O PPdeG amosa o firme compromiso da Xunta coa mellora da EDAR de Noia, na que investirá o vindeiro ano máis de 1,6 millóns de euros

Os deputados do Grupo Popular Magdalena Pérez e Ángel Rodríguez, acompañados do portavoz do PP de Noia, Santiago Freire, e outros concelleiros noieses, amosaron hoxe o firme compromiso do Goberno galego coa mellora da estación depuradora de Noia, que se manifesta nos máis de 1,6 millóns de euros que o vindeiro ano destinará para actuacións estruturais e tecnolóxicas nestas instalacións. “Agora falta por saber que van facer os responsables locais: se volver aos postulados do ano 2010, opoñéndose aos proxectos da Xunta; ou sumarse ao Goberno galego na mellora do saneamento do Concello de Noia e, en definitiva, da nosa ría”, manifestaron.

Magdalena Pérez e Ángel Rodríguez lembraron que o Plan Director de Saneamento de Noia, redactado por Augas de Galicia entre os anos 2020 e 2022, identificou as deficiencias máis relevantes desta rede, das estacións de bombeo e da propia EDAR, propoñendo actuacións a curto, medio e longo prazo para garantir a correcta depuración e mellorar a calidade das augas da ría.

DETERMINACIÓN, RIGOR E PLANIFICACIÓN

En concreto e para o cumprimento deste Plan Director, neste momento está en execución a mellora da EDAR de Noia, un proxecto ao que a Xunta destina case tres millóns de euros, xestionados polo anterior goberno municipal de Santiago Freire, dos que máis de 1,6 millóns de euros figuran no orzamentos de 2026, co obxectivo de que estas instalacións garantan o cumprimento dos parámetros de vertedura e permitan mellorar a calidade ambiental da ría.

“O Goberno galego está a actuar con determinación, rigor e planificación coa mellora da EDAR de Noia, nun roteiro de actuacións claro e fixado de acordo co Concello, con quen está disposto a seguir colaborando institucionalmente para avanzar na recuperación ambiental da ría de Muros e Noia e na protección do sector produtivo”, sinalou Ángel Rodríguez.

Porén, Magdalena Pérez cuestionou “cal vai ser o papel que quere xogar agora o Concello de Noia neste proxecto? Opoñerse aos proxectos da Xunta como aconteceu en 2010, obviando os criterios técnicos; ou poñerse a remar xunto co Goberno galego para poder aproveitar as oportunidades de mellora do sistema de saneamento municipal e o apoio que está dando a Xunta, sen obviar a realidade existente e asumindo as súas responsabilidades en materia de saneamento e depuración”.

Pola súa banda, Santiago Freire manifestou que “sería unha verdadeira mágoa que o traballo que se realizou nos últimos anos para avanzar na mellora do saneamento de Noia se vira paralizado agora por parte dos novos responsables, unha inexplicable decisión que non só prexudicaría a todos os veciños deste concello, senón tamén a todos aqueles que viven do marisqueo na nosa ría”.

O PPdeG esixirá no Parlamento galego que o Goberno central defenda en Europa os intereses da pesca galega do mesmo xeito que ao Mediterráneo

Os deputados do Grupo Popular Miguel Fidalgo e Felisa Rodríguez criticaron hoxe que o Goberno central priorizara defender os intereses da frota pesqueira do Mediterráneo fronte á galega na negociación dos novos TAC e as cotas pesqueiras, o que suporá un impacto para o sector pesqueiro galego de ata 65 millóns de euros. Por este motivo, anunciaron a presentación de iniciativas no Parlamento galego “para que todas as forzas políticas poidamos amosar o noso apoio á pesca galega e esixir un cambio de postura do Goberno de Pedro Sánchez: máis respecto aos nosos armadores e que non se primen os intereses do Mediterráneo sobre os da pesca galega”.

Nun encontro celebrado en Vigo con armadores galegos, Miguel Fidalgo e Felisa Rodríguez cualificaron de “pésimo” o resultado das negociacións dos TAC e das cotas pesqueiras acordados recentemente en Bruxelas, xa que se mantén o recorte do 70 por cento na xarda e se reducen un 40 por cento no lirio e un 13 por cento no abadexo.

“É deficiente que só se tivesen en conta criterios biolóxicos e non se atendesen os informes socioeconómicos que Galicia lle entregou, tanto á Comisión Europea como ao propio Ministerio, nos que se calculaba un impacto destas medidas para a frota galega de arredor de 65 millóns de euros”, lamentou Miguel Fidalgo.

RECORTES MÁXIMOS ATA O FINAL

Felisa Rodríguez criticou que “o interese do ministro nestas negociacións estivo centrado en mellorar as condicións do acordo para beneficiar ao sector pesqueiro do Mediterráneo, deixando a un lado a defensa da pesca galega e aceptando uns recortes que tanto a van prexudicar, chegando ata o punto de que os recortes máximos da proposta inicial acabaron plasmados no acordo fial”.

Diante desta situación, os deputados populares anunciaron a presentación no Parlamento de Galicia de iniciativas a través da que se esixa ao Goberno de Pedro Sánchez “un cambio e un respecto aos armadores galegos e ao bo traballo que levan desenvolvendo desde sempre, unha labor que debe ser recoñecida e defendida do mesmo xeito que está a facer co sector pesqueiro do Mediterráneo”.

Por último, Miguel Fidalgo criticou “a hipocrisía que o BNG está a demostrar neste asunto, porque mentres en Europa comparten bancada cos ecoloxistas, ao mesmo tempo son capaces de criticar desde Galicia que a Comisión Europea aplique criterios exclusivamente biolóxicos na súa decisión sobre as cotas pesqueiras sen incorporar a perspectiva socioconómica que beneficiaría á Comunidade galega”.