O Grupo Popular critica que o BNG torpedeara a creación das casas-niño no rural e agora pretenda apropiarse delas

O deputado do Grupo Popular Víctor Baladrón criticou hoxe no Parlamento de Galicia que o BNG “intentara torpedear desde o principio a creación das casas-niño no rural galego e agora, cando ven que é útil e esta iniciativa está ben valorada, pretenden apropiarse del politicamente”.

“As casas-niño son unha ferramenta fundamental para a conciliación no rural, e convertéronse nun exemplo do que representa esa Galicia que funciona: unha Galicia que non se resigna, que aposta pola calidade de vida nos concellos pequenos, que da apoio ás familias e que permite que moitos profesionais desenvolvan un proxecto vital sen ter que marchar”, sinalou o deputado popular.

Víctor Baladrón lembrou que as casas-niño naceron en Galicia en 2016 co obxectivo de ofrecer unha alternativa de conciliación real e próxima ás familias do rural galego, en concellos de menos de 5.000 habitantes onde non é viable abrir unha escola infantil tradicional. “Trátase dun modelo pioneiro en España que a día de hoxe xa supera as 100 casas-niño activas e que da servizo a máis de 500 familias”, destacou.

Así mesmo, afirmou que, segundo se recolle na orde publicada o pasado 20 de xaneiro, a continuidade das casas-niño “está totalmente garantida, como mínimo, ata o 2028, cun investimento total de 10,5 millóns de euros”.

O Grupo Popular asegura que todos os pacientes con síndrome post-covid teñen garantida a atención sanitaria, tanto a través da primaria como da hospitalaria

A portavoz de Sanidade do Grupo Popular, Encarna Amigo, criticou hoxe no Parlamento galego que BNG e PSdeG “utilicen agora a COVID persistente como arma política, distorsionando a realidade e creando alarma onde hai unha resposta organizada e solvente”. Así, asegurou que “todos os pacientes que sofren síndrome post-covid teñen garantida a atención sanitaria que precisan, tanto en atención primaria como nos centros hospitalarios especializados, segundo a sintomatoloxía que presenten”.

Encarna Amigo explicou que as unidades post-covid do Servizo Galego de Saúde atenderon a 26.474 pacientes entre os anos 2021 e 2024 e apuntou que “a demanda foi caendo ano tras ano porque o número de casos activos se reduciu de forma notable”. “Esa evolución permitiu reorganizar os recursos sempre co aval dos equipos profesionais para garantir a continuidade asistencial nos servizos hospitalarios especializados”, indicou.

PROFESIONAIS PILOTANDO A RESPOSTA

“Non se pode insultar a intelixencia dos profesionais sanitarios insinuando que precisan formación, cando son eles os que teñen pilotado a resposta desde o primeiro día da pandemia”, manifestou a portavoz popular, quen destacou que “temos os profesionais mellor formados da historia, que teñen unha oferta formativa a través do ACIS e da propia consellería cando eles consideran necesario”.

Ademais, subliñou que “Galicia lidera a investigación sobre Covid persistente cun proxecto recoñecido e financiado con 150.000 euros no Hospital Lucus Augusti de Lugo, un aval científico que reforza o noso compromiso coa saúde baseada na evidencia”.

A portavoz popular lembrou que “Galicia respondeu con responsabilidade, rigor e eficacia á pandemia da covid-19, sendo unha das comunidades autónomas que rexistrou menos falecemento por esta enfermidade gracias a unha xestión sanitaria solvente, á implicación dos profesionais e ao compromiso da cidadanía”. Neste sentido, afirmou que “lideramos as primeiras campañas de vacinación, acadando as taxas máis altas de inmunización de toda España, e a día de hoxe seguimos a ser das comunidades con maior aval vacinal ano tras ano”.

A vivenda, unha prioridade

Nicole Grueira.

