Autor: ppdegaliciaredes

Resumo do Debate sobre política xeral: péchase coa aprobación de 51 resolucións (39 das presentadas polo Grupo Popular, 4 do Grupo Mixto, 1 do Grupo Socialista e 1 do Grupo Parlamentario do BNG); ás que hai que engadir 1 transaccionada entre o Grupo Popular e o Grupo Socialista (sobre a Lei de Cultura inclusiva), 1 transaccionada entre o Grupo Popular e o Grupo Parlamentario do BNG (sobre a cogobernanza de fondos europeos), e 4 transaccionadas entre o Grupo Popular e o Grupo Mixto (sobre comercio, seguridade viaria, a transferencia de estradas autonómicas e sobre o Xurés).

Ademais, das 51 resolucións aprobadas, 11 saíron adiante co apoio unánime dos deputados do Parlamento galego.

Alberto Pazos dixo que, fronte á “crispación, o conflito e a crítica pola crítica” dos grupos da oposición, hai un goberno que goberna por Galicia.

Tal e como salientou o portavoz do Grupo Parlamentario Popular, o Debate de política xeral serviu para amosar a estabilidade política e a normalidade democrática que hai en Galicia.

Fixo referencia a unha oposición “absolutamente” afastada da realidade da nosa Comunidade: “Está ‘o modelo do non’ do BNG e o ‘non hai modelo’ do PSdeG”. E incidiu nos “deberes feitos” do Executivo de Alfonso Rueda, que, no ecuador da lexislatura, xa leva o 85% das propostas de goberno cumpridas.

Ante a falta de orzamento estatal, afeou o silencio e a complicidade tanto de BNG como de PSdeG: “En Madrid, calan, cando a falta de orzamentos do Estado lle resta a Galicia 388M€ en catro meses”.

“A boca pechada para reclamar ao Goberno central –engadiu- e a boca grande para malgastar os cartos dos galegos”. E é que, segundo trasladou Pazos, as propostas formuladas polo BNG cústanlle aos galegos un total de 6.355M€: “En nove propostas de resolución, case o 50% do orzamento da Xunta”.

Sobre o autogoberno, cualificou de “boa noticia para Galicia” o acordo co BNG para que Galicia teña maior capacidade de xestión dos fondos europeos que permitan un maior desenvolvemento do noso territorio.

Aproveitou, tamén, para remarcar as axudas de preto de 23M€ que o Goberno galego destina á recuperación do sector do marisqueo e instou ao Goberno central a que rebaixe o IVE dos produtos do mar e da carne.

E volveu reclamar que se apliquen de forma inmediata a aplicación das cláusulas de salvagarda de Mercosur e se intensifiquen os controis de fronteira. Asemade, pediu que non se reduzan os fondos europeos destinados ao sector agrogandeiro.

“Seguiremos defendendo un campo galego forte, porque o agro é sinónimo da Galicia que somos”, apuntou, e informou da proposta do Grupo Popular para establecer un sistema de cálculo dos custos de produción e a posta en marcha dunha prórroga automática dos contratos para evitar o desperdicio do leite.

Para que as familias poidan vivir no rural, o Grupo Popular propón novas axudas para os concellos máis pequenos e novos préstamos para acceder con máis facilidades aos programas europeos de desenvolvemento local.

Ao longo da lexislatura, o Goberno galego investiu máis de 87M€ na mellora das infraestruturas turísticas, especialmente, ao longo do Camiño. Neste punto, Alberto Pazos avanzou que se poñerán en marcha iniciativas que fagan do Xacobeo 2027 un ano histórico.

Neste punto, lamentou as trabas do Goberno central para habilitar os incentivos fiscais para empresas patrocinadoras e colaboradoras na celebración do Ano Santo e criticou o modelo turístico do BNG: “É o de rachar co Xacobeo”.

Avogou porque os galegos participen dos beneficios asociados ao aproveitamento dos recursos naturais e que se blinde o seu retorno social e económico para o conxunto do país.

