O PPdeG reivindica a importancia da educación para que as mulleres vivan “en liberdade”: “Nin caladas, nin submisas”

O Partido Popular de Galicia reivindicou hoxe, co gallo do 25N, a importancia da educación para que as mulleres vivan “en liberdade” fronte a unha esquerda que “pretende silencialas”.

“Todas estas mulleres que representamos ao PPdeG imos seguir alzando a voz imos pedir que sexamos mulleres en liberdade: nin caladas, nin submisas”, expresou a secretaria xeral do PPdeG, Paula Prado, no acto co que o partido conmemorou o Día internacional da eliminación da violencia contra a muller, e que tivo lugar na contorna da significativa avenida da Liberdade, no barrio de Santa Marta de Santiago de Compostela.

Participaron, entre outras, a responsable de Política Social e Igualdade no Goberno galego, Fabiola García; a responsable de Medio Ambiente no Goberno galego, Ángeles Vázquez; a presidenta provincial do PP de Lugo, Elena Candia; e a vicesecretaria de Igualdade do PPdeG, Raquel Touriño; así como alcaldesas, deputadas autonómicas e nacionais, e senadoras.

O PPdeG avogou este ano por incidir na importancia de educación, porque “é neses primeiros pasos, nos colexios e institutos, onde está parte da clave da erradicación”. “Na educación galega estase facendo un magnífico labor nesta dirección a pesar de quen hai quen queira boicoteala”, dixo Prado.

Nese sentido, sinalou á esquerda galega, que enviou aos centros educativos materiais didácticos como un no que converteron a un referente da nosa cultura, Rosalía de Castro, nunha muller calada e submisa, cunha mordaza na boca. “Pero nós non o imos permitir, en Galicia queremos mulleres libres, que poidan falar nos centros educativos, na política e en calquera ámbito, porque ese tamén é un xeito de loitar contra a violencia de xénero”, deixou claro a secretaria xeral do PPdeG.

Por iso, cunha imaxe de Rosalía de Castro sorrinte e sen mordaza, co lema ‘Mulleres en Liberdade: nin caladas, nin submisas’, o Partido Popular de Galicia comprometeuse a traballar nesa dirección.

Así mesmo, Prado fixo un chamamento a “non confiar nun PSOE e un BNG que van a favor da corrupción e en contra as mulleres, apoiando a un Goberno de Sánchez corrupto”, que “presumía de encabezar o Goberno central máis feminista da historia, algo que a día de hoxe parece unha broma”.

“Non hai nada menos feminista que a Lei do ‘só si é si’, con máis de 1.500 agresores beneficiados; o mesmo que pretender combater a prostitución rodeándote de compañeiros que a consumen; ou comprar en AliExpress unhas pulseiras antimaltrato defectuosas para as mulleres más vulnerables”, abundou.

Por último, agradeceu a todas as presentes a demostración cada día da “forza das mulleres do PPdeG” e o “compromiso” do partido coa eliminación da violencia contra a muller, e lembrou a todas as mulleres que no último ano foron asasinadas en toda España. “Imos seguir traballando para eliminar esta lacra social de primeira magnitude”, concluíu.

A IMPORTANCIA DE QUE AS MULLERES ESTEAN XUNTAS NESTA LOITA

Pola súa banda, Fabiola García subliñou que o PPdeG “vai continuar sensibilizando e concienciando sobre a importancia que ten que as mulleres estean xuntas nesta loita, reclamando e defendendo sempre os seus dereitos”.

A responsable de Igualdade no Goberno galego fixo fincapé en sensibilizar e concienciar ás mulleres novas de Galicia sobre os riscos que supón nestes momentos utilizar as novas tecnoloxías: “Nunca, nunca, deben ser controladas a través das redes sociais, dos seus dispositivos móbiles, porque se o consenten, o machismo gaña”.

Ademais, incidiu en que o PPdeG vai continuar reclamándolle ao Goberno central máis efectivos policiais na nosa Comunidade, “máis policía que estea nas rúas para continuar protexendo e defendendo a todas as vítimas de violencia de xénero”.

