Autor: ppdegaliciaedtis

O presidente do PPdeG, Alfonso Rueda, lamentou hoxe que gran parte dos fondos europeos destinados a ser unha “grande oportunidade para o desenvolvemento industrial de Galicia” aínda estean “sen resolver ou sen convocar” por parte dun Goberno central ao que reclamou a descentralización da xestión destes fondos nas comunidades autónomas.

Nunha visita ás instalacións de UNVI (Unidade de Vehículos Industriais) en San Cibrao das Viñas, o líder dos populares galegos puxo de manifesto que, a pesar de que Galicia aglutina “a cuarta parte ou máis da produción automobilística de toda España”, o peso do sector non se corresponde coa porcentaxe de fondos destinados á nosa Comunidade.

“As comunidades autónomas temos un nivel de execución de fondos europeos infinitamente maior que a do Goberno central. Por iso, seguiremos reclamando que se conte con nós e que se descentralice un sistema que non funciona e que está a  ralentizar a chegada duns investimentos que o noso tecido industrial e as nosas Pemes precisan para o seu futuro”, subliñou.

FONDOS EUROPEOS LIGADOS Á COMPETITIVIDADE E O CRECEMENTO

Nesta mesma liña, o candidato Adrián Vázquez asegurou que “non pode ser que o país máis descentralizado de Europa estea xestionando uns fondos tan importantes para o cambio do noso país dunha maneira tan centralizada”.

“Queremos máis transparencia e menos corrupción, máis cogobernanza coas comunidades e menos tapón desde Madrid”, engadiu ao tempo que subliñaba o compromiso do Partido Popular de aplicar maior transparencia e eficacia na xestión destes fondos para que así poidan chegar á economía real das empresas.

Os populares apostan así por un sistema de fondos europeos ligado á competitividade e o crecemento, de xeito que promovan a reindustralización da nosa economía e a incorporación de innovación nos sectores tradicionais a través de ferramentas máis eficaces que garantan a súa absorción. Un sistema no que, ademais, defenden o papel tanto das comunidades autónomas como do sector privado no seu deseño e planificación.

O Partido Popular de Galicia comprometeu hoxe a súa defensa e protección do Estado de Dereito, tamén ante Europa, fronte aos ataques que Pedro Sánchez está perpetrando contra a igualdade de todos os cidadáns e que se exemplifican na discriminación que sofre Galicia e na aprobación da Lei de Amnistía.

Cuestións como estas son as que se dirimen este domingo nas eleccións ao Parlamento Europa e por iso os populares poñen o foco na importancia de acudir masivamente ás urnas: “Quedar na casa é avalar a amnistía, a corrupción que rodea a Sánchez, os pactos cos independentistas e a Lei do só si é si. En definitiva, quedar na casa é permitir que Sánchez saia a dicir que España lle dá a razón”.

A secretaria xeral do partido, Paula Prado, explicou nesta liña que o exercicio do voto é cuestión de poucos minutos pero, en cambio, é moito o que Galicia se xoga nestes comicios: “Xogámonos ter unha presenza forte en Europa, onde todos os días se deciden asuntos que nos afectan, e xogámonos a oportunidade de dicir o que pensamos e de dicir ao Goberno de Sánchez que xa está ben”.

Pola súa banda, o candidato Adrián Vázquez apuntou que a defensa do Estado de Dereito e da separación de poderes non só é algo intrínseco na misión e nos valores do proxecto europeo, senón tamén a única garantía fronte a “líderes que utilizan as institucións como o seu cortijo persoal e dedican máis tempo a levantar cortinas de fume que a gobernar”.

Isto foi precisamente o que intentou trasladar aos alumnos e profesores da Universidade de Santiago de Compostela cos que se reuniu hoxe, a quen lles explicou a capacidade de acción que ten Europa ante ataques á democracia en si mesma nos países membros.