Fronte a aposta do PPdeG polo avance das enerxías renovables, hai un PSdeG que “desconecta unha provincia enteira” da rede eléctrica, limitando o seu desenvolvemento industrial; e un BNG que non quere nin eólicos nin hidráulica nin biogás.

Avanzou, tamén, propostas para mellorar as infraestruturas viarias e ferroviarias. Neste senso, instou ao Goberno central a que se recuperen as frecuencias de tren suprimidas desde a pandemia, un plan director completo do Corredor Atlántico, máis pulo para o AVE entre Vigo e Porto, a renovación entre Ferrol e Ribadeo ou o convenio para a estación intermodal de Ferrol.

“Este é o Debate de política xeral da clase media, que é o motor de Galicia”, sinalou o portavoz do Grupo popular, con propostas, engadiu, realistas, efectivas e centradas no importante. E con medidas para “a xente que levanta a persiana dos seus negocios cada mañá e a xente que aposta por emprender”. Neste punto, referiuse á reclamación da franquía do IVE para os pequenos negocios e os traballadores autónomos.

Fixo fincapé en que para o PPdeG a vivenda é un obxectivo “prioritario, constante e irrenunciable”. Así, propón elevar o limiar máximo de renda ata catro veces o IPREM para optar a unha vivenda pública, e reservará o 30% destas vivendas en venda para persoas de entre 36 e 45 anos. Ademais, a partir do próximo ano, Galicia bonificará o 100% do imposto de actos xurídicos documentados para as vivendas protexidas.

Cualificou de “propaganda barata” a política en materia de vivenda de Pedro Sánchez e recordou que o Goberno galego leva dez anos pedindo a cesión de vivendas da Sareb.

Urxiu un reforzo real e efectivo das políticas de protección das vítimas de violencia de xénero. Neste punto, o portavoz do Grupo popular pediu ao Goberno central que “actúe” ante os fallos das pulseiras antimaltrato, a reforma do sistema Viogén ou a falta de presenza policial.

Insistiu, tamén, na débeda de 3.000M€ en dependencia do Executivo de Pedro Sánchez con Galicia e destacou que o obxectivo do Goberno de Alfonso Rueda é que o Bono Coidado, que actualmente beneficia a 40.000 persoas dependentes, chegue a 10.000 galegos máis.

Por outra banda, referiuse á mellora para a abordaxe das baixas laborais, incluíndo a creación de unidades especializadas: “Trátase de blindar os dereitos dos traballadores e, á vez, de mitigar o impacto desta problemáticas nas empresas”.

Para rematar, subliñou que as propostas do Grupo Popular van dirixidas a quen é o piar fundamental de Galicia: a clase media, de aí as medidas dirixidas a mellorar a súa calidade de vida, desde o alivio fiscal, o acceso á vivenda, a promoción de emprego e servizos públicos esencias de calidade. “O noso obxectivo é claro: apoiar a quen sostén o país, garantíndolle máis oportunidades, máis estabilidade e máis benestar”, sentenciou.

 

A viceportavoz do Grupo Popular, Paula Prado, compareceu hoxe para dar conta das propostas de resolución rexistradas no Debate de Política Xeral, nun contexto marcado pola confrontación de dous modelos claramente diferenciados de país. Dun lado, a chamada “Galicia do si”, liderada polo presidente Alfonso Rueda, centrada na xestión, no cumprimento dos compromisos e na resposta ás necesidades reais da cidadanía. Do outro, segundo expuxo Paula Prado, sitúase a oposición, definida como a “Galicia do non” e caracterizada pola falta de proxecto e polo bloqueo constante ás iniciativas orientadas ao progreso.

ENLACE A: PROPOSTAS DE RESOLUCIÓN

A deputada popular resaltou que as propostas de resolución presentadas polo Grupo Popular apostan por abordar de maneira directa as preocupacións reais e cotiás da cidadanía. Neste sentido, subliñou que a clase media constitúe o motor do país e que, xunto coas medidas dirixidas ás persoas máis vulnerables, ao sector primario e ao reforzo dos servizos públicos esenciais —sanidade, educación e políticas sociais—, se sitúa no centro da acción política do Partido Popular neste Debate do Estado da Autonomía.

