Alberto Pazos destaca as novas rebaixas de impostos para familias monoparentais, contratos vitalicios, compra de libros, enfermos de ELA ou afectados dos incendios dos orzamentos para 2026

O portavoz do Grupo Popular, Alberto Pazos, salientou hoxe as novas rebaixas fiscais incorporadas aos orzamentos da Xunta para o 2026 que beneficiarán a familias monoparentais, a formación de contratos vitalicios para o coidado dos maiores, a compra de libros e material escolar, aos enfermos de ELA e ás súas familias e aos afectados pola vaga de incendios deste verán. “Estamos diante duns novos presupostos da Xunta, presentados en prazo e que dotarán á Comunidade galega dos fondos económicos necesarios para que, a partir do 1 de xaneiro, poida seguir medrando e creando emprego como viu facendo nos últimos 17 anos cos gobernos de Alberto Núñez Feijóo e Alfonso Rueda”, manifestou.

Ao remate da Xunta de Portavoces, na que se aprobou o calendario de comparecencias dos membros do Goberno galego, as deputacións provinciais e os organismos autónomos na Comisión 3ª para dar conta dos orzamentos dos seus respectivos departamentos, que darán comezo o vindeiro xoves, 23 de outubro, ás 10 horas co conselleiro de Facenda, Alberto Pazos criticou que BNG e PSdeG intentaran hoxe bloquear os orzamentos votando en contra da aprobación deste calendario. “Non lles chega con deixar a España durante tres anos sen orzamentos, senón que agora queren estender ese modelo a Galicia”, lamentou.

EXEMPLO A NIVEL ESTATAL

“Galicia volverá a ser un exemplo a nivel estatal ao tramitar os seus orzamentos en tempo e forma para que estean totalmente vixentes o 1 de xaneiro”, destacou o portavoz popular, quen contrapuxo esta situación “coa que sufrimos a nivel estatal, cun Goberno débil e sen o apoio parlamentario suficiente para sacar adiante uns orzamentos do Estado, prorrogados desde o ano 2023 e que atendían a proxectos e actuacións vixentes na pasada lexislatura, que, por suposto, quedaron totalmente desfasados para as necesidades da sociedade española actual”, sinalou.

O portavoz popular lembrou que o proxecto de orzamentos da Xunta para 2026 acada a cifra récord de 14.240 millóns de euros, dos que 3 de cada 4 euros se destinarán a gasto social, é dicir, sanidade, educación, políticas sociais e emprego; ámbitos nos que se prevé unha suba do 3,1 por cento respecto ao 2025, por enriba da suba do 2 por cento dos gastos totais recollidos nos orzamentos.

Máis en concreto, Alberto Pazo destacou a previsión de que o desemprego se reducirá ao 7,8 por cento ou que o Produto Interior Bruto se incremente un 1,9 por cento, un dato por enriba dos avances feitos tanto a nivel dos países da Zona Euro (1,4 por cento) ou da Unión Europea dos 27 (1,5 por cento). “E, todo iso, aderezado cunha nova rebaixa de impostos para colectivos sociais desfavorecidos, como: familias monoparentais; a formalización de contratos vitalicios para o coidado dos nosos maiores; a compra de libros e material escolar; os enfermos de ELA e as súas familias; ou os afectados pola vaga de incendios que sufrimos este verán; mantendo, por suposto, as rebaixas fiscais das que xa gozamos os galegos de anos anteriores”, subliñou.

SEMANA DE GLORIA DO BNG

Respecto das valoracións do proxecto de orzamentos realizadas por BNG e PSdeG, Alberto Pazos criticou que o BNG “cualifique as contas como as de un Goberno sen proxecto de país, sobre todo se o comparamos co proxecto de país que eles defenden despois de que pasaran a súa semana de gloria protagonizando tres situacións que identifican claramente os seus obxectivos e fins: o primeiro, a foto da vergoña cos herdeiros de ETA en Bilbao; o segundo, chamando fascista á recién recoñecida co Premio Nóbel da Paz, María Corina Machado; e, o terceiro, co documento feito público polo partido marxista-leninista que tutela ao BNG no que chama a axitar e crear tensión nas rúas galegas, traendo á nosa comunidade a kale borroka do País Vasco, para desgraza dos galegos que sufrimos as algaradas e desfeitas que acompañan habitualmente estas concentracións convocadas polas organizacións satélites do BNG e da UPG”.