“Nestes cinco anos vimos como Polonia e Hungría, cuxos líderes intentaron usurpar o poder xudicial sinalando a xuíces e a medios de comunicación, acabaron cun bloqueo dos fondos europeos que precisan para o seu desenvolvemento. Algo que pode pasar tamén en España se seguimos por esta senda”, afirmou.

Vázquez concluíu asegurando que Pedro Sánchez “en vez de estar gobernando o que quere é estar no Goberno” e pediu á cidadanía que non se deixe enganar: “A única carta que importa é a citación xudicial que recibiu a muller do presidente”.

A RESPOSTA DA MOCIDADE

Aproveitando a realización das probas da ABAU e proximamente o inicio dun novo curso universitario, a secretaria xeral do PPdeG aproveitou a ocasión para trasladarlles a todos os estudantes galegos os seus mellores desexos e a boa nova de que o próximo ano terán a matrícula de balde “grazas ao Goberno galego e ao compromiso do presidente Alfonso Rueda”.

Unha medida que para Paula Prado é o reflexo de que o seu partido é “o que mellor defende os dereitos da mocidade galega” e de que, precisamente por iso, foron a opción máis votada polos menores de 30 anos nas pasadas eleccións autonómicas. “Máis do 40% dos mozos e mozas galegas xa nos apoiaron o 18 de febreiro e queremos que o volvan facer o 9 de xuño”, remarcou.

O presidente do PPdeG, Alfonso Rueda, reivindicou hoxe ao seu partido como única alternativa moderada e comprometida con Galicia fronte ao que denomina como “a esquerda do non a todo”, que se opón a calquera avance para a nosa Comunidade, que fomenta a desigualdade e que ademais se presenta ás eleccións europeas con propostas antieuropeas.

Defendeu así que, ante unha candidata do PSOE que quere arrasar con todo e un BNG que leva de candidatos a unha independentista catalá de ERC e a un condenado por pertenza a ETA, os galegos terán a oportunidade de votar o próximo domingo a un partido que defende os intereses de Galicia, que aposta pola moderación, que goberna tanto para os que lle votan como para os que non e que xestiona con rigor o que é de todos. “Iso é o que representa o Partido Popular”, concluíu o presidente.

Rueda asegurou hoxe en Vigo que o 9 de xuño hai que responder nas urnas aos incumprimentos do Goberno central con Galicia e especialmente coa cidade. Mencionou así os anos de espera para a chegada da Alta Velocidade e os atrasos na súa posta en marcha, a falta de investimento na Saída Sur de Vigo –á que só lle consignan 30.000 euros nuns Presupostos prorrogados ante a renuncia do Executivo a aprobar unhas novas contas– ou a mala distribución dos fondos europeos que precisan industrias como Stellantis.

Puxo como exemplo desta falta de compromiso de Pedro Sánchez con Galicia o feito de que, mentres que o novo primeiro ministro de Portugal mostrou desde o primeiro momento a súa disposición a manter unha reunión para abordar a conexión por Alta Velocidade co país veciño, o presidente do Goberno de España aínda non o recibiu na Moncloa tres meses despois de gañar as eleccións autonómicas.

Fixo un chamamento a trasladar a Europa a mensaxe de que o que os galegos queren é sentidiño, rigor e xestión. E tamén mandar a Pedro Sánchez o recado de que Galicia non vai pasar nin unha máis, nin é menos que ninguén. Tal e como xa expresou nas urnas nas pasadas eleccións, engadiu, a cidadanía non quere amnistías, nin desigualdade, nin discriminacións, nin desgoberno.

LUIS LÓPEZ: “IMOS A POR UN NOVO TRIUNFO EN EUROPA”

Pola súa banda, o presidente provincial do PP de Pontevedra, Luis López, amosou a súa satisfacción pola gran acollida de público, outra vez máis na cidade olívica: “Celebramos que o sectarismo do PSOE e do BNG na cidade estalle pasando factura, como ocorreu, por exemplo, coa recuperación da Deputación de Pontevedra para toda a provincia”

“Celebramos que fomos o partido que gañou as eleccións xerais de xullo, e que se non gobernamos foi porque nós non estamos dispostos a entregar as chaves do país a Otegi, a Puigdemont e a Junqueras. Celebramos tamén que en febreiro Alfonso Rueda conquistou a súa primeira maioría absoluta e consolidou Galicia como unha referencia política en España. Agora imos a por un novo triunfo en Europa”, indicou.