A vivenda converteuse nun dos principais temas da axenda social e política actual. É un problema que afecta a toda a sociedade, pero que golpea con especial forza á mocidade que busca emanciparse.

Para moitos mozas e mozos galegos, atopar unha vivenda é unha tarefa complexa. Non é fácil encontrala a un prezo que nos poidamos permitir e por iso é fundamental tanto incrementar a oferta, para que baixen eses custes, como apostar pola vivenda pública.

Pero teño claro que os problemas, por complexos que sexan, non se solucionan con pancartas nin con ruído, senón con traballo, diálogo e políticas comprometidas.

Por iso cómpre lanzar unha mensaxe clara: a mocidade galega non está soa. O Goberno da Xunta é consciente da situación e está a actuar con decisión, poñendo en marcha medidas eficaces para darlle resposta a esta necesidade urxente.

Se es menor de 36 anos, xa coñeces algunhas das iniciativas pensadas para ti: axudas de ata 20.000 euros para mercar a túa primeira vivenda, a creación e ampliación do parque público de vivendas —reservando unha parte para a xente nova—, os aloxamentos compartidos ou o Bono Emancípate, que achega ata 3.000 euros para cubrir os primeiros gastos ao independizarse.

Ademais, o Goberno galego tamén facilita o acceso ao crédito, cubrindo o 20% do aval necesario para a hipoteca e aplicando bonificacións fiscais específicas. Todas estas accións, lonxe de ser promesas baleiras, están a materializarse co obxectivo de facer realidade un dereito fundamental: o dereito a un fogar digno. Mentres, o Goberno de Sánchez segue aplicando unhas políticas e unha Lei de vivenda que só trouxeron máis problemas.

Non debemos ver a vivenda como problema, senón como unha prioridade. Reverter esta situación non é doado, pero é posible. A Xunta está facéndoo, con compromiso e con accións reais, e desde o Partido Popular estámolo apoiando.

O PPdeG reclama ao Goberno central que poña fin ao “colapso ferroviario” que sofre Galicia para “non lastrar as oportunidades da mocidade galega”

O Partido Popular de Galicia reclama ao Goberno central a adopción, con urxencia, de todas as medidas necesarias para resolver a situación de “colapso ferroviario” que sofre a nosa Comunidade en canto “está a limitar as oportunidades e o benestar da mocidade galega”.

Faino a través dunha iniciativa que os populares galegos veñen de rexistrar no Parlamento galego logo de que Novas Xeracións de Galicia trasladara o “calvario” que sofren a diario milleiros de mozos que “ven os seus plans en suspenso por mor da falta de trens, da escaseza de conexións, das dificultades para atopar un billete que lles asegure chegar ao seu destino ou mesmo das deficiencias que en ocasións provocan que a viaxe se interrompa durante o traxecto”.

Trátase dunha iniciativa que esta mañá presentou a presidenta da organización xuvenil do PPdeG e deputada autonómica, Nicole Grueira, nas inmediacións da estación de tren de Lugo acompañada polos presidentes de NNXX na provincia, Miguel Gallego, e na cidade, Santiago Amedo, e outros compañeiros xunto aos que reclamou “uns servizos ferroviarios de calidade á altura dunha Galicia de calidade”.

A elección da estación ferroviaria da capital lucense non foi casual, xa que, tal e como asegurou, Lugo é “unha das provinciais máis incomunicadas de Galicia”. Referiuse así ao feito de que “todas as estradas nacionais se atopan en mal estado, as autovías están sen rematar e a nova estación intermodal verá limitadas as súas capacidades ao non ter acceso aos servizos de Alta Velocidade”.

Por todo isto, a iniciativa parlamentaria subliña que “é necesario esixir solucións ao Goberno de España para que Galicia conte cunha rede ferroviaria que funcione, que respecte aos seus usuarios e que devolva á mocidade a capacidade de planificar a súa vida sen incertezas”.

