Mes: noviembre 2024

O portavoz de Lingua do Grupo Popular, José Luís Ferro, instou hoxe aos grupos da oposición a “manter un clima de diálogo, de acordo e de encontro” para consensuar propostas que axuden na promoción e o uso do galego na sociedade actual, “apartando as liortas e traballando en serio con propostas de efecto inmediato e a longo prazo en favor da nosa lingua”.

Ao remate da xuntanza que mantivo co conselleiro de Cultura, José López, e o secretario xeral da Lingua, Valentín García, na que tamén estivo acompañado da portavoz popular de Cultura, Carmen Pomar, José Luís Ferro enmarcou o encontro “no camiño que iniciamos hai un mes para sacar adiante un Pacto pola Lingua”.

En concreto, Ferro indicou que “recibimos unha proposta para proceder á renovación integral do Plan Xeral de normalización da lingua do ano 2004, xa que entendemos que hai moitos aspectos que non concordan coa realidade e co contexto histórico e temporal da actualidade”.

O Parlamento de Galicia aprobou hoxe por unanimidade a proposición non de lei do Grupo Popular a través da que insta ao Adif a autorizar o proxecto de conexión do Porto Seco de Monforte coa N-120, deixando de insistir en exixencias que nada teñen que ver co proxecto da conexión do Porto Seco entre as estradas N-120 e LU-933; ao tempo que se pide á Confederación Hidrográfica do Miño-Sil e á Demarcación de Estradas do Estado que respecte o consenso acadado sobre o proxecto construtivo do novo acceso ao Porto Seco e autoricen esta actuación tan importante para a cidade de Monforte de Lemos e da súa contorna.

A deputada popular Katy Varela lembrou que o Porto Seco de Monforte “foi deseñado no seu momento coa colaboración das administracións autonómica, estatal e local, e naceu como motor de desenvolvemento económico da comarca de Lemos e do interior de Lugo, pero máis de dez anos despois hoxe permanece atrapado nunha rede de obstáculos inaceptables”.

En concreto, Katy Varela referiuse á conexión do Porto Seco coas estradas LU-933 e N-120, cuxa obra atópase bloqueada “ante a falta de compromiso do Goberno central, que non colabora no desenvolvemento desta infraestrutura e, por enriba, obstaculiza as autorizacións necesarias para avanzar coa súa execución”.

Esta nova conexión entre as estradas N-120 e LU-933 permitirá absorber o tráfico xerado pola área loxística e de intercambio de mercadorías do Porto Seco, constituíndose ademais na súa principal vía de unión coa Meseta e o sur de Galicia, ao tempo que evitará o paso de vehículos, sobre todo de tráfico pesado, polo núcleo urbano de Monforte.

“A realidade é que as decisións erráticas, os atrasos e os cambios de criterio por parte do Goberno central converteron este proxecto nun labirinto burocrático”, lamentou a deputada popular. Neste sentido, explicou que a solución inicial aprobada pola Xunta resultou incompatible coa seleccionada polo Ministerio de Fomento para a autovía A-76, unha situación que obrigou a comezar de novo, a redactar un novo trazado e a revisar o impacto ambiental.

Así mesmo, o Adif puxo como condición eliminar un paso a nivel alleo ao proxecto inicial, mentres que a Confederación Hidrográfica do Miño-Sil, con peticións interminables desde 2019, forzou o redeseño dunhas obras que xa contaban co seu visto bo.

Katy Varela criticou que “todo apunta a que o goberno de coalición de esquerdas, encabezado por Pedro Sánchez e apoiado polo BNG, coa complicidade do presidente da Deputación de Lugo e alcalde de Monforte, non ten interese algún en que este proxecto se faga realidade”. “Monforte e Galicia merecen un trato digno e un compromiso firme co desenvolvemento e o benestar da súa xente, polo que cómpre abandonar esta estratexia de sabotaxe e avanzar nun proxecto que é esencial para o futuro desta terra”, incidiu.