O líder dos populares na provincia subliñou que o progreso de Pontevedra e de Galicia no seu conxunto “pasa, si ou si, polo que se decide en Europa e iso é o que está en xogo o vindeiro 9 de xuño”. E puxo como exemplo cuestións como as axudas da PAC ou as novas liñas ferroviarias que unen Galicia con Portugal e coa Cornixa Atlántica, así como as liñas de apoio que se xestionan para os concellos.

“Para axudar a seguir polo bo camiño no que vai a provincia contamos con dous grandes guías, os dous pontevedreses, que son os nosos candidatos. Contamos con Francisco Millán Mon, que ten a experiencia imprescindible para defender os nosos intereses en Bruxelas; e con Adrián Vázquez, outro baluarte da política con maiúsculas que sabe ben o que precisa esta provincia”, rematou López.

ADRIÁN VÁZQUEZ: “GALICIA ESTÁ CLARAMENTE DISCRIMINADA NO REPARTO DOS FONDOS EUROPEOS”

O candidato Adrián Vázquez lamentou o “tapón” que está a exercer o Goberno central no que se refire aos fondos europeos, poñendo como exemplo que “dos 33.500 millóns de euros dos PERTES industriais aínda está o 50% sen convocar”.

Mostrouse moi crítico con que o deseño destes proxectos non tivese en conta o peso do sector automotriz galego na economía española: “Teño a sensación de que se deseñaron pensando máis nos 7 votos de Junts e nos 7 votos de ERC que nos intereses dun sector vital para Vigo e para Galicia”.

De feito, asegurou que “Pedro Sánchez mantén o control dos fondos europeos para comprar o apoio dos seus socios de Goberno, non para transformar España” e que a súa xestión está máis próxima ao desgoberno que á cogobernanza.

Criticou tamén que a Galicia só lle corresponda apenas un 8% do PERTE naval cando a nosa Comunidade representa o 40% da industria naval española. O cal demostra que “Galicia está claramente discriminada no reparto dos fondos europeos”.

Por todo isto trasladou que entre as propostas do Partido Popular están a de esixir a convocatoria da Conferencia Sectorial do Plan de Recuperación ou a de ligar os fondos europeos á competitividade e ao crecemento. “Máis para os que mellor o fan e menos criterios escuros e opacos para atornillar a Sánchez na Moncloa”, concluíu neste sentido.

O Partido Popular de Galicia insiste na súa demanda de que a Comisión Europea cree nesta próxima lexislatura un comisario específico de Pesca para que as políticas comunitarias neste eido non estean sometidas exclusivamente a criterios medioambientalistas e garantan o equilibrio co sector: “O futuro do planeta ten que ser verde e o do mar, azul; pero non a costa de que o futuro da nosa xente do mar sexa negro”.

Así o manifestou esta mañá o candidato do PP ao Parlamento Europeo Francisco Millán Mon nunha visita á confraría de pescadores de Burela, que na súa opinión exemplifica as consecuencias negativas para a frota galega e para a Mariña lucense de decisións como foi o veto á pesca de fondo.

“Este veto foi o resultado de primar os intereses dos peixes fronte aos dos pescadores e ademais non se fixo ben: nin contou cun estudo de impacto nin distinguiu entre dúas artes tan diferentes como o arrastre e o palangre”, afirmou amosando o seu compromiso de reverter este veto ou, polo menos, excluír ao palangre dado que “o seu impacto no fondo mariño é practicamente inexistente”.

Neste sentido, a existencia dun comisario específico de Pesca, tal e como propón o PP no seu programa electoral, sería a garantía de que “as políticas pesqueiras europeas non estarían sometidas exclusivamente a criterios próximos ao ecoloxismo radical, senón que recollerían as necesidades e preocupación da xente do mar e defenderían os seus intereses”.