O PPdeG urxe ao Goberno central que corrixa as deficiencias detectadas na dragaxe da ría do Burgo

O Grupo Popular demandará no Parlamento de Galicia ao Goberno de España a finalización inmediata dos traballos de saneamento e recuperación da ría do Burgo en A Coruña, corrixindo todas as deficiencias detectadas pola Confraría de Pescadores na execución dos traballos realizados durante a dragaxe. Ademais, esixe ao Goberno central que cumpra coas compensacións económicas correspondentes ao parón da actividade extractiva dos mariscadores da ría do Burgo ata que os bivalvos acaden a talla comercial unha vez rematada a dragaxe.

O deputado popular Jesús María Fernández Rosende, acompañado da deputada provincial Izaskun García Gorostizu, mantiveron un encontro con membros da Xunta Xeral da Confraría de A Coruña no que se lles trasladou as iniciativas que o Grupo Popular defenderá no Parlamento de Galicia para que o Goberno de Pedro Sánchez atenda as demandas dos mariscadores afectados pola dragaxe da ría do Burgo.

24 DOS 27 BANCOS MARISQUEIROS AFECTADOS

En concreto, Fernández Rosende lembrou que un informe elaborado por técnicos da Confraría de Pescadores de A Coruña alerta de que a dragaxe “tivo un impacto máis significativo e maior do esperado sobre os bancos marisqueiros”. En concreto, falan de cambios na cota, nas características granulométricas e da presenza de irregularidades nas superficies dos bancos marisqueiros causadas pola maquinaria pesada empregada para a actuación, o que afectou gravemente á actividade marisqueira ao reducir a superficie produtiva e está a poñer en risco a sustentabilidade da actividade do marisqueo.

“Por desgraza, a dragaxe da ría afectou directamente á produción de 24 dos 27 bancos marisqueiros existentes na ría do Burgo e neste momento a súa recuperación e produtividade están lonxe de arranxarse”, indicou o deputado popular, polo que considerou urxente que o Goberno central proceda á corrixir todas as deficiencias derivadas da dragaxe realizada, que xeraron un impacto negativo nos bancos marisqueiros ao reducir a superficie produtiva e poñen en risco a sustentabilidade da actividade.

MANTEMENTO DO PLAN DE AXUDAS

Ademais, Fernández Rosende insistiu na necesidade de que o Goberno central cumpra coas súas obrigas e, unha vez rematadas as obras de dragaxe, manteña o plan de axudas que compensen aos mariscadores da ría do Burgo ata que recuperan a normalidade e retomen a súa actividade habitual.

“O Goberno de Pedro Sánchez dispón de fondos suficientes procedentes do remanente de 16 millóns de euros que sobrou do orzamento previsto para a realización da dragaxe, xa que a obra foi contratada por 32 millóns de euros cando o orzamento inicialmente previsto superaba os 48 millóns de euros”, explicou o deputado popular.

O PPdeG reivindica o galego como “patrimonio de todos os galegos” desde o convencemento de que “a nosa lingua é para unir e non para dividir”

O Partido Popular de Galicia reivindicou hoxe nun acto para conmemorar o Día das Letras Galegas que “a nosa lingua é para unir e non para dividir” e que, na medida en que forma parte da identidade de Galicia, “non pertence a ninguén máis que a todos e cada un dos galegos e galegas”.

Así o asegurou a secretaria xeral dos populares galegos, Paula Prado, na súa intervención no acto organizado polo partido esta tarde en Muxía, na Costa da Morte. Una intervención na que concluíu que a homenaxe deste ano á poesía popular oral galega, e en concreto ás cantareiras, supón “un canto á alma de Galicia” e un recoñecemento a todas aquelas mulleres que “ao longo da nosa Historia engrandeceron a nosa cultura co son das súas pandeiretas e coa forza da súa voz”.