Así, indicou que se presentan respostas concretas para mellorar a calidade de vida: desde o alivio fiscal ata o acceso á vivenda, pasando pola promoción do emprego e o impulso a postos de traballo de calidade. “O noso obxectivo é claro: apoiar a quen sostén o país co seu esforzo diario, garantindo máis oportunidades, estabilidade e benestar para a maioría social”, concluíu.

Durante a súa intervención, a viceportavoz puxo en valor os resultados acadados polo Goberno galego, destacando que máis do 85 % das medidas comprometidas nesta lexislatura están feitas ou en marcha, así como un elevado nivel de execución orzamentaria. Subliñou tamén o enfoque en políticas públicas que abranguen ámbitos clave como a vivenda, a fiscalidade, os coidados, o rural e a sanidade, con medidas orientadas a mellorar o acceso á vivenda, reforzar os servizos sociais e garantir unha atención sanitaria de calidade.

Fronte a isto, Prado criticou a actitude da oposición, á que atribuíu unha desconexión coa realidade de Galicia e unha estratexia baseada no rexeitamento sistemático. Neste sentido, incidiu en que, mentres o Executivo autonómico aposta por un modelo construtivo e de avance, os grupos da oposición carecen dunha alternativa definida e viable para o conxunto da cidadanía galega.

No marco deste debate, o Grupo Popular rexistrou un total de 40 propostas de resolución orientadas a consolidar o crecemento económico, reforzar os sectores produtivos e mellorar a calidade de vida. Entre elas inclúense iniciativas en materia fiscal e de apoio ás pequenas empresas, medidas para o sector lácteo, así como actuacións para favorecer o desenvolvemento dos concellos de menor tamaño.

As propostas tamén abordan a necesidade de mellorar a vertebración territorial, con especial atención ás infraestruturas ferroviarias e viarias, reclamando a recuperación de frecuencias de tren, o impulso do Corredor Atlántico e o desenvolvemento de conexións estratéxicas como o AVE Vigo-Porto. Ademais, inclúense reivindicacións históricas como o rescate da AP-9 e a súa transferencia a Galicia.

Noutros ámbitos, formúlanse medidas para avanzar no autogoberno, reforzar o sistema educativo —incluíndo unha futura lei de educación dixital— e promover a lingua galega. Así mesmo, recóllense iniciativas centradas no benestar social, como a ampliación do Bono Coidado, a creación de novas residencias públicas e a reforma da atención primaria sanitaria.

Alberto Pazos contrapuxo o compromiso democrático e o respecto polas institucións do presidente Alfonso Rueda co do presidente Pedro Sánchez: “Aínda non se cumpriron catro anos desde que se converteu en presidente de todos os galegos e xa triplica o número de debates de política xeral, ademais de cuadriplicar o número de orzamentos aprobados nos oitos anos de Goberno de Sánchez”.

Tal e como salientou o portavoz do Grupo Popular, Galicia continúa a ser unha illa de estabilidade, grazas a que as galegas e os galegos apostan por manter a nosa terra afastada do ruído, do populismo e da lea permanente.

Dixo que a única base posible para o consenso é o programa electoral que foi referendado maioritariamente nas urnas, o cal se converteu nun “compromiso formal, vinculante e de cumprimento inescusable”.

Aproveitou para poñer en valor a educación de primeiro nivel, a atención sanitaria de gran calidade e servizos públicos solventes, modernos e avanzados, así como, tamén, un estado do benestar moi consolidado.

Lamentou o relato “distópico” e “apocalíptico” dos grupos da oposición: “Os galegos non poden recoñecerse nesa Galicia disparatada que vostedes debuxan”.

“Galicia non está na visión deformada que nos queren trasladar, senón na visión realista dos que cada día traballan coa esperanza de que a Galicia do solpor sexa un pouco mellor que a Galicia na que amenceron”, remarcou.

Fronte a isto, fixo fincapé en que Galicia ten unha das mellores sanidades do mundo. Referiuse á campaña de “permanente desprestixio” ao que os grupos da oposición a someten, aínda sendo a sétima mellor valorada de España.