“A FROTA GALEGA É A QUE MÁIS E MELLOR PROTEXE OS MARES”

Pola súa banda, o responsable de Mar no Goberno galego, Alfonso Villares, afondou nesta cuestión defendendo que a frota galega é a que “máis e mellor conserva os mares e protexe os seus ecosistemas” e incidiu no moito que o sector mar-industria da nosa Comunidade se xoga nas eleccións europeas.

Compartindo a necesidade dun comisario europeo específico de Pesca, recordou que o actual comisario de Medio Ambiente, Océanos e Pesca, Virginijus Sinkevičius, foi un dos promotores deste veto e que pertence ao grupo parlamentario europeo no que se integra tamén o BNG.

Reiterou tamén o seu compromiso de continuar defendendo os intereses da frota galega, como demostra o feito de que o Goberno galego é parte coadxuvante no recurso interposto polo sector contra o veto á pesca de fondo.

A secretaria xeral do PPdeG, Paula Prado, e o candidato do Partido Popular ás eleccións europeas Adrián Vázquez visitaron hoxe as instalacións da cooperativa agraria AIRA en Taboada acompañados polo coordinador de Medio Rural do PPdeG, Avelino Souto, o deputado nacional Francisco Conde e o portavoz do PP local, Ramiro Moure.

Unha visita na que os populares puideron comprobar de primeira man o funcionamento da maior fábrica de pensos para vacún de leite que existe en España e abordaron xunto á directiva de AIRA os retos aos que se enfronta o sector no presente e no futuro máis próximo.

Trataron así a necesidade, entre outras cuestións, de mellorar o funcionamento e a aplicación da Lei de Cadea Alimentaria para evitar que os produtores vendan por debaixo dos seus costes. Así como tamén a formulación dunha PAC que actualmente prima o criterio ideolóxico a costa do criterio dos produtores.

Desde o PPdeG trasladaron o seu compromiso de seguir defendendo a declaración do sector lácteo como estratéxico –proposta á que se opón o PSOE–, reducir a burocracia e o impulsar medidas para garantir o relevo xeracional nas explotacións gandeiras co obxectivo de asegurar o futuro neste eido en Galicia.

Así mesmo, Paula Prado e Adrián Vázquez valoraron positivamente que o Partido Popular incida no seu programa en que o comisario europeo de Agricultura na vindeira lexislatura ten que ser membro do Grupo Popular, ademais de subliñar a importancia de incluír cláusulas de leal competencia para protexer aos agricultores e gandeiros.

O candidato do PP ás eleccións europeas Francisco Millán Mon realizou hoxe unha visita á lonxa de Ribeira e mantivo un encontro con representantes do sector pesqueiro acompañado pola deputada nacional Rosa Quintana, o portavoz de Pesca do PP no Senado, Manuel Ruiz, e a portavoz do PP local, María Sampedro.

Unha xuntanza na que se puxo sobre a mesa a importancia que os fondos europeos teñen para este concello de cara á materialización de proxectos como o do Museo do Mar. Unha iniciativa promovida polo PP de Ribeira que opta a financiamento comunitario pero continúa agardando á chegada deses fondos, por parte do Goberno central, para converterse nunha realidade.

Millán Mon trasladou aos presentes a súa aposta por implantar o sentidiño nas políticas pesqueiras promovidas desde a Comisión Europea fronte á deriva medioambientalista radical que se experimentou nos últimos anos. Avogou así por unha lexislación que combine a sustentabilidade medioambiental cos intereses do sector e o benestar e o emprego das moitas persoas que viven do mar en Galicia.

Congratulouse así mesmo de que a presidenta da Comisión, Ursula von der Leyen, elixira esta fin de semana Galicia –a primeira zona pesqueira de Europa– para anunciar o seu compromiso de crear un comisario europeo exclusivo de Pesca, tal e como se propoñía desde o Partido Popular.

