Paula Prado celebra que o PPdeG xa goberna en máis da metade dos concellos galegos

A secretaria xeral do PPdeG, Paula Prado, celebra que, coa investidura de Belén Cachafeiro como nova alcaldesa de Forcarei, o número de concellos nos que goberna o partido xa supera a metade dos de toda Galicia e que isto supoña ademais a súa consolidación como a formación política con máis mulleres alcaldesas en Galicia, cunha cifra que ascende desde hoxe ás 31.

Esta mañá número dous dos populares galegos estivo presente na sesión plenaria celebrada no Concello de Forcarei para investir a quen xa fora rexedora deste municipio entre 2012 e 2019. Aproveitou para desexarlle moitos éxitos e acertos nesta nova etapa e reivindicou o acto de hoxe como “de xustiza”.

“O PP gañou as eleccións municipais en Forcarei con máis dun 48% de apoio, pero, a pesar de perder e coma sempre, PSOE e BNG decidiron unirse para que nós non gobernaramos”, sinalou incidindo en que “agora chegou o momento de comezar a atender aos veciños logo de seis anos de parálise”.

O PPdeG pedirá no Senado o traspaso das competencias sobre os permisos de traballo de estranxeiros a Galicia

Os senadores do Partido Popular de Lugo -José Manuel Barreiro, José Manuel Balseiro e Juan Serrano- acompañados da presidenta do PP de Vilalba, Sandra Vázquez, e outros representantes da agrupación local, visitaron hoxe a SAT Revolta, na parroquia vilalbesa de Noche, que conta seis socios e cinco traballadores, para dar conta dunha ofensiva que o PP desenvolverá desde a Cámara Alta en apoio da demanda da Xunta pola que pide o traspaso a Galicia das competencias sobre os permisos de traballo de estranxeiros.

Os populares lembran que moitas explotacións do rural están necesitadas de man de obra urxente, que non se ve satisfeita coa oferta laboral dispoñible, e respecto da que existen traballadores estranxeiros interesados, pero que non poden incorporarse pola lentitude e o colapso de moitos trámites que actualmente son responsabilidade da administración estatal.

A presidenta local tamén subliñou “a importancia do sector primario no municipio e na comarca da Terra Chá” e lembrou “a necesidade de man de obra para manter a actividade nas granxas, un dos principais motores económicos e un sector fundamental para asentar poboación no rural”. Polo tanto, considera necesario “axilizar os trámites para que as persoas que chegan doutras nacionalidades e que estean interesadas en traballar nas granxa poidan obter os permisos de traballo con celeridade”.

A iniciativa dos senadores lucenses pide, máis en concreto, ao Goberno de España autorizar o traspaso efectivo a favor da Comunidade Autónoma de Galicia das competencias e dos medios persoais e materiais necesarios para a tramitación e resolución das autorizacións iniciais de traballo por conta allea e propia, dos permisos para actividades laborais de tempada e das autorizacións vinculadas ás estadías de longa duración por razóns de estudo, mobilidade de alumnado, voluntariado ou formación, de persoas estranxeiras cuxa relación laboral desenvólvase en Galicia. Esta mesma demanda xa se solicitou formalmente por acordo do Goberno galego recentemente.

Desde o PP tamén lembran que non se trata dunha petición allea ao ámbito competencial autonómico. De feito, a demanda da Xunta conta co aval do Consello Consultivo de Galicia que, tras analizar as circunstancias deste requirimento, emitiu informe favorable respecto a a disposición de reclamar ao Goberno esta petición. Hai por tanto argumentos xurídicos sólidos e non fantasías de grupos separatistas, que son aos únicos que atende Sánchez, e que permitirían a Galicia avanzar no seu autogoberno, amparado no seu Estatuto de Autonomía e co respaldo do Tribunal Constitucional en diferentes sentenzas. “Buscamos ser útiles aos galegos, aos lucenses, e seremos máis útiles se estes permisos de traballo para estranxeiros se xestionan desde aquí”.

AO PSOE: “DIME DO QUE PRESUMES…”

Que Sánchez e o seu Goberno fagan oídos xordos ás necesidades do rural demostra con claridade o seu abandono a unha provincia como a de Lugo, onde o sector primario ten un peso especial e as súas necesidades non son atendidas desde Moncloa.

Con todo, o abandono aos lucenses demóstrase tamén noutros moitos aspectos, o que levan aos senadores populares a cuestionar a actitude triunfalista do PSOE que días atrás presumía do investimento do Goberno na provincia.

