O PPdeG pide a PSOE e Sumar que non bloqueen desde a Mesa do Congreso dos Deputados a tramitación da proposición de lei do PP para compensar ás familias o sobrecusto das dietas sen glute.
Os populares galegos fan este chamamento logo de que os deputados nacionais Jaime de Olano e Juan Andrés Bayón e a deputada autonómica Felisa Rodríguez mantiveran un encontro en Santiago de Compostela con representantes da Asociación de Celíacos de Galicia (ACEGA).
Un encontro no que os parlamentarios do PPdeG non só se interesaron polas actividades que desenvolve esta asociación, senón que tamén recolleron as súas demandas e puideron explicar en que consiste a proposición de lei rexistrada polo partido para compensar economicamente ás persoas celíacas.
Dado que estas teñen que asumir un sobrecusto medio superior aos 900 euros anuais na súa cesta da compra para poder cumprir unha dieta sen glute, o que o PP propón é que ninguén teña que escoller entre a súa saúde e a súa economía doméstica.
Por iso a proposición de lei –cuxa tramitación dependerá do que decidan os representantes do PSOE e Sumar na Mesa do Congreso– recolle propostas como a dedución no IRPF de ata 600 euros por cada membro da unidade familiar diagnosticado de enfermidade celíaca ou a creación dun Rexistro Estatal de Pacientes para garantir que todas as familias poidan acceder a esta axuda por igual.