O PPdeG lamenta que o Goberno de Sánchez remate o ano mantendo o “boicot” ao traspaso da AP-9 a Galicia e inicie 2026 cun “castigo” na peaxe

O PPdeG lamenta que o Goberno de Sánchez remate o ano mantendo o boicot ao traspaso da autoestrada AP-9 a Galicia e vaia iniciar o 2026 cun “castigo” en forma de nova subida no custo das peaxes.

O deputado do PPdeG e vicepresidente segundo da Comisión de Transportes e Mobilidade Sostible, Celso Delgado, en declaracións remitidas aos medios, resume o 2025 como “un ano de boicot” da transferencia da AP-9, pese ao acordo unánime do Parlamento de Galicia e pese a tratarse dunha demanda reiterada dos galegos.

Delgado lembra que durante esta lexislatura a Mesa do Congreso —dominada por PSOE e Sumar— acordou 45 prórrogas —60 en total, se se teñen en conta as do anterior período— do prazo de presentación de emendas ao articulado da proposición de lei orgánica.

Despois das “reiteradas protestas” lideradas polos deputados do PPdeG, ese prazo concluíu o 22 de outubro e os socialistas rexistraron oito emendas opoñéndose frontalmente á transferencia da titularidade da AP-9. A maiores, “ata o día de hoxe, volvemos a atoparnos cunha posición de bloqueo por parte do PSOE”, que agora non quere dar o seguinte paso e que se reúna a ponencia do Congreso

Así, Delgado insiste na necesidade de que na Comisión de Transportes e Mobilidade Sostible da Cámara Baixa se constitúa “de xeito inmediato” a ponencia, aínda que xa non será posible facela antes de que remate 2025 e quedará adiada, polo menos, ata febreiro de 2026. “A estratexia de Sánchez, Puente e Besteiro é que esta iniciativa decaia e se esqueza polo fin da lexislatura, que eles mesmos saben que neste momento está nunha situación agónica”, sinala.

Nesta liña, o PPdeG critica que o Goberno central tampouco tivera en conta o ditame da Unión Europea e, lonxe de iniciar os trámites para o rescate da concesión, presentara alegacións afirmando que vai levar o tema ao TXUE, dilatando aínda máis o proceso. Do mesmo xeito, o Executivo de Sánchez tampouco quixo valorar o estudo que fixo a Xunta de Galicia sobre os custes que tería para o Estado o rescate, valorado en 2.356 millóns de euros, unha cifra similar a das bonificacións. “Nin tan sequera quixo reunirse co Goberno galego nin estudalo, a pesar das reiteradas resolucións parlamentarias que instaban a que isto se fixera”, engade Delgado.

Ao mesmo tempo, reprocha que “non é comprensible que ante este desprezo a Galicia, o independentismo galego siga mantendo un apoio fixo e constante ao Goberno de Sánchez”. “O BNG é moi bravo en Galicia, con declaracións efectistas e caravanas propagandísticas, pero moi manso en Madrid, onde á hora da verdade segue acreditando a súa submisión a Sánchez”, agrega.

UN CLARO AGRAVIO COMPARATIVO CON OUTRAS COMUNIDADES

Diante das reiteradas aldraxes, o Goberno de Sánchez vai iniciar o ano 2026 “castigando a Galicia” cunha importante subida da peaxe, que se prevé de ao redor dun 5%. Un incremento que inclúe os prezos do sector, o IPC e o “extraordinario e ruinoso” compromiso do ministro José Blanco de autorizar un aumento acumulativo do 1% durante 20 anos en todos os tramos da AP-9.

E, mentres isto está ocorrendo, recorda o deputado do PPdeG, o Executivo central pactou recentemente coa Comunidade Foral de Navarra a transferencia da titularidade da AP-68 e liberou definitivamente a peaxe da AP-7 en Alicante, o que “supón que hai claramente un agravio comparativo”.

“Mentres que a determinadas comunidades si se lle fan concesións, Galicia segue esperando polo traspaso dunha autoestrada vital para a Comunidade, para a súa articulación socioeconómica. Con nós non se fala nin se negocia o rescate ou a liberación total ou parcial da peaxe”, conclúe Delgado.

De feito, o ministro Óscar Puente fixo recentemente unhas declaracións negándose unha vez máis á transferencia, case dous anos despois de que Besteiro, candidato socialista nas eleccións autonómicas, o prometera durante a campaña.