“Resumímolo moi ben tirando de refraneiro: Dime do que presumes e direiche de que careces”. Os senadores lembran que os socialistas “falan dun importante investimento en ferrocarril cando Sánchez condena a Lugo a ser a única provincia galega pola que non circularán trens AVE, AVRIL, AVLO ou deixan á capital sen conexión directa coa rede europea de mercadorías”. Tamén “presumen da nova estación intermodal, pero non explican que seguirán chegando os mesmos trens obsoletos que ata o de agora. E iso cando non recortan frecuencias ou servizos. Por non falar do desmantelamento do FEVE na Mariña, onde só hai investimento para o tramo asturiano. E os usuarios galegos e lucenses teñen que pagar por un servizo deficiente, mentres que en Asturias e Cantabria viaxan gratis”.

E se falamos doutras infraestruturas, máis do mesmo, só hai que ver a situación das autovías e das estradas de competencia estatal na provincia, para observar que “nestes sete anos non se avanzou nada, non hai ningunha nova autovía ou proxecto operativo: “Nin a Lugo-Ourense, nin a autovía da Mariña, nin a Ponferrada-Ourense e a Lugo-Santiago continúa en estar concluída”. E nas estradas nacionais “non realizan nin as obras de conservación e mantemento mínimo”.

Polo tanto, os populares consideran “incrible” que “o PSOE presuma do abandono de Sánchez a Lugo”.

O PPdeG salienta o esforzo económico da Xunta e dos concellos para facilitar a conciliación ás familias galegas a pesar dos recortes de Pedro Sánchez no financiamento estatal

O PPdeG pon en valor o esforzo económico realizado tanto polos seus alcaldes como pola Xunta de Galicia á hora de poñer a disposición das familias galegas medidas que favorezan a conciliación e especialmente logo de que o Goberno central recortase o financiamento estatal neste eido.

Así o explicou esta mañá a secretaria xeral dos populares galegos, Paula Prado, nunha visita ao campamento de verán impulsado polo Concello de Coristanco grazas a unha axuda de 50.000 euros do Goberno galego. Unha visita na que estivo acompañada polo alcalde Juan Carlos García Pose ademais do vicesecretario de Organización do Partido Popular da provincia da Coruña, Gonzalo Trenor, e o deputado autonómico Rubén Lorenzo.

“Se este campamento e tantas outras actividades que se realizan ao abeiro do Plan Corresponsables son posibles, é grazas ao esforzo económico unicamente dos concellos e do Goberno galego”, sinalou denunciando que o Goberno de Sánchez decidiu este ano recortar nun 25% a súa aportación a este plan. Un recorte que, no caso de Galicia, implicou deixar de percibir 2,3 millóns de euros que tiveron que ser asumidos pola Administración autonómica con fondos propios.

Por sorte, engadiu, as familias galegas “poderán seguir contando co apoio da Xunta á hora de conciliar, xa sexa a través dos campamentos de verán ou doutras medidas que fan de Galicia unha Comunidade pioneira neste eido”.

“Lamentablemente, o Goberno de Sánchez segue máis ocupado nos seus propios problemas que en cuestións como a conciliación”, concluíu ao respecto asegurando acto seguido que “Pedro Sánchez só concilia con Ábalos, Santos Cerdán ou o Fiscal Xeral do Estado, ao que un día máis segue sen cesar”. Neste sentido, cualificou de “inaudita” a situación actual de García Ortiz e insistiu en que “ten que marchar xa”.

O CONCELLO QUE MÁIS INVISTE POR HABITANTE DA COMARCA

Paula Prado enmarcou a realización deste campamento de verán no obxectivo que perseguen tanto o alcalde de Coristanco como o resto de rexedores do PPdeG: “Apostar polas persoas, polo seu benestar e pola mellora da súa calidade de vida”.

Non en balde, reivindicou que Coristanco destaca por ser o concello que máis inviste por habitante de toda a comarca de Bergantiños: “Un nivel de investimento que, a pesar de tratarse dun concello rural, o sitúa á altura de grandes cidades”.

O propio alcalde quixo poñer en valor o “intenso” traballo que se leva feito desde o Concello ao longo dos últimos anos e por iso quixo aproveitar esta visita para “dar conta de todo o traballo feito, acreditar os resultados e compartir os desafíos que quedan por diante de cara ao futuro”.