“A Galicia moderna de hoxe non se entende sen a súa Historia e tradicións, do mesmo xeito que a Galicia orgullosa da súa lingua non se entende sen os cantos que lle deron voz e melodía, nin tampouco se entende a Galicia que se escribe en feminino sen a traxectoria de tantas mulleres valentes e poderosas que nos precederon”, asegurou.

Para a secretaria xeral do PPdeG, “ser conscientes do que somos é importante para reivindicar como queremos seguir sendo e cara onde queremos ir”. Algo que cobra especial relevancia nuns momentos nos que “todos xuntos temos a obriga colectiva de trazar o mellor camiño para a lingua galega”.

Por iso, quixo reivindicar que “mentres uns intentan apropiarse da lingua e ridiculizar a quen non a fala como eles, desde o PPdeG seguiremos falando galego”. Así mesmo, “mentres uns defenden modelos de imposición lingüística, nós seguiremos defendendo o bilingüismo cordial e a liberdade de cada persoa para expresarse na lingua que queira”.

“Mentres uns seguen instalados no conflito, na axitación e en rachar con todo, nós seguiremos poñendo en valor a importancia do pacto e dos acordos”, concluíu insistindo en que Galicia “é de todos os galegos e galegas, vivan onde vivan, pensen como pensen e falen como falen”.

LÓPEZ CAMPOS: “HONREMOS A QUEN FIXO DA SÚA VIDA UNHA DEFENSA DO GALEGO E DO SEU PRESTIXIO”

O acto foi conducido pola coordinadora de Cultura do PPdeG, María Baleato, que foi a encargada de dar paso ás diferentes intervencións e de presentar a Asociación Cultural Trubisquiña de Vimianzo, o grupo de cantareiras que interpretou tres pezas musicais.

O responsable de Cultura, Lingua e Xuventude do Goberno galego, José López Campos, defendeu que o Día das Letras Galegas é unha xornada para “honrar a quen fixo da súa vida unha defensa do galego e do seu prestixio” e que, por iso, as cantareiras “merecen o recoñecemento do pobo galego por facer da música un acto de identidade e erguer a súa voz para dignificarnos como pobo”.

Na súa opinión, todas elas “cumpriron a importante tarefa de manter viva a nosa lingua e, grazas á súa voz, o galego non deixou de escoitarse e puido pasar de xeración en xeración”. De aí a súa contribución á identidade colectiva de Galicia.

“Desde o PPdeG cremos que a mellor defensa da nosa lingua é a través da convicción e non da imposición e apostamos por defender o galego desde o convencemento de que é o noso maior tesouro e que debemos coidalo para legarllo ás novas xeracións”, concluíu comprometéndose a seguir traballando na defensa e o prestixio da lingua.

SANDRA VILELA: “TEMOS CLARO QUE NON HAI FUTURO SEN RAÍZ”

Pola súa banda, a voceira do partido en Muxía, Sandra Vilela, sinalou na súa intervención que “non é casual” a elección deste concello para celebrar un acto como este: “En Muxía apostamos pola cultura dándolle vida ás tradicións, dignidade á nosa lingua e espazo ás nosas raíces. Porque temos claro que quen non coida da súa cultura, acaba por esquecerse de si mesmo”.

“Facémolo porque estamos orgullosos do que somos, con orgullo, con convicción e sen complexos”, explicou apuntando a que con este homenaxe ás cantareiras a quen realmente se homenaxea é “ás nosas avoas, ás nosas nais e a todas esas mulleres que fixeron da voz unha ferramenta de resistencia e de identidade”.

Desde o orgullo e o agradecemento, quixo concluír facendo un chamamento a “ser conscientes de que herdamos algo que temos a obriga de conservar” e reivindicando que “se algo temos claro no PPdeG é que non hai futuro sen raíz”.

