O PPdeG destaca o incremento de 3.428.675 euros nas transferencias da Xunta de Galicia aos oito concellos das bisbarras de Deza e Tabeirós-Terra de Montes para o Servizo de Axuda no Fogar (SAF) nos próximos tres anos, o que permitirá que os concellos de Lalín, A Estrada, Silleda, Vila de Cruces, Forcarei, Rodeiro, Agolada e Dozón poidan seguir mellorando esta prestación e implementando a súa sostibilidade económica.
Así o anunciaron os deputados Manuel Santos e Raúl Santamaría nunha dobre visita á zona, onde coñeceron o funcionamento das Casas do Maior de Rodeiro e Agolada –tamén impulsadas polo Goberno galego no eido social– xunto ás voceiras municipais, Cati Somoza e Carmen Seijas. Os parlamentarios deron conta das novas contías que se lles concederán aos oito concellos, sempre que o soliciten no prazo actualmente aberto, tras o anuncio por parte da Xunta de aumentar de forma progresiva o prezo por hora, pasando dos 12 euros en vigor ata o pasado 2025 a 16 euros no presente curso, 17 euros no vindeiro ano e 18 euros en 2028.
Deste xeito, Santos e Santamaría, que estiveron a departir cos maiores de Rodeiro e Agolada –incluso celebrando o aniversario dun usuario– e recolleron as súas inquedanzas e necesidades para seguir reforzando a política social da Xunta, explicaron que a Consellería de Política Social pasará a destinar 11,65 millóns de euros para o SAF dos oito concellos de Deza e Tabeirós-Montes nos próximos tres anos en vez dos pouco máis de 8 millóns que recibirían coa anterior achega de 12 euro por hora, o que supón un aumento do 41%. Iso si, lembraron que é imprescindible que as entidades locais soliciten a actualización destas contías no prazo dun mes actualmente en vigor, tendo en conta que o incremento do financiamento terá efectos retroactivas desde o pasado 1 de xaneiro.
“Está claro que somos o partido máis social e que máis se parece a Galicia, porque atendemos sempre as necesidades da xente máis vulnerable e da que precisa máis axuda da Xunta e por iso desde o PP emprendemos este enorme esforzo inversor para mellorar rotundamente o SAF, pero cremos que non hai ningunha medida que pague máis a pena”, manifestaron Manuel Santos e Raúl Santamaría, que destacaron especialmente a importancia desta medida nestas bisbarras de Deza e Tabeirós por tratarse das máis envellecidas da provincia e nas que se prestan anualmente 228.576 horas desta teleasistencia.
En canto ao financiamento da Xunta para o SAF para os oito concellos da zona queda fixado da seguinte maneira:
Concello 2025 2026 2027 2028 Incremento 2026-2028 Total 2026-2028
Agolada 283.023€ 377.365€ 400.950€ 424.535€ +353.779€ 1.202.850€
Dozón 34.677€ 46.236€ 49.126€ 52.016€ +43.346€ 147.377€
A Estrada 549.143€ 732.190€ 777.952€ 823.714€ +686.428€ 2.333.856€
Forcarei 210.283€ 280.377€ 297.901€ 315.424€ +262.853€ 893.702€
Lalín 770.381€ 1.027.175€ 1.091.373€ 1.155.572€ +962.976€ 3.274.120€
Rodeiro 143.487€ 191.317€ 203.274€ 215.231€ +179.359€ 609.822€
Silleda 413.126€ 550.835€ 585.262€ 619.689€ +516.408€ 1.755.786€
Cruces 338.797€ 451.729€ 479.962€ 508.195€ +423.496€ 1.439.887