A deputada popular subliñou “a vontade absoluta da Xunta en avanzar na conexión reservando, ano tras ano, unha partida nos seus orzamentos”. En concreto, dixo que a Administración galega leva investidos no Porto Seco preto de 20 millóns de euros para os traballos técnicos, a adquisición de terreos, a súa urbanización e a construción dos accesos coa estrada LU-933.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita o impulso á formación das forzas e corpos de seguridade en materia de espectáculos e de seguridade en grandes eventos a través da Academia Galega de Seguridade Pública.

A deputada popular Felisa Rodríguez afirmou que “garantir a seguridade durante a celebración de grandes eventos debe ser a máxima que guíe a actuación das administracións públicas” e apuntou que “cumprir esa máxima leva necesariamente aparellado optimizar a coordinación entre administracións e entre os distintos equipos participantes, como Policía Local, Policía Nacional, bombeiros, protección civil e persoal de urxencias do 061”.

“Pero tamén é imprescindible que todos os profesionais que participen neste tipo de dispositivos especiais conten coa formación necesaria e coas ferramentas axeitadas para desenvolver o seu traballo coas máximas garantías”, sinalou a deputada popular.

Neste sentido, explicou que “os membros das forzas de seguridade precisan dunha formación continua para desenvolver o seu labor, para o que en Galicia contamos coa Academia Galega de Seguridade Pública, fundada en 1992 e coa súa sede no concello de A Estrada”.

O portavoz do Grupo Popular na Comisión de Investigación sobre a contratación pública da Administración autonómica, Roberto Rodríguez, asegurou, logo da comparecencia esta mañá do conselleiro maior do Consello de Contas, que “non hai caso” ao incidir, do mesmo xeito que se recolle no propio informe da entidade, que a alternativa da licitación separada da obra e dos servizos do Hospital Público Álvaro Cunqueiro “era imposible e esixiría a renuncia da Administración á execución de gasto corrente ou doutros investimentos para cumprir co obxectivo de déficit para os efectos de estabilidade orzamentaria”.

Roberto Rodríguez felicitouse porque a oposición “recoñeza xa publicamente que non houbo sobrecusto na construción do Hospital Público Álvaro Cunqueiro”, unha cuestión sobre a que tamén se pronunciou o propio conselleiro maior e confirmou que “as únicas referencias do Consello de Contas ao sobrecusto son para evidenciar que non se produciu ou para indicar que entraba no risco da adxudicataria”.

ALTERNATIVA SÓ NUN ESCENARIO ÓPTIMO

“Comparecentes como o señor Menéndez, a señora Mosquera ou a señora Currás xa afirmaron categoricamente nesta Comisión que esa alternativa da licitación separada, da obra por un lado e dos servizos por outro, non era posible, pois calquera modelo de financiamento que supuxera que o investimento computara como débeda da Comunidade galega, a efectos de estabilidade financeira, era imposible por dúas razóns: porque non tería sido autorizada polo Goberno do Estado e porque, no caso de selo, as condicións de financiamento serían inalcanzables ou inasubmibles á vista da liquidación negativa de 2.500 millóns de euros herdada do Goberno bipartito e polas condicións do mercado existentes nos anos 2010 e 2011”, indicou. Neste sentido, o conselleiro maior concretou que este modelo de construción por separado só podería ser unha alternativa “nun escenario óptimo, que non era o caso”.

Respecto da superficie construída do Hospital Público Álvaro Cunqueiro, Roberto Rodríguez asegurou que “non hai tal redución pese á modificación do plan funcional” e explicou que o informe do Consello de Contas unicamente ten en conta a superficie útil hospitalaria, sen ter en conta os 22.600 metros cadrados da quinta planta que alberga todas as instalacións do edificio que de estar distribuídas polo edificio como estaban no proxecto básico, terían sido computadas”.

CONTRATACIÓNS DE EMERXENCIA AUDITADAS

Sobre as contratacións de emerxencia realizadas pola Xunta durante a pandemia, o portavoz popular lembrou que estas actuacións “foron auditadas polo Consello de Contas e tamén fiscalizada polo Goberno de España”. Ademais, confirmou que todos os expedientes tramitados de emerxencia polo SERGAS tiveron a necesaria xustificación do carácter de emerxencia, sen formular reparos de legalidade e incluso poñendo de manifesto que a mecánica seguida era plenamente xustificable debido á situación de anormalidade á que había que facer fronte”.

