Día: 23 de diciembre de 2025

O presidente do Partido Popular de Galicia, Alfonso Rueda, celebrou hoxe desde A Mariña lucense que o PPdeG peche o ano 2025 “forte” e “nun bo momento”, como puido comprobar nas diferentes reunións de Nadal. “Nun bo momento por nós mesmos e non por demérito do resto”, apuntou.

Rueda encabezou este mediodía en Viveiro unha reunión con alcaldes e portavoces da comarca, acompañado da secretaria xeral do PPdeG, Paula Prado, e da presidenta provincial do PP de Lugo, Elena Candia, ademais doutros representantes do partido na provincia, coa alcaldesa Mariña Gueimunde como anfitrioa.

O líder dos populares galegos agradeceu aos alcaldes e portavoces que formen parte dun equipo do perfil que quere a xente en Galicia: “traballador e cos principios claros, sen montar líos innecesarios”.

Neste sentido, pediulles “seguir así”, tendo “capacidade de traballar moito” e “sendo serios cando hai que selo”, en comparación cun PSOE que “está dando un espectáculo sobre todo nesta provincia” e un BNG que “despois de dar tantas leccións, é incapaz de actuar en consecuencia”.

De cara ao 2026, Rueda instou aos representantes do PPdeG a “traballar unidos”, “facer as cousas o mellor posible” e “estar preparados para o que teña que pasar”, tendo en conta a incógnita respecto das eleccións xerais. “Pechamos un bo ano e collemos con moitas forzas para o 2026”, resumiu.

Por último, agradeceu o apoio que lle dan sempre, trasladoulles o seu apoio no ano e medio que resta de cara ás eleccións municipais e asegurou estar “encantado” de participar nesta reunión: “É imprescindible vervos, escoitarvos e que me digades as cousas con sinceridade e claridade”, concluíu.

A secretaria xeral do PPdeG, Paula Prado, reivindicou este martes, á espera de que a Audiencia Provincial «confirme» a resolución do xulgado que determina que a investigación por suposto acoso sexual contra o exconselleiro Alfonso Villares «acabou en nada», que o partido que dirixe Alfonso Rueda, a diferenza do PSOE, «sempre» puxo «a verdade por diante».

Prado atendeu aos medios antes de participar nunha reunión con alcaldes e portavoces da comarca da Mariña lucense, en Viveiro. «Finalizamos o ano con máis da metade dos concellos de Galicia tinguidos de azul», destacou.

E aproveitando a súa presenza na Mariña, de onde procede Villares, a número dous do PPDEG aludiu á decisión do xulgado de Ferrol de non abrir xuízo contra el. “Agora estamos pendentes de que a Audiencia ratifique esa resolución na que se demostrou que a investigación acabou en nada, pero desde o PPdeG o que queremos dicir neste caso, como noutros, é que respectamos absolutamente as decisións da Xustiza», indicou.

«E neste caso sempre puxemos a verdade por diante en todo momento, a diferenza do PSOE, un PSOE que sempre tenta darnos leccións», recalcou, para engadir que os populares, pola contra, «nunca» o fan. «Pero o PSOE si que é moi dado a dar leccións e logo non aplicarse ningunha», contrapuxo.

A continuación, esgrimiu que a Villares se lle esixiu «unha dimisión con todas as letras», mentres que José Tomé, tras a denuncia pola canle interna do PSOE, presentou a súa renuncia como presidente da Deputación de Lugo, pero retén a acta provincial e tamén a Alcaldía de Monforte de Lemos.

«DIMISIÓN PARCIAL QUE NON ADMITIMOS»

«É unha dimisión parcial que nós non admitimos e onte mesmo pediámoslle a súa dimisión como alcalde de Monforte», sentenciou Prado, quen acusou a Tomé de estar «a facer moito dano aos seus veciños e veciñas e tamén á provincia de Lugo».

Por iso, os populares insisten en que debe presentar «a súa dimisión completa como deputado provincial» e a número dous do PPdeG insistiu en que «non pode ser» que o PSdeG «siga consentindo esta situación e o BNG actúe coa hipocrisía» de reivindicarse como «feminista» sen aplicar «para nada» o feminismo «en realidade».

Ao seu xuízo, ao BNG «o único que lle preocupa» é «manterse nos cargos», polo que non «rompe» co PSOE nas institucións nas que gobernan.