O Grupo Popular centrará na transferencia da AP-9 e na mellora do servizo ferroviario as súas demandas no Pleno da vindeira semana

O Grupo Popular centrará as súas demandas no Pleno da vindeira semana no ámbito do transporte, reclamando unha vez máis que o Congreso levante o bloqueo ao que ten sometido a tramitación da proposición de lei de transferencia da AP-9 a Galicia e pedindo que o Goberno central cese na súa discriminación a Galicia en materia ferroviaria, tanto na reposición da frecuencia de servizos, a venda anticipada de billetes ou a chegada do AVE a todas as cidades galegas.

Ao remate da Xunta de Portavoces, onde a Mesa do Parlamento galego deu conta da cualificación da candidatura de María Concepción Pombo Otero á Dirección Xeral da Corporación de Servizos Audiovisuais de Galicia, o portavoz popular, Alberto Pazos, informou que a sesión plenaria dará comezo coa comparecencia, a petición propia, do conselleiro de Sanidade para informar sobre as políticas da Xunta en materia de prevención de enfermidades e vacinación.

TRATAMENTO INDIGNANTE COA AP-9

Dentro do apartado de proposicións non lei, o Grupo Popular insistirá, unha vez máis, na demanda para que a Mesa do Congreso levante o bloqueo ao que ten sometida a tramitación da proposición de lei, aprobada por unanimidade neste Parlamento galego, para a transferencia da AP-9 a Galicia. Alberto Pazos considerou “indignante” o tratamento que está a recibir esta proposición de lei, con case 50 aprazamentos do prazo de presentación de emendas, ante o que anunciou que “imos seguir insistindo nesta demanda ata conseguir que se poña fin a esta actitude obstrucionista e denigrante que está a sufrir a transferencia da AP-9 a Galicia”.

A segunda proposición non de lei do Grupo Popular está relacionada co transporte ferroviario e a través dela pídense varias cuestións “para que os galegos poidamos gozar dun servizo ferroviario de calidade que realmente atenda as nosas necesidades”.

FRECUENCIAS, BILLETES E CHEGADA DO AVE

En concreto, a iniciativa pide que se repoñan de inmediato todas as frecuencias ferroviarias suprimidas durante a pandemia e que, a día de hoxe, aínda non se teñen recuperado; que se elabore un plan de continxencia que avalíe as causas e posibles solucións ante as frecuentes incidencias que sofren os usuarios do tren en Galicia, co obxectivo de garantir o cumprimento de tempos de viaxe e de horarios; que se dote ás cidades de Lugo e Ferrol de alta velocidade, de xeito que as súas estacións tamén reciban trens AVE; e que cese, dunha vez por todas, a discriminación que para Galicia supón as diferentes políticas de venda anticipada de billetes por parte de Renfe, facilitando a planificación de viaxes e o acceso a prezos máis competitivos.

Por último, no apartado de preguntas ao Goberno galego, o Grupo Popular interesarase polas novidades do novo Plan Estratéxico de Xuventude 2025-2027, dirixido á mocidade de entre 16 e 30 anos, que conta con máis de 130 medidas e dispón de máis de 700 millóns de euros de orzamento; sobre os beneficios acadados en 2024 polos cidadáns galegos na adquisición de vehículos que tributan ao 3 por cento, logo de que a Xunta habilitara axudas para a adquisición de vehículos usados, diminuíndo o tipo de gravame para a súa compra en 5 puntos porcentuais, ao pasar do 8 ao 3 por cento; e pola valoración que fai o Goberno galego sobre o conflito que afecta á cooperativa de vivendas en alugueiro social no barrio de Xuxán en A Coruña, onde a imposición de novas esixencias por parte do Instituto de Crédito Oficial está a botar abaixo as expectativas de acceder a unha vivenda a un prezo accesible e lonxe do carácter social da promoción.

Rueda destaca os beneficios para Ourense das novas axudas para rehabilitar vivendas baleiras do Goberno galego

O presidente do PPdeG, Alfonso Rueda, apunta á provincia de Ourense como unha das grandes beneficiadas das novas axudas para rehabilitar vivendas baleiras que anunciou no recente Debate sobre o Estado da Autonomía e que o Goberno galego porá en marcha nos próximos meses.