Pese a todo, os representantes do Partido Popular de Galicia adiantan que van seguir “loitando, con máis entusiasmo se cabe” desde todas as frontes, para acadar en 2026 o obxectivo que pretenden e que é o mesmo que o da gran maioría dos galegos e galegas: unha autoestrada galega e libre de peaxe.

O PPdeG destaca que Galicia destinou este ano 36 millóns de euros en axudas para facilitar a incorporación de mozos ao agro galego

Os deputados do Grupo Popular Enrique Barreiro, Nicole Grueira e Raquel Arias visitaron hoxe a explotación gandeira de Lácteos Conchy en Friol, “unha mostra do impulso que a Xunta está a dar á remuda xeracional no sector agrogandeiro galego, destinando este ano 36 millóns de euros en axudas para facilitar a incorporación de mozos ao agro”.

“Se ben é importante a formación para contar con profesionais preparados e con explotacións rendibles, modernas e competitivas, tamén é fundamental contar co apoio das administracións para que os proxectos que os mozos impulsen se convertan nunha realidade e se asenten no futuro”, manifestou Enrique Barreiro.

ATA 320.000 EUROS POR PROXECTO

Deste xeito, Nicole Grueira subliñou o apoio que os mozos e mozas galegas reciben na actualidade da Xunta para facilitar a súa incorporación ao rural galego. En concreto, a convocatoria de axudas correspondente ao ano 2025 estivo dotada de 36 millóns de euros, con achegas concretas de ata 320.000 euros por proxecto. “Desde o ano 2009 se teñen incorporado ás actividades agrogandeiras do rural galego máis de 5.000 mozos, que na actualidade tamén contan cun programa de titorización do que xa se levan beneficiado máis de medio milleiro de persoas”, indicou.

Pola súa banda, Raquel Arias centrouse nas axudas coas que contan os mozos galegos para facilitar a súa sucesión nas explotacións gandeiras, unha achega ligada ao Banco de Explotacións que contará cun importe de 2,1 millóns de euros ata 2029. Neste sentido, destacou o traballo que está a desenvolver o Banco de Explotacións, conectando a persoas que pretendan cesar na súa actividade con aquelas interesadas no seu arrendamento, permuta e adquisición co obxectivo de garantir a continuidade da actividade agrogandeira.

O PPdeG destaca que a Xunta o investimento de máis de 300.000 euros na recuperación e posta en valor da Igrexa de Santa María a Real en Entrimo

Os deputados do Grupo Popular Cristina Campero e José Luis Ferro salientaron hoxe o investimento de máis de 300.000 euros que a Xunta de Galicia está a facer na recuperación e posta en valor da Igrexa de Santa María a Real en Entrimo, un monumento declarado ben de interese cultural e que representa o mellor exemplo do estilo churrigueresco de toda Galicia.

Acompañados polo concelleiro popular José Luís Domínguez, Cristina Campero e José Luis comprobaron in situ o avance dos traballos de restauración e mantemento que se están a realizar na Igrexa de Santa María a Real, que buscan garantir a conservación, seguridade e accesibilidade deste ben de relevancia histórica e patrimonial. Neste sentido, destacaron que as obras destacan pola súa importancia para a protección do legado cultural e arquitectónico da zona, contribuíndo ao desenvolvemento do rural e á dinamización cultural da comunidade.

APERTURA Á SOCIEDADE

A deputada Cristina Campero salientou “a aposta firme do Goberno galego pola salvagarda do patrimonio cultural e o valor destas actuacións para as xeracións presentes e futuras no marco dunha política que busca tanto a conservación técnica dos bens como a súa apertura á sociedade e a promoción do coñecemento da nosa historia e identidade cultural”.

Pola súa banda, o deputado José Luis Ferro sinalou que “o impulso a este tipo de proxectos reflicte o compromiso co desenvolvemento integral dos concellos galegos, así como coa protección dos seus activos culturais e turísticos, destacando a importancia de manter estes bens en bo estado de conservación para favorecer tanto a investigación como a difusión patrimonial”.

José Luis Domínguez agradeceu a presenza dos deputados e puxo en valor “a colaboración entre as administracións para facer realidade actuacións que, ademais de preservar o patrimonio cultural e relixioso, xeran oportunidades de emprego e dinamización económica no ámbito local”.