Mes: mayo 2025

A portavoz de Educación do Grupo Popular, Cecilia Vázquez, destacou hoxe, tras unha xuntanza coa ANPA O Carregal do IES Francisco Aguiar de Betanzos, que a Xunta de Galicia segue avanzando na súa aposta pola igualdade de oportunidades no sistema educativo, incorporando esta semana dúas novas medidas: unha desgravación fiscal de ata 105 euros para libros de texto e material escolar, e a posibilidade de formalizar a matrícula educativa mediante o teléfono móbil.

Segundo explicou Vázquez, estas iniciativas complétanse co esforzo da Xunta por garantir a gratuidade educativa desde a escola infantil ata a universidade, ademais das axudas xa vixentes para a adquisición de material didáctico.

 DESGRAVACIÓN DO 15% PARA MÁIS FAMILIAS

A nova desgravación permitirá ás familias con rendas per cápita entre 10.000 e 30.000 euros deducir ata un 15 % do gasto en libros e material escolar, cun máximo de 105 euros. A medida, dirixida a alumnado de educación primaria e secundaria obrigatoria, estenderá o apoio económico a fogares que ata o de agora non tiñan acceso ás axudas existentes.

A portavoz popular fixo fincapé na importancia de que as familias conserven as facturas das compras realizadas entre o 1 de xullo e o 31 de decembro de 2025, para poder incluílas na declaración da renda do ano seguinte.

MATRÍCULA MÁIS ÁXIL E DIXITAL

Por outra parte, Cecilia Vázquez puxo en valor a nova funcionalidade da plataforma AdmisionAlumnado, que permitirá formalizar a matrícula escolar directamente desde o móbil, mediante certificado dixital ou Chave 365. A medida simplificará o proceso tanto para as familias como para os centros educativos, reducindo a carga administrativa.

As familias só terán que acceder á plataforma, premer na icona de matrícula e revisar ou modificar os datos precargados antes de completar o trámite en liña, incluídas as materias optativas.

“Con estas novas medidas, a Xunta continúa fortalecendo un modelo educativo máis equitativo, moderno e adaptado ás necesidades das familias galegas”, concluíu Vázquez.

Os deputados do Grupo Popular Julio García Comesaña, Felisa Rodríguez e Manuel Santos esixiron hoxe aos responsables municipais do Concello de Mondariz-Balneario que “se poñan a traballar e procedan urxentemente a incoar o procedemento para a declaración da fonte de Troncoso como ben de interese cultural, xa que é o camiño máis rápido e seguro para poder acceder ás axudas con cargo ao programa 2% cultural destinados á restauración desta emblemática obra do arquitecto Antonio Palacios”.

Acompañados da portavoz do PP en Mondariz, Marisa Domínguez, Julio García, Felisa Rodríguez e Manuel Santos explicaron que “un dos requisitos principais para poder optar a estas axudas estatais é que esta fonte estea declarada como ben de interese cultural ou, cando menos, teña iniciado o expediente para a súa declaración”.

INICIATIVA NO PARLAMENTO DE GALICIA

“Por este motivo, é fundamental e urxente que desde o Concello de Mondariz-Balneario se poñan a traballar para iniciar a tramitación desta declaración, para o que contarán coa total disposición da Xunta tanto no proceso de tramitación da solicitude como na elaboración da documentación necesaria para a incoación do expediente”, sinalaron.

Os deputados populares lembraron que “o pasado 23 de maio xa rexistramos no Parlamento de Galicia unha iniciativa parlamentaria a través da que pedimos ao Concello de Mondariz-Balneario que leve a cabo os trámites necesarios para solicitar formalmente a incoación do expediente da Fonte de Troncoso como BIC, o que suporía un paso determinante para garantir a conservación e posta en valor desta obra representativa do arquitecto Antonio Palacios”.

Julio García, Felisa Rodríguez e Manuel Santos garantiron que o Concello tamén “contará colaboración e apoio da Xunta na posterior solicitude de axudas ao Goberno central con cargo ao programa 2% cultural, co obxectivo de recuperar un ben patrimonial símbolo da tradición termal e do patrimonio histórico deste municipio”.