Así mesmo, considerou “paradóxico que os socialistas galegos teñan a desfachatez de criticar os orzamentos da Xunta, cando o Goberno de Pedro Sánchez leva desde 2023 cunhas contas prorrogadas e sen atender as demandas de novos investimentos e programas imprescindibles para a sociedade española actual”. “O seu descoñecemento ou mala fe lévaos a criticar a rebaixa dos investimentos previstos nestes orzamentos, cando é público e notorio que a finalización dos fondos europeos é a causa deste descenso dos investimentos, que, gracias ao esforzo do Goberno galego, se manterán nunhas cifras máis que aceptables e, por suposto, cun incremento do 3,3 por cento se excluímos os fondos europeos dos anteriores orzamentos”, explicou.

 

 

 

Galicia, o exemplo que España necesita

José Manuel Barreiro.

Galicia volve dar unha lección de boa xestión e seriedade institucional. A Xunta aprobou este venres os orzamentos para que o 1 de xaneiro os galegos volvamos a ter contas públicas. Os de 2026 son os orzamentos máis altos da historia de Galicia con máis de 14 mil millóns de euros, medran en case 300 millóns e o total dese incremento vai para gasto social. É dicir, 3 de cada 4 euros irán para sanidade, educación, políticas sociais e emprego.

Ademais Alfonso Rueda mantén o compromiso de baixar impostos, mantén as 120 rebaixas aprobadas nos últimos anos polos gobernos do PP e pon en marcha 5 novas coas que redobra o apoio ás familias monoparentais, ás rendas medias e baixas, aos menores de 36 anos, ás familias numerosas e aos colectivos vulnerables.

Galicia suma 17 anos consecutivos aprobando as contas en tempo e forma. Dezaseis exercicios de responsabilidade, estabilidade e rigor. Mentres tanto Pedro Sánchez continúa atrapado no seu labirinto de cesións, chantaxes e parálise política.

O que en Galicia é normalidade, en España xa é unha excepción. Aquí, os gobernos do Partido Popular —primeiro con Alberto Núñez Feijóo e hoxe con Alfonso Rueda— demostran que se pode gobernar pensando nas persoas. Alí, o Goberno socialista utiliza os orzamentos como moeda de cambio para mercar apoios e manterse no poder.

Galicia planifica, Sánchez improvisa. Galicia cumpre, Sánchez rectifica. Galicia goberna con sentido común, mentres Sánchez goberna ao ditado de quen queren romper España. Esa é a diferenza entre un proxecto serio, que dá confianza e estabilidade, e un Executivo esgotado, que só xera incerteza e división.

Como dixo Rueda, ter orzamentos é a única forma de empregar eficazmente os cartos dos cidadáns. Cada presuposto aprobado a tempo garante servizos públicos de calidade, investimento produtivo e seguridade económica para as familias e as empresas. Os orzamentos son a proba de que o modelo do PP funciona.

Mentres Sánchez atrasa as contas do Estado, manipula cifras e antepón a súa supervivencia política ás necesidades do país, Galicia demostra que se pode gobernar con rigor e estabilidade. E esa diferenza explica por que Feijóo é a alternativa real que España necesita: porque xa demostrou, en Galicia, que sabe gobernar .

O camiño de Galicia con Feijóo e Rueda é a proba de que outra política é posible. Fronte ao caos, estabilidade. Fronte ao sectarismo, xestión. Fronte ao ruído, resultados. Galicia non se detén, e faino cunha mensaxe clara para toda España: cando o PP goberna, as cousas funcionan.

Alfonso Rueda sitúa á Estrada como exemplo de que os concellos “tamén están chamados a facer cousas grandes por Galicia” con liderados como o de Gonzalo Louzao

O presidente do PPdeG, Alfonso Rueda, situou hoxe á Estrada como exemplo de que os concellos “tamén están chamados a facer cousas grandes por Galicia” se contan á súa fronte con líderes que, como Gonzalo Louzao, saiban “aproveitar as oportunidades e facelas realidade desde a colaboración, o traballo, a unión e a positividade”.