Para rematar, criticou ao Goberno de Sánchez polos “fallos que se están a dar unha e outra vez nas pulseiras antimaltrato, no sistema Cometa, que debería protexer cada día a milleiros de mulleres vítimas”.

O PPdeG denuncia o “taxazo do lixo” e os seus graves prexuízos para máis de 200 concellos rurais pola dispersión da poboación

As deputadas do Grupo Popular Dolores Hermelo e Patricia García denunciaron hoxe en Cangas o “taxazo do lixo” do PSOE e BNG como un novo ataque aos petos da cidadanía e o seu “afán recadatorio cun servizo básico”, especialmente prexudicial para as zonas rurais. Así, recordaron que a normativa estatal, que cualifican de “inxusta, antisocial e centralista”, non atende a realidade da Comunidade galega, con máis de 200 concellos de menos de 5.000 habitantes.

Dolores Hermelo e Patricia García reprocharon a socialistas e nacionalistas que opten pola opción máis gravosa das que ofrece a directiva comunitaria, “que pretenden utilizar como coartada para xustificar unha decisión arbitraria que carga nas familias o financiamento deste servizo municipal”.

As deputadas defenderon a creación dun sistema flexible de financiamento que permita aos concellos utilizar fondos propios ou mediante modelos mixtos e adaptados ao territorio, co obxectivo de “ampliar as bonificacións sociais para colectivos vulnerables, como pensionistas ou autónomos con baixos ingresos, do mesmo xeito que están a facer noutros países da UE”.

SOBRECARGA FISCAL

Neste sentido, criticaron que, pola contra, “agora estase a duplicar, triplicar ou quintuplicar o recibo”, poñendo como exemplos disto a concellos como Cangas ou Vigo. Por iso, Patricia García demandou ao alcalde de Vigo, “que non executa o 100 por cento do seu orzamento, que utilice o superávit para mitigar e reducir a taxa do lixo, como están a facer outros municipios e administracións, como a Xunta”.

“Este taxazo non vai repercutir na mellora do servizo e vai supoñer unha sobrecarga fiscal para o 22 por cento dos fogares galegos que teñen dificultades para os seus gastos básicos”, argumentou Dolores Hermelo, ao que apuntou que “alegan un ecoloxismo de pose, cunha lei estatal mal deseñada, que non conta cunha avaliación real do impacto económico nos municipios, nin tampouco se prevén fondos de compensación, dado que non se destina un só recurso á educación ambiental nin á reciclaxe industrial”.

O PPdeG salienta que a Xunta destinará máis de un millón de euros na adecuación da Oficina de Emprego de Monforte para que tamén acolla o Polo de Emprendemento

As deputadas do Grupo Popular Katy Varela e Encarna Amigo salientaron hoxe que a Xunta destinará máis de un millón de euros na adecuación da actual oficina de emprego de Monforte para que acolla tamén o Polo de Emprendemento e Apoio ao Emprego, unha entidade que, desde a súa posta en marcha hai tres anos leva atendido uns 300 proxectos empresariais.

Nunha visita ás actuais instalacións do Polo de Emprendemento de Monforte, a través do que se presta asesoramento para proxectos impulsados por emprendedores da capital monfortina, Carballedo, Chantada, Taboada, Bóveda, Pantón, A Pobra de Brollón, O Saviñao, Sober, Folgoso do Caurel, Quiroga e Ribas de Sil, as deputadas populares destacaron que as obras previstas pola Xunta adaptarán os máis de 570 metros cadrados das actuais dependencias da Oficina de Emprego na rúa Doutor Casares para acoller tamén o Polo de Emprendemento.

MÁIS MULLERES QUE HOMES

Neste sentido, Katy Varela e Encarna Amigo lembraron que o Polo de Emprendemento de Monforte púxose en marcha a finais do pasado ano 2022 e desde entón leva atendido arredor de 300 proxectos empresariais, practicamente o 30 por cento de todos os asesoramentos feitos en toda a provincia de Lugo.

Por sectores, predominan as iniciativas emprendedoras relacionadas coa hostalería (22 por cento), seguida do comercio (17 por cento) e do sector servizos (16 por cento). Ademais, o Polo de Emprendemento prestou arredor de 900 titorías a emprendedores da comarca de Lemos, dos que o 47 por cento fixéronse a homes e o 53 por cento a mulleres.