Tal e como subliñou esta tarde na Xunta Directiva Provincial do PP de Ourense, esta nova liña de axudas é un exemplo da “aposta clave” do Executivo autonómico para revitalizar o rural, fixar poboación e recuperar patrimonio abandonado.

Acompañado polo presidente do partido na provincia, Luis Menor, e pola secretaria xeral do PPdeG, Paula Prado, o líder dos populares galegos destacou que esta proposta, nacida das demandas que os representantes do partido trasladan de forma continua desde o territorio, terá un impacto directo e transformador.

Ao igual que o terán outras das medidas anunciadas no Debate sobre o Estado da Autonomía como é a execución do maior plan de residencias públicas da historia de Galicia. Un plan pensado para concellos pequenos e medianos e de especial relevancia en Ourense, onde o envellecemento demográfico é un reto central.

“Esta é a política de verdade: a política que transforma vidas e que se aplica a pé de obra nos concellos”, asegurou Rueda enxalzando a política de proximidade que practican os alcaldes e voceiros do partido na provincia e que os leva non só a ser a referencia dos veciños, senón tamén os garantes da conexión entre o territorio e o Goberno da Xunta.

O presidente concluíu que, por cousas como estas, os proxectos doutros partidos non calan nunha Comunidade que aposta pola estabilidade, a moderación e a seriedade. Tal e como demostra a confianza dos galegos e galegas no PPdeG: o partido da responsabilidade, da política útil e do respecto ás institucións e ás persoas.

UN PARTIDO REGRADO E RENOVADO

Luis Menor lembrou pola súa banda o compromiso que adquiriu para facer un partido regrado, cunha estrutura renovada, cos seus lexítimos representantes por toda a provincia e os seus correspondentes órganos de goberno e decisión. Neste sentido, subliñou que o PP de Ourense está nese camiño, afrontando en 2025 unha intensa fase de consolidación das agrupacións locais na provincia, e tamén na capital.

O presidente provincial destacou que en marzo comezou un amplo período congresual coas convocatorias xa celebradas do Barco de Valdeorras, Toén, Maside, A Bola e Cenlle. Congresos que continuarán desde finais deste mes con dez convocatorias máis: Os Blancos, Bande, Vilariño de Conso, San Xoán de Río, Monterrei, Sarreaus, San Amaro, Piñor, A Rúa, e Baños de Molgas.

O obxectivo, dixo, é seguir ofrecendo á militancia a estabilidade e a coordinación que necesita nos seus respectivos territorios, conformando os mellores equipos cara as eleccións locais de maio de 2027.

Para consolidar e normalizar a estrutura orgánica do partido, engadiu Luis Menor, tamén compre que as agrupacións locais estean en disposición de afrontar un congreso que axude a unir, ampliar e fortalecer o partido.

Deste modo, aprobáronse as xestoras locais de Barbadás, Xinzo de Limia, O Carballiño e Allariz, así como a da cidade de Ourense, cuxo liderado asume Ana Méndez, logo tamén de asumir en xaneiro a portavocía do grupo municipal no Concello de Ourense.

Ademais de facer balance da actividade desenvolvida polo PP de Ourense, Luis Menor tamén destacou a positiva evolución da campaña de afiliación, con 165 novas altas desde comezos deste ano.

“Sen euforias que distraian a nosa atención”, afirmou, que este é o resultado dun intenso traballo que ten como fin achegar a mensaxe do PP a toda a sociedade ourensá, “como partido apegado á terra que somos”.

Paula Prado pon de exemplo a xestión dos gobernos municipais do PPdeG fronte as “liortas” de concellos como o de Santiago

A secretaria xeral do Partido Popular de Galicia, Paula Prado, puxo de exemplo hoxe, cando se aproxima o ecuador do mandato municipal, a xestión dos concellos liderados polo PPdeG, fronte as “liortas” que se ven en gobernos como o de Santiago de Compostela.