Os deputados do Grupo Popular Miguel Ángel Viso, Cristina Campero e Víctor Baladrón defenderán no Parlamento de Galicia unha proposición non de lei a través da que se esixe ao Goberno de España e a Renfe que manteñan os servizos e horarios actuais na estación ferroviaria de A Gudiña-Porta de Galicia, solicitando que calquera cambio futuro no servizo se realice atendendo os criterios de equilibrio territorial e garantindo as frecuencias que permitan a mobilidade funcional dos usuarios do interior de Galicia.

Os deputados populares, que mantiveron un encontro con portavoz do PP en A Gudiña, José María Lago, e representantes municipais deste e doutros concellos da comarca, criticaron que a reorganización da oferta ferroviaria no corredor de Alta Velocidade Galicia-Madrid, prevista polo Ministerio de Transportes para a súa entrada en vigor o vindeiro 9 de xuño, “supón un claro prexuízo para os usuarios da estación de A Gudiña-Porta de Galicia, xa que se van reducir considerablemente o número de servizos dispoñibles”.

TRES SERVIZOS MENOS CADA DÍA

En concreto, lembraron que no traxecto A Gudiña–Madrid suprimirase o tren matinal das 8:28 e das 9:14 horas, que permitía chegar á capital antes das 10:34 horas, “co que resultará imposible chegar a Madrid antes das 14:08 horas, facendo imposible realizar xestións ou trámites durante a xornada de mañá”. Así mesmo, no traxecto Madrid-A Gudiña tamén se suprimirá o último servizo das 19:17 horas, quedando como último do día o das 18:06 horas.

“É intolerable que o Goberno de Pedro Sánchez, coa escusa de reducir os tempos da viaxe entre as grandes cidades, elimine servizos esenciais no interior de Galicia, limitando gravemente a mobilidade dos habitantes das comarcas de Monterrei, Viana ou Valdeorras”, sinalaron os deputados populares, quen tamén apuntaron que esta decisión “suporá un prexuízo considerable para os milleiros de peregrinos da Vía da Prata e do norte de Portugal que utilizaban esta estación como o seu principal punto de acceso á rede de alta velocidade”.

Ademais, subliñaron que esta reorganización dos servizos dificultará os desprazamentos de ida e volta no mesmo día, restando funcionalidade e utilidade a unha infraestrutura que mobilizou máis de 107.000 viaxeiros desde a súa apertura en decembro de 2021.

Os deputados do Grupo Popular Cristina Sanz e Enrique Barreiro salientaron hoxe, logo dunha xuntanza celebrada coa ANPA do Colexio Doutor López Suárez de Friol, que a Xunta “deu esta semana dous pasos máis na súa estratexia pola equidade e a xeración de igualdade de oportunidades no sistema educativo galego”. En concreto, referíronse á nova desgravación fiscal de ata 105 euros á que cada familia con fillos en idade escolar poderá acollerse pola compra de libros de texto e material escolar, así como a posibilidade de realizar a matrícula escolar para o vindeiro curso nos colexios e institutos a través do teléfono móbil.

Cristina Sanz e Enrique Barreiro explicaron que “o Goberno galego continúa cumprindo o seu obxectivo de apoiar ás familias con fillos en idade escolar, logo de implantar a gratuidade desde a escola infantil ata rematar os estudos universitarios ou as axudas que xa existían para a merca de libros de texto ou material escolar”.

ATA UN 15% DO GASTO REALIZADO

No caso da nova desgravación de ata 105 euros para a adquisición de libros de texto e material escolar, os deputados populares concretaron que “vai dirixida ás familias con rendas per cápita superiores aos 10.000 euros e ata os 30.000 euros, con fillos matriculados en educación primaria ou educación secundaria obrigatoria”. “Deste xeito, abrimos o abano de familias beneficiarias de axudas para manuais ou material, xa que ata agora só se recibían axudas as familias con rendas anuais per cápita inferiores aos 10.000 euros”.