Así o manifestou esta mañá ante o milleiro de asistentes ao Congreso Local do PP desta vila e no que Louzao foi elixido como novo presidente do partido en sustitución de José López Campos. Un relevo “feito perfectamente” e que, en opinión do presidente, foi posible grazas á combinación dun partido “cada vez máis grande e unido” e dun líder “co atrevemento e as condicións necesarias para converterse no mellor substituto posible para un gran alcalde”.

“Quédome moi tranquilo porque sei que na Estrada aínda hai moitas oportunidades por aproveitar e que en Gonzalo Louzao atoparemos sempre a alguén disposto a colaborar para que todo o que ten que vir sexa unha realidade”, asegurou o líder dos populares galegos tendéndolle a man e ofrecéndolle toda a súa colaboración ao novo presidente local para que o concello “siga avanzando”.

Neste sentido, Rueda avanzou que en cuestión de meses a autovía AG-59 “será unha realidade” e que con iso farase posible “a vertebración definitiva” de toda unha comarca que “demandaba” e “necesitaba” esta infraestrutura. De feito, un dos seus tramos xa está próximo á súa apertura e o seguinte avanza a bo ritmo.

“Os veciños da Estrada déronme un gran apoio nas eleccións autonómicas e eu teño que cumprir os compromisos adquiridos a cambio desa confianza”, subliñou o presidente reivindicando a aposta do seu Goberno por este concello en proxectos xa consolidados como a Academia Galega de Seguridade Pública (AGASP) e noutros que aínda están por vir.

Puxo en valor así a recente inauguración do novo edificio xudicial, que “é o primeiro que se fai en Galicia acorde aos requirimentos da Xustiza moderna”; así como a consolidación dun centro de saúde que “é unha referencia do modelo de sanidade pública que queremos para toda Galicia”.

Anunciou ademais a futura ampliación do polígono industrial da vila para “responder á potencia económica” das empresas instaladas nel e subliñou o seu compromiso de poñer en marcha novas vivendas públicas e asumibles “para que a xente que decide non vivir nas grandes cidades poida ter a oportunidade de instalarse na Estrada e facer que esta vila siga consolidándose como un lugar de oportunidades”.

UN NOVO PERÍODO CUN PROXECTO INTELIXENTE E BEN DEFINIDO

Pola súa banda, o presidente provincial do PP de Pontevedra, Luis López, destacou a “transición exemplar” da agrupación local, que pecha así a “era” do presidente saínte, José López Campos –ao que definiu como “un político modélico cunha xestión exemplar que converteu A Estrada pesimista nunha Estrada orgullosa”– e abre o período de Gonzalo Louzao. Un novo período, que, augurou, “vai durar moitos anos porque ten un proxecto intelixente e ben definido”.

López lembrou que Louzao leva só ano e medio ao fronte da alcaldía, “aínda que parecen vinte polo seu aplomo e capacidade de traballo”. Unhas virtudes que, na súa opinión, non só quedan acreditadas neste tempo á fronte do Concello, senón que tamén “van beneficiar agora ao PP da Estrada ao asumir a súa presidencia cun equipo unido, amplo e moi preparado”.

“Este concello é un exemplo de como facer as cousas porque fíxose fácil algo moi difícil, que é saber dar o relevo, e isto permítenos abrir hoxe dous camiños: o dunha Presidencia forte para o partido e o dunha Alcaldía, a maior beneficio de todos os estradenses, para moitos anos», rematou o presidente provincial.

Parécense en exceso

Pedro Puy.

«Os extremos tócanse». Tal pareceu que acontecía o pasado mércores na Comisión de Política Territorial do Congreso, no debate dunha proposición non de lei do BNG relativa ao traspaso de competencias á comunidade autónoma de Galicia. A mesma proposta, por certo, que xa fora rexeitada polo noso Parlamento ao contar só co apoio do grupo nacionalista. O argumento do BNG é que o país «perde poboación, actividade industrial, emprego e servizos públicos», e que semellante desastre só pode remediarse exercendo a soberanía en todos os ámbitos acadando, a ser posible «nun espazo de tempo relativamente próximo», un «novo estatus político de nación».