O presidente do PPdeG, Alfonso Rueda, fixo hoxe un chamamento ao voto nas eleccións europeas do 9 de xuño apelando ao moito que hai en xogo e asegurando que quedar na casa ese día supón tamén avalar un Goberno central que incumpre con Galicia cada día.

Explicou que está en xogo ter unha voz de sentidiño en Europa, que defenda os intereses dos galegos en materias como a pesca, o agro ou as infraestruturas. Pero, sobre todo, plantarlle cara ao desgoberno dun Pedro Sánchez que pretende que a cidadanía avale nas urnas a súa política de incumprimentos.

Uns incumprimentos que exemplificou en materia industrial, criticando neste sentido que continúen embalsados miles de millóns de euros de fondos europeos destinados á industria galega e que o Goberno central se nega a distribuír.

En clave local e aproveitando a súa presenza na cidade, o líder dos populares galegos afirmou que, co seu voto, os ferroláns poden expresar a súa resposta ante un Goberno que se esquece de Ferrol e das súas necesidades en infraestruturas.

Polo tanto, pediu a todos os galegos que o 9 de xuño amosen o seu rexeitamento a que Pedro Sánchez siga comprometendo os recursos de todos para pagarlle os votos aos seus socios independentistas, e facelo votando polo PP e para que xente como Francisco Millán Mon e Adrián Vázquez defendan a Galicia en Europa.

REY VARELA: “CON GOBERNOS ESTABLES, GALICIA E FERROL FUNCIONAN”

Pola súa banda, o alcalde José Manuel Rey incidiu na súa intervención na importancia de contar con gobernos estables, como o que preside Alfonso Rueda, para garantir que Galicia e Ferrol funcionen.

Unha estabilidade que se traduce en realidades como son a apertura da cidade ao mar, o proxecto da Cidade do Deporte, o investimento nos dez Centros de Educación Infantil e Primaria, o saneamento do rural ou a ampliación e reforma do hospital.

Explicou que moitos destes proxectos non serían posibles sen uns fondos europeos que son fundamentais para facer realidade tamén a transformación do Astillero 4.0 en Navantia ou a conexión ferroviaria entre Ferrol e A Coruña.

“Estes fondos non serán realidade sen un goberno serio en Europa que saiba onde está Ferrol”, afirmou amosando a súa confianza nos representantes galegos que conforman a candidatura do Partido Popular e poñendo en valor que, grazas ao traballo de Francisco Millán Mon na pasada lexislatura, foi posible incluír a Ferrol na Rede Transeuropea de Transporte a pesar dos atrancos do PSOE.

O Partido Popular de Galicia erixiuse hoxe como a única alternativa para defender os intereses do rural galego en Europa e reclamou un trato xusto e realista para os nosos gandeiros e agricultores: “Non queremos máis que ninguén, senón que se teña en conta a nosa realidade”.

A secretaria xeral do partido, Paula Prado, lamentou neste sentido que se estea a situar aos gandeiros e agricultores “como culpables de todo” cando en realidade eles son os que levan alimento a fogares de todo o mundo e “os únicos que non respectan o medio ambiente son o PSOE e o BNG co seu ecoloxismo radical”.

“Mentres outros poñen atrancos e problemas aos nosos gandeiros e agricultores, nós ofrecemos solucións porque temos moi presente a realidade do territorio galego”, asegurou poñendo en valor que en Galicia se ordeñan 4 de cada 10 litros de toda España e que a nosa Comunidade é a décima zona de Europa con maior produción de leite.

Na súa visita ás instalacións da cooperativa láctea CLUN no concello de Ames xunto ao candidato Adrián Vázquez, a responsable de Medio Rural do Goberno galego, María José Gómez, e o coordinador de Medio Rural do PPdeG, Avelino Souto, a número dous dos populares galegos avogou por “unha Europa que se pareza máis a Galicia: moderada, sen extremismos, cumpridora, sen mentiras, igualitaria e sen discriminacións”.