O PPdeG salienta o impulso ao turismo cultural de Ourense e do Ribeiro que supón a declaración como BIC do castro de San Cibrao de Lás

Os deputados do Grupo Popular José Luís Ferro e Juan Casares salientaron hoxe o impulso ao turismo cultural de toda a provincia de Ourense e especialmente para a comarca do Ribeiro a recente declaración pola Xunta do castro de San Cibrao de Lás como ben de interese cultural (BIC).

Nunha visita ao castro, acompañados do alcalde de San Amaro, Fernando Rodríguez, e a concelleira de Punxín Diana Sulleiro, os deputados populares salientaron que coa declaración de San Cibrao de Lás como BIC “refórzase a protección legal, a conservación e a posta en valor dun dos castros máis importantes do noroeste peninsular, tanto pola súa dimensión como polo seu extraordinario estado de conservación.

“Trátase dun dos xacementos arqueolóxicos máis singulares e visitados de Galicia, de grande valor cultural e histórico e un enclave crucial para o estudo da idade de ferro, especialmente no seu paso cara ao período romano”, manifestaron. Ademais, destacaron “o bo estado de conservación do poboado, xa que só un 15 por cento da súa superficie está escavada e musealizada, mantendo moita da súa integridade orixinal”.

José Luís Ferro afirmou que esta declaración como BIC “confirma o compromiso firme da Xunta coa defensa do patrimonio histórico e consolida o proxecto de recuperación integran do castro, que ata agora carecía dun marco de protección axeitado proporcional á súa relevancia”.

Pola súa banda, Juan Casares lembrou que “Florentino López Cuevillas, considerado como o pai da prehistoria galega, dirixiu en 1922 a primeira escavación en San Cibrao de Lás, despois dunha visita á zona que fixera o ano anterior canda Vicente Risco”. “Por este motivo, este castro representa unha mostra máis do labor que os galeguistas do cenáculo ourensán desenvolveron para sustentar e dar forma obxectiva á personalidade propia de Galicia”.

O PPdeG destaca que o Camiño Inglés incrementou un 8 por cento o número de peregrinos neste ano

Os deputados do Grupo Popular Cecilia Vázquez, Ethel Vázquez e Jesús María Fernández Rosende destacaron hoxe o impulso que está a ter o Camiño Inglés, que se manifesta no incremento dun 8 por cento do número de peregrinos este ano, situándose como a cuarto itinerario xacobeo máis percorrido en Galicia, só por detrás do Francés, o Portugués e o Portugués da costa. “Estamos ante un atractivo turístico para Betanzos, reflexado nos case 5.000 peregrinos que pernoctaron no albergue da Casa da Pescadería, un edificio que a Xunta mellorará este ano con obras que roldarán os 200.000 euros”, sinalou Cecilia Vázquez.

Máis de 29.800 peregrinos levan percorrido este ano o Camiño Inglés ata Compostela, dos que practicamente a metade eran de procedencia estranxeira. Andalucía, Madrid, Comunidade Valenciana e Cataluña son as comunidades das que proceden a maior parte dos peregrinos, mentres que a nivel internacional destacan Italia, Estados Unidos, Reino Unido, Portugal e Alemaña.

Por outra banda, Ferrol foi o punto de partida escollido pola meirande parte dos peregrinos (95,9 por cento), ao tempo que tamén máis do 97 por cento fixeron o camiño a pe.

SETE ALBERGUES ENTRE FERROL E SANTIAGO

Cecilia Vázquez, Ethel Vázquez e Jesús María Fernández Rosende visitaron o albergue Casa da Pescadería de Betanzos, un dos sete aloxamentos públicos cos que conta o Camiño Inglés entre Ferrol e Santiago. O albergue betanceiro dispón dunha capacidade para 36 peregrinos, que dispoñen no edificio dunha habitación e un baño adaptado.

Os deputados populares destacaron o compromiso da Xunta coa promoción do Camiño Inglés e mostra disto foi a colocación esta mesma semana de sendas mouteiras nas cidades británicas de Winchester e Reading.