Galicia aprobará o teito de gasto para 2026 e garante por 17º ano consecutivo uns orzamentos en tempo e forma grazas á estabilidade política

A Xunta de Portavoces aprobou esta mañá a convocatoria dun Pleno extraordinario do Parlamento de Galicia para o vindeiro luns, 4 de agosto, no que se procederá á aprobación do teito de gasto non financeiro dos orzamentos xerais da Xunta para o vindeiro 2026. “O que aquí é unha normalidade e a plena demostración da estabilidade política da que felizmente gozamos os galegos, non ten comparación algunha coa situación que se vive a nivel do Estado, onde temos un Goberno en mans dos independentistas cataláns e vascos que está gobernando con orzamentos da pasada lexislatura e, polo que estamos vendo nos últimos días, sen visos de poder sacar adiante unhas contas para o ano 2026”, sinalou a viceportavoz do Grupo Popular, Cristina Sanz.

A aprobación do teito de gasto dos orzamentos da Xunta para 2026 “será o primeiro paso para que Galicia volva contar, un ano máis, e xa van 17 consecutivos, con presuposto en tempo e forma, de xeito que o Goberno galego poida continuar co seu proxecto político, respaldado por unhas costas que xa estarán plenamente operativas desde o 1 de xaneiro de 2026”, salientou Cristina Sanz.

ORZAMENTOS SENSATOS E CON PROXECTO POLÍTICO

“Fronte a esta situación de estabilidade e bo facer dun Goberno galego capaz de poñer enriba da mesa uns orzamentos sensatos e que sustentan o seu proxecto político, temos ao Goberno de España que, por moito que se empeñe Pedro Sánchez en anunciar, como fixo o pasado luns, que ten previsto presentar uns orzamentos, é patente que non conta con garantía algunha de poder aprobalos e poñelos en práctica”, sinalou.

Neste sentido, apuntou que “a mellor mostra desta falta de apoios políticos para sacar adiante as contas é que xa evitan confirmar que os levarán ao Congreso, nunha mostra máis da máxima que defende Pedro Sánchez: gobernar sen o Congreso e limitándose á aprobación de decretos-lei, co único obxectivo de manterse no poder e aguantar como poida ata o remate da lexislatura”.

“O preocupante desta situación que padecemos a nivel nacional é que estamos en mans dun goberno sen proxecto político, máis preocupado por tapar os casos de corrupción que, un día tras outro, lle xorden por todos os lados e que afectan directamente ao Presidente Sánchez, á súa familia, ao seu Goberno e aos máximos responsables do Partido Socialista”, lamentou a viceportavoz popular.

O PPdeG na Fegamp propón elaborar un protocolo de protección para as traballadoras do Servizo de Axuda no Fogar

O Grupo do Partido Popular de Galicia na Federación Galega de Municipios e Provincias (Fegamp), a través do seu portavoz e vicepresidente primeiro, Ángel Moldes, trasladará na próxima reunión da Comisión Executiva da entidade a proposta de elaborar un protocolo de protección para as traballadoras do Servizo de Axuda no Fogar (SAF).

Esta iniciativa ten como finalidade establecer criterios comúns e estratexias de actuación ante situacións que poidan xurdir no exercicio da súa actividade laboral, garantindo así unhas condicións de traballo dignas e seguras para un colectivo esencial.

Tendo en conta que o SAF é un dos servizos máis demandados no ámbito da atención á dependencia en Galicia e que se presta en toda a comunidade a través dos concellos, Moldes defenderá a necesidade de impulsar un documento que funcione como guía e modelo para todos os municipios galegos.

“O noso obxectivo é dobre: asegurar unha atención de calidade ás persoas en situación de dependencia e, ao mesmo tempo, protexer e mellorar as condicións das traballadoras que desenvolven unha labor fundamental na nosa sociedade”, subliñou Moldes.

Paula Prado contrapón a política de xestión e eficacia dos gobernos do PP fronte á incapacidade de Pedro Sánchez para sacar adiante uns Presupostos

A secretaria xeral do Partido Popular de Galicia, Paula Prado, deixou hoxe en evidencia a incapacidade de Pedro Sánchez á hora de conseguir sacar adiante os Presupostos Xerais do Estado contrapoñéndoa coa eficacia e a xestión de gobernos do PP que, tanto na Xunta como en moitos concellos, si son quen de aprobar e executar ano a ano as súas contas.