Non deixa de resultar paradóxico que quen considera que son os gobernos autonómicos dos últimos quince anos os responsables de semellante desastre poboacional, industrial, laboral e dos servizos públicos, deveza por traspasarlle a ese Goberno autonómico novas competencias. Porque de materializarse algunha das demandas implícitas na idea que ten o BNG sobre o «estatus de nación», como no caso da súa reivindicación dun sistema de financiamento como o vasco, con toda seguridade onde só eles ven hoxe un desastre todos poderíamos comprobar o que é unha verdadeira catástrofe. Consecuencias de primar o «estatus de nación» sobre, ou a costa, do benestar real da cidadanía de Galicia.

Na mesma sesión o voceiro de Vox non só se opuxo a realizar novos traspasos competenciais a Galicia, senón que manifestou que eles queren liquidar o Estado das autonomías e os poderes executivos e lexislativos autonómicos, porque defenden «un Estado ao servizo da unidade de España», e porque «o benestar da nosa patria» depende de que consigamos un «estado moderno no que non existan 17 ordenamentos xurídicos distintos». Así, en paradoxo parello e inverso ao anterior, quen máis vocea as «traizóns» á nación española do «criminal» Goberno de Sánchez é quen solicita que se lle devolvan a ese Goberno de Sánchez todas as competencias que teñen as comunidades. O benestar, agora dos españois, subordinado a súa idea da patria.

O Estado das autonomías, pese as súas eivas (que as ten), e ao igual que outros sistemas políticos de tipo federal, ten a vantaxe de que permite acercar os ámbitos competenciais aos niveis territoriais de forma que o gasto público pode á vez aproximarse ás preferencias e necesidades dos residentes de cada circunscripción aproveitando as economías de escada na provisión de bens e servizos públicos no territorio. E precisamente esa é a forza do Estado das autonomías, a de permitir combinar racionalmente as preferencias políticas dos residentes en cada territorio e a eficiencia do gasto. Nos sistemas federais o reparto competencial oriéntase á mellora do benestar; xusto ao contrario do que defenden uns e outros nacionalistas, que priman a acumulación de competencias nun nivel de Goberno aínda que sexa a costa do benestar das persoas. «Os extremos tócanse». A frase que o centro virtual Cervantes di que denota «exceso» pode non ser de aplicación literal a este caso. Pero os nacionalistas extremos e os extremos nacionalistas cando antepoñen o estatus político ao benestar das persoas, parécense moito. En exceso(s).

Deputados do PPdeG visitan as instalacións de AGAELA en Santiago e amosan o compromiso da Xunta cos enfermos de ELA a través de axudas directas de 12.000 euros e as futuras rebaixas fiscais

Os deputados do Grupo Popular Carmen Pomar, Rubén Lorenzo e Gonzalo Trenor visitaron hoxe as novas instalacións da Asociación Galega de Afectados pola Esclerose Lateral Amiotrófica (AGAELA) en Santiago e salientaron o compromiso da Xunta con estes enfermos, que se manifesta na axuda anual de 12.000 euros para cada enfermo e as anunciadas rebaixas fiscais que se aplicarán desde o vindeiro ano. Pola contra, criticaron que “un ano despois da aprobación da Lei ELA, os enfermos, os seus familiares e coidadores aínda seguen esperando as axudas prometidas polo Goberno de Pedro Sánchez”.

Carmen Pomar, Rubén Lorenzo e Gonzalo Trenor felicitaron aos responsables de AGAELA polo traballo que realizan de atención e compromiso cos afectados e familiares de ELA, “un esforzo para o que sempre terán ao seu carón tanto ao Goberno de Alfonso Rueda como ao Partido Popular”.

Neste sentido, lembraron que Galicia foi a primeira comunidade autónoma de España en contar cunha axuda directa para as persoas diagnosticadas con esclerose lateral amiotrófica. En concreto, a Xunta subvenciona con ata 12.000 euros ao ano a cada paciente con esta enfermidade para que poida facer fronte aos cuantiosos gastos que debe facer fronte para conseguir vivir nunhas condicións dignas, aportación que poderá destinarse a sufragar aqueles gastos que nos estean cubertos polo sistema público de saúde.

