O Parlamento galego insta á Xunta a priorizar o desenvolvemento pleno, autónomo e efectivo das políticas que protexen e xestionan o litoral galego

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se insta á Xunta de Galicia a priorizar as accións que desenvolva no marco da Lei de ordenación e xestión integrada do litoral de Galicia (Loxilga) e que permitirán á Comunidade galega desenvolver de xeito pleno, máis autónomo e efectivo as políticas para protexer e xestionar a nosa costa.

O portavoz popular de Medio Ambiente, Gonzalo Trenor, afirmou que “o pasado 1 de xullo de 2025 foi e será para sempre un dia histórico para Galicia porque é cando entra en vigor o decreto polo que esta comunidade asumiu as funcións e servizos traspasados polo Estado en materia de xestión da costa”. “Esta data marcou un fito para a Comunidade autónoma, porque desde entón asumimos o autogoberno pleno sobre o noso litoral, a primeira cesión competencial á Xunta en 17 anos”, apuntou.

MÁIS ACTUACIÓNS EN MARCHA

Neste sentido, lembrou que desde esa data a Xunta xa puxo en marcha o visor web, que recolle a información cartográfica necesaria para a aplicación da norma; creouse a Comisión interdepartamental de coordinación da ordenación do litoral; constituíuse o Foro do Litoral; aprobouse a Estratexia de Economía Azul de Galicia 2024-2027; estase traballando nas directrices de ordenación do litoral; adaptáronse os procedementos de competencia autonómica de autorización na zona de servidume de protección á nova Lei de ordenación do litoral; unificáronse nun formulario todas as solicitudes de autorizacións no litoral; e creouse o novo servizo Galicia Litoral, co que se ofrece a través da web da Consellería e do 012 información sobre consultas ao respecto dos procedementos.

De cara ao futuro, Gonzalo Trenor explicou que a Xunta xa está a traballar no concurso para unificar a estética dos establecementos hostaleiros de tempada e no procedemento integrado para a obtención de títulos no litoral, asociado á posta en marcha dun rexistro do litoral que dará conta das autorizacións e das concesións outorgadas.

Así mesmo, o portavoz popular destacou os máis de 2 millóns de euros que a Xunta ten previsto investir o vindeiro ano nunha senda que una a Galicia costeira de norte a sur, ao tempo que tamén se unificará nunha aplicación informática toda a información dispoñible sobre o litoral galego e se crearán reservas de solo nas que desenvolver actuacións de iniciativa pública que contribúan a mellorar o medio ambiente, o patrimonio natural e o cultural.

Por último, Gonzalo Trenor referiuse á revisión e actualización do catálogo de bens de valor cultural do litoral e o programa de revitalización do patrimonio do litoral, que permitan a recuperación de edificacións xa existentes de especial valor arquitectónico, histórico e cultural, garantindo ao mesmo tempo que os novos usos que se dean a estes inmobles non poñan en perigo os valores que aconsellaron a súa protección cultural.

O Parlamento galego reclama ao Goberno de España a urxente cesión gratuíta a Galicia de vivendas e solos propiedade da SAREB para destinalos a políticas públicas de vivenda

O Parlamento de Galicia aprobou hoxe a proposición non de lei do Grupo Popular, que non contou co voto favorable dos deputados do PSdeG, a través da que se reclama unha resposta urxente do Goberno de España ás reiteradas solicitudes de cesión gratuíta e definitiva das vivendas e solos propiedade da Sociedade de Xestión de Activos procedentes da Reestruturación Bancaria (SAREB) situados en Galicia, có fin de destinalos a políticas públicas de vivenda.

O deputado popular Roberto Rodríguez lembrou que o Goberno galego “ten solicitado en infinidade de ocasións ao Goberno central a cesión ou venda de vivendas propiedade da SAREB” para poñelas no mercado, ante o que “a resposta sempre foi a mesma: remitir listados de vivendas que se ofrecían e que non estaban en condicións de ser adquiridas: unhas non estaban rematadas, outras non dispoñían de licenza de primeira ocupación nin posibilidade de obtela, e a meirande parte emprazábanse en concellos sen demanda, non que non se xustificaba a adquisición”.

“Agora xa non hai posibilidade de que a Xunta adquira máis vivendas porque a SAREB pechou toda posibilidade de venda ou cesión cando acordou traspasalas á sociedade de vivenda anunciada polo Goberno central, a pesar de que Galicia aínda dispón de fondos para facerse con esas vivendas”, sinalou o deputado popular.

Roberto Rodríguez criticou que, “como colofón a este exemplo de boicot a aquelas administracións que, como a Xunta, queren actuar directamente na raíz do problema da vivenda e aumentar a oferta pública, o Goberno de Pedro Sánchez optou por transferir 55 millóns de euros a empresas privadas para que xestionen esas vivendas, que en Galicia serán adxudicadas ao marxe do rexistro de demandantes de vivenda”.

Deste xeito, considerou “incomprensible e intolerable que o Goberno central poña en mans privadas a xestión das 40.000 vivendas públicas da SAREB, que era a entidade que ía xestionar a nova empresa pública estatal de vivenda”. “O Goberno de Sánchez pon a xestión do problema que máis preocupa aos cidadáns nas mans dunha inmobiliaria, pero nada sabemos nin do proceso nin dos criterios de adxudicación deses alugueiros”, sinalou o deputado popular, quen concretou que “falamos de 40.000 vivendas e 2.400 solos onde, segundo os cálculos do propio Ministerio, se poderían construír 55.000 novas vivendas”.