“Sufrimos a mesma falta de especialistas de atención primaria que toda España. Sufrimos a mesma folga de profesionais que toda España. E sufrimos a mesma indolencia da ministra de Sanidade de toda España”, subliñou.

Nesta liña, instou á oposición a que lle pidan ao Goberno de España que convoquen o MIR extraordinario que solicitan as Comunidades, o aumento das prazas de formación MIR e que se senten a negociar cos profesionais.

Ratificou o compromiso do Goberno galego con Ourense coas obras de reformas nos hospitais de Ourense e de Verín; a posta en marcha da residencia pública, financiada pola Fundación Amancio Ortega; o Centro de Excelencia en Ciberseguridade; o Cento Integral de Saúde; o IES de Pereiro de Aguiar ou o centro integral do Lume, en Toén.

E lamentou que Democracia Ourensana predique unha cousa no Parlamento e faga a contraria no concello de Ourense: “Non sei se pedir investimentos nesta Cámara para despois bloquealos na cidade é unha boa estratexia electoral, pero sei que é un pésimo negocio para Ourense”.

Apuntou, tamén, aos diferentes frontes que ten abertos o PSdeG ao longo do territorio. E mencionou a situación de “caos absoluto” no que se atopan as agrupacións municipais de Santiago de Compostela, Ourense, Barbadás, Lugo e máis de 15 concellos paralizados na provincia de Pontevedra.

Para Alberto Pazos, “o epicentro da desfeita socialista” é a provincia de Lugo, onde expulsaron ao ex presidente da Deputación do partido e do grupo provincial por “comportamentos indignos”, pero, ao mesmo tempo, o manteñen cos seus votos na Alcaldía de Monforte e lle soben o salario.

Sinalou a hipocrisía do secretario xeral dos socialistas galegos, ao recordar que, durante o Debate de política xeral, dicía que a igualdade non se negociaba, cando non atende as denuncias de comportamento machistas que lle trasladan empregadas do seu partido.

Afeou a falta de compromiso do Goberno central coa vivenda en Galicia: “Ducia de cámaras e de fotos, catro roldas de prensa e nin un só euro de fondos estatais propios”.

O portavoz do Grupo popular aproveitou para salientar “a submisión a Ferraz” do voceiro do PSdeG e o boicot ao avance de Galicia. Así, incidiu no “listado de agravios do Goberno”: o traspaso da AP-9, o “lamentable” estado das estradas e do servizo ferroviario, o bloqueo á creación de 2.500 empregos e ao plan de choque para a dependencia ou á desconexión eléctrica industrial de toda a provincia de Lugo.

Referiuse á oposición “contumaz e recorrente” do BNG a todos e cada un dos avances que ten experimentado a sociedade galega e puxo como exemplos: Alcoa, a AP-9, o Xacobeo, as casas niño, as casas do maior, as rebaixas fiscais ou a ampliación de Stellantis.

Dixo que os galegos non comparten “esa permanente obsesión do BNG de debuxar unha Galicia triste, gris e dramaticamente pontoniana”.

“Estamos acostumados a que nos dean leccións de dependencia xudicial os mesmos que critican as decisión xudiciais; a que falen de respecto á soberanía dos pobos os mesmos que negan a soberanía do pobo venezolano; a que nos dean leccións sobre xenocidio os que bloquean declaracións institucionais condenando o maior xenocidio da historia; e a que nos dean leccións de humanidade os que bloquean unha declaración institucional en defensa das mulleres iranias”, indicou.

“Contra á guerra estamos todos”, insistiu Pazos, para engadir que “algúns, ademais de dicir non á guerra, tamén, nos atrevemos a dicir si a paz”. Neste punto, fixo referencia á situación en Irán, Gaza, Ucraína e no Sáhara Occidental.

Criticou o “comportamento desleal” do BNG nos momentos de dificultades, e puxo como exemplo a crise financeira, a pandemia ou os pélets, nos que tentaron manipular á opinión pública.