“En Oroso, da man do alcalde Álex Doval, comprobamos o que supón que o Partido Popular goberne nos municipios: estabilidade e traballar nos problemas reais dos veciños e veciñas, afastados das liortas que vemos noutros concellos onde existe un pacto de perdedores, como en Santiago”, sinalou.

Prado lamentou “o que supón ese pacto” dous anos despois, cun BNG que goberna con 6 concelleiros de 25 e un PSOE “absolutamente destrozado” e “pelexado xa non só cos nacionalistas, senón tamén dentro do propio partido”.

“O do PSOE é un espectáculo esperpéntico cuns claros prexudicados: os veciños e veciñas da capital de Galicia”, criticou, e tamén mencionou a “inestabilidade” dun concello como o da A Coruña: “É unha pena ver a este socialismo ausente que se reproduce a nivel autonómico e que non deixa de ser unha copia do que vemos cada día con Sánchez e o seu goberno: un autócrata que quere gobernar con wasaps pero non con Presupostos Xerais do Estado”, engadiu.

Por este motivo, a pouco máis de dous anos para as eleccións municipais, cre que con alcaldes como o de Oroso séguese demostrando unha cousa: “A gran maioría dos concellos con estabilidade e xestión, sen sobresaltos nin liortas, son os liderados polo PPdeG”. E así, agregou, “Galicia Goberna grazas a que 157 alcaldías, a metade, están tinguidas de azul”.

“Álex é un dos nosos alcaldes máis novos, con ganas de cambiar as cousas no seu concello e con ideas tanto para núcleos como Sigüeiro como para as parroquias. É un gran exemplo do que queremos. Hoxe reivindicamos gobernos coma o seu, que xestionan día si, día tamén, o seu municipio”, concluíu.

“UNHA FESTA DA TROITA MELLORADA”

Por último, Paula Prado asegurou que foi “un pracer” acompañar aos veciños e veciñas un ano máis na Festa da Troita de Oroso: “Unha Festa da Troita mellorada desde que Álex está de alcalde, con moita máis actividade. O alcalde está facendo un magnífico traballo”.

Pola súa banda, Álex Doval subliñou que ata o de agora “foron dous anos de moitísimo traballo”, nos que tanto el como o seu equipo non tiveron “máis vida que o Concello”. “E nestes dous anos que restan de cara a 2027 apertaremos o acelerador para continuar dándoo todo”, adiantou.

“Encontramos un Concello nunha situación económica complicada, sen estar moi ben pensado nin deseñado, e fomos quen de poñerlle coto ao gasto corrente, facendo unhas contas reais e realistas que se poidan cumprir, ao tempo que cumprimos o noso programa electoral”, afondou.

Neste “fin de semana máis importante do ano” para o municipio, co gallo da Festa da Troita, Doval salientou o labor realizado “sobre todo na xestión, que é o que máis caracteriza aos gobernos do PPdeG”.

Francisco Conde: “A presión do PP foi decisiva para que hoxe os gandeiros galegos se sintan máis aliviados en relación aos ataques do lobo”

Francisco Conde puxo en valor que “a presión do PP foi decisiva para que hoxe os gandeiros galegos se sintan máis aliviados” en relación aos ataques que o lobo ten provocado nas súas explotacións.

O deputado nacional e os tamén representantes do PP lucense no Congreso, Jaime De Olano e Cristina Abades, os deputados autonómicos Nicole Grueira e Enrique Barreiro, o alcalde de Guntín, Ángel Pérez, e outros representantes do PP lucense escoitaron de man de gandeiros os prexuízos que provoca a especie nas explotacións gandeiras de distintos puntos da provincia e, de forma especial, nas de réxime extensivo, durante unha visita a unha granxa no municipio.