“Esta fin de semana fomos o corazón de Europa e o próximo domingo agardamos ser o corazón da vitoria do Partido Popular”, concluíu referíndose á presenza en Galicia da presidenta da Comisión Europea, Ursula von der Leyen, o pasado sábado.

ADRIÁN VÁZQUEZ: “EUROPA TEN TODO QUE DICIR SOBRE O RURAL”

Na mesma liña, o candidato Adrián Vázquez mostrou o seu interese por coñecer de primeira man a realidade do sector de produtores lácteos galegos e as súas demandas. Especialmente nun momento de crise no que, como explicou, “a comercialización, a produción e os prezos seguen sen estabilizarse”.

“Europa non é só que teña moito que dicir, senón que ten todo que dicir para axudar a un sector tan importante para Galicia”, engadiu ao tempo que lamentaba os ataques por parte dun Goberno de España que non escoita as súas demandas.

Contrapuxo así a actitude dun Partido Popular que si lle da a importancia que se merece ao rural e traballa por ofrecerlle solucións a todos os niveis fronte ao PSOE: “Nós queremos mellorar a vida do sector e vimos directamente a escoitalos e a falar con eles. Mentres, Teresa Ribera seguro que está acariciando algún lobo”.

O presidente do PPdeG, Alfonso Rueda, pide aos galegos e galegas que acudan masivamente a votar o próximo 9 de xuño para validar o modelo da Galicia que funciona fronte aos incumprimentos de Pedro Sánchez e o radicalismo dos independentistas: “Nestas eleccións vótase Europa, pero tamén se votan España e Galicia”:

Nun mitin celebrado esta tarde en Lugo, o líder dos populares galegos explicou que o que algúns pretenden é que, quedando na casa, a cidadanía valide cuestións como a amnistía, as desigualdades territoriais ou o desgoberno. E que, polo tanto, hai que combater todo isto indo a votar masivamente e facelo tendo claros os dous modelos que hai en xogo nestas eleccións.

Contrapuxo así o modelo da Galicia que medra e avanza, na que se fai o que se promete e que é pioneira en políticas de vivenda e educación fronte ao modelo dos que din unha cousa en campaña e logo fan a contraria, os do ‘non’ a todo e tamén aqueles que son incapaces aprobar máis leis que non sexan a de amnistía.

Nesta liña, pediu aos galegos que non se deixen enganar por un nacionalismo que está intentando ocultar que o seu único obxectivo é que a voz de Galicia en Europa sexa a dos independentistas cataláns e a dun condenado por pertenza a ETA.

“Podemos evitar todo isto dando a nosa resposta nas urnas”, concluíu pedindo o voto para o Partido Popular e para candidatos que, como Francisco Millán Mon ou Adrián Vázquez, defenderán a Galicia en Europa.

OS AGRAVIOS DE SÁNCHEZ Á PROVINCIA DE LUGO

Pola súa banda, a presidenta do PP da provincia, Elena Candia, subliñou durante a súa intervención que “as eleccións europeas en Lugo deben ser unha resposta aos agravios do Goberno de Sánchez á provincia”. O estado das infraestruturas, a negativa a escoitar ao noso sector primario ou a falta de medidas para apoiar a continuidade do emprego en Alcoa son algún dos exemplos que citou a dirixente lucense sobre “o comportamento de Sánchez con Lugo e os lucenses”.

Candia lembrou que “Lugo é a única provincia e capital de provincia galega que queda fóra da alta velocidade ferroviaria pola negativa do Goberno de Sánchez a construír as variantes proxectadas por un Goberno do Partido Popular”. Tamén citou a A-6, ademais de moitas estradas nacionais, como exemplo do “mal estado das infraestruturas viarias de titularidade estatal que sufrimos tódolos lucenses a diario”, ao que hai que engadir a falta de avances na construción de autovías para conectar con Ourense, Ponferrada ou a da Mariña.