Aproveitou para incidir en que, fronte aos grupos da oposición que sementan alarma e espallan enganos, hai sempre un Goberno do PPdeG ao carón dos galegos.

Para finalizar, puxo en valor o modelo de xestión do presidente Rueda e destacou o récord de emprego industrial, o impulso a unha fiscalidade xusta, a redución da débeda, o aumento do autogoberno, a mellora dos servizos públicos e a modernización da frota e do agro. Asemade, salientou a aposta pola vivenda pública, por máis residencias de maiores e máis escolas infantís, unha educación pública accesible e de calidade, e terapias e tratamentos de vangarda.

E rematou remarcando a importancia de evitar a polarización e a intolerancia.

O Parlamento aprobou, hoxe, por unanimidade a iniciativa do PPdeG na que se insta ao Goberno central a revisar o Programa oficial da especialidade de Radiofísica hospitalaria, co fin de adaptalo á realidade tecnolóxica e científica e á normativa actual.

Tal e como salientou a portavoz de Sanidade do Grupo Popular, Encarna Amigo, trátase dun “piar fundamental na medicina moderna”, clave tanto no diagnóstico como no tratamento de múltiples enfermidades, especialmente, no cancro, ao garantir que cada procedemento se realice coa máxima precisión, eficacia e seguridade.

Asemade, pediu que a Administración central, en colaboración coa Comisión nacional de Radiofísica Hospitalaria, así como tamén cos colexios profesionais e coas sociedades científicas, actualice as titulacións universitarias de acceso á especialidade; garantindo a súa adecuación aos estándares europeos. “Estámonos aliñando co que xa se esixe na nosa contorna europea”, dixo Encarna Amigo.

A proposición non de lei do PPdeG inclúe, tamén, a petición de ampliar a duración da residencia ata os catro anos e a incorporación de forma explícita as tecnoloxías e procedementos que xa forman parte de práctica clínica diaria

Por outra banda, a deputada popular fixo fincapé na importancia de fomentar programas de formación continua e accesible para os profesionais no sistema sanitario galego, co fin de garantir a súa capacitación fronte aos constantes avances tecnolóxicos. Nesta liña, explicou que as técnicas son cada vez máis complexas, máis especializadas e máis esixentes.

Coincidindo co Día mundial da saúde, Encarna Amigo apuntou que “o que queremos é máis formación para garantir unha mellor saúde para todos”. Esta iniciativa, engadiu, reflicte a aposta do PPdeG por un sistema sanitario “máis seguro, máis moderno e mellor preparado”.

GALICIA, Á VANGARDA DA SANIDADE PÚBLICA
Asemade, remarcou que a incorporación da protonterapia marcará un antes e un despois no tratamento do cancro. “Galicia vai estar á vangarda”, dixo ao referirse á posta en marcha do centro de protonterapia –prevista entre finais deste ano e principios do que vén-, o cal converterá á nosa Comunidade nun referente na sanidade pública en España, tanto no tratamento como na investigación oncolóxica.

“Vai supoñer un salto enorme na calidade do tratamento, con maior precisión e menos efectos secundarios para os doentes”, finalizou.

O PPdeG enxalza o compromiso do Goberno galego co tecido veciñal, a través da nova convocatoria de axudas que ascende a 3M€.

Neste senso, as deputadas autonómicas, Dolores Hermelo e Patricia García, mantiveron un encontro coa directiva da Asociación Veciñal de Gandón, en Cangas, para trasladarlles a nova liña de subvencións destinada ás asociacións veciñais, confederación, federacións ou unións de asociacións de veciños, así como tamén ás comunidades de augas e asociacións de mulleres rurais.

Tal e como destacaron, estas achegas supoñen un soporte económico importante, xa que lles permite financiar actuacións de mellora, reforma e ampliación dos seus locais sociais, así como tamén a adquisición do equipamento necesario para o seu funcionamento diario e a organización de actividades comunitarias.