“Viveiro aprobou a semana pasada os seus Orzamentos, sen ningún voto en contra, e Galicia xa ten en marcha os Orzamentos de 2026, que se todo vai ben entrarán en vigor por décimo sétimo ano consecutivo en tempo e forma”, explicou incidindo en que “algo que debería ser o normal estase convertendo en excepcional nun bo número de administracións encabezadas por PSOE e BNG”.

Paula Prado fixo estas declaracións esta mañá durante a visita que realizou a Viveiro xunto á presidenta provincial do PP de Lugo, Elena Candia, a deputada nacional Cristina Abades, o senador José Manuel Balseiro, deputados autonómicos e concelleiros populares, que foron recibidos pola alcaldesa Mariña Gueimunde. Sobre esta última precisamente destacou que é unha das 30 alcaldesas que fan do PPdeG o partido con máis mulleres rexedoras de Galicia.

“Nos cinco meses que vai cumprir sendo alcaldesa xa se converteu nunha referente da Mariña lucense”, engadiu ao tempo que enxalzaba a Gueimunde como “unha muller valente, con ganas de cambiar as cousas, que defende aos seus veciños e que é un gran exemplo para todas as mulleres que traballan en política”.

Para a número dous dos populares galegos, tanto a rexedora viveirense como o resto de alcaldes e alcaldesas que “tinguen de azul máis da metade dos concellos de Galicia” son a constatación de que “fronte aos pactos de perdedores de PSOE e BNG, a gran maioría dos concellos con estabilidade e xestión, sen sobresaltos nin liortas, son os liderados polo PPdeG”.

ELENA CANDIA: “NON TODOS SOMOS IGUAIS”

A presidenta provincial do PP de Lugo quixo afondar tamén nesta idea, asegurando pola súa banda que o proxecto dos populares márcase como obxectivo “liderar as institucións para traballar por todos coa templanza e a serenidade que precisan os grandes cambios co compromiso e coas ganas que representan alcaldes e alcaldesas como Mariña Gueimunde”.

Elena Candia amosouse convencida de que “a forza, a responsabilidade e o acerto constituirán a liña de traballo” da alcaldesa de Viveiro e, á súa vez, reflexan que “non todos somos iguais”. Algo que os veciños deste concello, ao igual que os do resto de concellos da provincia, saben ben da man do PSOE e do BNG.

“Hoxe reivindicamos a política de compromiso e de feitos do PPdeG fronte aos pactos en despachos e as promesas incumpridas do PSOE e fronte a un BNG centrado en todo menos en traballar para todos”, concluíu.

O CAMIÑO DO QUE VIVEIRO “NUNCA DEBEU PERDERSE”

A alcaldesa aproveitou a visita para facer un chamamento á unidade e ao traballo colectivo para “volver ao camiño do que Viveiro nunca debeu perderse” e “deixar de lado o partidismo e pensar en que neste concello hai veciños e veciñas que precisan de apoio e de investimentos”.

Referiuse así tanto á Deputación de Lugo como ao Goberno central, que, en contraposición á aposta do Goberno de Alfonso Rueda, acumulan anos de desleixo con este concello. “Necesitamos que, ao igual que temos o apoio do PPdeG e do PP de Lugo, poidamos contar co respaldo de todas as administracións para que Viveiro volva ter o que lle corresponde e merece”, concluíu neste sentido.

O PPdeG esixe ao alcalde de Vigo que recapacite a súa decisión e permita que a Xunte leve adiante o proxecto do novo Centro de Asociacionismo

As deputadas do Grupo Popular Patricia García e Loli Hermelo esixiron hoxe ao alcalde de Vigo que recapacite a súa decisión e permita que a Xunta leve adiante o proxecto do Centro de Asociacionismo que ten previsto implantar no antigo edificio xudicial da rúa Lalín, no que ten previsto investir 19 millóns de euros para atender as necesidades de locais de 70 colectivos vigueses.

Xunto á delegada da Xunta en Vigo, Ana Ortiz, e a presidenta do PP nesta cidade, Luisa Sánchez, Patricia García e Loli Hermelo criticaron que o alcalde vigués “poña os intereses partidistas por enriba das necesidades da cidade” e lamentaron que “máis de 70 entidades veciñais, culturais e sociais están a verse prexudicadas por quen prefire preitear antes que dialogar e chegar a acordos entre as administracións públicas”.