A dirixente lucense incidiu en que “dende o Partido Popular escoitamos aos nosos gandeiros” e conseguimos en Europa flexibilizar a PAC, reducir a burocracia, dar marcha atrás a algúns dos excesos do Pacto Verde e que a Comisión Europea se posicionara para rebaixar o nivel de protección do lobo. Todo o contrario que o Goberno de Sánchez que se nega a escoitar ás comunidades lobeiras. Defende o lobo por riba dos gandeiros”, condenou.

Elena Candia lembrou tamén “a falta de implicación do Goberno de Sánchez para o mantemento do emprego en Alcoa”, a única fábrica de produción de aluminio primario en España. “Prometeran moitas cousas, pero o certo é que o Executivo estatal segue sen promover instrumentos públicos de apoio: nin garante un marco enerxético estable – non hai un estatuto electrointensivo verdadeiramente eficaz, non axiliza os parques eólicos nin os contratos de longa duración (PPAs) para abaratar o prezo da luz…- nin aclara se está disposto a unha intervención pública instrumental e temporal para buscar un comprador solvente, como si fixo con outras industrias estratéxicas a través da SEPI”.

A presidenta do PP de Lugo pediu o voto para o Partido Popular do “sentido común” fronte ao “PSOE e BNG con candidatas como Teresa Ribera, que é a socialista máis ecoloxista, ou Ana Miranda que se presenta en coalición cos independentistas vascos e cataláns e se alía cos verdes en Europa que, entre outras cousas, prohibiron a pesca de arrastre no Atlántico Norte prexudicando gravemente á flota mariñá”.

Así, a popular agarda que o vindeiro domingo 9 de xuño ás urnas se enchan de papeletas ao Partido Popular igual que nas municipais, nas xerais e nas autonómicas. “O Partido Popular é o partido do rural, o do mar, o da xente moza e tamén o dos nosos maiores, o das políticas para xerar oportunidades para os lucenses, o que aposta pola conciliación e o acceso á vivenda e o que defende favorecer o emprendemento, o mantemento e a creación de empregos e o impulso industrial responsable”.

O presidente do PPdeG, Alfonso Rueda, incidiu hoxe no moito que significa Europa para Galicia e, apelando á vitoria acadada nas autonómicas, animou aos seus a facer posible un novo éxito electoral o próximo 9 de xuño: “Toca defender Galicia máis que nunca e demostraremos que sabemos facelo”.

A unha semana das eleccións ao Parlamento Europeo, insistiu en que é o momento de “pisar o acelerador” e mobilizarse como nunca. “Non pode haber escusas, nin pereza, nin conformismo. Temos que demostrar o mesmo esforzo, as mesmas ganas e o mesmo impulso de sempre”, subliñou.

Ante a presidenta da Comisión Europea, Ursula von der Leyen, o líder dos populares galegos incidiu na importancia de Galicia para Europa e remarcou que o PPdeG non vai fallar: “Farémosvos sentir orgullosos dándolle ao Partido Popular Europeo e a Alberto Núñez Feijóo unha vitoria como a do pasado 18 de febreiro”.

Referíndose precisamente á asistencia de Von der Leyen á tradicional Romaría Popular do Pino, Rueda amosouse convencido de que, coa súa presenza aquí, demostra non só que “Galicia se ten cada vez máis en conta” e que o partido “está máis forte que nunca”, senón tamén que “a nosa terra é o final de todos os camiños”.

“Para parar aos que queren illar Galicia e aos que aínda a estas alturas seguen falando de cousas como a autoderminación dos pobos, temos que activarnos como nunca. Europa, España e Galicia meréceno”, concluíu dirixíndose ás case 5.000 persoas que este mediodía encheron a Área Recreativa da Magdalena do concello coruñés do Pino.

Un concello que volveu ser hoxe punto de encontro para a gran familia do Partido Popular e no que se deron cita –ademais de Rueda, Von der Leyen e Feijóo– os candidatos Dolors Montserrat, Esteban González Pons, Francisco Millán Mon, Adrián Vázquez e Pablo Gómez Cedrón; así como a secretaria xeral do PPdeG, Paula Prado, e o presidente provincial do PP da Coruña, Diego Calvo.