AXUDAS E DESGRAVACIÓNS FISCAIS

“Estas importantes axudas, para as que o Goberno galego destina este ano 2,4 millóns de euros, veranse complementadas en 2026 con desgravacións fiscais ás que poderán acceder os enfermos de ELA, tal e como xa anunciou esta semana o Presidente Rueda que se recollerá nos orzamentos da Xunta para o vindeiro ano”, subliñaron os deputados populares.

Porén, criticaron o “desprezo e engano que están sufrir os enfermos de ELA por parte do Goberno de Pedro Sánchez, incapaz de poñer enriba da mesa unha partida orzamentaria para dar cumprimento ao recollido na Lei aprobada hai máis de un ano por unanimidade do Congreso”.

“A parálise e extrema debilidade na que vive o actual Goberno de España é tan patente que, ademáis de ser incapaces de aprobar uns orzamentos do Estado desde hai tres anos, son incapaces de conseguir 230 millóns de euros para financiar a Lei ELA e atender as demandas dos enfermos, a pesar de que son capaces de mover milleiros e milleiros de euros para cumprir coas demandas dos seus socios parlamentarios e de contar con cuantiosos fondos europeos cos que atender estas necesidades”, sinalaron.

O PPdeG asegura que o remate da autovía Nadela-Sarria é a mellor demostración do compromiso do Goberno galego co desenvolvemento e a mellora das infraestruturas da provincia de Lugo

Os deputados do Grupo Popular Nicole Grueira e Enrique Barreiro, acompañados do alcalde do Páramo, José Luís López, e da voceira do PP en Sarria, Carmen José López, salientaron hoxe que a aprobación do proxecto de trazado do último tramo da futura vía autovía Nadela-Sarria “é a mellor demostración do compromiso firme do Goberno galego co desenvolvemento e a mellora das infraestruturas de Lugo, fronte a un Goberno central que o único que fai é poñer atrancos ao progreso desta provincia: sen trens, sen AVE, con estradas nacionais en pésimo estado e cunha autovía a Santiago en permanente prórroga de finalización”.

“Mentres o Goberno de Pedro Sánchez leva anos esquecendo e desconectando a provincial de Lugo en materia de comunicacións por estrada ou ferroviarias, o Goberno de Alfonso Rueda actúa con responsabilidade e aposta por mellorar as comunicacións nesta provincia, co obxectivo de garantir a igualdade de oportunidades para todos os lucenses”, manifestaron.

En concreto, destacaron que a conversión en autovía de todo o corredor Lugo-Sarria, logo de que a Xunta aprobada esta semana o proxecto de desdobramento do último tramo de 13,5 quilómetros entre Nadela e Pobra de San Xiao, permitirá acurtar o tempo de viaxe entre ambas localidades e beneficiará aos máis de 100.000 veciños que residen nesta zona.

“Fronte á deixadez do Goberno central con Lugo, o Goberno galego cumpre, inviste, planifica e mellora as infraestruturas que son clave para o futuro da provincia, que serán unha peza fundamental para atraer investimento, xerar emprego e fixar poboación nesta provincia”, afirmaron.

O Grupo Popular defende que a Unión Europea manteña recursos equivalentes e homologables á actual PAC e aos fondos FEAGA e FEDER

Os deputados do Grupo Popular Miguel Ángel Viso e Cristina Campero defenderon hoxe o mantemento por parte da Unión Europea dun orzamento específico e suficiente para o sector agrícola e gandeiro, con recursos equivalentes e homologables á actual Política Agrícola Común (PAC) e aos fondos FEAGA e FEADER, de forma que se garanta a competitividade, modernización e viabilidade futura do sector.

Cristina Campero e Miguel Ángel Viso visitaron a explotación gandeira en extensivo Balín na comarca da Limia, onde mantiveron un encontro cos seus responsables para abordar a situación actual do sector primario e o futuro da Política Agrícola Común ante a proposta da Comisión Europea de reducir os fondos nun 20 por cento no próximo marco financeiro.

PREOCUPACIÓN POLA VIABILIDADE DAS EXPLOTACIÓNS

Durante a reunión, os gandeiros trasladaron aos deputados populares a súa preocupación pola viabilidade das explotacións agrogandeiras, especialmente as de pequena e mediana escala, que dependen en boa medida das axudas europeas para manter a súa actividade. Neste sentido, alertaron de que un recorte desa magnitude podería ter un forte impacto sobre a economía rural, o emprego no agro e a continuidade das explotacións familiares.