A través destas novas axudas, cada familia poderá desgravarse ata un 15 por cento do gasto realizado en libros de texto e material escolar, “cantidade que se determinará en función do importe das facturas correspondentes ás compras realizadas para este fin entre o 1 de xullo e o 31 de decembro deste ano 2025, polo que é importante que cada familia conserve os xustificantes da compra para incorporar a súa contía na declaración da renda que se presentará o vindeiro ano”, indicaron.

BENEFICIO PARA FAMILIAS E CENTROS ESCOLARES

Por outra banda, sobre a posibilidade que o Goberno galego abre para realizar a matrícula nos colexios e institutos a través do teléfono móbil, os deputados populares sinalaron que esta medida “non só beneficia ás familias, senón tamén aos procesos administrativos dentro dos centros escolares, xa que permitirá reducir a súa carga de traballo e facilitar a xestión interna”.

Cristina Sanz e Enrique Barreiro aseguraron que “o proceso é moi sinxelo: as familias poderán realizar a matrícula dos seus fillos accedendo á plataforma AdmisionAlumnado, onde se autentificarán con certificado dixital ou Chave 365”. A partir de aquí, deberán premer na icona de matrícula, onde xa aparecerán precargados os datos persoais dos pais e dos alumnos e desde onde poderán facer as modificacións que consideren oportunas tanto de identificación como de optativas do curso, antes de realizar a matrícula en liña.

O Parlamento de Galicia aprobou hoxe a proposición non de lei do Grupo Popular, sen o apoio dos deputados do PSdeG, a través da que se solicita ao Goberno de España que, namentres non se chegue a un acordo cos colexios profesionais veterinarios, as asociacións protectoras animais e as administracións públicas autonómicas, se adopte unha moratoria na aplicación do Real Decreto 666/23 que regula a distribución, prescrición, dispensación e uso de medicamentos veterinarios.

O deputado popular Juan Casares cualificou de “paragóxico e contraditorio que o Goberno de Pedro Sánchez non fixera unha consulta co servizo veterinario antes de aprobar unha normativa que non só lles atinxe de xeito directo, senón que ten efectos perversos sobre a protección animal”. “Estamos ante unha situación que podemos cualificar tanto de maltrato animal, porque pon en risco a vida de mascotas, como de un menosprezo absoluto á profesión veterinaria, fundamental para a saúde tanto animal como humana”, apuntou.

INCREMENTO DE CUSTOS E BUROCRACIA

A través desta nova normativa, “o veterinario sofre un incremento esaxerado de custos, ao tempo que se xeran efectos colaterais que poden derivar no sufrimento innecesario do animal e, incluso, resolverse coa súa morte por falta de acceso aos tratamentos axeitados”, dixo o deputado popular.

Ademais, indicou que o novo decreto “soterra aos veterinarios en burocracia, menospreza a súa experiencia e coñecemento, e limita perigosamente a capacidade de prescrición de antibióticos, podendo derivar na morte de mascotas”. “Ao mesmo tempo, amedrenta aos profesionais pola vía coercitiva, coa ameaza de multas elevadas ante calquera erro burocrático e pon en risco a viabilidade das clínicas”, engadiu.

Juan Casares asegurou que os veterinarios “sempre estiveron, están e estarán comprometidos co uso racional e sostible dos medicamentos, nomeadamente dos antibióticos, e son conscientes da problemática que xera a resistencia derivada do uso abusivo”. Neste sentido, lembrou que España, segundo a Organización Colexial Veterinaria, é o país europeo cunha maior redución do uso de antibióticos na sanidade animal entre os anos 2014 de 2022.

OUTRAS ACTUACIÓNS NECESARIAS

A proposición non de lei aprobada hoxe no Parlamento galego, ademais de pedir unha moratoria na aplicación do Real Decreto 666/23, tamén pide ao Goberno central homoxeneizar o sistema nacional de declaración de antibióticos que chegan ao poder dos titores de mascotas e gandeiros de animais de produción, así como derrogar de xeito inmediato o réxime sancionador relacionado coas notificacións de prescrición de antimicrobianos, previsto na Lei estatal de Sanidade Animal, substituíndo por un novo que respecte e garanta a proporcionalidade das sancións.