TRANSFERIDO Á XUNTA EN 1994

O antigo edificio xudicial da rúa Lalín foi transferido sen condicións á Xunta polo Estado en 1994, polo que consta ao seu nome no Catastro e abona o IBI anualmente polo mesmo. O Concello de Vigo concedeu nun primeiro momento licenza de obra á Xunta para a realización do proxecto de adecuación deste edificio, pero dous meses despois decidiu suspendela alegando dúbidas sobre a titularidade do inmoble.

Diante desta situación, as deputadas populares demandaron ao alcalde de Vigo que “aparque a súa fobia contra todo o que ten que ver coa Xunta na cidade e mire algo polos beneficios dos seus veciños e asociacións, que están esperando por unhas instalacións nas que poder levar adiante os seus proxectos e actividades, pero que o Concello ten paralizadas sen xustificación congruente algunha”.

Ver a luz

Pedro Puy.

A película The Blues Brothers (1980) xa é de culto. O seu argumento é coñecido: os irmáns Jake e Elwood Blues, interpretados respectivamente por John Belushi e Dan Aykroyd, decátanse de que van embargar e vender o orfanato católico do barrio marxinal de Chicago no que se criaran, por falta de pagamento do imposto de bens inmobles. Nunha celebración relixiosa, agora baptista, oficiada polo reverendo Cleophus James (James Brown), Jake ve a luz. Ten unha misión: salvar o orfanato xuntando a súa banda de Blues, dar un concerto, e coa venda de entradas evitar o desafiuzamento da irmá Mary Stigmata, alias Nai Pingüín. No proceso, son perseguidos pola Policía Local polas máis de cen multas de aparcamento pendentes de Elwood, por unha moza abandonada por Jake, por unha banda de músicos country aos que suplantan nun local e por unha tropa de neonazis aos que atropelan durante unha manifestación. O concerto é un éxito, o imposto é pagado, pero a cidade de Chicago queda medio esnaquizada tralas frenéticas persecucións.

Esta semana o presidente do Goberno, Sánchez, tamén viu a luz. Foi en Santiago de Chile, no Palacio de la Moneda (o bombardeado por Pinochet), na compaña dos presidentes das repúblicas chilena, brasileira, colombiana e uruguaia. Pronto se unirán México e Honduras, e anúnciase algún que outro país de maior exemplaridade e tradición democrática, como Australia ou Canadá. A súa misión: salvar a democracia. Crear unha plataforma en defensa das institucións democráticas fronte aos movementos populistas de ultradereita e unha «dereita tradicional que ten sucumbido diante desa internacional reaccionaria do odio e a mentira». Non semella que sexa así en Alemaña, Polonia ou na Unión Europea, onde os seus correlixionarios gobernan coa dereita tradicional. Máis ben parece unha prolongación do muro que erixiu na súa investidura. Cuestión de visións.

Non só na ficción os irmáns Blues, cumprindo unha nobre misión tras ser alumeados pola divindade, deixaron tras de si unha boa recua de escachamentos. Foi a comedia musical máis cara da historia. Os 12 millóns de dólares de orzamento inicial convertéronse en 27,5, algo comprensible nunha película na que ademais das extraordinarias participacións de James Brown, Ray Charles, Aretha Franklin ou John Lee Hooker foron contratados máis de 500 extras, 200 membros da Garda Nacional de Illinois e 100 policías locais de Chicago, máis de 60 coches de policía que remataron esnaquizados, 3 tanques Sherman e 3 helicópteros, que precisaron un permiso especial para deixar caer o coche dos neonazis desde 400 metros de altura. Co tempo, os ingresos compensaron a produtora, pero a súa rodaxe segue a ser un exemplo de como non facer as cousas a xeito.

E é que ás veces as boas misións, xurdidas de alumeamentos, deixan consecuencias. Pola nobre causa de salvar a democracia no mundo fronte ao populismo da extrema dereita, en España poden quedar polo camiño a independencia e unidade do poder xudicial, a función lexislativa, orzamentaria e de control do poder lexislativo, ou a capacidade do Estado de recadar con equidade os seus propios tributos progresivos en todo o territorio. Quizais antes de dar leccións de democracia ao mundo sería prudente non esnaquizar o Estado de dereito en España. Ignoro os motivos, pero en España a película The Blues Brothers comercializouse co título de Granujas a todo ritmo.