Por último, Roberto Rodríguez salientou que o conselleiro maior asegurou que, “de ter constatado o Consello de Contas calquera indicio que implicara a existencia de responsabilidades contables, que puidera constituír ilícitos penais ou que supuxera responsabilidades de calquera outra natureza, terían posto estes feitos en coñecemento da Fiscalía do Tribunal de Contas ou da Fiscalía de Galicia, con quen ten asinados convenios de colaboración e intercambio de información”.

O Parlamento de Galicia aprobou hoxe a proposición non de lei do Grupo Popular, que non contou co apoio do BNG e do PSdeG, a través da que se demanda ao Goberno de España que manteña a presenza da Garda Civil en todos os cuarteis de Galicia, mesmo estudando a posibilidade de reapertura daqueles clausurados nos últimos anos, e dote de máis medios persoais e materiais que garantan a atención presencial as 24 horas do día.

A través desta iniciativa parlamentaria tamén se pide executar un plan integral destinado á construción, renovación, mellora e ampliación dos acuartelamentos da Garda Civil no medio rural galego; crear os instrumentos e protocolos, negociados cos concellos, para que de forma práctica e efectiva se incremente a cooperación da Garda Civil coa Policía Local; reforzar de maneira urxente, con medios materiais e humanos, os postos da Garda Civil en todas aquelas zonas que carecen de Policía Local; e ocupar a totalidade das prazas que aparecen definidas no catálogo de postos de traballo das distintas provincias galegas e que están vacantes na actualidade, elaborando incentivos profesionais e económicos para que os axentes queiran ocupar os postos de baixa demanda no medio rural.

A viceportavoz popular, Paula Prado, lamentou que “nos atopamos nun contexto no que, segundo os últimos datos do Ministerio do Interior, en Galicia incrementáronse as agresións sexuais con penetración, os roubos con intimidación e os roubos con forza en domicilios, establecementos e outras instalacións”.

GARANTIR UNHA PRESENZA PERMANENTE

Diante desta situación, “o lóxico sería que o Goberno central garantise unha presencia permanente dos efectivos das forzas de seguridade as 24 horas do día, os 365 días do ano e en todo o territorio: desde as grandes cidades ata os concellos máis pequenos”, manifestou. Porén, criticou que “a situación é máis ben a contraria: nin hai efectivos suficientes, nin hai unha atención permanente, nin se garante a seguridade por igual en todo o territorio”.

No caso concreto da Garda Civil, Paula Prado explicou que “é responsable da seguridade cidadá de 300 dos 313 concellos de Galicia, é dicir, son responsables de máis dun 95 por cento da poboación, para o que deberíamos contar con máis de 5.000 efectivos, pero na realidade contamos con pouco máis de 4.000 efectivos”.

“Para facer fronte a esta situación hai dúas posibilidades: ou se aumentan os efectivos para poder dar máis servizos ou se recortan servizos para poder prestalos con menos efectivos”, indicou a portavoz popular, quen criticou que “os Goberno de Pedro Sánchez se decidiu pola segunda vía: recortes pechando os postos auxiliares en sete concellos galegos, como Somozas, Cariño, Touro, A Pobra, O Incio, Sober e Baltar; e recortes reducindo os horarios de atención presencial nos cuarteis, coa nova moda de abrir só de 9 a 14 horas”.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno central que impulse os cambios lexislativos necesarios para recoñecer ás confrarías de pescadores como organizacións de produtores pesqueiros (OPP) e, deste xeito, acabar coas diferenzas entre elas no acceso a fondos públicos. Así mesmo, pídese que defenda diante das institucións europeas o papel das confrarías de pescadores para que sexan recoñecidas polo seu papel imprescindible na Política Pesqueira Común (PPC) e na Organización Común de Mercados (OCM).

A deputada popular Dolores Hermelo salientou que “as confrarías existen e vertebran toda a costa española, aunando a maioría do tecido social e económico de moitos pobos pesqueiros”. En concreto, sinalou que existen arredor de 200 confrarías ao longo da costa española con máis de 30.000 asociados.