Así mesmo, pídese apoio aos veterinarios, a través da modificación do Real Decreto 1/2015, reforzando a figura da cesión de medicamentos con destino ós animais, necesarios para a atención urxente dos mesmos; simplificar os trámites de importación de medicamentos veterinarios, garantindo que as restricións normativas non dificulten o acceso a tratamentos esenciais para os animais; revisar a normativa para equiparar os prezos dos tratamentos de animais ós de uso humano, cando conteñan os mesmos principios activos; actualizar as fichas técnicas e prospectos dos medicamentos veterinarios para que reflictan os seus posibles usos e aplicacións; e promover a redución do 21 por cento do IVE aplicable aos servizos veterinarios, que penaliza tanto a saúde e benestar animal como a saúde pública.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita á Xunta de Galicia o impulso da recuperación das razas autóctonas galegas ameazadas, a través do deseño dunha estratexia común dirixida ao establecemento dun plan de axudas para a recría de femias e machos en favor dos gandeiros e gandeiras titulares das razas bovinas, ovina e cabrúa ameazadas.

O portavoz popular do Medio Rural, Miguel Ángel Viso, salientou que “nos últimos 20 anos e gracias ao apoio continuo da xunta e o compromiso das asociacións de criadores, conseguiuse frear o declive e incluso facer medrar os censos dalgunhas razas nun 1.000 por cento, como foi o caso da raza cachena, que pasou de apenas 82 reprodutoras en 1991 a máis de 1.600 en 2007”.

FREO DA RECUPERACIÓN

“Porén, esta recuperación freouse e, se non actuamos agora, corremos o risco de perder séculos de adaptación natural, de diversidade xenética e de saber facer rural”, alertou o portavoz popular, quen apuntou que “é hora de dar un novo pulo, porque os gandeiros e gandeiras precisan ferramentas, axudas e seguridade para continuar co labor de conservar e multiplicar estas razas”.

Miguel Ángel Viso manifestou que “estas razas non só producen carne, leite e ovos, senón que axudan na limpeza de montes, prevén incendios, aproveitan os terreos máis agrestes e alimentan a nosa gastronomía e o noso turismo”. “Ao mesmo tempo, as nosas razas autóctonas son un exemplo de sustentabilidade nun momento no que Europa aposta pola conservación da biodiversidade e pola loita contra o cambio climático”.

O portavoz do Grupo Popular, Alberto Pazos, criticou hoxe que o Goberno de Pedro Sánchez insista en converter a Conferencia de Presidentes convocada para o vindeiro 6 de xuño “nun paripé, co único obxectivo de tapar o vendaval de casos de corrupción que día tras día están a afectar directamente ao Presidente Sánchez e ás altas esferas do Partido Socialista”. Neste sentido, considerou “imprescindible que o Goberno de España valore seriamente un cambio na organización das Conferencias de Presidentes, dando máis protagonismo ás comunidades autónomas e ás súas propostas, fomentando o debate entre todos os participantes, fuxindo do habitual monólogo de Pedro Sánchez que sofren os presidentes autonómicos en cada reunión e contando, cando menos, cunha mínima documentación sobre os asuntos a tratar, para poder preparar debidamente cada cuestión e poder facer as súas aportacións para chegar a acordos útiles para a poboación”.

Alberto Pazos amosou o apoio do Grupo Popular “á postura adoptada polo Goberno galego, e por todas as comunidades autónomas gobernadas polo Partido Popular, de rexeitar o intento do Goberno de Pedro Sánchez de centrar esta Conferencia de Presidentes nos temas de vivenda e formación profesional e universitaria que lle interesan ao Goberno central e convertela nun monólogo do Presidente Sánchez, quedando as comunidades autónomas como meros espectadores, sen posibilidade algunha de debater e facer aportacións sobre outras cuestións nas que tamén están interesadas”.