O PPdeG salienta que o xacemento romano Aquis Querquennis compre 50 anos do inicio das escavacións convertido nun punto de referencia e atracción de visitantes do turismo cultural galego

Os deputados do Grupo Popular Juan Casares e José Luis Ferro, acompañados da alcaldesa Sandra Quintas, salientaron hoxe que, cando se compren 50 anos do inicio das escavacións arqueolóxicas no xacemento romano de Aquis Querquennis de Bande, este espazo converteuse nun punto de referencia e atracción de visitantes a esta comarca da Baixa Limia ourensá no contexto do turismo cultural galego, sobre todo no ámbito histórico patrimonial.

O xacemento romano de Aquis Querquennis, situado na parroquia dos Baños do concello de Bande, constitúe un dos conxuntos arqueolóxicos máis representativos da romanización do noroeste peninsular, tanto polo seu estado de conservación como pola súa importancia estratéxica na antiga Vía Nova, que unía Bracara Augusta (actual Braga) con Asturica Augusta (Astorga). En concreto, trátase dun antigo campamento militar romano, datado no século I d.C., que inclúe restos do campamento, do mansio, termas e outras estruturas lixeiras vinculadas á presenza militar e ao tránsito imperial.

MEDIA DE 30.000 VISITANTES CADA ANO

Os deputados populares lembraron que as escavacións no xacemento de Aquis Querquennis iniciáronse en 1975 da man do profesor Antonio Rodríguez Colmenero e desde entón este enclave consolidou o seu papel como recurso patrimonial, educativo e turístico, cunha media de 30.000 visitantes cada ano.

“O traballo que se está a desenvolver neste xacemento, así como o interese que suscita entre os seus visitantes, reforza o papel dun concello do interior como é o de Bande no contexto do turismo cultural galego, sobre todo no ámbito histórico patrimonial”, manifestou o deputado popular José Luis Ferro.

Neste sentido, Juan Casares subliñou que “a actividade investigadora e patrimonial que desenvolve o conxunto arqueolóxico de Aquis querquennis supón afondar no coñecemento dun elo máis da cadea histórica que define a Galicia como terra senlleira e ancestral”.

Pola súa banda, a alcaldesa Sandra Quintas afirmou que “o Concello de Bande aposta por aumentar a visibilidade deste xacemento como recurso patrimonial, histórico e turístico, así como por potenciar a oportunidade que abre á cooperación interterritorial con outras localidades unidas pola Vía Nova”.

Así, con motivo da celebración deste 50 aniversario do inicio das escavacións neste xacemento, o Concello ten previsto un programa de actividades para poñer en valor o traballo de investigación e conservación realizado; achegar á cidadanía e visitantes a relevancia histórica do enclave; reforzar a proxección de Aquis Querquennis como recurso patrimonial e turístico de relevancia autonómica; e promover o respecto polo patrimonio cultural como elemento de identidade colectiva.

O PPdeG sitúa a rehabilitación integral do IES Alfredo Brañas de Carballo como unha mostra máis do compromiso da Xunta coa educación pública

O deputado do Grupo Popular e portavoz do PP en Carballo, Rubén Lorenzo, xunto á tamén deputada Ethel Vázquez afirmaron hoxe que a rehabilitación integral do IES Alfredo Brañas de Carballo, que suporá un investimento superior aos 1,7 millóns de euros, “é unha mostra máis do firme compromiso da Xunta coa educación pública”. Estas obras mellorarán as condicións de traballo do profesorado e a calidade do ambiente para estudar do alumnado, convertendo o IES Alfredo Brañas nun espazo máis acolledor, eficiente e cómodo.

Esta actuación, que deu comezo recentemente e teñen un prazo de execución de nove meses, permitirá modernizar estas instalacións educativas mellorando a súa eficiencia enerxética, o confort térmico e acústico, a accesibilidade e a calidade dos espazos.

En concreto, a intervención prevista pola Xunta no IES Alfredo Brañas inclúe a renovación das carpintarías exteriores, a mellora do illamento térmico, a instalación de sistemas de iluminación máis eficientes e a adecuación de espazos interiores e accesos ao edificio, reducindo así o consumo enerxético e contribuíndo á sustentabilidade ambiental.

Rubén Lorenzo e Ethel Vázquez explicaron que esta actuación se enmarca na segunda fase do Plan de Nova Arquitectura Pedagóxica da Xunta, a través da que se investirán 200 millóns de euros nos vindeiros catro anos para transformar os centros educativos galegos en espazos modernos e adaptados ás necesidades actuais.

Na primeira fase deste plan, a Xunta investiu case un millón de euros nos centros educativos de Carballo, con obras tan demandadas como o salón de actos deste IES Alfredo Brañas.