Os deputados populares mostraron o seu apoio incondicional ás demandas do sector e manifestaron a súa clara oposición a calquera recorte dos fondos da PAC, por consideralos unha ameaza directa ao futuro do medio rural galego. Ademais, subliñaron a importancia de que a Unión Europea manteña un compromiso firme co sector primario, especialmente nas rexións con características singulares como Galicia, onde a dispersión xeográfica, o minifundismo e o avellentamento da poboación agraria requiren dunha atención específica.

“Non podemos permitir que o esforzo e dedicación das nosas mulleres agricultoras e gandeiras se vexa penalizado por decisións que non teñen en conta a realidade do rural galego”, aseguraron os deputados, e avanzaron que “desde o PP defenderemos, tanto en Galicia como en Madrid e en Bruxelas, unha PAC forte, xusta e adaptada ás necesidades do noso territorio”.

Así, incidiron que o Partido Popular se compromete a seguir traballando da man dos colectivos agrogandeiros, escoitando as súas propostas e levando a súa voz ás institucións para evitar que o medio rural quede atrás nas políticas europeas. “Todo isto porque a defensa do campo galego e do papel fundamental que desempeñan as mulleres no sector primario é e seguirá sendo unha prioridade na axenda política do PP”, anotaron.

O PPdeG reclama ao Goberno central a inmediata posta en marcha do IVE franquiciado, que aliviaría a carga fiscal de máis de 100.000 autónomos galegos

Os deputados do Grupo Popular Julio García Comesaña e Manuel Santos demandaron hoxe ao Goberno central a aplicación inmediata do réxime especial de franquicia do IVE, previsto na Directiva europea 2020/285 e que debía estar vixente desde o 1 de xaneiro de 2025, o que aliviaría considerablemente a carga fiscal de máis de 100.000 autónomos galegos que teñen un volume de negocio por baixo dos 85.000 euros. “Pola contra, o Goberno de Pedro Sánchez prefire implantar unha suba considerable das cotas que pagan os autónomos á Seguridade Social, unha proposta que só é defendida polo Partido Socialista e que representa unha nova derrota para o Goberno”, indicaron.

Julio García Comesaña e Manuel Santos mantiveron un encontro en Pontevedra co presidente e a vicepresidenta da Asociación de Autónomos e Pequenas Empresas de Galicia, José Ramón Caldas e Silvia Crespo, no que abordaron as consecuencias da demora do Goberno de España na posta en marcha do réxime especial de franquía do IVE.

Esta norma, xa aplicada noutros países da Unión Europea, permitiría eximir do pago e da liquidación periódica do IVE ás pequenas empresas e autónomos cun volume de negocio anual inferior aos 85.000 euros, reducindo notablemente os custes administrativos e a carga burocrática que soporta o colectivo.

57% POR BAIXO DOS 85.000 EUROS

Segundo os datos da Axencia Tributaria, arredor do 57 por cento dos declarantes do IVE en España facturan por baixo dese limiar, o que suporía máis de 100.000 autónomos galegos potencialmente beneficiarios. Porén, España é un dos poucos Estados membros que aínda non transpuxo a Directiva, o que motivou un Ditame Motivado da Comisión Europea en xullo de 2025, paso previo a unha posible sanción por incumprimento.

“Estamos a falar dunha medida pensada para axudar, e que o Goberno converteu nun novo agravio, porque cada mes que pasa sen aplicala supón máis burocracia, máis custes e menos competitividade para miles de pequenos negocios galegos”, sinalou Manuel Santos.

Pola súa parte, Julio García Comesaña lamentou que “mentres Europa busca facilitar o crecemento dos autónomos e pemes, o Executivo central segue instalado na parálise normativa e na improvisación fiscal”.

INICIATIVAS PARLAMENTARIAS

Durante o encontro, os deputados populares explicaron que o Partido Popular demandará tanto no Parlamento de Galicia como no Congreso dos Deputados que o Goberno de España proceda a transpoñer con carácter urxente a Directiva 2020/285, poñendo en funcionamento o réxime de franquía antes de rematar o ano e garantindo unha simplificación real do sistema, sen novas cargas nin limitacións adicionais.