“De pouco vale que o Goberno central acepte incorporar algunhas das propostas que se puxeron enriba da mesa por parte das comunidades autónomas, se ao final se priva de calquera debate ou intercambio de opinións sobre as mesmas entre os presidentes autonómicos e do Goberno de España”, sinalou o portavoz popular.

ÉXITO EN FUNCIÓN DOS ACORDOS ACADADOS

Neste sentido, afirmou que “o Goberno de España debería ter presente que o éxito das Conferencias de Presidentes non se mide polo número de reunións que se celebran senón polos acordos e consensos aos que se chegan dentro delas, e o que está demostrando o Goberno de Pedro Sánchez é que está máis polo primeiro, é dicir, por sumar unha Conferencia tras outra, servíndose das comunidades autónomas para soltar o seu sermón político, que por pechar unha orde do día da Conferencia coas cuestións que realmente preocupan á gran maioría das comunidades autónomas”.

O portavoz popular explicou que “non só estamos a falar de abordar o novo sistema de financiamento autonómico, porque existen outras cuestións que preocupan as comunidades autónomas e que deberían figurar na orde do día das conferencias de presidentes como o incremento da okupación de vivendas; o financiamento da educación gratuíta de 0 a 3 anos, tal e como se comprometeu o Presidente Sánchez no seu momento; o déficit existente de infraestruturas críticas, no caso de Galicia as vías de comunicación coa Meseta ou o servizo de transporte ferroviario; a seguridade do modelo enerxético, máxime despois do apagón que vivimos hai un mes; o control de fronteiras e a inmigración por parte do Estado; ou o déficit de profesionais sanitarios, algo sobre o que xa vimos insistindo desde Galicia desde hai tempo pero que o Goberno de Pedro Sánchez non acaba de adoptar as medidas que se lle propoñen”.

FALSOS DEFENSORES DO ECOLOXISMO

Por outra banda, Alberto Pazos criticou a “demagoxia e incongruencia” do BNG respecto do sector eólico, porque “os que agora se presentan como máximos defensores do ecoloxismo, protagonizando moitas das demandas que se están a presentar contra proxectos eólicos que se queren implantar neste momento en Galicia, son os mesmos que se vían beneficiados polo concurso eólico do Goberno bipartito de nacionalistas e socialistas”.

“Basta xa de tanto postureo e tanta hipocrisía, porque non se pode estar a favor do eólico cando auguras que pode supoñer uns importantes beneficios persoais e despois ser o principal opositor ao impulso do sector eólico en Galicia, co único obxectivo de paralizar calquera proxecto que se intente poñer en marcha en Galicia, incluso cando falamos de repotenciar parques, reducindo o número de muíños que afean a nosa paisaxe pero incrementando a súa produción”, apuntou.

O Parlamento de Galicia aprobou hoxe por unanimidade a proposición non de lei do Grupo Popular a través da que se pide ao Goberno central que, de acordo coas comunidades autónomas con lingua propia, adopte as modificacións normativas necesarias para o recoñecemento oficial dos títulos de tradución e interpretación xurada que autorizan as mesmas.

O portavoz popular de Lingua, José Luís Ferro, explicou que a Xunta aprobou no ano 2002 un decreto polo que se regula a habilitación profesional para a tradución e interpretación xurada doutras linguas para o galego e viceversa, unha norma que a Xunta xa está a analizar a súa actualización para a convocatoria de novas prazas de tradutores xurados e ampliar os idiomas traducidos. “Ao abeiro deste decreto, desenvolvéronse convocatorias de probas e tramitáronse solicitudes de habilitación directa, dotando así a Galicia dun cadro de profesionais perfectamente capacitados, que prestan un servizo esencial: garantir que a documentación redactada en galego poida ser válida máis alá das nosas fronteiras e, ao tempo, que os documentos procedentes doutras linguas poidan ser utilizados dentro de Galicia sen mingua da legalidade nin da seguridade xurídica”, apuntou.

