronte aos 25 días de media das comunidades autónomas.

O Parlamento de Galicia aprobou hoxe a proposición non de lei do Grupo Popular a través da que se demanda ao Ministerio de Facenda unha maior flexibilidade fiscal no IRPF e no imposto de Sociedades que permita unha mellora da xestión forestal. De xeito paralelo, pídese ao Ministerio de Economía o desenvolvemento dun plan sectorial contable para o sector forestal que permita axustar o resultado contable da actividade forestal ao real, de xeito que se tribute de forma máis xusta e de acordo coa capacidade de renda xerada, tal como establece a Constitución Española.

A deputada popular Cristina Campero manifestou que “ter unha fiscalidade que permita valorizar os investimentos e o aproveitamento do monte galego significa apostar pola produtividade territorial, que redunda nunha maior prevención contra os incendios, así como apostar pola remuda xeracional no campo”.

Cristina Campero explicou que “en España, con excepción do País Vasco e Navarra, a fiscalidade do sector forestal réxese por unha normativa común do Estado, sen que exista unha normativa sectorial e diferenciada que regule a propiedade e a actividade forestal, a pesar das súas especificidades e tendo en conta os seus ciclos de produción”.

MEDIDAS RECOLLIDAS NO PLAN FORESTAL

Neste sentido, afirmou que “a Xunta apoia a demanda do sector forestal galego diante do Goberno central a prol da mellora da fiscalidade para este eido produtivo clave do rural galego en impostos que son competencia exclusiva do Estado, como poden ser o IRPF, o de Sociedades ou o IVE”.

Campero indicou que “no Plan Forestal de Galicia reflíctense as medidas en materia de fiscalidade forestal que se propoñen para reverter a tendencia ao abandono da actividade forestal, maiormente no caso dos propietarios particulares”.

Unha das medidas fiscais propostas é aplicar ao sector forestal un criterio diferenciado no IRPF, polo que, no caso de que un propietario exercera unha actividade profesional no réxime de estimación directa, cando a actividade sexa diferente coa forestal e non exista risco de trasvancamento de facturas dun réxime a outro, se puidera optar por un dobre réxime: un en estimación directa, nos cales están os servicios profesionais non vinculados á actividade forestal; e outro en estimación obxectiva, a propia actividade forestal.

“Esta medida, contra a que a Axencia Tributaria se mantén inflexible, podería ser parcialmente acadada no caso de desenvolver un Plan sectorial de contabilidade para o sector forestal”, sinalou a deputada popular, quen apuntou que este plan “deberá ter en conta as especiais características da actividade, sobre todo en relación coas prolongadas quendas de corta da actividade forestal.

O Grupo Popular vén de solicitar a constitución, no menor prazo de tempo posible, da Comisión de estudo sobre a reforma do financiación autonómico, co obxectivo de elaborar o ditame definitivo logo das comparecencias e a documentación aportada durante a pasada lexislatura, coa posibilidade de incorporar, se procede novos informes actualizados. O portavoz popular, Alberto Pazos, explicou que este documento “servirá de apoio ao Goberno galego nas súas demandas nas necesarias negociacións multilaterais que se deberán realizar para elaborar e acordar o novo financiamento autonómico, ben a través da convocatoria dunha Conferencia de Presidentes ou dun Consello de Política Fiscal e Financeira, coa presencia de representantes de todas as comunidades autónomas”.

Alberto Pazos manifestou que “vivimos un momento preocupante respecto do financiamento das comunidades autónomas, no que nos atopamos cun Goberno de España totalmente débil e a mercé do independentismo catalán, conseguindo inaceptables compensacións polo seu apoio para manter a Pedro Sánchez na Moncloa e nomear a Salvador Illa como Presidente da Generalitat”. “Primeiro foi a condonación da débeda a Cataluña e agora o cupo catalán, co que iso suporá de merma no financiamento para as demais comunidades autónomas”, dixo.

Diante desta situación, Alberto Pazos considerou que “o Parlamento de Galicia non debe quedarse quieto nin calado, como pretenden tanto o BNG, para non molestar aos seus aliados independentistas cataláns; como os socialistas galegos, para non estorbar nin entorpecer a continuidade de Pedro Sánchez na Moncloa, e urxe elaborar un documento no que se recolla as conclusións desta comisión de estudo”.

Neste sentido, lembrou que entre as conclusións aportadas polos expertos “quedou claro o rexeitamento ao cupo para todas as comunidades autónomas ou a cesión significativa de máis porcentaxe do imposto sobre a renda, medidas que porían en risco a capacidade de redistribución do Estado e serían especialmente prexudiciais para Galicia polas súas maiores necesidades de gasto dada a dispersión e o maior envellecemento da súa poboación”.

FALSIDADES

Respecto da actividade parlamentaria celebrada esta semana, Alberto Pazos indicou que no Pleno “volveu quedar patente que temos unha oposición sen ideas e incompetente para presentar un proxecto alternativo ao que está a desenvolver en Galicia o Goberno de Alfonso Rueda, á que o único que se lle ocorre para ganar un titular é crear unha Comisión de Investigación coa que intentar tapar os numerosos casos de corrupción que salpican directamente a Pedro Sánchez, ao seu entorno, e a varios membros do seu goberno”.

“Pero esta Comisión de Investigación xa comeza totalmente devalada, porque neste Pleno xa quedaron claras varias cuestións”, lembrou o portavoz popular. En concreto, asegurou que “é totalmente falso que o Consello de Contas fale no seu informe dun sobrecusto na construción do Hospital Público Álvaro Cunqueiro: as únicas referencias á palabra “sobrecusto” son para evidenciar que non se produciu ou para indicar que entraba dentro do risco da empresa adxudicataria e polo tanto a Administración autonómica non o abonou”.

Ademais, o propio Consello de Contas recoñece que o método utilizado para a construción do Álvaro Cunqueiro permitiu levar adiante este novo hospital nun prazo de tempo moito máis corto que o que suporía asumir a obra con cargo aos orzamentos da Xunta, nun momento, de fonda crise económica. “Ao que hai que engadir o informe que encargou o Goberno bipartito de socialistas e nacionalistas a unha coñecida consultora española, que deixaron sen pagar, e no que se avoga pola construción dun hospital en Vigo recorrendo a capital privado, a pesar da época de bonanza que se vivía naquel momento”, engadiu.

Alberto Pazos tamén subliñou que no Pleno “quedou claro que non existe trato de favor algún á empresa Eulen por parte dos gobernos do PPdeG, porque os datos oficiais recollidos no Rexistro e, posteriormente, na Plataforma de contratos da Xunta acreditan que o Goberno galego que máis cartos lle ten dado a esta empresa foi precisamente o Goberno bipartito de socialistas e nacionalistas, e foi o primeiro Goberno de Feijóo o que reduciu máis dun 65 por cento o importe dos contratos adxudicados a esta empresa”.

Por último, respecto dos contratos realizados pola Xunta durante a pandemia, o viceportavoz popular recordou que “xa foron dobremente fiscalizados, sen que se producira ningunha taxa de ilegalidade”.