O PPdeG salienta que a Xunta destinará o vindeiro ano 1,3 millóns de euros para a conservación do patrimonio histórico de Allariz

Os deputados do Grupo Popular Juan Manuel Casares e Víctor Baladrón, acompañados do portavoz do PP en Allariz, José Benito Grande, salientaron hoxe que a Xunta de Galicia investirá o vindeiro ano 1,3 millóns de euros na conservación do patrimonio histórico deste concello ourensá.

En concreto, e dentro do Plan Territorial de sostebilidade turística en vilas termais e cascos históricos, a Xunta destinará un millón de euros á realización de actuacións no casco histórico, espazos patrimoniais e a contorna do río Arnoia no municipio alaricán.

A este orzamento sumaranse outros 250.000 euros dentro do Plan Especial do Casco Histórico e 18.000 euros que se destinarán a traballos de conservación e posta en valor do castro de Armeá.

APOSTA POLA CONSERVACIÓN

“Este investimento directo de cerca de 1,3 millóns de euros do Goberno galego en patrimonio e bens de interese cultural converte a Allariz nun dos concellos máis apoiados pola Xunta de Galicia na realización deste tipo de actuacións”, salientou o deputado popular Víctor Baladrón.

Pola súa banda, Juan Manuel Casares afirmou que “este orzamento demostra non só o compromiso do Goberno galego con este concello ourensán, senón tamén unha aposta pola conservación destas pegadas que a nosa historia deixou no territorio e que constitúen unha parte esencial da nosa identidade cultural como galegos”.

O PPdeG cualifica de “misión cuasi imposible” alugar un piso en A Coruña logo da declaración da cidade como zona tensionada

Os deputados do Grupo Popular Ethel Vázquez e Jesús María Fernández Rosende cualificaron hoxe como de “misión cuasi imposible” alugar un piso na cidade de A Coruña, unha situación que se agravou logo da declaración como zona tensionada. Por este motivo, solicitaron ao Concello que “busque alternativas reais e efectivas que faciliten o acceso á vivenda, sen comprometer a estabilidade do mercado nin provocar unha desbandada da oferta”.

Tomando como base os datos oficiais do Observatorio da Vivenda coñecidos esta semana, Ethel Vázquez asegurou que a declaración da cidade de A Coruña como zona tensionada “non solucionou o problema da vivenda, senón que o agravou considerablemente”. Neste sentido, concretou que o citado informe pon de manifesto que o número de contratos de aluguer baixou un 38 por cento respecto ao pasado ano desde que se declarou a zona tensionada, unha caída que coincide, ademais, coa suba das rendas do aluguer a nivel xeral da cidade.

ADVERTENCIAS DA XUNTA E DO SECTOR INMOBILIARIO

“O principal efecto negativo da declaración de zona tensionada foi a baixada potencial do número de contratos asinados, porque se retiran pisos do mercado de alugueiro; o trasvase de vivendas do mercado de aluguer tradicional ao temporal; e o aluguer por separado de vivenda, trasteiro, garaxe ou mobiliario”, explicou Fernández Rosende.

Ethel Vázquez lembrou que estes efectos negativos “xa foron advertidos no seu momento desde o Goberno galego, porque queda claro que a declaración de zona tensionada non resolve en absoluto o acceso á vivenda, senón máis ben agrava o desaxuste entre a oferta e a demanda ao retraer propietarios e limitar a dispoñibilidade”.

Así mesmo, os deputados subliñaron que “as propias asociacións do sector inmobiliario aseguran que a nova regulación provocou que moitas vivendas se retirasen do mercado habitual de aluguer ou se reorientaran cara ao aluguer temporal ou por habitación, contribuíndo á redución drástica da oferta de pisos completos destinados ao aluguer tradicional”.

O PPdeG salienta que a Xunta incrementará ata os 10 millóns de euros o orzamento do Plan Saborea Calidade Diferenciada de Galicia

As deputadas do Grupo Popular Encarna Amigo e Katy Varela salientaron hoxe que a Xunta incrementará o vindeiro ano ata os 10 millóns de euros o orzamento destinado ao Plan Saborea Calidade Diferenciada de Galicia, a través do que se continuará impulsando a promoción, a diferenciación e o prestixio dos produtos galegos.

Nun encontro coa responsable da queixería da Gandería Quintián na localidade do Páramo en Lugo, as deputadas popular amosaron o recoñecemento e agradecemento a todas as produtoras e produtores de queixo e mel de Galicia, porque “demostran día tras día que no rural hai futuro, hai vida e hai proxectos que funcionan”.

COMPROMISO COA TERRA

“Estes produtores representan o compromiso coa terra, profesionais que creen no que fan e produtos elaborados cunha calidade extraordinaria”, sinalou Encarna Amigo, quen anotou que “a súa experiencia confirma que no rural galego se pode vivir, se pode crear emprego, se pode innovar e se pode prosperar”.

As deputadas populares compartiron cos propietarios da Gandería Quintián “a realidade diaria destas explotacións familiares, do esforzo que hai detrás de cada queiro e da importancia de manter vivas as denominacións de orixe que nos distinguen”.

Neste sentido, Katy Varela salientou “o impacto directo que teñen estas producións na fixación da poboación, na dinamización das comarcas e na creación de oportunidades para as novas xeracións”.