SEN CONVOCATORIA DESDE HAI DÉCADAS

Porén, indicou que “o problema é que o Ministerio de Asuntos Exteriores, competente na materia a nivel estatal, non está a convocar probas para linguas cooficiais dende hai décadas, porque esa competencia foi asumida polas comunidades autónomas con lingua propia, o que derivou que o Estado tampouco está a recoñecer oficialmente os títulos outorgados por esas comunidades”. “Esta situación xera unha paradoxa inadmisible: os territorios con lingua propia exercen a súa competencia, forman profesionais, expiden títulos, e logo eses títulos non teñen recoñecemento xeral fóra do seu ámbito autonómico, deixando en situación de incerteza tanto aos profesionais coma aos cidadáns que dependen deses servizos”, dixo.

José Luís Ferro manifestou que “este baleiro normativo provoca, por exemplo, que unha tradución xurada realizada por un profesional habilitado pola Xunta poida non ser aceptada por determinados órganos estatais ou internacionais, aínda que esa tradución cumpra todos os requisitos técnicos e legais e proceda dun sistema público e garantista”.

“A solución pode pasar por reformar o regulamento estatal sobre tradutores e intérpretes xurados, para que inclúa expresamente o recoñecemento dos títulos autonómicos; ou por establecer mecanismos de homologación automática que garantan que os profesionais habilitados por Galicia, Cataluña, Euskadi ou outras comunidades poidan exercer con plena validez en todo o Estado”, indicou o portavoz popular.

Ferro asegurou que “estamos a falar da garantía dun dereito básico recollido no noso Estatuto de Autonomía e na Constitución: o dereito a usar o galego como lingua oficial en pé de igualdade co castelán”, polo que agradeceu o apoio unánime dunha proposta “a favor do galego, da seguridade xurídica e dos profesionais que desempeñan unha función clave para garantir o exercicio real dos dereitos lingüísticos”.

O Parlamento de Galicia aprobou hoxe a proposición non de lei do Grupo Popular, co voto en contra dos deputados do BNG, a través da que se solicita ao Goberno de España que cree, xunto ás comunidades autónomas e ás universidades españolas, un sistema coordinado de matrícula entre as facultades de Medicina, co obxectivo de dar as máximas garantías aos futuros estudantes e simplificar o proceso a nivel nacional.

O viceportavoz popular, Julio García Comesaña, afirmou que esta proposta “busca garantir a igualdade de oportunidades, aliviar a presión e o estrés que soportan cada ano milleiros de estudantes e as súas familias, e facilitar a xestión e planificación dunhas prazas que son estratéxicas para o noso sistema sanitario e universitario”.

“O actual sistema de matrícula obriga aos futuros estudantes de Medicina a solicitar praza en varias facultades á vez, nun auténtico exercicio de incerteza e presión”, sinalou o viceportavoz popular. En concreto, apuntou que esta situación “supón unha sobrecarga administrativa para as universidades, que reciben solicitudes duplicadas ou triplicadas, moitas das cales non se chegan a formalizar; e implica un custo económico para as familias, que despois non recuperan”.

DESIGUALDADES NO ACCESO E COMPETENCIA DESREGULADA

García Comesaña explicou que “a falta de centralización na matrícula das universidades presenta diversos problemas, que van desde desigualdades no acceso, a dificultades na planificación e xestión de prazas ou mesmo a disparidades na calidade da formación”. “Ademais, esta non centralización xera unha competencia desregulada entre as universidades e unha fragmentación da oferta educativa, o que repercute na homoxeneidade da formación e na equidade no acceso á carreira”, dixo.

Para rematar, fixou como desafíos desta situación a existencia de desigualdades no acceso, pola falta dunha plataforma única que xera diferenzas significativas nos criterios de admisión e notas de corte; a dificultade na planificación e a xestión, que provoca desaxustes entre a oferta e a demanda, así como problemas na distribución xeográfica dos profesionais; disparidade na calidade da formación; unha competencia desregulada, que prioriza a captación de estudantes fronte á calidade; e unha fragmentación da oferta educativa, que dificulta a mobilidade e a homoxeneidade formativa.