DESCOÑECEMENTO DAS CONFRARÍAS

Porén, lamentou que “Europa non sabe como é a nosa frota e, por suposto, descoñece frontalmente as confrarías, sendo estas as organizacións máis representativas do asociacionismo no noso sector pesqueiro”. “Pese a existir antes que a política pesqueira común e da organización común de mercados, as nosas confrarías son inexistentes para Europa, que aposta claramente polas organizacións de produtores pesqueiros”, apuntou.

Dolores Hermelo indicou que “este feito fai que as nosas confrarías non podan estar ao mesmo nivel que estas organizacións de produtores pesqueiros dentro dos obxectivos da política pesqueira común, a pesar de que no sentido práctico compren os mesmos obxectivos”.

Así mesmo, a deputada popular considerou “sorprendente que o Goberno de Pedro Sánchez se esquecera no Real-Decreto 664/2023, que regula as actividades do asociacionismo do sector pesqueiro, das confrarías de pescadores”, polo que demandou que “debe solucionar este problema modificando a súa lexislación e pedindo a Europa que asimilen as confrarías como organizacións de produtores pesqueiros, de xeito que poidan acceder aos fondos públicos para estas organizacións”.

O Parlamento de Galicia aprobou hoxe a proposición non de lei do Grupo Popular a través da que se demanda ao Goberno central que teña en conta as alegacións presentadas ante as resolucións da Secretaría Xeral de Pesca sobre os recortes para as pesquerías do abadexo e da raia.

O portavoz popular do Mar, Miguel Fidalgo, lembrou que “as propias confrarías tacharon de burla ao sector a postura do Ministerio sobre as capturas de abadexo e raia, froito das nefastas negociacións do Goberno de España no Consello de Ministros de Pesca da Unión Europea, nas que sempre priman as políticas ambientais sobre a subsistencia das comunidades pesqueiras”.

Neste sentido, sinalou que “se tiveran en conta a nosa proposta a frota galega non estaría nos apuros nos que se atopa a conta da exigua cota que se fixou para o abadexo este ano e o que ven en augas ibéricas: 70 toneladas, que se quedaron en 55,6 ao descontar as 14 toneladas que se pescaron de máis en 2023”.

Fidalgo lembrou que “desde o Partido Popular consideramos que o abadexo non debería estar sometido ao réxime de totais admisibles de captura e cotas, como tampouco o linguado, a maruca, o merlán ou a solla”.

COTA DA RAIA

Respecto da pesquería da raia, o portavoz popular explicou que as alegacións parten da cota inicial de 1.724 toneladas para as zonas 8 e 9 da augas da Unión Europea, 17 toneladas máis que na campaña pasada, pero cunha reserva do 2 por cento para evitar posibles rebasamentos ou para utilizala en intercambios con outros estados membros.

“Consideramos que reservar un 2 por cento nunha especie que xa ten unha cota inicial moi limitada, uns topes de captura reducidos e incluso unha cota de captura en modo accesorio para a raia mosaico non resulta axeitado nin proporcional, especialmente se a pretensión é utilizala para intercambios”, indicou Miguel Fidalgo.

O Grupo Popular levará ao Pleno do Parlamento galego da vindeira semana as solicitudes ao Goberno central para que convoque, de xeito urxente e inmediato, a mesa de seguimento do pacto de viabilidade da factoría de Alcoa en San Cibrao, así como que transfira a Galicia a competencia dos servizos de meteoroloxía e estudos oceanográficos.

Ao remate da Xunta de Portavoces, o portavoz popular, Alberto Pazos, informou que a sesión plenaria dará comezo coas comparecencias, a petición propia, das conselleiras de Medio Ambiente e Cambio Climático, expoñer os proxectos e programas a desenvolver desde o seu departamento a curto, medio e longo prazo; e do Medio Rural, para dar conta dos resultados do Plan de prevención e defensa contra os incendios forestais de Galicia, unha vez rematada a tempada de alto risco de lumes de 2024.