“Desde Galicia, o PP seguirá esixindo políticas que dean respiro ao noso tecido produtivo e que recoñezan o esforzo dun colectivo esencial para a economía e o emprego da provincia”, concluíron.

O Grupo Popular defende o traballo dos servizos de inspección de servizos sociais da Xunta e critica que o BNG “volva repetir hoxe como un papagaio as falsidades que utilizou Ana Pontón no Pleno”

A portavoz de Política Social do Grupo Popular, Raquel Arias, defendeu hoxe a todo o persoal de inspección de servizos sociais da Xunta ante o novo ataque que sufriron hoxe por parte do BNG, logo de que o deputado Iago Tabarés “repetira como un papagaio todas e cada unha das falsidades coas que a súa lideresa Ana Pontón aderezou a súa pregunta ao Presidente Rueda no Pleno o pasado mércores”. “Para a súa tranquilidade, o peche das vivendas comunitarias para maiores de Amoeiro e Xinzo son a mellor demostración de que a Xunta vela porque os usuarios destes centros teñan os mellores coidados, cos mellores medios e atendidos polos mellores profesionais, e, se isto non é así, realiza os correspondentes requirimentos e, en último caso, se pecha o servizo inmediatamente”, explicou.

Raquel Arias lamentou que “o deputado nacionalista non atendera ás explicacións profusas que deu o Presidente Rueda no último Pleno sobre as razóns do peche das vivendas comunitarias de Amoeiro e Xinzo, onde quedou claro que nestas casas do maior leváronse a cabo varias inspeccións, cos conseguintes requirimentos, e se procedeu ao seu peche contundente no momento que se comprobou que non adoptaban as medidas oportunas para prestar a mellor atención aos maiores”.

“O deputado nacionalista tampouco se quixo enterar no pasado Pleno de que, unha vez decidido o peche destas dúas vivendas comunitarias de maiores, a Xunta púxose inmediatamente en contacto coas súas familias para comunicarlles a situación e proceder á reubicación de todos os usuarios en centros públicos autonómicos da contorna”, destacou.

A deputada popular criticou “a dobre moral do BNG, obsesionado con intentar crear malestar entre os usuarios dos servizos de atención á dependencia en Galicia ao mesmo tempo que aplauden no Congreso que ao País Vasco se lle pague a metade do custo da dependencia e a Galicia se lle reduza ano tras ano a aportación estatal, chegando o pasado ano ao 35 por cento”.

O Parlamento solicita a realización de campañas para atraer á mocidade aos comercios locais

O Parlamento galego aprobou hoxe a proposición non de lei do Grupo Popular, que non contou co voto favorable dos deputados do PSdeG, a través da que se solicita a realización de campañas focalizadas en atraer á mocidade aos comercios locais, co fin de xerar vínculos de valor deste sector en Galicia e posibilitar tanto unha posible remuda xeracional como a fidelización de potenciais clientes.

A portavoz popular de Comercio, Felisa Rodríguez, considerou “imprescindible desenvolver campañas específicas dirixidas á mocidade, empregando os seus modos de interacción e comunicación, que se centran no ámbito en liña e nas redes sociais”.

NOVA CAMPAÑA PARA O CURSO 2025-26

Neste sentido, lembrou que a Xunta puxo en marcha este ano a campaña Localízate! No teu comercio local, dirixida a conectar aos estudantes de ESO e ciclos formativos de grao básico co comercio de proximidade. Os obxectivos principais desta iniciativa, na que participaron 600 estudantes das cidades de Ourense, A Coruña, Vigo e Lugo e máis de 70 comercios locais, son achegar o comercio local aos máis novos, promover estes establecementos e fomentar a sostibilidade.

“Logo do éxito desta campaña no fomento dunha conexión real da mocidade co comercio local, a Xunta xa está na fase de captación ou inscrición de participantes nas sete grandes cidades galegas para desenvolver unha nova edición neste curso 2025-26, co obxectivo de duplicar as cifras da primeira convocatoria e procurando sensibilizar, especialmente coa fase práctica, sobre a importancia e a valía da experiencia de compra no comercio local”, indicou Felisa Rodríguez.