José Manuel Barreiro
As cidades falan. Fano a través das súas rúas, dos seus comercios e das conversas da súa xente. E Lugo comeza a dicir algo diferente. Apenas transcorreron dous meses desde que Elena Candia asumiu a alcaldía e xa se percibe un cambio difícil de medir con estatísticas, pero imposible de ignorar: a cidade recuperou o pulso.
Non se trata de proclamar milagres nin de vender titulares baleiros. Ningún rexedor transforma unha cidade en sesenta días pero si pode cambiar a maneira de gobernar, o clima institucional e a confianza da cidadanía. E iso é precisamente o que está a acontecer.
Lugo volve ter un Concello que escoita antes de decidir, que dialoga antes de confrontar e que entende que a política só ten sentido cando serve para mellorar a vida das persoas. Pode parecer obvio, pero durante demasiado tempo deixou de selo para os lucenses.
A chegada de Elena Candia trouxo unha maneira diferente de exercer a responsabilidade pública. Máis presenza na rúa, máis contacto coa veciñanza, máis interlocución co tecido económico e social e, sobre todo, unha idea moi clara: o goberno municipal debe ser un aliado de quen quere facer medrar Lugo, nunca un obstáculo.
Ese cambio de actitude xa se deixa nota; respírase máis dinamismo, percíbese unha maior axilidade na xestión e volve instalarse unha palabra imprescindible para o progreso de calquera cidade: confianza. A confianza de quen emprende, de quen inviste, de quen crea emprego e tamén de quen simplemente quere vivir nunha cidade que non se conforme con administrar o presente, senón que aspire a conquistar o futuro.
Elena Candia ten unha folla de ruta clara e a determinación de devolverlle a Lugo o protagonismo que merece. Está a facelo sen estridencias, sen caer na política do espectáculo e cunha convicción especialmente valiosa nestes tempos de ruído: os resultados importan máis ca os titulares.
Os primeiros dous meses de Elena Candia deixan unha lección que vai máis alá da política. O cambio comeza cando alguén decide que a resignación deixa de ser unha opción. Lugo recuperou a iniciativa, a ambición e a ilusión. E cando unha cidade recupera a ilusión, o resto comeza a chegar.
Queda moito por facer e ninguén con sentido común o discute. Pero tamén é innegable que a cidade ten por diante unha oportunidade extraordinaria para consolidar esta nova etapa e afrontar con decisión os proxectos que marcarán o seu futuro.