Dentro do apartado de proposicións non de lei, o Grupo Popular demandará diversas actuacións do Goberno central para garantir a continuidade da factoría de Alcoa na Mariña lucense. En concreto, solicitará a convocatoria inmediata da mesa de seguimento do pacto de viabilidade desta empresa, coa participación ao máis alto nivel dos titulares dos ministerios de Industria e Turismo e de Transición Ecolóxica e Reto Demográfico; unha consignación de 74 millóns de euros correspondentes ao mecanismo de compensación de custes de emisións indirectas de CO2, que non percibiu esta empresa entre os anos 2018 e 2021; a autorización dos parques eólicos de competencia estatal vencellados a contratos a longo prazo para a produción de enerxía a prezos competitivos que prevén subministrar á factoría mariñá; e a articulación dunha liña de axudas públicas e apoios extraordinarios que garantan o investimento para a modernización da planta, no mesmo sentido que as que recibiron outras empresas tamén declaradas estratéxicas polo Estado.

INCAPACIDADE DO GOBERNO CENTRAL

Alberto Pazos lamentou que “o Goberno de Pedro Sánchez está a demostrar a súa incapacidade para poñer enriba da mesa un marco enerxético estable e competitivo que garanta o futuro de Alcoa na Mariña lucense, ao que se engadiu recentemente que esta factoría non poderá optar nesta anualidade a recibir ás axudas do mecanismo de compensación de custes de emisións indirectas de CO2, nin beneficiarse dos recursos procedentes dos fondos europeos vinculados ao Perte para a descarbonización”.

Pola contra, salientou “o compromiso da Xunta con esta empresa” e mostra disto lembrou a reunión mantida polo Presidente da Xunta co Comité de Empresa, na que lle trasladou a absoluta disposición a acudir a unha reunión en Madrid ao máis alto nivel con representantes do Goberno central. “Este compromiso do Goberno galego tamén se pon de manifesto no cumprimento dos seus deberes tanto coa tramitación dos parques eólicos dependentes da Administración galega como da ampliación da balsa de lodos vermellos”.

INFORMACIÓN PRECISA SOBRE METEOROLOXÍA

A segunda das proposicións non de lei do Grupo Popular ten como obxectivo solicitar ao Goberno do Estado a transferencia da competencia dos servizos de meteoroloxía e estudos oceanográficos, iniciando os trámites para establecer un marco normativo propio. Alberto Pazos sinalou que “os últimos acontecemos ocorridos en Valencia e outras comunidades autónomas por fenómenos meteorolóxicos adversos, así como os acaecidos en Galicia na última alerta activada, poñen de manifesto a importancia de ter información precisa sobre os cambios meteorolóxicos, así como a potestade de poder activar alarmas, baseándose na proximidade dos servizos e a precisión aportada pola experiencia”.

Neste sentido, o portavoz popular explicou que o artigo 149.1.20 da Constitución Española establece como competencia exclusiva do Estado o servizo meteorolóxico, circunstancia que non debería ser inconveniente para que Galicia reciba a súa transferencia, xa que existe unha previsión no Estatuto de Autonomía de Galicia no artigo 27 núm. 32 que fai referencia “as restantes materias que con este carácter e mediante lei orgánica sexan transferidos polo Estado”.

“Consideramos que se o Goberno central ten verdadeira intención para traspasar a Galicia esta competencia existe un marco legal para poder facelo, aínda que, despois da experiencia que estamos a sufrir co traspaso das competencias e dos medios humanos e materiais para que Galicia asuma as súas competencias sobre o seu litoral, non somos moi optimistas para que, finalmente, as competencias en materia de meteoroloxía recaian na Administración galega”, manifestou.

Por último, o Grupo Popular cuestionará ao Goberno galego sobre as repercusións que terá na sanidade galega a posible transferencia de usuarios de MUFACE ao sistema sanitario público; as novidades que a Xunta introduciu no Plan Especial de Protección Civil ante o risco de inundacións de Galicia como consecuencia da recente actualización levada a cabo; e sobre o incumprimento dos compromisos do Goberno de Pedro Sánchez respecto de aplicar de forma inmediata os descontos comprometidos nas autoestradas estatais en Galicia, logo de que nas últimas semanas se publicaron diversas informacións sobre subas nas peaxes para 2025.