Primeiro, a aprobación no Congreso a iniciativa do Grupo Popular para que o Goberno de Sánchez retirara a especie da Listaxe de Especies Silvestre en Réxime de Protección Especial (LESPRE) permitiu a súa xestión. E a aprobación no Parlamento Europeo da proposta da Comisión Europea para rebaixar o status de protección do lobo de ‘estritamente protexido’ a ‘protexido’ supón un ”reforzo na seguridade xurídica fronte aos extremistas”. Así mesmo, aclarou que “a especie continuará a estar protexida, pero será xestionable en toda Europa como vimos defendendo no Partido Popular dende 2017”, apuntou.

A POLÍTICA QUE SERVE
Conde reivindicou, polo tanto, “a política que serve: a do Partido Popular defendendo os interese dos galegos e das galegas” en relación ao traballo dende fai anos do PP dende o Goberno galego e as distintas cámaras e da man dos sectores afectados para garantir o equilibrio entre o lobo e a gandería.

No lado oposto, “BNG e PSOE que se opuxeron á proposta posicionándose en contra do rural galego. O BNG votou en contra en Europa e en Galicia. O PSOE contradise: en Europa intentou ata o último momento manter a protección máxima para o lobo introducindo unha emenda, mentres que no Parlamento de Galicia votou a favor da iniciativa do Partido Popular recoñecendo o efecto da especie para os gandeiros galegos”.

O deputado popular asegura que “non hai que elixir entre protexer ao lobo ou á gandería, hai que xestionar con rigor e sentido común para promover a súa convivencia. Non son incompatibles, so hai que antepoñer a técnica á ideoloxía”.

Os datos son concluíntes: 14.000 reses mortas polo lobo no último ano en España (40 ao día), máis de 3.200 en Galicia no 2024 das que a metade, máis de 1.600, foron contabilizadas na provincia de Lugo.

Conde explicou que “a nova Directiva Hábitats será aplicada en España sen necesidade de trasposición”. É dicir, no mesmo momento no que se publique no boletín da UE, será de aplicación inmediata en España grazas a que “o Partido Popular logrou aprobar as emendas introducidas no Congreso á Ley de despedicio que prevén esa aplicación inmediata no momento en que cambiase a regulación europea”.

O BNG, OS DO NON A TODO, PRIORIZAN A PROTECCIÓN DO LOBO Á DEFENSA DOS GANDEIROS
Pola súa banda, os deputados autonómicos Nicole Grueira e Enrique Barreiro salientaron a aprobación no Pleno do Parlamento de Galicia celebrado esta semana dunha proposición non de lei (PNL) a través da que se manifesta o apoio da Cámara galega á rebaixa do nivel de protección do lobo e ao restablecemento do equilibrio entre a preservación desta especie e as actividades gandeiras desenvolvidas no rural.

“Lamentablemente, esta iniciativa do Grupo Popular non contou co voto favorable dos de sempre, os do non a todo, xa que os deputados nacionalistas decidiron rexeitar esta proposta seguindo a súa liña negacionista”, indicaron os deputados.

Neste sentido, consideran “lamentable que o BNG priorice a protección ao lobo fronte á defensa dos gandeiros de Galicia, nun exemplo máis do seu ecoloxismo fanático e irresponsable que só supón perdas para os nosos produtores”.

Ademais, os representantes do PP lucense no Parlamento de Galicia criticaron “a incoherencia amosada polos socialistas neste asunto, xa que, despois de amosar no Parlamento galego o seu apoio á rebaixa da protección do lobo, dous días despois votaron en contra desa mesma rebaixa no Parlamento europeo”.

“Un exemplo perfecto de falta de coordinación e de incongruencia por parte dos socialistas galegos, pero lamentablemente algo que non nos sorprende en absoluto dada a falta dun liderado firme neste partido, totalmente submiso ao que lle marcan os independentistas para manterse no poder, influíndo incluso no seu voto no Parlamento europeo”, concluíron.