Roberto Rodríguez amosou a preocupación porque esas vivendas “non sexan cualificadas como vivendas públicas, unha estratexia do Goberno central que non entendemos cando as comunidades autónomas, en particular Galicia, leva anos pedindo a cesión gratuíta de activos da SAREB para contribuír a incrementar o noso parque de vivendas públicas”.

“Pedimos ao Goberno central que recapacite e ceda gratuitamente á Xunta as vivendas da SAREB que estean en condición de ser habitadas, permitindo que esas vivendas se incorporen nos procedementos ordinarios de adxudicación de vivendas públicas, respectando a normativa e non xerando máis confusión entre a cidadanía”, rematou.

O PPdeG demanda ao Goberno de Sánchez a baixada do IVE dos alimentos básicos para “aliviar o afogamento económico que sofren as familias”

O Partido Popular de Galicia demanda ao Goberno de Sánchez que cumpra o mandato de rebaixar o IVE aos alimentos básicos, tal e como lle teñen demandado tanto o Parlamento galego como o Congreso, para así “aliviar o afogamento económico que sofren as familias ante a suba de prezos”.

“Non se entende que o Goberno central que máis impostos recada da historia siga afogando as economías domésticas cando o que estas precisan é máis apoio, máis certezas e máis seguridade”, denuncia neste sentido a secretaria xeral Paula Prado facéndose eco dunha situación económica na que “os prezos seguen subindo pero o poder adquisitivo non se recupera”.

A número dous dos populares galegos fixo estas declaracións aos medios esta mañá en Padrón logo de visitar diversos negocios da localidade xunto ao portavoz local do PP e deputado autonómico, Ángel Rodríguez Conde. Unha visita na que puideron comprobar de primeira man como o sector comercial reclama medidas que fomenten o consumo.

Medidas, como, por exemplo, o “exitoso” Bono Peixe posto en marcha polo Goberno de Alfonso Rueda e que contrastan coa “inacción” dun Pedro Sánchez que “segue sen facer caso” á iniciativa promovida polo PP para rebaixar o IVE dos produtos básicos e que xa foi aprobada tanto no Parlamento galego como no Congreso.

Paula Prado subliña que desde o seu partido seguirán insistindo desde todas as frontes ata conseguir esta rebaixa. “Xa bastante complicado está todo como para que nolo sigan poñendo cada vez máis difícil a negocios e clientes”, sostén.

“Está claro que as preocupacións de Sánchez son outras”, concluíu a este respecto a secretaria xeral facendo referencia á reunión secreta do presidente con Arnaldo Otegi para negociar a moción de censura ao Goberno de Mariano Rajoy e afeándolle que “teña tempo para os seus ‘chanchullos’ e non para o esencial”.

En clave local, Prado lamentou así mesmo que o alcalde socialista de Padrón «non se desmarque de Sánchez e do seu partido», algo que «trae nefastas consecuencias aos veciños e veciñas desta vila». Ao mesmo tempo, puxo en valor o labor de Ángel Rodríguez Conde e o grupo municipal do PP, que a partir de 2027 «volverán liderar o concello e deixarán atrás o actual desgoberno».

A NECESIDADE DE APOIO AO COMERCIO LOCAL

Pola súa banda, Rodríguez Conde quixo poñer en valor o esforzo que día a día fan os establecementos do pequeno comercio local e os autónomos para “conseguir levar adiante a súa actividade”. Un esforzo que se ten que ver correspondido, na súa opinión, por administracións que “escoiten as súas necesidades e inquedanzas”.

O portavoz do PP de Padrón recordou así que o seu partido leva tempo presentando iniciativas no Pleno municipal para demandar ao Concello que tome medidas para fomentar o consumo no pequeno comercio.

O PPdeG amosa o apoio á demanda para que o Ministerio de Transportes abandone o estudo da nova variante de Caldas e retome a proposta aprobada por unanimidade nos concellos en 2008

O portavoz do Grupo Popular, Alberto Pazos, e a secretaria xeral do PPdeG, Paula Prado, reuníronse no Parlamento de Galicia co portavoz do PP de Caldas de Reis, Fernando Pérez, e representantes das plataformas de Arcos da Condesa, Santa María e Godos para amosarlles o seu apoio á demanda para que o Ministerio de Transportes anule o actual estudo informativo do proxecto da variante oeste de Caldas de Reis e retome o trazado aprobado por unanimidade das forzas políticas deste concello e do veciño de Portas en 2008.

Alberto Pazos e Paula Prado, acompañados do tamén deputado popular Raúl Santamaría, rexeitaron que o Goberno de Pedro Sánchez, co beneplácito dos socialistas galegos, pretenda impoñer un novo trazado da variante de Caldas que causa graves prexuízos aos veciños tanto deste concello como da veciña localidade de Portas.

OPOSICIÓN DOS VECIÑOS

Deste xeito, amosaron o seu apoio á concentración convocada para o vindeiro sábado en Caldas de Reis coa que se pretende trasladar ao Goberno central a oposición dos veciños a todas as alternativas da nova proposta da variante oeste. Así mesmo, anunciaron a presentación de iniciativas no Parlamento de Galicia solicitando a anulación inmediata do estudo informativo elaborado polo actual Goberno central e que se elabore unha nova proposta de trazado da variante que adapte aos acordos unánimes dos Plenos municipais de Caldas e Portes do ano 2008.

“É incomprensible que o Goberno de Pedro Sánchez faga oídos xordos a unha demanda da gran maioría dos cidadáns destes concellos, que non entenden os intereses que pode haber para que se desprece o trazado respaldado unanimemente polos Plenos de Caldas de Reis e de Portas en 2008 e que supón unha afección ao territorio e ás propiedades moito menor que a nova proposta”, indicou Alberto Pazos.