Durante o encontro, puideron coñecer as iniciativas que a entidade está a desenvolver e polas que a puxeron como “exemplo de xestión proactiva”. Así, Dolores Hermelo fixo fincapé no papel «fundamental e insubstituíble» que xogan este tipo de entidades na vertebración do territorio: “Asociacións como a de Gandón son o verdadeiro corazón das nosas parroquias, xa que realizan un traballo impagable na dinamización social e cultural dos barrios e son esenciais para garantir a prestación de certos servizos de proximidade”. “E –engadiu- actúan como un fío condutor que mantén vivas e cohesionadas as nosas zonas rurais”.

Ao remate da visita, ambas as dúas deputadas puxeron en valor que estas achegas demostran con feitos o “firme compromiso e apoio incondicional” do PPdeG cara ao tecido asociativo e veciñal. “Nós cremos nas asociacións como un poderoso instrumento de transformación real dos nosos barrios e parroquias”, subliñou Patricia García, quen salientou os recursos para que as entidades sigan medrando e mellorando a vida da veciñanza.

O PPdeG puxo en valor os máis de 1,5M€ que o Goberno galego destina, este 2026, á conservación da contorna paisaxística e á loita contra a erosión de viñedos na Ribeira Sacra.

Durante unha visita á sede do Consello Regulador da Denominación de Orixe Protexida Ribeira Sacra, dos deputados autonómicos, Katy Varela, Raquel Arias e Juan Casares, salientaron a importancia desta achega, xa que, entre os seus obxectivos, está o de preservar todo este ámbito e evitar a desaparición dos socalcos de pedra. Segundo dixo Katy Varela, este tipo de cultivo da vide, tradicional da Ribeira Sacra, contribúe de forma moi significativa á singularidade paisaxística desta zona que aspira a ser declarada Patrimonio Mundial da UNESCO.

UNHA ACHEGA DE MÁIS DE 1,5M€, EN 2026
Ao abeiro desta liña de axudas, o Goberno galego pon a disposición dos viticultores, de xeito individualizado e como máximo, unha achega de 2.000€ por hectárea para o sistema de cultivo tipo 1, zonas con socalcos de pedra e onde o traballo se realiza de forma non mecanizada; e de 1.000€ por hectárea para o tipo 2, o que se leva a cabo de forma mecanizada.

En 2025, resultaron beneficiarios 794 viticultores e unha superficie de arredor de 810 hectáreas, das cales 519 hectáreas correspondentes co sistema de cultivo tipo 1, e 291 hectáreas co de tipo 2.

“Esta liña de axudas, xunto con outras como as de promoción da calidade dos viños ou as de reestruturación de viñedos, demostran a sensibilidade da Xunta co sector vitivinícola galego, que achega o 1,4% do PIB da nosa Comunidade”, subliñou Juan Casares. E é que, tal e como explicou, este sector xera un Valor Engadido Bruto duns 890 millóns de euros anuais e mantén o 1,5% do emprego, contabilizando tanto os postos de traballo directos coma os indirectos.

MÁIS DE 1.200 HECTÁREAS DE CULTIVO EN TERRAZAS
Esta denominación de orixe é unha das cinco protexidas que posúe Galicia. Na actualidade, o Consello Regulador da Denominación de Orixe Protexida Ribeira Sacra ampara unha superficie produtiva dunhas 1.253 hectáreas -das cales arredor de 900 practican o sistema de cultivo en terrazas ou socalcos-, correspondentes a preto de 1.878 viticultores e 93 adegas certificadas. Na vendima de 2025, este selo de calidade recolleu algo máis de 4,6 millóns de quilogramos de uva, o que amosa a súa posición destacada no sector.

Segundo salientou Raquel Arias, o sector vitivinícola é “un motor económico fundamental para o desenvolvemento do territorio da Ribeira Sacra”. Unha actividade –engadiu- que non só favorece o asentamento da poboación, senón que “abre expectativas de futuro para as xeracións máis novas”.

No encontro, celebrado en Monforte, os parlamentarios populares aproveitaron para abordar a situación actual e recoller as súas demandas desta entidade que, tal e como apuntaron os deputados do PPdeG, “velan pola calidade do produto e poñen en valor todo o territorio”.